Xam tias thaum no koj twb “mus nto ntsis” nyob hauv txoj kev nrog tus Tswv mus. Koj tab tom ua Vajtswv haujlwm tau zoo, ua rau Vajtswv tau koob meej, tau sawv daws qhuas. Tiamsis xwb tim, txhua yam cia li yaj tshis. Thaum lub samthiaj tua teeb, thaum tej suab npuaj tes qhuas ploj lawm… tsis paub koj tshuav dabtsi? Peb pheej xav tias yus tsuas muaj nqis pub rau Vajtswv thaum tseem muaj zog, tseem ua tau, thiab ua tiav dejnum zoo. Tiamsis, tej zaum nyob rau lub sijhawm qaug zog tshaj thiab tsis muaj zog tshaj, Vajtswv ho ua tej yam uas muaj zog thiab yam xav tsis thoob hauv peb lub neej. Tej zaug, los ntawm tej qhov tawg uas hnov cuag li tsis muaj qab hau, Vajtswv lub tebchaws tau muab puab kom ruaj khov.
Hnub no, yog hnub 23/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Bill Gaultiere dhau ntawm Zaj kawm UA NEEJ RAU TUS TSWV LOS NTAWM TEJ YAM PHEEJ TSHAJ
Vajluskub: “Rau qhov Vajtswv lub tebchaws tsis yog kev noj kev haus, tiamsis yog kev ncaj ncees, kev thajyeeb thiab kev zoo siab uas Vaj Ntsujplig tus Dawbhuv pub rau peb” (Loos 14:17)
Dieter Zander muaj ib ntu yog ib tug xibhwb nto npe heev nyob tebchaws Mekas. Nyob rau ntu 1980, yawg yog thawj tus uas tsim muaj Pawg Ntseeg pub rau cov hluas GenX- yog ib yam tshiab thaum ntawd. Tomqab no, yawg ua tus thawj rau txoj haujlwm “Axis” hauv Pawg Ntseeg Willowcreek nyob Illinois, ua haujlwm pab rau cov hluas, lawv pab ntawv muaj kuv ob tug kwv tib si.
Kuv yeej tseem nco muaj ib zaug los saib tsev, kuv tau mus saib lub Pawg Ntseeg Willowcreek thiab pom Dieter tab tom ntaus lub taub dương cầm, ke qhuab qhia ntawm tsheej pua tus hluas xub ntiag. Thaum nkag mus rau hauv kuv ceeb tag. Muaj txoj kev kub siab lug. Suab nkauj nrov ntxhia txhua qhov, thiab yawg zaj lus qhuab qhia ua rau sawv daws tau txhawb zog. Tseeb tiag yawg yog ib tug neeg uas ua rau sawv daws caum qab – ke yog tus ntaus nkauj, ke yog tus qhuab qhia, thiab kuj yog tus kws sawv daws nyiam.
Yawg ua tiav qhov haujlwm no mus rau qhov haujlwm tod. Dieter tuaj mus rau San Francisco pab cov xibhwb ntaus nqi rau txoj kev tsim tsa Pawg Ntseeg, tshwj xeeb yog tseg rau cov hluas. Cuag li txhua lub qhov rooj tab tom qhib rau tom ntej.
Tiamsis, ncaj rau hnub 4/2/2008, Dieter cia li raug tus mob tuag ib ce ua rau yawg tsis nco qab. Tau rau hnub yawg thiaj tsim los, tiamsis txhua yam hloov pauv tag. Tuag sab tes xis- yawg ntaus tsis lo taub lawm. Yawg lub suab hais tsis tsheej lus- thaum no tsuas yog tej lus tsis meej, tsis nkag siab lawm xwb. Yawg hu tsis tau nkauj, qhuab qhia tsis tau ntxiv. Daim duab sawv saum sam thiaj muab kaw cia. Tsis muaj tej suab npuaj tes ntxiv. Txhua lub sijhawm ua haujlwm, koob npe puav leej ploj tag. Txhua yam cuag li yaj tshis ua pa lawm xwb.
Tiamsis yam xav tsis thoob yog yawg lub hlwb meej pem heev. Yawg yog ib tug neeg txawj ntse, nws tej tswv yim yeej tseem tob li qub, tsuas yog yawg hais tsis tau ua lus li yav tas lawm. Ua mus ua tuaj tej neeg ib ncig lawv nkees thaum yuav tau siv zog kom totaub yawg, thiab ib tug zuj zus tso yawg tseg. Yawg nyob ib leeg, raug kaw rau hauv yawg lub hlwb los ntawm qhov uas yawg hais tsis taus lus. Tiamsis nyob rau qhov chaw nyob ib leeg ntawd, ho muaj ib lub suab hais maj mam hauv yawg lub siab:
“Cia li ua twjywm thiab paub tias kuv yog Vajtswv” (Ntawv Nkauj 46:10).
Ntau xyoo tom qab yawg thiaj sau: “Tag nrho tej kev xav, kev ntshai, tej lo lus hais luag ua si hauv kuv lub taub hau uas kuv hais tsis tau ua lus – Vajtswv puav leej hnov. Kuv hnov tau txhawb zog, muaj kev kaj siab, nrog rau Vajtswv lub suab luag tib si.”
Tom qab raug tus mob tuag ib ce, Dieter pib ib lub neej tshiab. Tsis yog ib tug xibhwb nto npe, yawg ua ib tug zov kev, yawg qhov haujlwm yog pab tej menyuam hla kev. Tomqab ntawd yawg ua haujlwm hauv tej tsev muag khoom, ntawm tej qhov chaw tsis muaj neeg quav ntsej txog, Vajtswv qhia yawg ib zaj kawm tob tob tias: hlub tej neeg zej zog – tsis yog tias yuav tau nyob saum sam thiaj, tsis yog vim lawv tej suab npuaj tes, tsuas yog vim Vajtswv hlub yawg xwb. Yawg suav tias yawg lub neej tamsim yog “ua neej pub rau Vajtswv nyob ntawm txhua yam cuag li tsis tseem ceeb”. Ntawd yog qhov chaw uas txhua yam dhau los ua ua kev pehawm fij pub rau Vajtswv.
Ntseeg tias koj kuj txais tau ib yam li kuv: Dieter lo lus hais thaum no muaj zog thiab zoo tshaj! Yawg ua rau peb pom txog ib qhov tseeb uas tseem ceeb: Pehawm Vajtswv tsis yog tej uas peb ua rau saum sam thiaj, tiamsis yog txoj kev uas peb ua lub neej sib hlub txhua hnub, thaum tsis muaj leej twg ntsia pom, thaum uas tsuas muaj peb thiab Vajtswv xwb. Pehawm tsis tas yuav muaj tej suab nkauj nrov zoo, lossis sawv daws npuaj tes nrov nrov, tiamsis yog txoj kev uas peb mus ntsib Vajtswv los ntawm peb tus kheej uas tsis muaj zog nrog tus ntsujplig tseeb (Yauhas 4:24).
Dhau ntawm Dieter zaj xwm, peb ntsia pom ib daim duab zoo txog Tswv Yexus tus ntoo khaub lig- tau nthuav tawm nyob rau hauv peb tib neeg lub neej txhua hnub.
Vajtswv tsis thuam tej uas peb tau ua yuam kev hauv peb lub neej. Vajtswv muaj cuab kav pauv tej uas cuag li tsis tseem ceeb, tej nrim, tej ua tsis tau, dhau los ua ib feem nyob hauv Vajtswv lub tebchaws ci ntsa iab, kom Vajtswv lub siab nyiam tau ua nyob rau hauv peb lub neej. Thiab ntawm no thiaj yog ib txoj koob hmoov loj!
Ib yam li Vajtswv tej lus tau ntuas peb hauv Loos 14:17:
“Rau qhov Vajtswv lub tebchaws tsis yog kev noj kev haus, tiamsis yog kev ncaj ncees, kev thajyeeb thiab kev zoo siab uas Vaj Ntsujplig tus Dawbhuv pub rau peb.”
Niaj hnub nim no, Dieter yeej tseem ua Vajtswv haujlwm, tiamsis los ntawm lwm txoj kev. Txawm yog hais tsis meej los, yawg siv yawg lub peev xwm dhos duab los tham txog tej zaj xwm txheej uas Vajtswv tau qhia rau yus. Phau ntawv A Stroke of Grace (txhais tias: “Txoj kev tuag ib ce hauv txoj kev hlub”) yog ib zaj xwm txheej luv, yooj yim tiamsis ua rau pom txog Vajtswv txoj kev ua haujlwm zoo ntawm yus thiab Vajtswv, los ntawm tag nrho lub siab thiab txo hwjchim.
Thov caw nrog kuv peb thov Vajtswv ua ke
Kuv tus Vajtswv, muaj tej lub sijhawm kuv hnov cuag li kuv tsis muaj nqis dabtsi, tsis muaj zog, hnov cuag li kuv lub neej pob puas tas, tiamsis Koj yeej tseem ntsia pom kuv. Kuv ua Vajtswv tsaug! Thov Vajtswv qhia kuv kom kuv paub pehawm koj, tsis yog los ntawm sab nraud ci nploos, tsis yog los ntawm tej haujlwm uas ua rau lwm tus lees yuav. Tiamsis thov Vajtswv pub kom kuv pehawm koj los ntawm kuv tus neeg tiag tiag, nrog kuv tej kev qaug zog, kuv txoj kev tsis xyuam xim thiab lub siab puas ntsoog. Thov pab kom kuv ua neej pub rau koj nyob hauv tej yam uas cuag li tsis tseem ceeb hauv lub neej. Kuv thov hauv Tswv Yexus Khetos lub npe. Amees.
Cov kwv tij, lub siab pehawm Vajtswv, ua Vajtswv haujlwm, ua neej pub rau Vajtswv, tsis raug ntsuas los ntawm tej lub sam thiaj loj lossis tej suab npuaj tes qhuas. Yam muaj nqis ntawm txoj kev pehawm tiag yog: Peb lub siab puas yuav tig mus rau ntawm Vajtswv tiag tiag? Txawm yog tsis muaj neeg ntsia pom, txawm yog thaum peb lub neej tsuas yog tej daim txhais khis pov rau ub rau no. Yog tias hnub no koj pom tias yus tab tom nyob rau ntawm ib qhov chaw tsis muaj dabtsi tseem ceeb, ntsiag to, cuag li tsis muaj nqis dabtsi fij pub rau Vajtswv… ces nco ntsoov tias hauv qhov tob tob ntawd, Vajtswv tab tom tos koj. Nws tos koj txhawb koj zog thiab hloov koj tus ntsujplig. Nws yuav siv koj rau txoj kev tshiab, muaj zog dua, tseeb dua, thiab ua rau Vajtswv tau koob meej dua yav tas los.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply