Hnub no yog hnub so nco txog tej menyuam ntseeg Vajtswv hnub, yog ib hnub tshwj xeeb thaum Pawg Ntseeg tseg sijhawm nrog tej menyuam hu nkauj, qhuas Vajtswv. Tswv Yexus hlub tej menyuam mos. Thaum ua Vajtswv tes haujlwm hauv ntiajteb, Nws hu lawv: “Cia tej menyuam los cuag kuv…” Nws tsis yog tsuas puag lawv rau hauv siab xwb, tiamsis tseem qhia tias yog leej twg xav mus hauv Vajtswv lub tebchaws yuav tsum dhau los zoo li tus menyuam mos. Tsis yog tsuas hlub tej menyuam mos xwb, Vajtswv tseem samhwm ib lo lus samhwm rau peb: “qhia rau tej menyuam paub txoj kev uas lawv yuav mus.” Ntawm no yog lo lus samhwm uas peb txhua tus yuav tau npaj txhij los lees paub thiab ua kom tiav nyob hauv peb tsev neeg thiab Vajtswv Pawg Ntseeg.
Hnub no, yog hnub 08/06/2025, Yog hnub nco txog tej menyuam ntseeg Vajtswv, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm CIA LI QHIA RAU TEJ MENYUAM YAUS
Vajluskub: “Qhia menyuam kom paub ua nws lub neej, nws yuav nco ntsoov tej lus ntawd mus tas nws sim neej” (Pajlug 22:6)
Muaj ib zaug nyob hauv lub rooj tshaj tawm Txojmoo Zoo loj nyob hauv Hà Nội, kuv ntsib ib tug menyuam yaus kawm phau ntawv Quyển Sách Thần Kỳ yav dhau los, thaum no nws twb kawm xyoo 2 hauv tsev kawm Vajluskub hauv Hà Nội. Nws mus nrog nws txoj kev cog lus, muab nws tus kheej fij ua Vajtswv haujlwm. Thaum no nws zoo nkauj, ntxim hlub, kub siab lug rau txhua txoj haujlwm.
Ua Vajtswv tsaug, kuv ntsia pom nws loj hlob raws lub caijnyoog. Thaum tseem yog ib tug me ntxhais txomnyem nyob pem roob, tau xibhwb tsev neeg lees los tu. Nws kawm paub Vajtswv dhau ntawm txoj kev hlub, tu, thiab tsev neeg qhia, dhau ntawm phau ntawv Quyển Sách Thần Kỳ. Vajtswv txojlus tsau tsawv hauv nws lub siab. Thaum tseem yau, nws npau suav hauv siab ib hnub loj tuaj yuav dhau los ua ib tug neeg ua Vajtswv haujlwm, coj ntau tus los ntseeg Vajtswv. Ntawm no yog txoj kev uas tseb Vajtswv txoj lus rau tiam txuas ntxiv, ib txoj kev nqes peev puv npo kev hlub ntawm tsev neeg thiab Pawg Ntseeg. Ua Vajtswv tsaug!
“Qhia menyuam kom paub ua nws lub neej, nws yuav nco ntsoov tej lus ntawd mus tas nws sim neej” (Pajlug 22:6).
Vajtswv tej lus nyob hauv Pajlug 22:6 swm kawg. Kuv ntsia pom Vajtswv tej lus nyob hauv nqe Vajluskub no tsis yog tsuas yog ib lo lus ntuas maj mam xwb, tiamsis tseem yog ib lo lus samhwm: “Yuav tau qhia rau tej menyuam paub txoj kev uas lawv yuav mus…”
“Qhia” – Vajtswv nqua hu kom peb ua ib qhov haujlwm cheem tsum: qhia Vajtswv tej lus rau peb tej menyuam. Vajtswv tej lus ntawm no tsis yog “thaum zoo sijhawm” lossis “qhia tau xwb”, tiamsis qhia kom meej meej: cia li qhia. Txawm zoo sijhawm thiab tsis zoo, nrhiav txhua txoj kev los qhia tej menyuam. Ntawm no yog Vajtswv tej lus samhwm tseg rau txhua tus uas hlub Vajtswv, cov uas ua niam ua txiv, xibhwb Pawg Ntseeg, tus kws qhia tej menyuam yaus thiab tag nrho txhua tus uas tau Vajtswv tso tej menyuam rau hauv yus lub siab.
“Qhia” thiab “cob” yog ib txua kev. Nyob hauv txua kev ntawd, yuav tsum muaj neeg nrog lawv mus, ua qauv, hlub thiab ua siab ntev. Tej neeg uas peb yuav qhia yog tej menyuam yaus, ces kuj yuav tau qhia kom zoo nyob rau hauv peb txhua lo lus hais, peb txhua tus cwjpwm coj.
Tej menyuam lawv yuav nyiam kawm thaum peb nrog lawv kawm, nrog lawv ua si, nrog lawv mus ua ke. Lawv cheem tsum pom ib tug qauv, ib tug qauv rau lawv xyaum ua li ntawd. Nyob hauv tej uas peb qhia thiab tej uas peb ua, yuav tau zoo tib yam nkaus.
Peb tsis txhob ntaus nqi qis rau tus qauv uas peb tau tseb rau hauv tej menyuam yaus lub siab hnub no. Peb tab tom kos ib daim duab rau hauv lawv lub neej, tsis yog los ntawm tus kheej lub tswv yim, tiamsis yog txoj kev twb tau npaj tseg hauv Vajluskub: yog Tswv Yexus.
“Yexus teb Thaumas hais tias, “Kuv yog txojkev, yog qhov tseeb thiab yog txojsia; tsis muaj leejtwg mus cuag tau Leej Txiv, tsuas yog mus ntawm kuv mus xwb thiaj tau.” (Yauhas 14:6).
Tswv Yexus yog txoj kev, yog txoj kev mus cuag Vajtswv, txoj kev mus txais tau txojsia, txoj kev txawj ntse, txoj kev kawm kom muaj tswv yim, txoj kev kawm kom ua tau lub neej zoo, txoj kev ua siab ntev, ua haujlwm pab thiab mloog lus txog thaum kawg.
Ib yam uas tseem ceeb yog: tej menyuam yuav tsum paub tias peb yog cov neeg uas qhia lawv, hlub lawv, tshua txog lawv, thiab Tswv Yexus Khetos yog tus hlub thiab tshua txog tej menyuam ntau tshaj.
Peb ua tau tej no vim Vajtswv hlub peb, thiab Vajtswv xav kom peb hlub yam uas Vajtswv hlub. Tswv Yexus tib leeg thiaj yog txoj kev mus cuag tau Vajtswv. Tej menyuam lawv yuav tau nkag siab txog qhov no thiab ntaus cim rau tej ntawd thaum tseem yau, kom raws li lub caijnyoog loj hlob tuaj, txoj kev ntseeg rau qhov tseeb thiab txojsia ib txhis yuav yog tus cag ruaj khov rau tej menyuam lub neej.
Thaum tab tom kawm, tsis yog txhua tus menyuam yaus lawv yuav txais yuav tau sib npaug zos. Muaj tej tus tau qhia Vajtswv txojlus thaum lawv tseem me, tiamsis thaum loj hlob tuaj lawv ho yuam kev. Peb kuj pom muaj ntau tus ib ncig peb, thiab ntau zaug nyob hauv yus tsev neeg. Ntau tus tau cob qhia zoo, tiamsis lawv ho taug txoj kev uas lawv xaiv.
Tiamsis Vajluskub cog lus tias, yog peb qhia txoj kev yog uas lawv taug, qhov no yuav tsis tawm ntawm lawv lub siab mus, txawm yog thaum laus lawm. Ntawm no tsis yog lo lus tab pov yooj yim, tiamsis yog ib lo lus tab pov muaj zog ruaj khov txog Vajtswv tejlus nyob hauv tej menyuam lub hlwb mos mos ntawd. Yog li, peb yuav tau ua peb tej haujlwm mus ntxiv: qhia rau tej menyuam lawv paub txoj kev uas lawv yuav mus. Yuav muaj tej lub sijhawm koj hnov qaug zog vim muaj ntau yam tshwmsim tuaj. Tiamsis peb yuav tau sib txhawb kom nco ntsoov tias: “Tej lus uas kuv hais tawm lawm zoo ib yam li ntawd ntag; tej lus ntawd yuav tsis rov qab los cuag kuv dawb do ib zaug li, tiamsis yuav tawg paj txi txiv raws li kuv xav tseg lawm, kuv tej lus yuav ua txhua yam uas kuv tso nws mus ua (Yaxayas 55:11).
Vajtswv tej lus tseg rau peb tsis yog tas rau ntawm qhov uas pab kom peb nkag siab txog peb lub nra, tiamsis tseem yog ib lo lus nqua hu kom yuav tau ua kiag tamsim. Tej yam yooj yim uas peb yuav tau ua nyob rau hauv peb tsev neeg, xws li qhia tej menyuam thov Vajtswv txhua hmo, thov Vajtswv ntawm pluas noj pluas haus, kawm Vajluskub ua ke, lossis tham txog ib zaj xwm txheej hauv Vajluskub ua ntej yuav mus pw, puav leej dhau los ua tej kev cim nco rau tej menyuam mus tag lawv tiam neej.
Nyob hauv Pawg Ntseeg, ntawm tej lub rooj kawm Vajluskub txhua thiv tseg rau tej menyuam, cov kws qhia ntawv lawv ua tib zoo qhia ib qhov me me zuj zus: los ntawm qhov uas qhia tej menyuam lawv nco tej nqe Vajluskub, txog hu tej zaj nkauj, ua yeeb yam lossis coj ib kaujruam zuj zus hauv txhua txoj haujlwm. Tag nrho tej yam no cuag li tsis muaj dabtsi tiamsis nws yog lub noob muaj nqis tab tom tau tseb rau tej menyuam yaus, ib qhov zuj zus, ruaj khov thiab puv npo kev hlub.
Nyob rau lub neej niaj hnub nim no, thaum tej menyuam lawv ntsib ntau txoj kev xav nws tsis yog raws li Vajtswv txojlus, los ntawm tej hlwb hlau huam vam li niaj hnub nim no, ces txoj kev cob qhia Vajtswv tej lus dhau los maj heev. Tej cuab yeej vam meej li niaj hnub no, fuab cua nrog rau tej kev cob qhia sab nraud puav leej cuam tshuam ntau txog nej lub hlwb thiab nej lub siab. Yog Pawg Ntseeg thiab tsev neeg tsis qhia Vajtswv tej lus, ces yeebncuab yuav tseb rau hauv tej menyuam tej lus dag xwb.
Ntawd yog qhov uas vim li cas yuav tau nqes peev rau tej menyuam, tsis yog tsuas qhia rau hnub so xwb, tiamsis yog ib txua kev ntev: nrhiav cov neeg uas muaj siab, cob qhia lawv muaj pib muaj xaus qhia tej menyuam kom zoo tshaj, tib txhij ntawd txhawb txhua nkawm niam txiv hauv Pawg Ntseeg ua lawv lub luag haujlwm qhia tej menyuam pub rau Vajtswv.
Peb yuav tau ua siab ntev. Cob qhia tej menyuam cheem tsum kev ua siab ntev, vim tes haujlwm no poob sijhawm thiab tsis tau txi txiv tamsim. Tiamsis yog peb rov qab tseb, cov noob no yuav loj tuaj, ib lub txi kaum lub, ib lub yuav txi ib puas lub.
Thov caw nrog kuv peb thov Vajtswv ua ke
Kuv tus Vajtswv, Koj yog txoj kev mus, qhov tseeb thiab yog kuv txojsia hauv kuv lub neej. Ua Vajtswv tsaug vim zaj kawm hnub no, vim Vajtswv txojlus twb ci tuaj thiab tshoov kuv lub siab. Thov pab kom kuv paub mloog Vajtswv lus, pib los ntawm tej yam uas me tshaj, qhia tej menyuam yaus hauv txoj kev hlub thiab kev ncaj ncees. Thov Vajtswv tsa kom muaj ib tiam tshiab hwm Vajtswv. Kuv thov hauv Tswv Yexus Khetos lub npe. Amees.
Cov kwv tij txhua tus, hnub no yog hnub nco txog tej menyuam yaus tshaj tawm Txojmoo Zoo, yog ib lub sijhawm ntuas kom peb nco txog tej haujlwm uas Vajtswv cob rau peb thiab tiam txuas ntxiv.
Yog nej yog cov yug yaj, yog cov thawj coj Pawg Ntseeg sab ntsujplig, tseg sijhawm los thov Vajtswv tshwj xeeb, tseg sijhawm los cob qhia tej mneyuam hauv Pawg Ntseeg ntawm koj lub caijnyoog ua haujlwm, nyob rau txhua zaug sab laj hauv rooj tsav xwm, pab cob qhia tej menyuam yaus. Yog nej tab tom ua haujlwm hauv cov qhia hnub so hauv Pawg Ntseeg, yuav tau mus ntxov, npaj zaj lus qhuab qhia los ntawm lub siab puv npo kev kub siab lug, hlub tej menyuam los ntawm lub qhov muag ntsia, lo lus hais thiab kev ua siab ntev. Yog koj yog ib leej niam leej txiv, txhob ua poob lub sijhawm tseb Vajtswv tej lus rau hauv yus tej menyuam txhua hnub, txawm yog tsuas yog ib nqe Vajluskub xwb. Txhob tos kom Pawg Ntseeg qhia koj tej menyuam rau koj xwb. Yuav tau koom tes nrog Pawg Ntseeg, pib ntawm koj. Qhia tej menyuam txoj kev lawv yuav taug, kom tom qab no, tag nrho nws tiam neej mus ua ke hauv Vajtswv tej lus.
Qhov haujlwm peb ua hnub no tej zaug yuav dhau los ua ib tug cag rau peb txoj kev ntseeg rau lub neej tom ntej kom tej menyuam pib. Pib kiag hnub no thiab tom qab no. Qhia tej menyuam txoj kev lawv yuav, feem txuas ntxiv Vajtswv yuav ua nyob rau hauv Vajtswv lub siab nyiam.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply