Puas tau muaj zaum twg koj hnov khob qhov rooj tiamsis tsis paub leej twg tab tom nyob sab nrauv? Lub sijhawm ntawd, peb ua xyem xyav tsis paub puas yuav qhib los tsis qhib? Vim muaj ntau zaug, qhib qhov rooj tsis yog cia ib tug neeg twg nkag los, tiamsis tseem yog txoj kev txiav txim tej kev hloov pauv tshiab hauv peb lub neej. Vajluskub kuj hais txog lub suab khob qhov rooj, tiamsis tsis yog ib tug qhua deb deb, tiamsis yog Tswv Yexus kiag. Nws khob qhov rooj thiab Nws hu peb. Qhov tseem ceeb tsis paub peb puas yuav npaj txhij qhib lub qhov rooj ntawd thiab txais yuav Tswv Yexus los rau hauv peb lub neej?
Hnub no, yog hnub 24/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Shadia Hrichi dhau ntawm Zaj kawm PUAS YOG VAJTSWV TAB TOM KHOB QHOV ROOJ?
Vajluskub: “Kuv sawv sab qhovrooj nraud thiab khob; yog leejtwg hnov kuv khob thiab qhib qhovrooj rau kuv, kuv yuav los hauv tus ntawd lub tsev. Kuv yuav nrog nws noj mov thiab nws yuav nrog kuv noj mov” (Tshwmsim 3:20)
Tsis ntev los no, kuv tseg sijhawm los pauv lub qhov rooj rau kuv tsev neeg. thaum kuv tab tom dhos, tus kws ua qhov rooj nug kuv tias puas xav dhos ib lub qhov muag saib ntawm lub qhov rooj – nws hais tias tsuas poob ob peb feeb los tho xwb ces dhos kiag tau rau. Thaum nws tab tom npaj, kuv khiav khiav mus yuav tom chaw muag khoom yuav ib lub qhov muag me me los. Tsuas poob kaum puav txhiab xwb, kuv muaj cuab kav ntsia pom leej twg tab tom nyob sab nraud khob ua ntej yuav txiav txim qhib lossis tsis qhib.
Rau qhov tseeb tiag, tsuas hnov khob ib zaug xwb ces yeej hais tsis tau dabtsi. Peb yeej tsis paub leej twg tab tom sawv sab nraud, yog li peb thiaj ua xyem xyav tsis paub puas yuav qhib los tsis qhib. Thiab cuag li Tswv Yexus Nws kuj tshua txog qhov uas peb txhua tus yuav txiav txim siab li cas, puas meej pem thiab ua tib zoo xav zoo zoo. Nyob hauv Tshwmsim 3:20, Vajluskub qhia rau peb pom txog ib daim duab uas ib txwm muaj: Tswv Yexus tab tom sawv sab qhov rooj nraud thiab khob.
“Kuv sawv sab qhovrooj nraud thiab khob; yog leejtwg hnov kuv khob thiab qhib qhovrooj rau kuv, kuv yuav los hauv tus ntawd lub tsev. Kuv yuav nrog nws noj mov thiab nws yuav nrog kuv noj mov”
Txawm yog ntawm no yog cov lus xa rau tag nrho Pawg Ntseeg los, nyob rau lub sijhawm no, peb yuav nkag siab tias Pawg Ntseeg yog qhov chaw uas txhua tus tuaj ua ke, tej ntsujplig tab tom kaw qhov rooj tsis qhib rau Tswv Yexus. Paulus hais nyob hauv Loos 3:11 tias: “Tsis muaj ib tug to taub lossis nrhiav Vajtswv li” Vajluskub qhia tias: vim txoj kev hlub tshua thiab kev hlub loj, Vajtswv nrhiav peb! thiab qhov pov thawj meej tshaj plaws yog: Tswv Yexus ua siab ntev sawv sab nrauv khob qhov rooj, tos peb txais yuav Nws!
Daim duab lub qhov rooj nyob hauv nqe Vajluskub no tau nkag siab tias sawv cev rau txhua txhia tus lub siab. Txawm yuav nkag siab raws lub ntsiab twg los, peb yuav tsis lees ob yam no tsis tau: Vajtswv tsis cia tus neeg sab hauv twv saib leej twg tab tom khob. Rau qhov Vajtswv tsis yog tsuas khob xwb, tiamsis tseem hu thiab. Vajluskub sau: “Yog leej twg hnov kuv lub suab…” koj puas tau muaj zaum nug tias: Tswv Yexus tab tom hais dabtsi rau koj sab nraum lub qhov rooj ntom nti ntawd?
Nqe Vajluskub ua ntej ntawd tej zaug muaj feem ua rau peb nco txog: “Kuv yeej cem thiab ntuas txhua tus uas kuv hlub” (Tshwmsim 3:19). Ntawm no yog ib lo lus ntuas maj mam tiamsis nws kuj nruj, ntuas kom peb tso txoj kev ua xyem xyav tseg. txawm li los, txoj kev xaiv nws yeej nyob ntawm peb. Txawm yuav hnov Vajtswv lub suab los, peb muaj cai qhib lossis tsis qhib. Vajtswv tsis quab yuam peb.
Yog li yam dabtsi tab tom tshwmsim tuaj yog peb txiav txim siab qhib? Tsis paub Tswv Yexus puas txeem kiag los taw tes rau tej uas peb ua yuam kev hauv lub neej? Muaj qee tus tsis kam caw Tswv Yexus nkag los, vim xav tias Tswv Yexus tsuas yog los txiav txim, los cem, thiab hloov pauv txhua yam hauv tsev xwb.
Tiamsis Vajluskub tsis hais li ntawd. Vajtswv txojlus sau: “Kuv yuav los nrog tus ntawd noj hmo ua ke” Tswv Yexus khob qhov rooj tsis yog los cem, tiamsis yog tsim kom muaj txoj kev sib raug zoo ua ke nrog peb. Tswv Yexus tsis txeem los, kuj tsis yog los nrog txoj kev txiav txim. Nws los muab pub, muab Nws tus kheej pub, kom dhau ntawm Nws, peb thiaj muaj feem tau ua Vajtswv tus menyuam.
Ib yam li Yauhas 1:10-12 sau: “Txojlus ntawd twb los nyob hauv ntiajteb no lawm, thiab Vajtswv kom nws tsim lub ntiajteb, tiamsis ntiajteb tsis paub nws. Nws los rau hauv nws lub tebchaws, tiamsis nws haivneeg tsis lees yuav nws. Txawm yog li ntawd los cov neeg uas lees yuav nws thiab ntseeg nws, nws pub lawv muaj cai los ua Vajtswv cov menyuam.”
Thov caw nrog kuv peb thov Vajtswv ua ke
Kuv tus Tswv Yexus, kuv ua Koj tsaug vim Koj ua siab ntev nyob sab nraud khob qhov rooj. Muaj tej lub sijhawm kuv tsis khoom, muaj tej lub sijhawm kuv ua xyem xyav, thiab kuj muaj tej lub sijhawm kuv ntshai tsam yus zoo tsis txaus los txais yuav koj. Ua Vajtswv tsaug tau pab kuv paub Koj thiab qhib kev rau kuv txais yuav koj. Thov los kav kuv lub neej, ua kuv tus Vajtswv thiab tus Tswv, nrog kuv txhua lub sijhawm. Kuv thov hauv Tswv Yexus Khetos lub npe. Amees.
Cov kwv tij txhua tus, Tswv Yexus tsis quab yuam ib tus twg qhib qhov rooj lossis txais tos Nws. Nws ua siab ntev sawv sab nrauv, khob qhov rooj, hu peb lub npe, thiab tos. Tswv Yexus tos kom muaj ib lub qhov rooj qhib puag hauv lub siab tuaj, los ntawm txoj kev ntseeg, txo hwjchim txais yuav Nws los rau hauv. Yog tias hnub no koj hnov Nws lub suab, thov txhob hnov qab. Qhib siab los. Vim Vajtswv tsis yog los txiav txim, tiamsis yog sib txuas lus ua ke nrog koj. Kom dhau ntawd, koj yuav zoo siab txais yuav txoj kev sib raug zoo nrog Leej Txiv saum ntuj ceebtsheej ua ke.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply