Nyob hauv txoj kev ntseeg, muaj tej lub sijhawm peb kub siab lug xav kom loj hlob sai, xav pom yus muaj zog, paub tob dua, loj hlob kiag tamsim. Peb ntshaw kom ntsia pom tej kev hloov pauv meej meej, tej nqi zog loj. Tiamsis Vajtswv yog tus txawj ntse thiab ua siab ntev. Nws tsis maj, vim Vajtswv paub tej paj txiv zoo tsuas txi thaum uas twb muaj ib lub sijhawm ntev loj hlob thiaj ruaj khov.
Hnub no, yog hnub 11/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jordan Buntgen dhau ntawm Zaj kawm UA SIAB NTEV TOS LUB TXIV QAB
Vajluskub: “Tiamsis Vaj Ntsujplig yuav ua rau neeg muaj lub siab sib hlub, zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj, tsis khavtheeb thiab paub tswj yus lub siab. Yeej tsis muaj ib txoj kevcai yuav txwv tej no hlo li.” (Kalatias 5:22-23)
Tsis ntev los no, kuv twb thov Vajtswv pab kom kuv nkag siab tob dua txog Vaj Ntsujplig. Thaum ntawd, kuv ntshaw kom tau tej koob hmoov zoo uas Vajluskub tau hais txog. Kuv npaj txhij txais yuav tej kev ntsib dhau “zoo”. Tiamsis pauv rau qhov ntawd, Vajtswv ho coj kuv mus txog rau ntawm tej daim duab txog tej paj txiv.
Thaum pib, nyob rau ib lub sijhawm, kuv ntsia pom daim duab hais txog lub txiv tsw qab! Zoo ib yam li Vajtswv tab tom ntxhi ntxhi rau kuv: “Peb cia li pib ntawm lub txiv no ua ntej”. Hais tiag mas, thaum ntawd kuv yeej tsis ntshaw pes tsawg. Kuv pom cuag li Vajtswv tab tom cab kuv mus rau ntawm lub rooj kawm cob qhia menyuam yaus, pauv qhov uas kuv zaum ua ke nrog tej pawg “neeg laus”. Yuav poob ib ob Athiv, kuv thiaj tso tau kuv txoj kev khav theeb thiab qhib siab rau Vajtswv qhia kuv.
Lub txiv tsw qab nws yuav poob lub sijhawm ntev li 18 txog 32 hli kom nws siav. Peb cheem tsum qhov chaw dav kom loj hlob, yog tsis li ntawd yuav txi tsis taus txiv. Hom ntoo no yuav cog rau ntawm tej qhov chaw fuab cua sov so thiab muaj txaus qhov pom kev. Ib tsob ntoo nws tsuas txi tau ib lub ib zaug cog xwb.
Tus Tswv qhia rau kuv pom tias tsis yog nyob nyob kuv txawm cia li pom txog daim duab uas hais txog tsob txiv tsw qab no. Vajtswv qhia rau kuv pom tias kuv zoo ib yam nkaus li tsob txiv no. Nyob hauv Vajtswv txoj kev tiv thaiv, Vajtswv yuav tsim kom muaj ib qhov chaw txaus rau kuv loj hlob, Vajtswv qhov pom kev yuav tuav kom yog tej fuab cua uas cheem tsum, thiab tu kuv sab ntsujplig. Yog ib tug neeg uas saib xyuas lub vaj, Vajtswv yuav muab kuv tej ceg txiav, tsom ntsoov rau tej qhov chaw cheem tsum pab kom kuv loj hlob thiab ua siab ntev tos txog lub sijhawm uas lub txiv siav. Tus Tswv tsis qaug zog txawm ncua kev uas tos tsob ntoo loj hlob yuav ntev, kuj tsis npau taws txawm yuav poob 32 hli thiaj txi txiv. Vajtswv yeej tsis maj. Nws nkag siab zoo txog yam muaj nqis ntawm txoj kev loj hlob.
Yog li kuv xav ntuas nej tias: cia Vaj Ntsujplig coj koj lub neej, thaum ntawd koj yuav tsis ua raws li tej kev ntshaw ntawm koj sab nqaij tawv. Tus cwjpwm ntawm tej kev txhaum xav ua tej haujlwm phem, nws txawv tej uas Vaj Ntsujplig xav. Vaj Ntsujplig pub rau peb tej kev ntshaw txawv tus cwjpwm kev txhaum. Ob lub hwjchim no sib tawm tsam ua ke, ua rau peb yuav cim civ ua tsis tau tej yam zoo uas peb xav tau. Tiamsis thaum cia Vaj Ntsujplig coj, koj yuav tsis raug Mauxes kevcai khi ntxiv. (Kalatias 5:16-18).
Muaj ib qhov tseeb yog peb yuav cim civ loj hlob tsis tau. Yim quab yuam ces yim tsis muaj nqis. Kev loj hlob cheem tsum lub sijhawm. Vajtswv tsim peb los zoo li ntawd. Peb yuav ua tsis tau kom peb ua siab ntev dua, siab mos siab muag dua. Tsuas yog Vajtswv coj peb xwb thiaj pab rau tej lub txiv qab ntawd tshwmsim tuaj nyob hauv peb lub siab. Pauv rau qhov uas pheej hais tias: Kuv yuav tsum tau dhau los kom zoo dua. Tus Tswv Kuv thov txim, lwm zaus kuv mam siv zog dua!” – ces kuv siv zog kawm txoj kev hais tias: “Vaj Ntsujplig, kuv cheem tsum koj pab. Thov koj qhia kuv paub ua haujlwm zoo!”
Zaj kawm uas kuv xav tias tsuas yog tseg rau tej menyuam yaus xwb ho hloov pauv tag nrho kuv txoj kev nkag siab txog Vaj Ntsujplig. Ntawd tsis yog ib zaj kawm me, tiamsis yog lo lus caw tseem ceeb, coj kuv nkag mus tob dua rau hauv qhov tseeb uas kuv xav tias kuv twb nkag siab lawm. thiab ziag no, kuv nyiam lub txiv uas tsw qab no dua thiab saib taus cov tib neeg uas tau cog tej ntawd!
“Tiamsis Vaj Ntsujplig yuav ua rau neeg muaj lub siab sib hlub, zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj, tsis khavtheeb thiab paub tswj yus lub siab. Yeej tsis muaj ib txoj kevcai yuav txwv tej no hlo li.” (Kalatias 5:22-23).
Thov caw nrog kuv peb thov Vajtswv ua ke
Leej Txiv tus uas muaj kev hlub, kuv ua Koj tsaug vim Koj yog tus Tswv ua Vaj uas zoo tshaj hauv daim av hauv kuv lub siab. Thov qhib kuv lub siab thiab qhia rau kuv paub txog tej paj txiv zoo uas koj xav cog hauv kuv lub neej. Thov Vaj Ntsujplig coj kuv ib kaujruam zuj zus hauv kuv txoj kev ntseeg loj hlob. Thov koj lub hwjchim zoo li lub teeb taws pom kev rau kuv thaum uas kuv qaug zog, thiab nte kom kuv lub siab sov los ntawm koj txoj kev ua siab mos siab muag. Vajtswv Kuv hlub koj tshaj! Kuv thov hauv Tswv Yexus Khetos lub npe. Amees.
Cov kwv tij txhua tus, tej zaug koj xav kom yus hloov pauv sai, tawg paj txi txiv zoo pub rau Vajtswv lub tsev. Tiamsis Vajtswv paub tias tej yam zoo tshaj cheem tsum sijhawm kom loj hlob. Ua siab ntev, vim koj tabtom nyob hauv tus uas txawj ua vaj tshaj txhais tes. Nws ua siab ntev coj koj ib kaujruam zuj zus nyob hauv txhua yam me hauv koj lub neej, kom lub noob zoo uas Vajtswv cog tau loj hlob yam uas zoo tshaj. Cia li qhib siab thiab cia Vaj Ntsujplig ua tes haujlwm zoo kawg nkaus ntawd hauv koj tus ntsujplig txhua hnub.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply