Muaj tej lub sijhawm, koj zoo siab vim lwm tus ua tiav haujlwm zoo, tiamsis nyob hauv koj lub siab, koj hnov nyuaj siab rau yus tus kheej. Muaj tej hnub, koj nkag siab tias yus yuav tau nco tshav ntuj, tiamsis ho nrhiav tsis tau ib yam dabtsi zoo. Twb yog nyob rau tej lub sijhawm koj lub siab tsis muaj kev kaj siab, peb yuav tau tig rov qab mus saib tej yam uas me tshaj, kom pom tias: Vajtswv txoj kev hlub niaj hnub nrog peb nyob, thiab Vajtswv txhais tes yeej ua tib zoo coj peb dhau ntawm txhua txoj kev txomnyem ntawd.
Hnub no, yog hnub 20/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Joanna Eccles dhau ntawm Zaj kawm KHAWS TEJ KEV KAJ SAB TSEG RAU HNUB MUAJ CUA DAJ CUA DUB.
Vajluskub: “Tus Tswv pab peb los txog ntawm no,” (I Xamuyees 7:12)
Tau ob peb xyoos dhau los, kuv muaj ib tug phooj ywg nws qhia kuv tias nws yuav sib yuav. Kuv tsis xav tias txoj xov no ho ua rau yus lub siab tub qaug rau yus ua luaj. Vim thaum ntawd kuv tsis muaj dabtsi ntawm tes – thiab tseeb tiag, kuv kuj xav kom kuv muaj lub neej li kuv tus phooj ywg ntawd, kuv nyuaj siab, tas kuv hnov muaj txim vim kuv tau khib, thiab pheej daig rau hauv tej kev xav tsis zoo ntawd mus ntxiv.
Nyob hauv lub sijhawm thov Vajtswv hauv thiv tom qab ntawd, kuv nqua hu kom sawv daws ua tim khawv txog tej uas lawv yuav tau nco tshav ntuj. Tseeb tiag, kuv paub kuv cheem tsum yuav tau kawm zaj kawm txog lub siab nco tshav ntuj dua ib zaug ntxiv. Thaum txog kuv ua tim khawv, kuv saib kuv ob txhais taw, thiab pom nkawm khau daj ci ntsa iab thaum tshav ntuj tim tuaj. Kuv cia li hais tias:
“Kuv nco tshav ntuj vim nkawm khau no”. nkawm khau no kuv yuav pheej yig saum fuab cua. Thiab tej zaug kuv yuav tau ua Vajtswv tsaug vim lub zog yus muaj lossis tej haujlwm yus ua, tiamsis thaum ntawd, kuv ho tsuas xav ntsoov txog nkawm khau xwb. Thiab tseeb tiag, twb yog los ntawm tej yam me me ntawd thiaj ho yog qhov pib. Pib ntawm nkawm khau, Vajtswv cab kuv tawm hauv qhov tsaus ntuj hauv kuv lub siab los, thiab taw rau kuv pom txog qhov pom kev ntawm kuv lub neej tamsim.
Zoo kawg nkaus thaum uas paub tias Vajtswv thaum twg twb npaj txhij pab peb – nyob kiag ntawm qhov chaw peb tab tom nyob. Tej zaug koj kuj tab tom nyob rau lub sijhawm yoj yees, tsis pom muaj dabtsi yuav ua rau yus luag. Tej zaug koj tab tom saib rau hauv, muaj lub siab nyhav, thiab xav twj ywm tias: “Tsis paub txog thaum twg thiaj yuav kov yeej qhov xwm txheej no?”
Yog li, sim thov kom Vajtswv taw qhia rau koj pom txog tej yam zoo uas Vajtswv tau ua rau koj lawm saib. Sim tig rov qab mus saib. Sim nco Vajtswv tshav ntuj, thiab thaum nco txog tej haujlwm loj uas Vajtswv tau ua lawm, cia siab tias yuav rov qab pib muaj txawm yog tej hnub uas tsaus ntuj nti tshaj plaws.
Thaum uas lub neej zoo, yuav tau “khaws cia” tej yam zoo tseg rau tej hnub muaj cua daj cua dub. Zoo li luag pheej hais txog “khaws nyiaj cia rau hnub muaj kev txomnyem”. Koj kuj muaj cuab kawv khaws tseg ib “qhov kev hlub cia” yog tej uas txhua zaug Vajtswv pab koj, kho koj zoo, thiab teb koj tej lus thov. Cia li muab sau cia. Thaum koj tsis xav txog lwm yam zoo ntxiv lawm, ces tej uas koj sau tseg ntawd yuav yog lub sijhawm ua rau koj nco txog: Vajtswv hlub koj, thiab Vajtswv tsis tau muaj ib zaum twg txav deb koj.
Cov neeg Yixalayees thaum ub kuj tau ntsib dhau tej no. Tomqab lawv lees txim tig rov qab los cuag Vajtswv thiab thov Vajtswv pab lawv hauv ntsus kev tsov rog nrog cov neeg Filitees, Vajtswv tau pub rau lawv muaj yeej. Tas tus cev lus Xamuyees tsa ib tug ncej zeb rau ntawd thiab nws thiaj tis lub pobzeb ntawd npe hu ua “Pobzeb Cawm Siav.” (I Xamuyees 7:12).
Vajtswv haiv neeg thaum ub pheej ua qhov no – lawv khaws pob zeb los txhos ua kev nco txog txhua zaug uas Vajtswv ua haujlwm cawm lawv. Vajntxwv Daviv los kuj ib yam li ntawd. Yawg pib hauv Ntawv Nkauj thaum nyuaj siab, tiamsis tomqab ntawd ho pauv mus qhuas nco txog tej haujlwm uas Vajtswv tau ua haujlwm rau yawg.
Nyob hauv Ntawv Nkauj 77:10-12 yawg sau: “Kuv hais tias, “Yam uas mob kuv siab tshaj plaws zoo li Vajtswv txawm tsis muaj hwjchim li lawm.” Tus Tswv, kuv yuav nco ntsoov koj tej haujlwm uas tseemceeb; kuv yuav rov nco txog tej txujci tseemceeb uas koj ua yav tas los lawm. Kuv yuav xav txog txhua yam uas koj tau ua tas los lawm; kuv yuav ua tib zoo xav txog koj tej haujlwm uas tseemceeb.”
Tsis yog tsuas tseg nco txog xwb, peb tseem yuav ua tim khawv txog Vajtswv tej koob hmoov. Thaum koj tham txog tej uas Vajtswv tau ua rau koj, koj tab tom txhawb lwm tus lub zog, thiab lawv kuj yuav yog tus neeg ntuas kom koj nco thaum koj hnov qab Vajtswv txoj koob hmoov.
Rov qab nco txog tej uas Vajtswv tau ua rau koj yuav ua rau koj muaj lub siab nco tshav ntuj. thiab lub siab nco tshav ntuj yuav yog ib qhov cuab yeej ntawm sab ntsujplig, ua rau koj muaj kev kaj siab hauv sab ntsujplig.
Vajluskub nyob hauv Filipis 4:6-7 sau: “Nej tsis txhob nyuaj siab rau ib yam dabtsi hlo li, thaum nej thov Vajtswv nej cia li qhia txhua yam uas nej xav yuav rau Vajtswv, thiab thaum nej thov nej yuav tsum nco ntsoov ua Vajtswv tsaug. Yeej tsis muaj leejtwg yuav paub qhov uas Vajtswv ua rau nej muaj kev kaj siab thiab qhov uas nej nrog Yexus Khetos koom ib txojsia thiab tej uas nej xav huv tibsi.”
Vajtswv tsis yog coj koj los rau hauv lub ntiajteb no thiab muab koj tso tseg cia. Thov Vajtswv pab kom koj nrhiav tau tej yam zoo ntawd, nyob hauv Vajtswv txoj kev hlub, rub koj dhau ntawm txhua ncua kev uas txomnyem.
Thiab yog koj tab tom nyob nruab nrab ntawm tej nthwv cua, cia li thov Vajtswv tseb rau hauv koj lub siab txog tej qhov pom kev ntawm txoj kev zoo siab. Cia txoj kev cia siab hauv Nws rub koj tes nce, thiab coj koj tig rov qab los rau ntawm qhov pom kev.
Thov caw nrog kuv peb thov Vajtswv ua ke
Kuv tus Vajtswv uas muaj kev hlub. Tus Tswv, muaj tej lub sijhawm kuv zoo li qhuav qhawv, nrhiav tsis tau yam dabtsi zoo los ua Koj tsaug. Tiamsis Koj yeej ua siab ntev ntuas kom kuv nco txog koj txoj kev hlub, pib ntawm tej yam uas me tshaj txog tej uas koj niaj hnub tiv thaiv kuv. Thov qhib kuv lub qhov muag kom kuv nco txog tej haujlwm loj uas koj tau ua, thiab cia kom kuv lub siab puv npo kev zoo siab fij rau koj. Thov pub kom kuv muaj kev kaj siab hauv koj, kom kuv sawv khov kho txawm yog tab tom nyob hauv cua daj cua dub. Kuv thov hauv Tswv Yexus Khetos lub npe. Amees.
Cov kwv tij txhua tus, txawm yog koj tab tom nyob qhov twg hauv txua kev ntev hauv lub neej los, nyob rau tej hnub muaj kev kaj siab lossis yog tsaus ntuj, cia li pib ntawm tej yam uas me me: ib yam uas koj nco tshav ntuj. ntawd yog tus duab tshav thaum sawv ntxov, ib lub paj tawg zoo nkauj ntawm ntus kev, lossis ib lo lus xa xov nug moo. Ntau zaug, los ntawm tej yam me me ntawd, rov qab muaj kev zoo siab, thiab koj yuav pom tias: Vajtswv yeej nyob ntawd, nws ib txwm tsis tau tso koj tseg. cia lub siab nco tshav ntuj qhib kev kaj siab nkag los. thiab ntseeg tias Vajtswv tab tom ua yam zoo rau koj, txawm yog koj tab tom nyob qhov twg!
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply