Tej kev tu siab yav dhau los yuav ua rau peb muaj tej kev ntshai nyob rau lub neej tamsim, ua rau peb qaug zog tsis kam mus rau tom hauv ntej. Tsuas yog los ntawm Vajtswv lub hwjchim xwb, peb thiaj tiv dhau thiab saj tau lub hwjchim ywj pheej. Qhov tseem ceeb ntawm no yog peb coj tus cwjpwm zoo li cas rau txhua zaug uas peb ntsib tej kev ntshai ntawd?
Hnub no, yog hnub 03/10/2024, thov caw sawv daws nrog kawm Vajtswv Txojlus ua ke nrog tus qhia Lina Johnson dhau ntawm Zaj kawm VAJTSWV TXOJLUS PAB KOV YEEJ KEV NTSHAI.
“Nej yuav paub qhov tseeb, thiab qhov tseeb ntawd yuav tso nej dim.” (Yauhas 8:32)
Muaj ib zaug kuv mus cuag kws kho mob kaus niav thiab raug lawv cem, kuv muaj kev txaj muag thiab hnov ntshai heev thaum ntsib lawv. Tsis tag li xwb, thaum hnov ib tug twg qw, kuv yuav khiav nkaum, thiab hnov mob kuv ib ce tag nrho. Kuv pheej ua li no tau ntau lub xyoo. Mus txog rau muaj ib hnub, kuv hais rau kuv tus kheej tias. “Txaus lawm!” Thaum ntawd kuv tab tom zaum hauv kws tshuaj lub qhov chaw kuaj mob. Kuv tus tub nrog tus kws tshuaj tawm mus sab nraum thaij duab X-quang lawm. Txawm yog kuv tsis yog tus mob los, kuv yeej tseem zaum ntawd nrog kev ntshai, qaug zog vim tej uas yav dhau los kuv tau raug. Tamsim ntawd kuv thiaj xa xov rau ob peb tug phooj ywg, nug lawv saib puas muaj nqe Vajluskub twg pab kom kuv kov yeej txoj kev ntshai no.
Raws li koj pom, kuv twb tau lwm tus txhawb zog, kuv twb zam txim rau lawv lawm, tiamsis kuv paub tias kuv cheem tsum Vajtswv txoj kev kho zoo dua tshiab. Kuv cheem tsum kev ywj pheej. Kuv cheem tsum Vajluskub – uas yog Vajtswv tej lus. Tom qab ntawd kuv tej phooj ywg tau xa xov rau kuv, xa tej nqe Vajluskub txhawb kuv zog. Muaj ib tug phooj ywg nws xa Loos tshooj 8 rau kuv. Yog, tag nrho tshooj 8. Kuv zaum, saib kuv lub xov tooj thiab nyeem tag nrho tshooj no. Kuv xav, “Dab tsi? Ntawm no yog ntu Vajluskub hais txog qhov uas tau tso dim ntawm txoj kev txhaum ne!” Tiamsis kuv ntseeg tus phooj ywg no, kuv thov Vajtswv thiab nyeem mus nyeem los tshooj no. Txhua zaug kuv nyeem, kuv ob lub qhov yim qhib loj tuaj. Vajtswv tsis yog tsuas xav tso kuv dim ntawm tej kev txhaum uas kuv tau ua yuam kev xwb tiamsis tseem xav tso kuv dim ntawm tej kev txhaum uas lwm tus tau ua rau kuv thiab. Vajtswv kuj xav ua qhov no rau koj thiab. Cia li Nyeem Loos 8:5-6:
“Tus uas ua lub neej raws li lub siab qub qhia, tus ntawd yeej ua raws li nws lub siab qub nyiam, tiamsis tus uas ua nws lub neej raws li Vaj Ntsujplig qhia, tus ntawd yeej ua raws li Vaj Ntsujplig lub siab nyiam. Tus uas ua raws li nws lub siab qub qhia, tus ntawd yuav raug kev ploj kev tuag, tiamsis tus uas ua raws li Vaj Ntsujplig qhia, tus ntawd yuav tau txojsia thiab kev kaj siab”
Tus cwjpwm txhaum xav kom kuv tuav tej kev mob no cia. Nws xav tswj kuv. Tiamsis thaum kuv thov Vajtswv rau tej qhov kev tu siab ntawd kom yuav tau tawm mus thiab thov Vajtswv tus ntsujplig kho zoo kuv lub siab los ntawm txoj sia thiab kev kaj siab, ces Vajtswv twb pab kuv!
Kom kov yeej txoj kev ntshai, kuv yuav tsum mus rau hauv Vajtswv tej lus, nyeem mus, nyeem los, xav txog tej lus ntawd. Kuv pib nqa ib phau Vajluskub nrog txhua zaug uas mus ntsib kws tshuaj. Thaum hnov ntshai, kuv rov qab nyeem Loos tshooj 8. Yog tias kuv ntsib ib ob nqe Vajluskub nws tshoov kuv lub hlwb, kuv nyeem mus nyeem los txog thaum uas kuv nrhiav tau kev kaj siab. Tsis ntev tom qab ntawd, kuv tsis nqa Vajluskub nrog ntxiv lawm, vim kuv paub tias kuv twb nco Vajtswv tej lus lawm, tsis yog tsuas nco rau hauv taubhau xwb, tiamsis tseem zais rau hauv siab, tias kuv twb tau ywj pheej lawm! Tej kev ntshai twb ploj mus! Vajtswv txojlus tau hloov pauv kuv, vim Vajluskub nyob hauv Yauhas 8:32 sau tseg tias:
“Nej yuav paub qhov tseeb, thiab qhov tseeb yuav tso nej dim”
Kuv twb tau ywj phej thaum kuv pom qhov no, thiab thaum no kuv nkag siab txog tej uas Vajluskub sau nyob hauv Loos 8:38-39:
“Rau qhov kuv paub tseeb hais tias
tsis muaj ib yam dabtsi yuav cais tau
peb ntawm Vajtswv txojkev hlub, tsis
hais tuag lossis kev ua neej nyob, cov
timtswv lossis cov uas muaj hwjchim kav saum nruab ntug, nimno lossis yav tom ntej, saum nruab ntug lossis hauv nruab tivtxwv, lossis ib puas tsav yam uas yog Vajtswv tsim yeej tsis muaj ib yam dabtsi cais tau peb ntawm Vajtswv txojkev hlub uas nws pub Yexus Khetos uas yog peb tus Tswv los tuag theej peb lub txhoj.”
Yog tias koj tab tom nyob hauv txoj kev mob siab lossis ntshai, cia li nyeem thiab xav txog Loos tshooj 8. Thov Vajtswv coj koj kev rau tej lus cog tseg no txog thaum uas koj tuav ruaj ruaj kom txais tau kev ywj pheej.
Thov caw nrog kuv peb thov Vajtswv ua ke:
Tus Tswv, yeebncuab xav muab peb lub neej tuav cia hauv txoj kev txhawj ntshai thiab tu siab, tiamsis kuv yuav ntseeg koj lub hwjchim hauv koj tej lus, kuv yuav tau kho zoo thiab tau ywj pheej dim ntawm tej voj hluas yav dhau los. Thov Vajtswv pab kom kuv nyiam Koj tej lus thiab saj tau txoj kev hloov pauv zoo kawg nkaus thaum ua lub neej raws li tej lus ntawd. Kuv thov hauv Tswv Yexus Khetos lub npe. Amees.
Cov kwv tij, txoj kev ntshai yuav tshwmsim hauv peb lub neej, tiamsis ntawm no tsis yog yam uas ua rau peb thaub qab vim paub tias tus nyob hauv peb loj dua txhua yam hauv ntiajteb no. Puas muaj txoj kev ntshai twg loj txog qib ua rau koj ntsia tsis pom Vajtswv txoj kev tso peb dim? Cia li nrhiav Vajtswv thiab vam khom rau Vajtswv tej lus thaum koj ntshai, nco ntsoov tias yeej tsis muaj dabtsi yuav cais tau peb tawm ntawm Vajtswv txoj kev hlub uas tseg rau koj.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply