Kơnòm dêt là sơnăm geh sền là ala sơ but dêt Hìu Jum Goh tơnơ̆ do, mờ là bơta pràn kòp dà lơlăr dê. Mơya sền dồ bă băl, do là sơ năm mờng ờs “lời hŭi” oă rlau jơh. Bol oh kơp koñ geh ê gàr, koñ gơboh, sền gàr, bơtê bơto dồ bă wil tơl nàn rgơi kwèng, bơt bơtào jat bè ala bơta kơp koñ tòm rài kís, bơh do là mpồl sơnăm goñ ngăn gơ lời wơl tơnời jê sồt, goñ cau sền ò sơp ò so, mờ goñ cau pơr lồm. Dờng màng rlau jơh hơ̆ là bol oh păl geh bơto nàng Git mờ Dòn dòp Yàng Je-su.
Ngai do, ngai 07/6/2025, Bơta Hòi Dan Kòp Ngai dan jà ồng mò oh mi bơtê bal Jơnau Yàng dê bơh tơnggume RÒNG SIAM TĔ ALĂ BELÀT KÒN AÑ JÊ
Sră Goh: Kơnràñ đơs lah: “Ròng siam tĕ ală belàt kòn Añ jê.” (Jang 21:15)
Añ neh geh lik rài tòm dồ nơm tiah dêt rhền, rƀah mờ kal ke ngăn tòm chàr miền Trung-Việt Nam. Dilah gớs dồ nă cau lơi lùp añ lah: tòm sơnăm găm dêt bơta lơi să tòm añ kah rlau jơh taih? Bơta mờ añ kah rlau jơh hơ̆ là: Mẹ Bèp añ ờ tŭ lơi ai oh mi añ lòt nhơl tòm ngai poh. Mẹ Bèp bol hi sùm tơng kah dồ bă nền cî: păl ơn lài tŭ jơ nàng tús duh khoai Yàng.
Kòp àng drim poh, tơnơ̆ mờ neh rcăng sir ồi ào, khŏ dép gen Mẹ Bèp bol hi lăm tús dê Hìu Jum Goh nàng pơ jum duh khao Yàng. Tŭ rê hơ hìu, Mẹ Bèp añ rơp lùp bơh bơta bơtê àng drim hơ̆, dilah bol hi ờ rgơi hơ dồ bă wil tơl, hala tŭ pơ jum ờ ờm dồ bă niam gen gùl ngai hơ̆, gen ngăn oh mi bol hi rơp geh lah dồ bă kràñ cî ngăn. Gen tàng, oh mi bol hi tús duh khoai Yàng dồ bă nền nòn bơh ò di là bol hi gơboh mơya nàng ờ dờp bơta pù lơh. Tŭ do kơ lôi wơl, hơ̆ ngăn là ala rơndap sơnrờp mờ oh mi bol hi geh tề lăm tòm rài kís duh khoai Yàng, duh rngòt Yàng, koñ gơboh Yàng.
Ưn ngài Yàng, kung bơh hơ̆ mờ bol hi geh dờng tòm rài kís kờp rơndap kòp drim poh Hìu Goh dê, ala khà đớs chờ gơlik gớs kah nền tòm bồ tơngngoh bol hi dê, bơta ntào nggui, tŭ jòng rơ Yàng, tŭ đọk Jơnau Yàng, mờ tŭ hòi dăn… jơh tơl bơta gơlik gớs dồ nơm rùp niam bol hi in tús dê tòm ngai do…Tòm ala ngai sơn rờp tús tòm tiah Sài Gòn nàng bơ srăm, añ tơ riang tơ ryồng mờ gơboh nàng pơjum duh khoai Yàng mờ bơ srăm Jơnau Yàng băl mờ kòn sau Yàng tòm Hìu Jum, bơh tềng hơ̆ añ sền gŏ rùp mềr kiar, gơboh bơh geh kơno Jơnau Yàng, geh đớs chờ ala khà chờ mờng òs bè là ơm tềng hìu. Ưn ngài Yàng, bơh ala bơta kwơ màng hơ̆ mờ añ kòp ngai geh dờng tòm bơta dòn, hòn chò bơh geh bơ srăm git oă rlau bơh Yàng mờ lơh gớs cau duh broă Yàng tòm gơnoăr broă Yàng hòi jạ.
Yàng Jesu đơs mơ Simôn Pier lah: “Ơ Simôn, kòn Jôna, mê kòñ gơboh di Añ rlau mơ ală cau do sơl?” (Jang 21:15)
Tŭ Yàng Je-su hòi Pier mờ sơnđăn măt jat jơnau Hebrơ: “ Simôn, kòn Jôna”. Hơ̆ là sơnđăn măt tờm ồng dê, dô nă cau pràn kơldăng mơya lơbơn lơñio, mờ đwơn dờp mờ ta gơplơ̆ nùs. Mơya, Yàng neh sak mờ sơnđăn măt ồng là Pier, gơtha là: lŭ klềr, pràn kơldăng, kră kơldăng (Mathiơ 16:17). Bơta kră kơldăng, pràn kơldăng hơ̆ ờ dì nàng cau bơto Pier lơh gớs dồ nă cau lăm bồ gớs bơta pràn mờ gơnoar, mờ ya nàng Pier cih kah să tòm păl lơh gớs dồ nă cau î pràn kơl dăng, bềng nùs koñ gơboh bè Yàng Je-su là bè hơ̆ sơl.
Bơta dơ̆ pàr he păl git, tŭ Yàng lùp: “mê koñ gơboh di Añ rlau mờ ală cau do sơl?” Yàng sền dờng màng bơta koñ gơboh ồng Pier dê gơ wèt mờ Kơnràñ gớs oă rlau mờ bơta koñ gơboh ồng dê gơ wèt mờ cau gut dăr ồng hala broă lơi ndai ồng sền rmê. Bơta koñ gơboh ồng dê là bơta dô thoa, lòt găn mờ đwơn tòm gơl sơl? Yàng Je-su koñ Pier păl đăl git lah: koñ gơboh Yàng ò di mìng là bơta dồ êt tŭ, lòt găn mờ ya bơta koñ gơboh geh bơt bơtào bơh bơta đăl git Yàng là cau lơi mờ bơta koñ gơboh Kơnràñ dê ai dê să tòm ồng dê. Broă hơ̆ dong cau bơtê Pier gơlik gớs pràn kơldăng, ntào kơ̆ di oă bơta kal ke, kup kơr yăn găm kơp gơn hơ đap.
Di đap jơnau hơ cau bơta Pier dê: “Ơ Yàng, ơi Kơnràñ git lah añ gơboh di Kơnràñ.” Yàng Je-su đớs lah: “Ê tĕ ală belàt Añ jê.” Ơ ală oh mi koñ gơboh! Bol he rơp lơh bè lơi tŭ đăl git hwềng nùs Yàng Tòm Trồ sùm gơwèt dê ala cau roh lơm tòm dunnia do taih? Să tòm Yàng neh sền jơh tơl nă cau là be làt Kơnràñ dê, Kơnràñ neh nđàc sơngit tŭ belàt Kơnràñ dê lòt gơ prah gơ pring hơ đăng ala bơnơm, ala dòr..bè belàt ò geh cau ê (Mathiơ 10:36)
“Ê tĕ ală belàt kòn Añ jê” Yàng Je-su kơp koñ cau bơtê Pier pơnjat gơnoăr sồr Kơnràñ dê hơ là kơñ gơboh mờ ê sề ală belàt Kơnràñ dê, tòm hơ̆ gớs ală belàt dê, là ală “belàt kòn”. “Ròng siam tĕ ală belàt kòn Añ jê.” (Sră goh pa), “ Ai tĕ ală belàt kòn Añ sa” (Sră goh pa 2011). Ròng siăm tĕ ala kơnòm dêt Yàng dê mờ phăn sa là Jơnau Yàng nàng bol khai geh dờng pràn kơldăng.
Ngai do, bol he mờ añ, là ală cau neh hơ jơnau lùp Yàng dê “ Mê kơñ gơboh dê Añ sơl?” bơh bơta hơ nền “kòn kơñ gơboh Yàng”, Yàng Je-su kung găm đớs mờ bol he lah: “Ê tĕ ală belàt kòn Añ dê”. Bơh Kơnràñ sùm kơñ gơboh bol he. Yàng Je-su đớs: “Kung behơ̆ sơl, Bèp bol mê ơm hơđang trồ ò kòñ dô nă tòm ală cau dềt do roh rui.” (Mathiơ 18:14)
Yàng Je-su koñ gơboh mờ ê sền ala kơnòm dêt, Kơnràñ kơnđu bol khai, ơn tê hơđang bol khai mơ ai lơngai lơngò bol khai in.” (Mak 10:16). Yàng Je-su kung neh ngui rùp ala kơnòm dêt nàng dong kòl ală cau kơno oă bơta bơtê đah hwềng dờng màng. Bơta hơ̆, ai bol he in gŏ: Ala kơnòm dêt tòm Hìu Jum Goh ngai do kung kơp koñ nàng geh ê sền, koñ gơboh mờ bơto bol khai in Jơnau Yàng dồ bă wil tơl nàng bol khai sơ tờm rài kís niam nùs Yàng tòm tŭ bơh sơnăm găm dêt.
Gen tàng, bơto tĕ ală kơnòm dêt in dràh Jơnau Yàng, cèng tĕ bol khai tìp Yàng Je-su bañ kơ ñau ală tŭ bol khai gen duh khoai băl mờ Hìu Jum Goh, mờ mẹ bèp, lòt tĕ bol khai geh dòng mờng òs tòm hìu Yàng dê. Lòi tĕ ală kơnòm dê rgơi kơno ală jơnau đớs chò goh ring lơngai cèng tús bơta kís bơh lơgăr hơđăng trồ.
Dan jà bol he dô nùs bal tòm bơta hòi dan:
Khoai Bèp koñ gơboh kòn dê, ưn ngài Kơnràñ neh koñ gơboh kòn mờ bơta gơboh wil tơl, să tòm Kơnràñ neh jòi mờ dong klàs kòn, tòm gơl kòn gơlik gớs cau pa tòm Kơnràñ. Dăn Yàng ai bơta koñ gơboh Kơnràñ dê bềng lìu tòm nùs kòn nàng kòn rcang sir koñ gơboh, ê sền, ê gàr ală belàt kòn tòm hìu Yàng dê. Dăn ngui kòn nàng bơto kơnòm dêt bơh Jơnau Yàng, bơh bơta koñ gơboh să tòm Kơnràñ dê nàng bol oh geh dờng pràn kơldăng mờ gơlik gớs ala phăn ngui gớs kwơ tòm tê Kơnràñ, Kòn jơh nùs hòi dăn tòm sơnđăn Yàng Je-su Krist, A-men.
Ơ ồng mọ, oh mi koñ gơboh, Yàng Je-su neh koñ gơboh bol he bè Kơnràñ neh koñ gơboh cau bơto Pol, ò mìng toh glài mờ chò nùs ngui ồng nàng ê gàr mpồl belàt Kơnràñ dê, gen tòm ngai do, bol he rơp lơh bèlơi dê đap bơta koñ gơboh dờng mờ Kơnràñ neh ai bol he in? Sơn rờp, bol he koñ goboh Jơnau Yàng, lòi tŭ jơ kwơ màng nàng đọk, bơ srăm mờ kơlôi sơnơng Jơnau Yàng. Ai té rài kís geh tòm gơl he dê nàng ràng tơlik Jơnau Niam cau ndai in, dờng màng rlau jơh là lơh krơh ală cau kơnòm dêt in. Hòi dăn té ala cau kơnòm dêt tòm Hìu Jum Goh, kơno mờ kong ơt bol khai bè Kơnràñ neh kong ơt mờ bol he. Sơn tờm té bơh ngai do mờ jơnau hòi dăn ala kơnòm dêt in tòm hìu nhă mờ Hìu Jum Goh bol he dê, bơh dồ jơi bơtian pơnjat tòm lơgăr Yàng Tòm Trồ dê.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply