Yeej muaj tej kev ntshaw thaum koobtsheej Tswv Yexus los txog – Peb ntshaw kom muaj ib lub koob tsheej zoo nyob hauv Pawg Ntseeg, lub sijhawm tau nrog tsev neeg nyob ua ke, lossis tej qhov khoom plig zoo ib tug tseg rau ib tug. Tiamsis muaj ntau zaug, tej kev cia siab ntawd ho dhau los ua lub nra nyhav, ua rau peb yooj yim tag kev cia siab, yog tias txhua yam nws tsis tshwmsim los raws li lub siab xav. Tiamsis thaum nyob rau txhua tsav yam tawg ci ntsa iab ntawm lub koob tsheej Tswv Yexus Yug tsis paub peb puas ua poob yam uas muaj nqis tshaj?
Hnub no, yog hnub 18/12/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Missey Butler dhau ntawm Zaj kawm KEV NTSHAW NTAWM KOOBTSHEEJ TSWV YEXUS YUG
“Tseeb tiag, tus ntseeg uas txaus siab rau tej uas nws muaj lawm thiaj yog tus npluanuj tiag” (I Timautes 6:6).
“Hnub qub ci puv ntuj, Vajntxwv ntuj los nrhiav tib neeg, Vajntxwv twb yog tus Cawm Seej rau tib neeg!”
Tej suab nkauj no yog lub ntsiab lus ntawm ib zaj nkauj koob tsheej Tswv Yexus yug muaj nqis, hais txog Tswv Yexus txoj kev los rau hauv ntiajteb cawm peb txhua tus. Tiamsis, txawm yog lub ntiajteb no nws yuav tau npaj kom zoo muaj teeb cig ntsais liab vog nrog tej qhov khoom plig zoo rau lub koob tsheej los, tag nrho tej no yeej piv tsis tau rau lub hwjchim uas tau tshwmsim tau ntau tiam dhau los: Ib tug metub tau yug los rau hauv lub dab zaub, lub ntuj puv npo hnub qub rau ib hmo txias zias. Ib tug metub tau yug los rau peb, ib tug metub tau muab pub rau peb. Yog ib qhov khoom plig muaj nqis tau muab pub rau tag nrho tib neeg ntiajteb.
Thaum kuv zaum tos teeb liab nrog tej tsheb coob coob hauv lub koob tsheej Tswv Yexus yug, kuv pib xav txog tej “kev ntshaw”. Kuv pom tias, nyob rau lub koob tsheej Tswv Yexus yug xyoo no, peb txhua tus ib leeg xav ua kom haum ib leeg siab, kom ua haum yus tej phoojywg thiab tsev neeg tej kev ntshaw. Kuv cim civ nug tias… “Puas muaj zaum twg peb tsuas xav ntsoov txog yus txoj kev ntshaw xwb peb ua poob lub ntsiab lus ntawm lub koob tsheej tiag lawm?”
Txawm yuav siv zog npaum cas los, peb yeej mus tsis tiav lub koobtsheej yog tias peb tsis muaj ib qhov kev ntshaw twg. Leejtwg los yeej muaj ib qhov kev ntshaw ntawm tus kheej. Tiamsis ua li tshuav qhov tseeb ne: Txoj kev ntseeg nrog kev txaus siab nws yog yam muaj nqis loj. Vim thaum peb yug los yeej nqa tsis tau dabtsi nrog peb los ces rov qab mus yeej nqa tsis tau dabtsi nrog peb mus thiab” Ua li yog li cas?
Peb yeej paub meej tias thaum peb mus, peb yeej nqa tsis tau ib yam dabtsi nyob hauv lub ntiajteb no nrog peb. Tiamsis pheej maj nroos siv zog ua tas nrho zog los khaws cia tej yam uas yuav dua mus. Ua li vim li cas tiag? Peb ua li no tsuas yog kom peb zoo siab nyob rau lub koob tsheej Tswv Yexus yug no ib vuag xwb los? Puas yog peb twb hnov qab peb lub homphiaj tiag ntawm txhua tes haujlwm uas yus tab tom ua lawm los? Kuv xav tias twb txog lub sijhawm sim ua ib yam dabtsi twg ntawd txawv nyob rau xyoo no.
Kheev lam peb tsis cia siab tos ntau… lossis zoo dua, kheev lam peb tso tau tej kev ntshaw ntawd tseg! Tseeb tiag, tsis tos ib yam dabtsi! Thaum tsis muab tej no sib nias, peb yuav tsis muaj hnub ua rau tus kheej tas kev cia siab, lossis hnov tias yus poob siab. Mloog cuag li nws yog kev puas yog? Thiab peb hnov ywj pheej dua thaum uas tsom ntsoov rau lub ntsiab tiag ntawm koob tsheej Tswv Yexus yug. Cia li koom zoo siab rau tus Cawm Seej tau hlub peb los yug ua neeg cawm peb!
Thov caw nrog kuv peb thov Vajtswv ua ke:
Leej Txiv uas muaj kev hlub, thov pab kom kuv tiv dhau txoj kev vam khom rau tus kheej thiab lwm tus. Thov rhuav tshem daim ntaub dag ntxias tawm ntawm kuv qhov muag thiab pab kom kuv ntsia pom txhua yam raws li Koj txoj kev tias: qhov kaj hauv lub ntiajteb twb los rau kuv. Koj yog kuv tus Cawm Seej Tswv Yexus thiab Koj yog tus Tswv ntawm lub koob tsheej no. Kuv thov hauv Tswv Yexus Khetos lub npe. Amees.
Cov kwv tij txhua tus, nyob rau hauv lub koob tsheej no, thov kom tus dua ci ntawm lub dab zaub yuav ci rau peb txhua tus lub siab, ntuas kom peb nco ntsoov txog lub ntsiab tiag ntawm koob tsheej Tswv Yexus yug. Tsis yog tej kev cia siab lossis tej khoom plig, tiamsis yog kev hlub thiab kev cia siab uas Cawm Seej Tswv Yexus tau los rau hauv ntiajteb. Koj puas pom qhov no? koom siab tig rov qab los thiab saib taus qhov khoom plig muaj nqis ntawd.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply