Nyob hauv lub neej, muaj tej kev cheem tsum peb yuav tseg tsis tau – piv txwv li nqhis dej. Thaum nqhis dej, peb lub cev cuag li nqua hu, tshoov kom peb yuav tau nrhiav txhua txoj kev kom tau dej haus. Zoo ib yam li ntawd, peb lub neej sab ntsujplig kuj ib yam li ntawd. Nyob hauv peb lub siab, peb ib leeg yeej muaj ib txoj kev nqhis – peb nqhis tus dej uas cawm txojsia tiag, thiab nws ntws los tsis muaj hnub tu.
Hnub no, yog hnub 12/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Bill Gaultiere dhau ntawm Zaj kawm KOJ TAB TOM NQHIS TXOG QIB TWG?
Vajluskub: “Tus uas nqhis dej cia li los cuag kuv, kuv yuav muab dej rau nws haus raws li Vajtswv Txojlus hais tias, ‘Yog leejtwg ntseeg kuv, tus dej uas cawm neeg txojsia yuav txhawv hauv tus ntawd lub siab los.” (Yauhas 7:37)
Koj puas tau muaj tej zaum nqhis dej mus txog qhov uas qhov ncauj qhuav tas, qaub ncaug cia li nplaum tag? Thaum tseem yau, txhua zaug ncaws pob nraum tshav puam tshav ntuj kub kub, kuv pheej raug li ntawm. Lub sijhawm ntawd, yeej tsis muaj neeg nqa dej mus nraum zoov li ziag no. qhov ncauj qhuav tsis zoo nyob li, tiamsis tsis muaj neeg suav tias qhov no yuav yog ib qhov teeb meem. Cov thawj coj lub sijhawm ntawd lawv hais tias: “Tsis ua cas li os, ib pliag xwb ces yeej swm lawm os!”
Tiamsis tshuav qhov kev nqhis mus txog qhov uas neeg qaug zog zis, tes taw tshee tas, mob ib ce, tsuas xav pw xwb ne yuav ua cas?
Kuv twb ntsib dhau qhov no ob zaug, thaum nrog kuv tus tub mus nce roob. Thawj zaug yog thaum kuv tus tub muaj 16 xyoo, peb tau mus ncig ua si ntev hnub. Hnub ntawd, sawv daws yuav tau taug kev deb li 20 daim phiaj zeb, nce mus rau saum qhov chaw siab siab, thiab ua tsev so rau hauv qab ib lub taw roob loj loj.
Tshuav ob peb kilomet xwb ces yuav nto saum hauv roob, thiab kuv xav kom nce nto lub roob no. txawm yog thaum ntawd twb yuav tsaus ntuj, thiab tsis muaj neeg nrog kuv mus los, kuv yeej xav nce ib leeg. Kuv hliv dej puv nkaus kuv lub hnab thiab nqa peb lub ncuav nrog kuv mus thiab kuv pib nce roob, xav tias yuav rov qab los txog thaum tsaus ntuj.
Tiamsis txhua yam tsis zoo li kuv xav. Kev mus nyuaj dua, tsaus ntuj sai dua, thiab kuv tseem mus yuam kev lawm thiab. Saum ntsis roob txias zias, tsuas muaj ib lub teeb me me xwb, kuv tsis muaj zog tas thiab tsis muaj huab cua txaus rau kuv ua pa thiab. Kuv nqhis dej caj pas qhuav tas, kotaw tsis muaj zog ntxiv lawm. Kuv xuas dub los txog ntawm chaw so ces yog 8 teev tsaus ntuj, thaum ntawm sawvdawg tabtom yuav tuaj nrhiav kuv – thawj yam kuv ua yog haus tas nrho ib taub dej.
Yog li sim xam saib: Yog muaj ib hnub peb ntshaw Vajtswv zoo li ntawd no yuav zoo li cas? Vajntxwv Daviv tawm suab thov Vajtswv nyob hauv Ntawv Nkauj 63:1
“Vajtswv, koj yog kuv tus Vajtswv, kuv tos ntsoov koj, kuv lub siab xav tau koj ib yam li thaj av qhuav uas tsis muaj dej. Kuv tus Ntsujplig nqhis koj qhuav siab qhawv.”
Los txog tamsim no, lo lus thov Vajtswv ntawd yeej tseem chwv txog peb lub siab. Vim lub ntiajteb no kuj zoo li ib daim av qhuav qhuav, tsis muaj txojsia tiag. Muaj tej zaug kuv hais thiab ntuas rau kuv tus kheej dhau los ntawm cov lus thov Vajtswv ntawd. Hais tias kuv tus kheej los yeej cheem tsum Vajtswv kawg. Kuv muab Phau Ntawv Nkauj tshooj 63 sau dua los ua ib cov lus thov Vajtswv ntawm kuv tus kheej thiab tis npe hu ua “Nqhis Tswv Yexus”
Thiab kuj tsis txhob hnov qab lo lus caw uas Tswv Yexus muab pub rau cov uas tab tom nqhis:
“Tus uas nqhis dej cia li los cuag kuv, kuv yuav muab dej rau nws haus raws li Vajtswv Txojlus hais tias, ‘Yog leejtwg ntseeg kuv, tus dej uas cawm neeg txojsia yuav txhawv hauv tus ntawd lub siab los.’” Yexus hais li no yog hais txog Vaj Ntsujplig; yog leejtwg ntseeg Yexus, tus ntawd yuav tau txais. Thaum lub sijhawm ntawd Vajtswv tseem tsis tau txib Vaj Ntsujplig los, rau qhov Vajtswv tseem tsis tau tsa Yexus ua tus muaj tshwjchim ci ntsa iab” (Yauhas 7:37-39).
Zoo kawg nkaus li! Thaum qhib siab los txais yuav Tswv Yexus, peb tsis yog tsuas haus ib pas dej xwb- tiamsis Vaj Ntsujplig yuav ua rau peb muaj lub siab hlub lwm tus ib yam li tus dej ntws uas cawm txojsia, txias zias, puv npo, thiab tsis muaj hnub tas!
Thov caw nrog kuv peb thov Vajtswv ua ke
Kuv ua Vajtswv tsaug vim Koj paub zoo kuv txoj kev nqhis hauv kuv lub siab. Kuv paub tias yeej tsis muaj ib yam dabtsi nyob rau hauv ntiajteb no ua rau kuv tus ntsujplig txaus siab yog dhau ntawm koj. Thov Vaj Ntsujplig qhib tus dej ntawd ntws rau hauv kuv lub neej, hloov dua tshiab thiab yws dej rau thaj av qhuav hauv kuv lub siab. Thov qhia rau kom kuv paub tshaw koj tshaj txhua yam, vim Koj yog lub hauv paus ciaj sia, lub zog dawbhuv pab kuv txhua hnub. Kuv thov hauv Tswv Yexus Khetos lub npe. Amees.
Cov kwv tij txhua tus, nyob rau hauv lub ntiajteb qhuav qhawv thiab qaug zog zis no, Vajtswv tab tom caw peb: “Yog leej twg nqhis dej cia li los cuag kuv, kuv yuav muab dej rau nws haus” Nws tsis yog pab kom txhob nqhis ib vuag xwb, tiamsis tseem cia tus dej cawm siav ntwg tsis tu ntawd ywg peb lub siab uas qhuav qhawv. Cia li qhib siab rau Vajtswv cov dej cawm siav ua rau koj txaus siab, coj koj mus rau hauv lub neej tshiab – ua kom laj ntxiag thiab puv npo Vajtswv tus ntsujplig.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply