Gơs ală bơta tơmlơh ò nggôr nggàc, ò cau lơi git, mơya gơ gơlik gơs ơm tòm nùs nhơm bol he kơp ngai. Hơ̆ là tŭ bồ dơngoh mơ nùs kòñ hwoai bol he hơ bar đah pha is. Tŭ bol he kòñ kis niam nùs Yàng, mơ ya gơkol ơniai gen sơlơ ngai sơlơ ngai bơh Kơnràñ. Mơ gen añ lùp is: “Ñchi bơh tai añ kư lơh ală broă mơ añ git loh la ò di lơh?” Digul bơta pơrdac tồi glài dô, kung găm sùm gơs dô nơm mpông lik klas bol he in: hơ̆ là să tòm Bơtau Krist, Bơtau neh phalin ala bol he in.
Ngai do, ngai 21/06/2025, Bơta Hòi Dan Kòp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl mò Miriam Drennan dê bơh tơnggumê BƠTA TƠMLƠH TÒM DƠLĂM
Sră Goh: “Bơh añ ò git wă bơta añ lơh; añ ò lơh bơta añ kòñ, mơya añ lơh bơta añ gơjrañ.” (Rôma 7:15)
“Bơh añ ò git wă bơta añ lơh; añ ò lơh bơta añ kòñ, mơya añ lơh bơta añ gơjrañ.” Hơ̆ là jơnau cau gơnoăr bơto Pol neh đơs tòm Rôma 7:15.
Oh mi gơlơh wi wơ ò tòm tŭ sền ală jơnau do? Ală gùng cih ông Pol dê oă dơ̆ kung gơs bơta long behơ̆. Oh mi mor gơlơh be geh bơta tơm lơh tòm dơlăm ồng, be là găm sền dô nơm plai kol dơp đah dô dơp đah nê. Nùs gen kơlôi sơnưng, nùs kòñ gen hwoai đah dô, broă lơh geh sơkềng đah nê – kư be la dô bơta coh pleai digùl bơta kơlôi sơnưng mơ nùs kòñ.
Plai prah la dô nơm bơta kơnhơl niam. Bulah oh mi la cau kơnhơl hala ming là cau sền gợi, bơta kơnhơl dô kung găm niam mơ gơlơh ò suc ò iang. Nhức la tom tŭ plai kư geh ăt hơđăng pah gợi, dơp đah nê dơp đah dô, cau lơi kung gơlơh ò iang gơn lăng cau kơnhơl lơi rơp la cau kơnhơl ò gơs plai.
Mơya “bơta tờmlơh tòm dơlăm” mơ ông Pol đơs tus tòm Rôma dăp 7 la ò niam dô ết lơi. Hơ̆ là bơta tơmlơh mơ cau lơi dòn Yàng gen nền cê kung neh lòt găn, lah pơrhơng is să tơm, mơ lùp is: “ Añ kòñ Yàng ngăn hala ò? Añ ngăn gơs bơta dòn hala ò?” Gơs dơ̆ oh mi gơlơh sơ ỏi ir, ming kòñ rùc wơl. Mơ ngăn, gơs dơ̆ bol he neh săng lơi ngăn.
Mơ ya Yàng gen ò behơ̆. Bơh sơnrơp, Kơnràñ git loh bol he la kòn mơnùs lơbơn lơño, gen tang behơ̆, Kơnràñ tus nàng dong bol he.
Bulah behơ̆, bulah neh git lam oă bơta, neh geh cơnđòa lòt ngai ngăn tòm gùng lòt jat Yàng, kung găm gơs dơ̆ nùs bol he wanh lơnggơh, kòñ ri wơl hơ đah nê. Digơlăn bơh bol he kah wơl ală ngai yau – ală ngai gơlơh be ní “Chò hơp rlau”, nggôr nggàc rlau, jôi geh oă priă rlau, geh ală cau sền dơng mang rlau… Mơ gen bol he kơlôi: “Hala ri wơl dô đau? Dô dơ̆ đau, gen he rơp wơl til mơ!”
Mơ bôl he jôi jơnau: bulah mbe lơi gen Yàng Jêsus kung neh phalin rau – ò càng pal kơlôi sơnưng oă ir?
Dingăn, ông Pol kung neh kơlôi lai bơh bơta hơ̆, mơ ôgn neh ơn bol he in dô sèng lùp song ngăn: “Behơ̆ ală broă oh mi neh lơh lài òr gen ñchi cồng nha geh taih? Mơ tŭ do lơh oh mi in ƀàssìl, lồi dut ală broă hơ̆ dê la bơta chơt.” (Rôma 6:21)
Tŭ do, jơh nùs tĕ lùp is să tòm – mơ lùp Yàng tai: Phăn “công nha” hơ̆ gơs dipal mơ bơta ring lơngai tòm nùs mơ oh mi geh gơs hala ò? Dilah oh mi sền dơng mang ngăn phăn bàn bơta kis găm sùm sùm Yàng ai, gen broă kơñ tis glài behơ̆ gơs di hala ò?
Crih crai ngăn tòm tŭ git ông Pol neh tơm lơh be bol hư. Ông ò pồn prăp, mơ cih wơl, nàng ală cau lơbơn be bol he geh kơ̆ nùs. Mơ ya đơs ngăn, oh mi sơ ỏi ò? Tòm tŭ kư kơnhơl bơta kơnhơl “dơp dô-dơp nê” do? Ơn tĕ jơh ală bơta Yàng in mơ kơnòm Kơnràñ bơntơl pràn nàng oh mi phalin ală bơta ơniai, bơh bơta gơklŏ Kơnràñ dê.
Dan jà bol he dô nùs bal tòm bơta hòi dan:
Khoai Yàng, gơs dơ̆ kòn gơkol ơniai nàng ri wơl rài kis yau. Dăn Kơnràñ toh glài kòn in. Dăn ai kòn in bơta pràn nàng ntao kơ̆, ai kòn in nùs kơ̆dơn nàng kơp gơn Kơnràñ lơh broă tòm nùs kòn, mơ dong kòn gơs bơta dòn tơl dơng nàng kòn sac kis niam nùs Yàng kơp ngai. Dăn Yàng ngui jơh pơnah yau klăm jơngo kòn dê, tơmgơl gơ gơlik gơs bơta niam nùs Kơnràñ. Kòn jơh nùs hôi dăn tòm sơđăn Yàng Jêsus Krist, Amen.
Ơ ală ồng mò oh mi kòñ gơboh, bơta tơmlơh tòm nùs bol he rơp sùm găm têng hơ̆, mơya kah tĕ lahbol he ò cơnđòa lòt dô nă. Yàng ò tŭ lơi săng lơi bol he, bulah bol he gơs wơl ngkơi mơ Kơnràñ nđờ dơ̆ – ming cang bol he git gơjràñ săng glài, gut ri wơl, mơ git sền dơng mang phăn bàn dong klas kas mang mơ Kơnràñ neh ai. Dilah ngai dô oh mi gơlơh he be găm ơm digùl “bơta tòmlơh tòm dơlăm”, ơm bơdơh tĕ mơ sền tơnggơr hơ chi pơng. Lơi tĕ bơta nđàc phalin. Mơ lơi tĕ nùs git ưnngai gơlik gơs bơta gơchôt dong oh mi pơnjat cơnđòa lòt, ò di tòm bơta pơnđơl prràn is, mơ la tòm bơta pràn tus bơh Hwềng Kơnràñ.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply