Ngai do, ngai Rlô Cau Kơnom Jơnau Niam, dô ngai krơi is tom tŭ jơh Hiu Jum Goh lòi tŭ jơ nàng ơm bal mơ cau kơnom đơs chò, jòng-ro Yàng. Yàng Jesu kòñ gơboh cau kơnom. Tom tŭ lơh gơnoar broă hơđang ù, Kơnràñ neh hoi jà: “Lòi tĕ ală kơnom dêt tus hơ Añ…” Kơnràñ ò di mìng kơnđu ală kòn tom nùs, mơ kung bơtọ lah cau lơi kòñ mùt Lơgar Đang Trồ gen pal gơlik gơs bè dô nă kọ̀n dêt. Ò di mìng kòñ gơboh kòn dêt, Yàng kung ai gơnoar sồr: “Bơtọ tĕ kọ̀n dêt in dô nơm gùng dà khai pal jat”. Do la gơnoar sồr mơ kờp nă bol he pal cang lơh dô bă krañ-cê, đal git loh mơ lơh mo tom hiu nhă să tom he dê mơ Hiu Jum Goh he dê.
Ngai do, 08/06/2025, ngai Cau Kơnom Jơnau Niam, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng bơh tơnggume BƠTỌ TĔ KỌ̀N DỀT ĬN.
Sră Goh: “Bơtọ tĕ kọ̀n dêt ĭn dô nơm gùng dà khai păl jăt; bulah tŭ khai neh gơlik gơs kra, kung ò tŭ lơi săng lòi gơ ò.” (Jơnau Pơnđik 22:6)
Tom dô tŭ lơmpah bơtọ yal dơng tom Hà Nội, añ geh tìp mơ oh ur dêt bơtê sră ‘Quyển sách Thần Kỳ’ ngai lơi hơ̆, tŭ do neh la cau bơtê năm 2 Klơng Sră Goh Hà Nội dê. Oh neh mùt tom bơta ho pơgon he dê, ơn să duh broă Yàng. Oh tŭ do her ur ngan, gơboh ngan, tơryăng ngan tom jơh ală bơta.
Ưnngai Yàng, añ geh sền gọ̆ oh geh têh dờng jat kơnhai sơnam. Bơh di dô nă oh ur dêt tom tiah mơnơm kalkê, oh geh hiu nhă dô nă Cau Gơnoar Bơto dòp ròng. Oh geh bơtê git Yàng kơnòm di bơta kòñ gơboh, sền-gar, bơtọ sồr hiu nhă dê, gan kờp ơdŭ bơtê sră ‘Quyển Sách Thần Kỳ’. Jơnau Yàng geh tăm tom nùs oh dê. Bơh di tŭ gam dềt, oh neh kơp kòñ têh dơng rơp gơlik gơs dô nă cau duh broă Yàng, tề lăm oă cau rê wơl mơ Yàng. Do la dô công nha dô gùng lòt sih tam Jơnau Yàng rài tơnơ̆ pơnjat in, dô bơta prap ai bîng kòñ gơboh hiu nhă mơ Hiu Jum Goh dê. Ưnngai Yàng!
“Bơtọ tĕ kọ̀n dêt ĭn dô nơm gùng dà khai păl jăt; bulah tŭ khai neh gơlik gơs kra, kung ò tŭ lơi săng lòi gơ ò.” (Jơnau Pơnđik 22:6)
Jơnau Yàng tom Jơnau Pơnđik 22:6 òs mong ngan. Añ sền gọ̆ Jơnau Yàng tom seng Sră Goh do ò di mìng la dô jơnau tơngkah lơbơn niam ai bol he in mơ kung la dô gơnoar sồr: “Bơtọ tĕ kọ̀n dêt ĭn dô nơm gùng dà khai păl jăt..”
“Bơtọ tĕ” – Yàng hòi jà bol he pal lơh tĕ dô nơm broă pal cang: bơtọ Jơnau Yàng ală kọ̀n oh bol he dê ĭn. Jơnau Yàng ting do ò đơs la “tom tŭ buôn-soh” hala “dilah rgơi”, mơ ya yal tơlik dô bă loh lang: bơtọ tĕ. Bulah buôn-soh hala ò buôn-soh, joi tĕ gùng nàng bơtọ bol khai in. Do la gơnoar sồr ai jơh tơl nă cau lơi kòñ gơboh Yàng, bal mơ me bèp sơl, Cau Gơnoar Bơto Hiu Jum Goh, cau pơgru bơto kơnom, kơnom dềt mơ jơh ală cau geh Yàng ơn kơnom digah he.
“Bơtọ” hala “bơtọ sră pơàr” la dô gùng lòt. Tom gùng lòt hơ̆, ò rgơi siơ̆u bơta lòt bal, lơh krơh, kòñ gơboh mơ kong-ơ̆t. Cau bol he pal bơtọ hơ̆ la cau kơnom, gen bơta hơ̆ pal cang nê̆-nền mơ loh lang tom jơnau đơs, broă lơh bol he dê.
Kọ̀n dêt rơp buôn ngan dòn dòp tom tŭ bol he sùm bơtê bal, kơnhơl bal, lòt bal mơ ală kòn. Ală kòn pal cang sền gọ̆ dô nơm krơh, dô nơm rùp lơh krơh nàng đom jat. Tom ală bơta bol he bơtọ mơ tom ală bơta bol he lơh, pal cang dô bă bal mơ gơp.
Bol he bañ sên òsơp bơta gơrềng bơh ală bơta lơi bol he sih tom nùs ală oh dêt ngai do. Bol he gam lơh rùp pac sir dô nơm rùp sơnio rài kis ală oh in. Ò di jat nùs is mơ ya bal mơ gùng lòt neh geh lơh nền tom Sră Goh: hơ̆ la Yàng Jesu.
“Yàng Jesu đơs lah: “Añ la gùng lòt, jơnau-song, mơ bơta kis; ò bơh añ gen ò gơs cau lơi geh lòt tus hơ Bèp.”” (Jang 14:6)
Yàng Jesu la Gùng Lòt, gùng lòt tus hơ Yàng Tom Trồ, gùng lòt tus hơ bơta kis, gùng lòt bơta jak chai, gùng dà bơta git jak, gùng lòt nùs nhơm, bơta pơndềt să, duh broă mơ dòn duh wĭl tơl jơl tus lồi dùt.
Dô bơta dơng mang rlau jơh: ală oh pal cang git bol he la ală cau bơtọ bol khai, kòñ gơboh bol khai, kơlôi rcang bol khai in, mơ lah: Yàng Dọ̆ng Klàs Jesu Krist la Bơtau kòñ gơboh mơ kơlôi rcang ală oh in oă rlau jơh.
Bol he rgơi lơh bơta do tài bơh Kơnràñ kòñ gơboh bol he, mơ Yàng kòñ bol he kung kòñ gơboh bơta Yàng kòñ. Mìng Kơnràñ la gùng lòt tus hơ Yàng Tom Trồ. Ală oh pal cang wă wơng bơta do mơ prap jrô bơta hơ̆ bơh tŭ gam dêt, nàng jat kơnhai sơnam têh dơng, bơta dòn di Jơnau Song mơ bơta kis rơp la mơnang kơ-cê rài kis ală oh in.
Tom tŭ geh bơto, ò di jơh ală oh dêt rgơi dòp git ndrom bal. Gơs ală oh geh bơto Jơnau Yàng bơh di kơnom dêt, mơ ya dờng kung gơs tŭ tìs nrah. Bol he kung sền gọ̆ oă bơta gùt dar he, mơ tom hiu nhă he. Oă oh geh bơtọ sồr niam ngan, mơ ya ală oh kư lòt jat gùng ìs he dê.
Mơ ya Sră Goh ho lah, dilah bol he bơto di gùng, bơta hơ̆ rơp ò lik bơh nùs bol khai, bulah tom tŭ kra. Do ò di la jơnau geh ho nền dô bă buôn-soh, mơ la dô bơta lơh nền bơh bơta gơnoar pràn jọ̆ jòng Jơnau Yàng dê tom hwềng nùs lơbơn-lơñọ. Gen tang, bol he kư pơnjat gơnoar broă he dê: bơtọ tĕ kọ̀n dêt ĭn dô nơm gùng dà khai păl jăt. Rơp gơs tŭ oh mi gơplơ̆ nùs tài bơh oă tơnggu. Mơ ya bol he tơngkah tĕ bal mơ gơp lah: “Gen jơnau đơs añ jê kung behơ̆ sơl, gơ neh lik bơh di bơr ăñ, gen gơ rơp ò rê wơl dô bă ò kwơ, mơ ya rơp lơh gơs bơta ăñ kòñ, mơ lơh wĭl tơl tơnggume broă mơ ăñ neh sồr gơ.” (Esai 55:11)
Jơnau Yàng ai bol he in ò bơdơh wơl tom bơta dong kơl bol he dòp git gơnoar broă, mơ kung la dô jơnau hòi jà pal gơs broă lơh mo. Ală broă buôn-soh mơ bol he lơh tom hiu nhă he dê, kung bè tề lam ală kòn hòi dan kờp mang, hòi dan tom ală tŭ sa, bơtê Sră Goh bal, hala yal yau dô bơta yal yau tom Sră Goh lai mơ tŭ jơ bĭc, jơh ală tŭ jơ hơ̆ rơp gơlik gơs ală bơta geh cih kah jrô tom nùs mơ rơp jat ală oh jơl jơh rài kis.
Tom Hiu Jum Goh, tom ală ơdŭ bơtê Sră Goh kờp poh ai ală oh dêt, ală cau pơgru jơh nùs tề lam dô bă nê-nền bơh broă dềt: bơh broă bơto ală oh cih kah kờp seng Sră Goh, tus di bơtê đơs chò, lơh ală bơta ryà, hala tề lam kờp cơnđoa tom dô bơta kơnhơl. Jơh ală bơta gơlơh bè buôn soh mơ ya hơ̆ la ală gar sơntil kwơ mang gam geh sih tom nùs ală oh, dô-ềt dô-êt, dô bă kơ̆ nùs mơ bîng bơta kòñ gơboh.
Digùl dô lơgar jak-chai ngai do, tom tŭ cau kơnom pal ntào di đap oă bơta kơlôi sơnơng pơrlơ̆ wơl mơ Jơnau Yàng dê, bơta jak-chai geh mòn gơs ntoat tơngguh, gen bơta bơto sồr Jơnau Yàng sơlo gơlik gơs dô bơta pal cang ngan. Ală bơta geh ngui jak chai, mạng xã hội mơ bơta bơto sră pơàr đah bơdih gơs gơrềng pràn ngan tus dơngoh kơlôi mơ nùs nhơm ală oh. Dilah Hiu Jum Goh mơ hiu nhă ò jơh nùs sih Jơnau Yàng laì, gen cau sò-tom rơp sih tom nùs ală oh dê ală bơta ma blàc.
Hơ̆ la tơnggu ñchi bơh tài Hiu Jum Goh pal cang prap-lòi dô bă krañ-cê pơnah dong kơl cau kơnom, ò di mìng la bơta rơndap tom ngai rlô, mơ la dô bơta rơndap jọ̆-jòng: jọi cau lơh broă gơs nùs nhơm, bơto dong kơl mơ tề lam bol khai dô bă gơs rơndap tap seng nàng bơto cau kơnom dô bă niam rlau jơh, mơ kung pơndom-pơniàng mơ chôl tơngkah kờp me bèp tom Hiu Jum Goh lơh gơnoar broă bơto sồr kòn sau Yàng Tom Trồ in.
Bol he pal kong-ơ̆t. Broă lơh ală oh in gơlik gơs cau bơtê pal cang bơta kơ̆-dơn, tài bơh broă lơh do roh tŭ jơ mơ ò gơlik công nha mo. Mơ ya dilah bol he pơnjat sih, ală gar sơntil rơp geh têh dờng, dô gar gơlik jơ̆t gar, dô gar gơlik dô rhiang gar.
Dan jà bol he dô nùs bal tòm bơta hòi dan:
Khoai Yàng Jesu kòñ gơboh kòn dê, Kơnràñ la gùng lòt, jơnau song mơ bơta kis rài kis kòn dê. Ưnngai Yàng tài bơh bơta bơtê ngai do, bơh Jơnau Yàng neh pơnđang sol mơ gơchôl nùs kòn dê. Dan dong kòn git dòn bơr Yàng, sơntom bơh di ală bơta dềt rlau jơh, bơto ală oh dêt tom bơta kòñ gơboh mơ bơta don song. Dan Yàng tơngguh dô rài duh rngòt niam nùs Yàng. Kòn jơh nùs hòi dan tom sơnđan Yàng Jesu Krist, Amen.
Ơ jơh ală ông mò, oh mi kòñ gơboh, ngai do la Ngai Cau Kơnom Jơnau Niam, dô tŭ lơmpah nàng tơngkah bol he bơh gơnoar broă Yàng jao bol he in gơwèt mơ ală rài pơnjat.
Dilah oh mi la ală cau î gar belàt, la cau at-bồ đah hwềng Hiu Jum Goh dê, lòi tĕ tŭ jơ nàng hòi dan ala dô bă kroĭ is, pal ơn tĕ sùm dô tŭ tom broă lơh lơh ală cau kơnom dềt in gơlik gơs cau bơtê Hiu Jum Goh dê tom bơta rơndap tŭ jơ lơh broă he dê, tom ală tŭ bơyai broă mpôl tơrña broă, mpôl tề lăm cau kơnòm dêt. Dilah oh mi tom gơnoar broă ñă ơdŭ Klơng Ngai Rlô Hiu Jum Goh dê, lòt tus tĕ gòñ, rcang laì bơta bơto mơ jơh nùs ngac-ngar, kòñ gơboh ală oh bal mơ muh mat, jơnau đơs mơ bơta kong-ơ̆t. Dilah oh mi la me bèp, bañ lòi roh tŭ lơmpah sih Jơnau Yàng tom nùs kòn sau he kờp ngai, bulah mìng la dô seng Sră Goh. Bañ mìng kơp gơn Hiu Jum Goh ala oh mi bơto kòn sau he dê. Pal dô nùs bal tĕ mơ Hiu Jum Goh, sơntòm tĕ bơh di să tom oh mi. Bơto tĕ kọ̀n dêt in dô nơm gùng khai pal jat, nàng ngai tơnơ̆, jơh rài kis khai cơnđoà lòt tom bơta àng Jơnau Yàng.
Broă bol he lơh ngai do rơp gơlik gơs mơnang dô rài kis bơta dòn kơ̆-cê tom ngai tơnơ̆ ală oh kòn bol he in. Sơntom tĕ mơ pơnjat ngai do mo. Bơto tĕ ală kọ̀n dêt in gùng khai pal jat, pơnah gam wơl Yàng rơp lơh tom nùs kòñ Kơnràñ dê.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply