Npaj tej khoom plig, kho vaj kho tsev, koom pab kev hu nkauj,… tag nrho tej haujlwm no ua rau koob tsheej Tswv Yexus yug lom zem thiab zoo siab tshaj. Tiamsis, nyob rau tej kev npaj ntawd, peb txhua tus kuj txhob hnov qab tus Tswv.
Hnub no, yog hnub 17/12/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Andrew Knox dhau ntawm Zaj kawm TUS METUB DUA TWG LAWM
“Nej sim mloog saib, kuv sawv sab qhovrooj nraud thiab khob; yog leejtwg hnov kuv khob thiab qhib qhovrooj rau kuv, kuv yuav los hauv tus ntawd lub tsev. Kuv yuav nrog nws noj mov thiab nws yuav nrog kuv noj mov (Tshwmsim 3:20).
Ob peb thiv ua ntej yuav txog hnub Tswv Yexus los yug, kuv tsev neeg pib kho tej nyuag nkuaj tsiaj, tej nyuag dab pub zaub rau tsiaj hauv kuv lub tsev. Peb maj mam ua tib zoo muab txhua yam coj los pib tso kom muaj chaw: cov tub txawg, cov yug yaj, Malis, Yauxej, nrog rau tej tsiaj. Tiamsis yam tseem ceeb dua ntais yog tus -Metub Yexus, ho tsis pom nyob qhov twg. Peb twb tshawb hauv tej khoom ntawd tas, txhua lub thawv, thiab tej ceg kaum tsev saum nthab tib si. Tswv Yexus – tus tseem ceeb ntawm koob tsheej ho poob dua twg lawm hauv peb tej khoom coj los tsab zam ntawd.
Thaum tabtom nkees vim tej no, kuv nres thiab ua zoo xav, “Puas yog kuv lub siab tsis muaj Tswv Yexus rau txhua lub caij txog koob tsheej Tswv Yexus los yug?” Tswv Yexus nyob qhov twg rau txhua hnub uas kuv maj nroos rau txhua txoj haujlwm hauv lub koob tsheej? Yuav khoom plig, tu vaj tu tsev, npaj pluas noj pluas haus. Ntawd yog tej uas ib txwm pom nyob rau lub koob tsheej, tiamsis tag nrho tej ntawd nws kuj tsis muaj dab tsi tseem ceeb thaum uas xav txog Vajtswv txoj kev hlub tau pub Tswv Yexus los rau hauv lub ntiajteb cawm peb.
Nyob rau hauv koob tsheej Tswv Yexus yug, pauv qhov uas xav txog txoj kev hlub ntawd, coob tug lawv tsuas saib sab nraud. Tshuav ntau tus, koob tsheej Tswv Yexus yug kuj tsis yog ib lub koob tsheej muaj kev zoo siab tiag. Vim nyob rau qhov twg ntawd, yeej tseem muaj kev tsis sib haum nyob hauv tsev neeg, lossis yeej tseem ntsib teeb meem txog nyiaj txiag, yeej tseem pom tias yus nyob ib leeg thaum xav txog yus tej neeg txheeb ze tau tag sim neej lawm. tag nrho tej ntawd ua rau lawv txoj kev zoo siab tsis muaj txaus nkaus.
Yog peb tsis tig peb lub qhov muag mus rau ntawm Tswv Yexus, lossis peb ua “poob qab” Tswv Yexus lawm rau tej hnub koob tsheej nco txog Tswv Yexus los yug, ces tej kev khwv tsis muaj sijhawm khom hauv lub neej no yuav txeeb tag peb tus kheej. Tswv Yexus txoj kev los yug tsuas yog ib txoj kev xav dhau xwb tsis yog yam uas tseem ceeb. Thaum hnov xov tus Cawm Seej tau los yug, cov tub txawg lawv tau zoo siab pehawm Nws thiab muab tej khoom muaj nqis fij rau Nws. tshuav cov yug yaj thaum lawv ntsib Tswv Yexus lawv rov qab mus ua rau Nws lub koob npe nrov thiab qhia txoj xov zoo uas lawv tau pom. Tshuav Yexus niam, tseem ua tau yam uas tob dua: “Malis khaws tej Ius ntawd thiab xav ntsoov rau nruab siab (Lukas 2:19).
Los txog thaum no, kuv yeej tseem nrhiav tsis tau daim duab tus metub Yexus los tso. Thiab peb twb siv dua ib cov khoom tshiab lawm, muaj txaus txhua yam, tseem ceeb tshaj yog muaj Tswv Yexus. Txhua zaug saib hauv lub dab zaub, kuv cim civ nug tus kheej, “Tswv Yexus puas tab tom tsis muaj chaw nyob hauv kuv lub siab?” Lo lus nug no ntuas kuv tias leej twg thiaj yog tus tseem ceeb nyob rau hauv lub caij koob tsheej Tswv Yexus los yug.
Vajtswv tab tom nqua hu kom koj tsom ntsoov mus rau ntawm Nws – “Ema-nu-es, tus Tswv nrog nraim peb nyob.” Cia li zoo siab vim Leej Txiv saum ntuj twb pub ib qhov khoom plig rau peb los yug thiab tab tom tshoov peb txhua tus lub siab txais yuav qhov khoom plig tawd. Txhob cia tej kev txhawj ua rau peb tsis pehawm Vajtswv, vim yog li no, peb lub siab thiaj kho siab khuav thaum tsis muaj Tswv Yexus nyob hauv, tas peb txais koob tsheej Tswv Yexus yug los ntawm txojsia sab ntsujplig qhuav qhawv yeeb tas.
“Nej sim mloog saib, kuv sawv sab qhovrooj nraud thiab khob; yog leejtwg hnov kuv khob thiab qhib qhovrooj rau kuv, kuv yuav los hauv tus ntawd lub tsev. Kuv yuav nrog nws noj mov thiab nws yuav nrog kuv noj mov (Tshwmsim 3:20).
Hnub no, Vajtswv tab tom khob peb txhua tus lub qhov rooj siab thiab caw koj los cuag Nws.
Thov caw nrog kuv peb thov Vajtswv ua ke:
Tus Tswv, thov pab kom kuv paub muab tag nrho kuv lub neej fij rau koj, cia koj ua tus Tswv, thiab yog tus nyob nruab nrab. Thov kom koj yog tus uas kuv yuav tig kuv lub siab rau tej hnub uas ua koob tsheej nco txog koj hnub yug. Thov pab kom kuv nrhiav tau koj txoj kev hlub loj uas koj tseg rau kuv. Kuv thov hauv Tswv Yexus Khetos lub npe. Amees.
Cov kwv tij txhua tus, Emanu-es, tus Cawm Seej twb los rau hauv ntiajteb coj txoj kev zoo siab thiab kev cawm dim los. tiamsis puas muaj zaum twg nyob rau hauv lub koob tsheej ntawd, peb ua tus metub Yexus yuam kev nyob hauv peb lub siab lawm? Puas muaj zaum twg, nyob hauv tej homphiaj, tej khoom plig thiab tej kev zoo siab, peb ho hnov qab qhov uas vim li cas peb ua koob tsheej Tswv Yexus Yug lawm? txhob cia tej kev txhawj, tej kev tsis khoom cab koj khiav deb Vajtswv. Nyob rau lub caij ua koob tsheej nco txog Tswv Yexus los yug no, cia koj lub siab tau saj Nws txoj kev zoo siab thiab Nws txoj kev hlub loj, ib yam li teb Nws lub suab hu”Kuv nyob sab qhov rooj nraud khob”.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply