Gơs dô dớ ne ăn neh đọk git la “dilah bol he ò bơto oh kòn he di đăl git Yàng mơ lot jat Yàng, gen dunnia rơp bơto bol khai bơta gơplớ wơl”. Ngan la be hớ, bol he găm kis tơm pah rài mơ Satan găm lơh oă bơta nàng hoài bol he, nưk la ală cau pơnu ơruh, dô ple bơh Yang. Bơta bơto oh kòn he mhăr git Yang lik gơs păl lơh mhăr mơ kwơ ngăn. Bol he rơp lơh bơta do be lơi tơm rài kis kơp ngai he di?
Ngai do, ngai 06/06/2025, rơndap bơta hòi dan kòp ngai hòi jà ồng mọ oh mi kơlôi sơnơng Jơnau Yàng bal bơh tơnggume: HÒI DĂN BĂL MƠ KÒN
Sră Goh: “Mơ bơh di tŭ mê gam dềt mê neh git Sră Goh rgơi lơh mê in gơlik gơs jak chài tồ geh dong klàs bơh bơta dòn tòm Yàng Krist Jesu.”( II Timôthe 3:15)
Tơm dô măng ne tơm tú jơ hòi dăn hìu nhắ di, kon ur bol he tú hớ khai 7 sơnam, nisơna khai lùp:” Ơ mè, măng do he hòi dăn pha is dô êt di sơl? Ăn neh yăl “ Di sơl ơ kòn, kòn kờn hòi dăn be lơi’ Kon ur đơs “ bol he rgơi nhơm mát lài dô êt phuk mơ hòi dăn is mơ Yàng lài mơ tú he hòi dăn dơng di sơl? Ăn neh nhó mơ lơh nền di sơl. Lồi dô êt phuk, kon sơn tờm hòi dăn dờng băl mơ mè bẹp “ Ơ Yang, kon ưn ngai Yang ai kon in dô ngai niam ngăn. Ưn ngai Yang bơh plai ù, hơ đăng trồ mơ dà lềng. Kon ưn ngai Yang neh crơng gơs jơh ală phan. Kon ưn ngai Yang neh crơng gơs jơi phăn win sa sà mak tài bơh sà mak ò niam gơwet mơ bol kon. Dăn Yang ai lơngai cau rbah in nàng bol khai geh phan sa. Bơyô Sarah kon di tơm ngai or khai ơm tơm bơta kọp ji gen tàng păl rê lài tơm hìu, kon ưn ngai Yang neh sơm bời bơyô kon di gen ngai do Sarah tus hok wơl. Dăn Yang ai lơngai bep kon in tơm broă lơh…”
Ăn neh nhó ờm tơm nus bulah ò git kon gơs jơnau drô dơp lơi kờn đơs is mơ Yang, mơya nus ăn hon chờ tú bàn kon kờn bơh bơr mơ Yang. Tú hòi dăn bol he di niam ngan bơh gơs kon là bơyô hòi dăn băl mơ mè bèp
Jơnau Yang di bơto tơng kah Jơnau
“Bơto tĕ kòn dềt in dô nơm gùng di khai pal jat;bulah tŭ khai neh kra, kung ò tŭ lơi sang lòi gơ.”(Pơnđik 22:6)
Digơlan kung gơs dô êt nắ kơlôi sơ nơng la, kơnòm là cau mòm să ò rgơi git bơta lơi. Mơya, ală bơta sền swì neh đơs la sơ nam bơh 4-14 la sơ nam buơn rlau jơh nàng dợp geh jơnau song.
Bơh Timôthe mơ bơh di tŭ ồng gam dềt ồng neh git Sră Goh rgơi lơh ồng in gơlik gơs jak chài tồ geh dong klàs bơh bơta dòn tòm Yàng Krist Jesu. (II Timôthe 3:15-15), mơ cau neh dong kơl Timôthe mhăr dơp bơta dong klas Yang di la mè yo mơ mè ồng di ( IITimôThe 1: 5)
Kung gơs dô êt nă tơm bol he kơlôi la cau bơtê kơnòm la dô bơta gơ rê mơ Hiu Jum Goh, gơ rê mơ mpool lam bộ kơnom, he lam kon tus hiu jum kơp poh la tơl rau. Mơya ò di là be hớ! Cau bơtê kơnòm, hala đơs nàng wơng rlau la dong kơl kơnòm gơ lik gơs be Yang Jesu, là gơnoar broă kợp nắ cau lơh me bèp, kợp hìu nhắ. Mơ bơta hớ ò di là broă lơh dô poh dô dớ, mơ la 24/7.
Gơs oă pơnah nàng he bơto kon dệt in dợp git Yang mơ lot jat Yang, dô pơnah tơm jơh ală pơnah kwow mơ bol he rgơi lơh kợp ngai băl mơ kon la hòi dăn băl mơ kon. Bơta hòi dăn gơwet kon in la dô nơm broă mơ oă cau lơh mè bèp sùm lơh. Tơm gônar la cau lơh mè, ăn bàn să tờm he he geh lơngai ngan tú ò di mìng git hòi dăn kon in, mơ kung geh hòi dăn băl mơ kon. Tú jơ hòi dăn băl mơ kon ur clau he di gơs tơm gơl jat sơ nam kon di.
Ur clau he di gơs tú jơ hòi dăn băl kợp ngai, bơh ală tú tơ ngai kòn găm ơm tơm klung mè, gen tus di tú mắ ằn kon tơm tê, kòn mìng iat mơ kơnô mè bèp đok Sră Goh mơ hòi dăn băl. Tú kòn rhơi dờng dô êt tai, gen kòn gùi băl gen tàng “ Amen”tú bol he pơn dit bơta hòi dăn.
Tú kòn găm tơm sơ nam hok mẫu giáo, tồ lời tú jơ nàng pơjum is hìu nhắ di ò gơ lơh rô ran kòn in, gen bol he lơh tơl jơh ală bơta, bơh yăl yau tus lơh bơta ràng tơlik wơl ală bơta yăl yau tơm Sră Goh, bol he lơh băl jơh ală bơta hớ. Tú kòn rgơi đok Sră rau, gen bol he đok Sră Goh băl mơ kòn, yăl tơlik bơta ưn ngai Yang tơm dô ngai mơ hòi dăn băl băl. Gơs tú nàng sôr bơtrut kòn tơm bơta hòi dăn, bol he lơh oă mpăng sră hòi dăn mơ kơp nă rgơi sak pe nơm mpăng sră jat nus he di nàng hòi dăn ala gơwet mơ ală pơnah păl càng pha is hìu nhắ di, hìu jum goh, gơp bơyô hala hòi dăn ala ală cau tơm lơgar ò rgơi iat mơ kơnô bơh Jơnau Niam.
Bơta mơ bol he hok git la bơh di tú jơ lơi tơm ală ngai kòn găm kơnòm să sơn tờm git Yang la Bơtau iat mơ dơp jơnau he hòi dăn. Kòn git joi Yang, gơn kơnờm Yang, tú tịp bơta bol glar. Gơs tú kòn găm 4-5 sơ nam, bơta sơn rợp kòn lơh tú git ăn neh kop duh là tus ơm di gah, ai tê ơn hơ đăng ăn mơ hòi dăn mơ Yang dăn Yang sơm bời, be ală bơta bol he găm lơh sùm tú kòn tip kopf ji.
Bulah jơh nus kơp kờn dong kòn đăl git Yang mơ lơh sir gơnoar broă he di nàng bơto kòn Yang in, bol he kung la mè bèp ò wil tơl, găm bơta tis. Oă dớ, bol he dăn Yang toh glai he in, dăn Yang tuh hơ đăng bol he bơta kờn gơboh, bơta kong ớt, bơta jak chài tus bơh Yang nang bơto kon Yang in, nàng dong kon gơlik gơs cau mơ Yang kờn.
Tơm gơnoar bol he di, gơs oă cau lơh me bep tus mơ he mơ gơ hor dà mat tú bol khai git bol khai ơn tis bơta păl càng lài hớ đap tú kon găm kơnom să. Tài bơh bơta kơlôi rcăng phan sa, phan nhô, jen priê, bơh oă gơnoar broă pha is, bol khai ò tơl tú jơ nàng ơm mơ kon, hala hòi dăn băl mơ kon nàng dong kon git Yang, bol khai ò găm tai tú jơ hớ, mơ bơta moat jrum hơ gơ lơh ò tú lơi jơh.
Ăn kơp kờn bol he păl lơh ală bơta hớ lài mơ tú ò găm tú jơ tai nàng he in lơh. Dăn Yang tê lam kon, bơtơl bơta nđac kơp nă bol he in nàng he git dong kon trấy dơng tơm bơta dòn kơp ngai bơh bơta hòi dăn mơ jơnau Yang.
Dan jà bol he dô nùs bal tòm bơta hòi dan:
Khoai Yang kờn gơboh, dăn Yang toh bơta tis glai bol kon di tài bơh oă dớ bol kon ò rcăng mơ lơh sir gơnoar broă Yang jao tơm broă dong ală oh kon bol kon di dơp git Yang. Dăn ai bol kon in git rơn dăp wơl pơnah ơn di đap. Dăn tuh hơ đăng bol kon bơta kờn gơboh, bơta ơt ơl mơ bơta jak chài nàng git bơto oh kon bol kon di. Dăn ai hìu nhă bol kon in sơ lơ ngai dơng tơm Yang tơm rài kis git hòi dăn mơ ai ală oh kon bol kon di mhar dơp git Yang mơ gơlik gơs be Yang. kon ai sơn đăn Yang Jesu krist, Amen.
Ơ ală ồng mò oh mi kòñ gơboh, “ “Bơto tĕ kòn dềt in dô nơm gùng di khai pal jat” la gơnoar broă păl càng ngăn ngai do tơm Hiu Jum Goh, mơ kung gơwet mơ hìu nhắ. Bol he rgơi duh broă băl tơm pơnah dô be lơi? Bol he rgơi sơn tơm bơh bơta cop să kon “ ngai do kon di gơ lơh be lơi?”gơs bơta lơi kờn ưn ngai Yang? Gơs bơta lơi nàng bèp, mè, mè in, bạp in rgơi hòi dăn ala kon in sơl? Bol he dô nus băl nàng hòi dăn mơ Yang ơ kon!…”kơp kờn Yang ngùi kơp nă bol he nàng bơtao wơl dô pah rai pơn jat git duh rngot Yang Tơm Trồ, ală cau bơta dệt rhền gơwet mơ lơgar Yang.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply