Thaum peb taug kev txhua hnub, hais txog “kev nkhaus” peb hnov cuag li tsis xav mus vim yuav poob sijhawm ntau thiab poob zog ntau. Peb tsuas xav mus ib txoj kev ncaj ncaj kom txog chaw xwb. Tiamsis, koj puas paub tias cov neeg Yixalayees thaum ub lawv taug txoj kev nkhaus 40 xyoo vim Vajtswv coj lawv taug txoj kev ntawd? Tsis paub txoj kev nkhaus uas Vajtswv coj koj puas yog txoj kev tsis muaj qab hau, lossis nws yog ib feem hauv Vajtswv lub homphiaj loj?
Hnub no, yog hnub 22/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Diane Pearson dhau ntawm Zaj kawm NROG TUS TSWV MUS NTAWM TXOJ KEV NKHAUS
Vajluskub: “Yog li ntawd, Vajtswv thiaj coj lawv taug kev raws tiaj suabpuam mus rau tom Hiavtxwv Liab” (Khiavdim 13:18a)
Txhua hnub, Joyce tsav tsheb ntawm nws tsev mus txog rau nws qhov chaw ua haujlwm tib txoj kev xwb, mus dhau ntau txoj kev me. Nws hais tias:
“Txhua zaug thaum lub kaum hli los txog, kuv hnov nyuaj siab, vim ntawd yog lub sijhawm uas kuv tus ntxhais tau tag sim neej.
Xyoo no, txoj kev nyuaj siab cuag li nyhav dua. Caij nplooj ntoo zeeg xyoo no los txog qeeb kawg, thiab tsis zoo li txhua xyoo.
Thaum tab tom tshav tsheb dhau tej zej zos kuv ntsib ib txoj kev hlau muaj kev ncauj loj heev tab tom kaw qhov rooj kho kev, kuv yuav tau mus txoj kev nkhaus. Txawm yog tsis zoo siab pes tsawg los kuv kuj nrhiav tsis tau lwm txoj kev mus. Kuv yeej tsis nco tias zaum kawg kuv taug txoj kev no yog thaum twg, tiamsis thaum tsav tsheb ib leeg ntawm txoj kev nce roob me me, muaj ib qhov zoo tshwm tuaj ntawm kuv lub qhov muag: ntawd yog muaj ib cov ntoo lub caij nplooj ntoo zeeg zoo nkauj heev uas kuv tau ntsia pom. Txoj kev zoo nkauj ntawd ua rau kuv nyob ntsiag to.
Tas kuv mam nkag siab tias: Vajtswv coj kuv taug txoj kev nkhaus ntawd kom kuv pom txoj kev zoo nkauj kawg nkaus hauv ib puas tsav yam uas Vajtswv tsim los. Qhov no txhawb tau kuv lub zog thiab kuv lub siab tag nrho hnub ntawd”.
Dhau ntawm tej uas kuv ntsib dhau no, Joyce pom tias qhov uas tav kev no yog los ntawm Vajtswv los, thiab Vajtswv lub homphiaj yog xav kom nws txais tau tej koob hmoov zoo thiab txhawb nws thaum muaj kev nyuaj siab thiab nws tej kev quaj ntsuag.
Tsis paub Vajtswv puas siv tej kev nkhaus ntawd los pab kom peb saj tau Vajtswv ntau dua? Lo lus teb tias muaj! Kuv txais tau lo lus teb meej meej rau qhov no thaum kuv kawm Vajluskub. Ntawd yog zaj xwm txheej cov neeg Yixalayees tau Vajtswv coj lawv dim ntawm txoj kev ua cev qhev tim tebchaws Iziv. Khiavdim 13:17-18 sau li no:
“Thaum Falaus tso cov Yixalayees lawm, Vajtswv tsis coj lawv taug txojkev uas raws ntug hiavtxwv ncaj nraim mus rau pem tebchaws Filitees, txawm yog txoj kev ntawd ze los nws tsis coj lawv mus txoj ntawd. Vajtswv xav hais tias, “Kuv tsis xav kom cov Yixalayees hloov siab khiav rov qab mus rau nram lub tebchaws Iziv thaum muaj kev sib ntaus siab tua ntawm kev.” Yog li ntawd, Vajtswv thiaj coj lawv taug kev raws tiaj suabpuam mus rau tom Hiavtxwv Liab. Thaum cov Yixalayees taug kev tawm hauv lub tebchaws Iziv los, lawv yeej npaj cuabyeej ua rog nrog ncig tos sib tua thiab xwb.”
Hiav txwv liab yog qhov chaw ntsia pom Vajtswv nthuav tawm Vajtswv lub hwjchim uas loj tshaj plaws: Vajtswv cais dej rau cov neeg Yixalayees hla dhau zoo li av qhuav. Nyob hauv Vajtswv lub homphiaj, Vajtswv tau cia cov pej xeem taug txoj kev nkhaus ntawd.
Yog tib neeg, peb muaj tus cwjpwm ua tsis tshua taus siab ntev. Peb xav kom yus txhua lub homphiaj yuav tau tshwmsim los zoo; tiamsis, muaj ntau zaug Vajtswv xav kom peb maj mam thiaj ntsia pom tej yam zoo. Yog haiv neeg Yixalayees tsis mus kev nkhaus, lawv yuav tsis muaj hnub ntsia pom hiav txwv liab cais dej ntawm lawv qhov muag, yog ib qhov txujci ua rau tus twg twb ceeb thiab xav tsis thoob.
Tus cev lus Yaxayas, yog tus tau saj tau Vajtswv lub hwjchim, kuj hais khov kho tias txhua qhov txujci puav leej yog los ntawm Vajtswv txhais tes los. Yawg sau: “Cia neeg ntiajteb porn thiab paub hais tias kuv yog tus Tswv uas ua tej no. Lawv thiaj yuav paub hais tias haivneeg Yixalayees tus Vajtswv dawbhuv yog tus uas tsim tej no” (Yaxayas 41:20).
Nyob hauv lub neej, thaum Vajtswv coj koj mus dhau “txoj kev nkhaus” txhob maj qaug zog. Cia li thov Vajtswv ua tus coj kev, thiab qhib lub qhov muag kev ntseeg tos, saib saib Vajtswv puas tab tom ua haujlwm raws li txoj kev uas koj xav tsis thoob. Tej zaug, nyob hauv txoj kev cuag li nkhaus ntawd, koj yuav tau txoj koob hmoov loj uas koj tsis tau xav txog ib zaug li.
Thov caw nrog kuv peb thov Vajtswv ua ke
Tus Tswv Koj yog tus coj kuv kev! Kuv lub siab nco koj tshav ntuj txawm yog thaum kuv taug tej kev nkhaus hauv lub neej, koj yeej nyob ntawd thiab coj kuv kev. Thov Vajtswv pab kom kuv ntseeg siab rau koj lub homphiaj thiab koj txoj kev rau kuv lub neej, txawm yog yuav mus dhau tej kev txomnyem thiab kev nyuaj siab los, kuv paub tias koj yeej nyob ntawd foom hmoov thiab rub kuv tes. Kuv thov hauv Tswv Yexus Khetos lub npe. Amees.
Cov kwv tij, ntau zaug Vajtswv yuav tsis coj peb taug txoj kev ncaj ncaj, tiamsis siv tej kev nkhaus los pab kom peb saj tau Vajtswv tob dua. Yog li, txhob tag kev cia siab lossis ua xyem xyav rau Vajtswv lub homphiaj tseg rau koj, pauv rau qhov ntawd, nco Vajtswv tshav ntuj thiab nrhiav Vajtswv ua tus coj.
Vajtswv coj cov neeg Yixalayees mus kev nkhaus tsis yog vim Vajtswv tsis muaj hwjchim txaus, tiamsis Vajtswv paub yam twg yog yam zoo rau lawv. Hnub no, koj kuj yuav tau paub tias Vajtswv tab tom siv tej kev nkhaus ntawd los cob koj, qhia koj kom paub mloog lus, paub ntseeg nws, thiab thaum kawg yog npaj rau koj nkag mus rau hauv thaj av “cog lus tseg” zoo uas Vajtswv yuav pub rau koj.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply