Hăm đei layơ buăl mơ̆ng kơtơ̆ng đei krao tơdŭ ‘măng mă lei ưh kơ băt kơ bu oei dơ̆ng tơ’ngoaih ưh? Lăm jơ kơplah ‘noh, lu bơ̆n ngăl đei tơchĕng ưh kơ băt wă pơih dah ưh? Yua kơ mưh lăp, pơih ‘măng ưh sĭ jơ̆ ăn kơ mĭnh ‘nu bơngai bu ‘noh mơ̆t tơlăm, mă kŭm jơ̆ pơdrơ̆ng sơng iŏk dôm kơ tơdrong tơplih ‘nao plơ̆ng lăm tơdrong arih kơ lu bơ̆n. Sơ̆p Hla Bơar ‘Bok Kei-Dei kŭm pơma gah mĭnh tơdrong krao tơdŭ ‘măng, mă lei ưh kơ trŏ truh đơ̆ng mĭnh ‘nu bơngai nai bơ̆n ưh kơ băt, mă truh đơ̆ng kơdih ‘Bok Dŏng Pơklaih Yang Yêsu. Sư tơdŭ ‘măng păng Sư krao lu bơ̆n. Tơdrong gĭt kăl jơ̆ lu bơ̆n hăm wă ăn kơ tơdrong pơdrơ̆ng pơih ‘măng ‘noh păng sơng iŏk Sư mơ̆t lăm tơdrong arih bơ̆n dah ưh?
Năr ‘nâu, ‘năr 24/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Shadia Hrichi kơ̆l ‘bai RŎ LĂNG KRĂ YANG OEI TƠDŬ ‘MĂNG?
Sơ̆p Hla Bơar ‘Bok Kei-Dei: “Dang ei Inh oei dơ̆ng tơ ‘ngoaih ‘măng wă krao iĕm. Bu kơtơ̆ng ‘bơ̆r Inh krao na pơih kơ Inh ‘măng, bơngai noh Inh wă mơ̆t oei hăm sư, sŏng sa hơdai sư.” (Tơdrong Tơ’bôh 3:20)
Brei mơ sơ̆, inh ‘măn jơ năr tơplih tơnang ‘măng tơm kơ hnam nhôn. Kơplah truh tơ tah hơmet, bơngai jang jet inh hăm ‘maih pơklep thim măt yang ưh- sư pơma khan lăp kăl tŏ sĕt phŭt wă kuer păng tah tơmơ̆t đĕch. Lăm kơ plah sư hơmet, inh kơdâu lĕch hăt hot tơ anih tĕch tơmam răt mĭnh pôm măt yang iĕ. Lăp dôm jĭt bâu đĕch, inh gơh lăng ‘bôh bu oei dơ̆ng tơ’ngoaih ‘măng adrol kơ kơplah pơdrơ̆ng hăm wă pơih ‘măng dah ưh.
Yua kơ tơpă, lăp mĭnh kơtơ̆ng krao tơdŭ ‘măng đĕch lei ưh kơ đei pơma kơ tơdrong kiơ. Lu bơ̆n ưh kơ gơh băt kơ bu oei dơ̆ng tơ’ngoaih, thoi noh lu bơ̆n tơchĕng giĕng ưh kơ băt hăm wă pơdrơ̆ng pơih ‘măng dah ưh. Păng nhen thoi kơdih Yang Yêsu kŭm hiơ̆k bơngơ̆t truh kơ rim ‘nu bơngai lăm lu bơ̆n tơlĕch tơdrong pơdrơ̆ng ‘nâu, kiơ̆ hăm mĭnh tơdrong oei praih păng đei tơchĕng hơlen hơđăl. Lăm Tơdrong Tơ’bôh 3:20, Nơ̆r ‘Bok Kei-Dei ăn kơ lu bơ̆n ‘bôh mĭnh rup pơdah juăt: Kră Yang Yêsu oei dơ̆ng tơ’ngoaih wă krao.
“Dang ei Inh oei dơ̆ng tơ ‘ngoaih ‘măng wă krao iĕm. Bu kơtơ̆ng ‘bơ̆r Inh krao na pơih kơ Inh ‘măng, bơngai noh Inh wă mơ̆t oei hăm sư, sŏng sa hơdai sư.”
Mă khan ‘nâu jơ̆ nơ̆r gơih ăn kơ đĭ Khŭl Bơngai Lui, mă lei lăm jơ ‘nâu, lu bơ̆n gơh hlôh Khŭl Bơngai Lui jơ̆ pơgơ̆p đơ̆ng rim kơ bơngai, dôm kơ pơhngol đơ̆ng đei tang ‘măng hăm Kră Yang. ‘Bok Pôl đei pơma lăm Rôm 3:11 khan
“Păng ưh kơ đei bu hlôh wao tơdrong ‘Bok Kei-Dei, yua kơ ưh kơ đei bu wă chă Sư.”
Sơ̆p Hla Bơar ‘Bok Kei-Dei pơtho khan: yua kơ jơhngơ̆m ‘mêm mơnat păng tơdrong mơnat ăn đĕch tih dêh, Kră Yang đei chă lu bơ̆n! Păng tơdrong tơ’bôh rơđah hơđăl hloh ‘noh bơih: ‘Bok Dŏng Pơklaih Yang Yêsu kĕ chơ̆n dơ̆ng tơ’ngoaih ‘măng păng krao, chang gô lu bơ̆n sơng iŏk Sư!
Rup pơdah tơnang ‘măng lăm trong Sơ̆p Hla Bơar ‘Bok Kei-Dei ‘nâu ngăl đei hlôh nhen thoi jơ̆ tang măt ăn kơ jơhngơ̆m đơ̆ng rim ‘nu bơngai. Mă hlôh kiơ̆ thoi yơ, lu bơ̆n kŭm ưh kơ gơh ưh kơ pơdrơ̆ng mĭnh tơdrong: Kră Yang ưh kơ ăn bơngai tơgah lăm đei khan lăng bu oei krao. Yua kơ Sư ưh kơ sĭ tơdŭ ‘măng, mă Sư kŭm đei tơlĕch nơ̆r. Sơ̆p Hla Bơar ‘Bok Kei-Dei chih: “Bu kơtơ̆ng ‘bơ̆r Inh krao…” Buăl hăm đei layơ jet kơdih: Kră Yang Yêsu oei pơma kiơ hăm buăl đơ̆ng tơ‘ngoaih ‘măng oei tang ‘noh?
Trong lăm Sơ̆p Hla Bơar ‘Bok Kei-Dei adrol ‘noh kŭm đei tơ’bôh kơ lu bơ̆n: “ Athei tơbral kơdih tơdrong yoch” (Tơdrong Tơ’bôh 3:19). ‘Nâu jơ̆ mĭnh nơ̆r pơtho tơ’bôh pơ’lơ̆ng mă lei nơ̆r tơdrăp, tơ’blŏk kơ lu bơ̆n wih rŏng kơ tơdrong ưh kơ đei hiơ̆k tơchĕng, ưh kơ bơngơ̆t. Mă khan thoi noh, tơdrong rơih iŏk oei đơ̆ng lăm lu bơ̆n. Mă khan kơtơ̆ng nơ̆r Sư, lu bơ̆n oei gơh pơdrơ̆ng ưh kơ pơih ‘măng. Sư ưh kơ pơgŏ lu bơ̆n.
Thoi noh tơdrong kiơ gô truh tơdah bơ̆n pơdrơ̆ng pơih ‘măng? Lei Kră Yang hăm drong mơ̆t păng tơ’bôh hloi dôm lu tơdrong yoch glăi lăm tơdrong arih đơ̆ng lu bơ̆n ưh? Đei bơngai mơ’nah ưh kơ pơ̆n ưh kơ wă krao Kră Yang mơ̆t, yua kơ tơchĕng khan Sư lăp truh wă sek tơlang, wă hil phak, păng tơplih tôm tơdrong lăm hnam. Mă lei Sơ̆p Hla Bơar ‘Bok Kei-Dei ưh kơ pơma thoi noh.
Nơ̆r Kră Yang pơtrơp: “Inh wă mơ̆t oei hăm sư, sŏng sa hơdai sư.” Kră Yang Yêsu tơdŭ ‘măng ưh kơ trŏ wă pơma hil, mă wă pơjing tơdrong pơgơ̆p hơdai hăm lu bơ̆n. Sư ưh kơ pơrăm ‘măng mơ̆t, kŭm ưh kơ truh hăm tơdrong tơ’bôh sek tơlang. Sư truh wă ăn tơmam ăn đĕch, pơjao ăn kơdih akâu Sư, wă kơ đơ̆ng Sư, lu bơ̆n gơh jing kon ‘Bok Kei-Dei.
Thoi Yôhan 1:10-12 đei chih: “Teh bơ̆n âu đơ̆ng Sư pơjing mơ̆n, na kơplah Sư oei tơ ala teh âu sơ̆ lu bơngai ala teh âu ưh kơ băt kơ Sư. Sư jur tơ teh đak Sư kơdih, mă-lei lu buăl Sư ưh kơ wă sơng iŏk Sư. Na dôm lu bơngai mă sơng iŏk Sư tơpă păng dôm lu bơngai lui kơ Sư, Sư ăn kơ lu bơngai ‘noh jing kon ‘Bok Kei-Dei.”
Apĭnh đĭ đăng krao khan hơdai:
Kơkuh kơ ‘Bok Dŏng Pơklaih Yang Yêsu ‘mêm mơnat, kon bơnê kơ Ih yua kơ Ih oei kĕ chơ̆n dơ̆ng tơ’ngoaih ‘măng jơhngơ̆m kon păng krao. Đei dôm kơplah kon hrăt hrot, đei kơplah kon ưh kơ đei hiơ̆k tơchĕng, păng kŭm đei kơplah kon hli tơrơ khan kơdih ưh kơ ‘lơ̆ng tôm wă gơh sơng iŏk Ih. Bơnê kơ Kră Yang đei tơgŭm kon băt kơnăl kơ Ih păng gơh pơih jơhngơ̆m kon wă sơng iŏk Ih. Apĭnh oei pơgơ̆r lăm tơdrong arih kon, pơm ‘Bok Dŏng Pơklaih păng pơm Yŏng, păng hơdai hăm kon lăm tôm tơdrong. Kon kŭp kơ̆l krao khan hăm anăn Yang Yêsu Krist, A-men.
Ơ lu bơngai mơ̆ng mă ‘mêm kơeng, ‘Bok Kei-Dei ưh kơ pơgŏ kơ mĭnh ‘nu bơngai bu pơih ‘măng dah sơng iŏk Sư. Sư kĕ chơ̆n dơ̆ng tơ’ngoaih, tơdŭ ‘măng, krao anăn lu bơ̆n, păng chang gô. Sư gô mĭnh pôm ‘măng đei pơih đơ̆ng lăm jơhngơ̆m, hăm tơdrong lui ngeh păng tơdrong chu iŏk đon hơla wă sơng iŏk Sư mơ̆t tơ lăm. Tơdah năr ‘nâu buăl mơ̆ng kơtơ̆ng nơ̆r Sư, apĭnh ‘nĕ kơ yak yoh. Athei pơih jơhngơ̆m bĕ. Yua kơ Sư ưh kơ truh wă sek tơlang, mă wă pơgơ̆p hăm buăl. Wă kơ đơ̆ng noh, buăl gơh hiôk chơt sơng iŏk tơdrong pơgơ̆p hơdai đei pŭn hiôk hăm ‘Bă kơpal plĕnh.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!
Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.
Leave a Reply