Puas muaj zaum twg koj ua ib yam dabtsi twg txhaum, thiab txawm yog twb siv zog kom hnov qab, siv zog muab zais cia, los lub siab yeej tsis tus? Koj paub tias koj tau ua rau Vajtswv nyuaj siab. Tiamsis koj ho khiav nkaum, nrhiav txhua txoj kev los hais daws yus zaj, thiab xav tias “Vajtswv nkag siab” tiamsis, muaj ib yam tab pov tias: Vajtswv tsis muaj ib zaum twg yuav hnov qab kev txhaum. Thaum Vajtswv hu tias nws yog kev txhaum, ces yeej yog kev txhaum, peb yuav tsis lam ua txuj hnov qab tau. Vajtswv yeej tseem tos ntsoov peb rov qab los, tsis yog tos peb los nplawm, tiamsis kho kom peb zoo, thiab pab peb dua.
Hnub no, yog hnub 25/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Martha Noebel dhau ntawm Zaj kawm THAUM VAJTSWV SUAV TIAS “NTAWD YOG KEV TXHAUM”
Vajluskub: “Thaum ntawd kuv lees kuv tej kev txhaum rau koj, kuv tsis zais tej uas kuv ua txhaum ib qho li, kuv lees kuv tej kev txhaum huv tibsi rau koj, thiab koj zam tagnrho kuv tej kev txhaum huv tibsi mus” (Ntawv Nkauj 32:5)
Koj puas ntshaw kom yus lub neej sab ntsujplig muaj kev pauv dua tshiab? Thaum ntawd, txhob hnov qab lees txim thiab tso kev txhaum tseg yog thawj kaujruam tseem ceeb heev. Peb yuav tau mus cuag Vajtswv thiab thov Vajtswv tiag tiag: “tus Tswv, puas tseem tshuav yam dabtsi hauv kuv lub neej tab tom tav kuv ua rau kuv txais tsis tau tag nrho tej uas koj npaj tseg rau kuv?”
Yuav zoo li cas yog tias peb pom tias tej uas yus tab tom ua ntawd ho yog kev txhaum? Thaum peb cia Vajtswv txhais tes chwv txog peb lub siab, Vajtswv ceeb toom thiab taw ncaj qha rau ib yam twg ntawd tias yog “kev txhaum”, ces peb yeej tsis txaus siab li. Peb xav muab tej uas peb ua txhaum ntawd hu los ntawm ib lub npe “yooj yim mloog” dua, lossis yuav lees tias yog kev txhaum. Lossis txawm yog paub tias yog kev txhaum, los peb ho sau tsheej plas lus los hais daws peb zaj.
Tiamsis tsis paub peb puas hnov qab tias: thaum Vajtswv hu yam twg yog kev txhaum, ces qhov ntawd yog kev txhaum, txawm yog peb yuav hais daws npaum twg? Peb puas cheem tsum rov qab tshab dua ib zaug ntxiv tias: ntawm Vajtswv xub ntiag, yeej tsis muaj kev txhaum loj lossis me, kev txhaum yeej yog txhaum? Puas muaj zaum twg peb cim civ dag peb, txog qhov uas xav tias Vajtswv lub siab yuav ntaug thaum peb hais daws peb zaj, thiab ua txuj li uas tsis pom tej kev txhaum peb ua? Puas muaj yam twg hauv peb lub siab suav tias: Vajtswv “twb hnov” qab feem uas tej kev txhaum coj los lawm tau?
Vajtswv hlub peb thiab vim yog txoj kev hlub ntawd, Vajtswv tsis xav kom ib qhov kev txhaum twg yuav caum rawv peb hauv peb lub neej. Tiamsis qhov teeb meem yog: peb puas nyuaj siab tiag rau peb tej kev txhaum? Peb puas zoo siab hlo lees txim, thov kom tau zam txim, thiab txiav txim siab tig nruab qaum tawm ntawm txoj kev txhaum?
Tus sau Ntawv Nkauj 32:5 sau tias: “Thaum ntawd kuv lees kuv tej kev txhaum rau koj, kuv tsis zais tej uas kuv ua txhaum ib qho li, kuv lees kuv tej kev txhaum huv tibsi rau koj, thiab koj zam tagnrho kuv tej kev txhaum huv tibsi mus”
Niaj hnub nim no peb pom ntau txoj kev sib txuas ua ke kub heev, muaj teeb meem sib tawm tsam. Thiab ntau zaug thaum uas taug mus txog ntua rau lub hauv paus, ces qhov teeb meem ntawd ho yog qhov kev txhaum uas tsis tau lees tawm. Vajtswv hu tias qhov ntawd yog kev txhaum, tiamsis tus neeg ua txhaum ntawd ho siv zog muab qhov kev txhaum ntawd tis dua lwm lub npe hu. Qhov teeb meem yog thaum Vajtswv suav tias yog kev txhaum, ces nws yog kev txhaum.
Peb yuav tau tig rov qab mus saib peb lub siab. Thiab cim civ nug: “Puas muaj yam dabtsi hauv kuv lub siab cheem tsum Vajtswv zam txim?” Tej zaug yuav nyuaj ntsib tej ntawd, tiamsis Vajtswv yuav maj mam taw tej uas Vajtswv xav hloov pauv hauv peb lub siab. Txhua hnub, peb yuav tau loj hlob hauv Vajtswv. Thiab lees peb tej kev txhaum yog qhov pib rau txua kev ntawd.
Txhob khiav nkaum kev txhaum. Cia li muab txhua yam nthuav qhia rau Tswv Yexus. Cia Vajtswv txoj kev zam txim ntxuav qhov tsaus ntuj hauv koj lub siab mus. txawm yuav nyuaj lees yuav los, peb yuav nrog Vajtswv sib cav tsis tau. Thaum Vajtswv hu yam twg yog kev txhaum ces nws yeej yog kev txhaum.
Cia li tawm suab thov Vajtswv ib yam li Daviv tau qhia rau Vajtswv: “Thov koj tsis txhob saib kuv tej kev txhaum, thiab thov koj tshem kuv tej kev phem kev qias huv tibsi mus. Vajtswv, thov koj pub kom kuv muaj lub siab dawb, thiab thov koj muab lub siab tshiab rau kuv kom kuv mloog koj lus.” (Ntawv Nkauj 51:9-10).
Thov caw nrog kuv peb thov Vajtswv ua ke
Kuv tus Vajtswv uas muaj kev hlub, thaum no kuv tsis xav ua neej dig muag ntsuav hauv sab ntsujplig ntxiv. Thov hlub tshua txog kuv thiab zam txim rau tej kev txhaum uas kuv tau siv zog npog, cim civ hais daws kuv zaj. Thov pub kom kuv muaj lub siab huv, thiab ua rau kuv muaj tus ntsujplig tshiab, kom kuv txais tau tej yam zoo kawg nkaus uas koj tau npaj tseg rau kuv. Ua Vajtswv tsaug tau niaj hnub pub rau kuv, txawm yog kuv tsis tsimnyog. Kuv thov hauv Tswv Yexus Khetos lub npe. Amees.
Cov kwv tij txhua tus, Vajtswv tab tom nrhiav cov neeg muaj lub siab lees txim, paub tig rov qab los, thiab paub thov Vajtswv txoj kev hlub tshua. Yog hnub no koj pom hauv yus lub siab muaj yam dabtsi tsis tau dawbhuv, thov txhob zais ntawm Vajtswv xub ntiag. Thaum koj muab qhia rau Vajtswv, tej kev txhaum ntawd yuav raug zam. Lub siab yuav pauv dua tshiab, thiab txua kev tom ntej yuav pib hauv txoj kev dawbhuv uas yog Vajtswv muab pub.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply