Ntau xyoo nrog tus Tswv mus, ntseeg tias twb muaj ntau zaug peb tau hnov tias Vajtswv yog tus pub, tus pab Vajtswv tej menyuam. Tiamsis nyob rau hauv txoj kev ua neej ceev li niaj hnub no, ntawm ntau txoj kev txhawj, tej zaug nyob qhov twg ntawd hauv peb lub neej yeej muaj lo lus khuab xeeb tias: “Tus Tswv, yuav ua li cas kom kuv thiaj tuav tau kuv txoj kev ntseeg ruaj khov rau ntawm koj tias koj tab tom saib xyuas kuv?” Phooj ywg, hnub no, Vajtswv txojlus caw koj nres ib mentsis thiab saib txoj kev uas Vajtswv tu tej paj nrog tsuag – me me, saib tsis tseem ceeb dabtsi ntawd los Vajtswv yeej tseem ua rau tej ntawd zoo nkauj npaum ntawd.
Hnub no, yog hnub 29/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Missey Butler dhau ntawm Zaj kawm CIA LI NTSIA SAIB TEJ NNROJ TSUAG NNRAM LIAJ
Vajluskub: “Thiab ua li cas nej yuav txhawj hais tias, nej yuav muab dabtsi los hnav? Nej sim saib tej paj ntoos tom tiaj nrag tawg li cas. Tej paj ntoos ntawd twb tsis ua haujlwm thiab tsis ntos ntaub hnav.” (Mathais 6:28)
Ob peb thiv dhau los, kuv muaj sijhawm zaum ntawm ib tsob ntoo loj loj twb vau rau ntawm ntus zoov, thiab tej kev xav yav dhau los cia li tshwm tuaj. Lub sijhawm ntawd ua rau kuv muaj txoj kev xav cuag li tau rov qab mus tsev. Kuv nyiam ib puas tsav yam Vajtswv tsim los. Kuv xav mus ncig ntawm tej tsob ntoo loj loj, zaum ntawm tej ntus dej tsis muaj neeg, saib tej ntses tab tom ua luam dej. Ntawd yog lub ntiajteb ua rau kuv muaj kev kaj siab.
Kuv niam thiab kuv pog nkawd paub zoo tias kuv nyiam ib puas tsav yam npaum twg. Kuv pheej rov qab los tsev neeg lo av li, puv npo nplooj ntoo, tes taw yoov tom qhov txhua chaw. Txhua zaug los noj hmo, kuv cov tijlaug lawv npo tsis taus luag thaum ntsia pom kuv, vim kuv npleev tshuaj yoov tom qhov txhua chaw.
Thaum twg kuv khoom, kuv ho mus saib cov phooj ywg nyob hauv “kuv lub zoov”. Tej qhov chaw uas kuv nyiam nws nyob nrug deb tej suab ntxhia hauv nroog. Txhua zaug mus yos hav zoov, kuv hnov cuag li tab tom mus rau ib lub ntuj tshiab. Kuv nyiam tej suab noog quaj, tej nplooj zeeg nrov txhis txhuas. Kuv zaum twj ywm ntsiag to saib tej nas khiav dhia ua si. Kuv cia li ceeb plaws thaum hnov ib pab noog ntxuaj tis ya saum kuv taub hau ntawm ib tsob ntoo loj loj.
Kuv cia li tau ntuas tias lub neej tsis yog tsuas yog ua pa nrog lub plawv dhia xwb, tiamsis tseem yog qhov kev muaj nqis ntawm peb txhua tus txoj kev tshwm ntsej muag. Yog ib tug uas muaj sianyob, Vajtswv tso rau hauv peb muaj ib tug cwjpwm txawv, ib lub homphiaj meej meej, thiab ib yam uas Vajtswv tsim los tshwj xeeb.
Thaum ib tug noog daug los, tsis tas yuav muaj tus hais qhia rau nws paub tias nws yog leej twg. Tsis tas yuav muaj neeg qhia rau nws kev ua neej zoo li tus noog, qhia nws noj kab lossis ya ntawm ces ntoo no rau ces ntoo tod, vim qhov ntawd yeej ib txwm muaj nyob hauv lawv tus kheej.
Qhov tseeb yog, tag nrho ib puas tsav yam Vajtswv tsim los nws yog ib txoj nkauj loj tau ntaus los ntawm cov tub txawj zoo kawg nkaus, thiab tus neeg uas coj pab ntaus nkauj ntawd yog Vajtswv – tus uas tsim muaj txhua yam kom nyob tau sib haum xeeb nrog tej uas Vajtswv tsim los.
Xav txog tej ntawd ib mentsis! Txojsia uas txhua hom muaj puav leej yog vam khom rau Vajtswv, tus uas tau tsim tej ntawd los. Nws tsis yog tsuas tiv thaiv xwb, tiamsis tseem tsim kom muaj txoj kev zoo nkauj txawv rau tej ntawd.
Thaum zaum hauv hav zoov kuv ntsia pom ib hom paj, nws tuaj ntawm tej hmab. Kuv pib xav txog qee yam paj uas Tswv Yexus tau hais nyob hauv Mathais:
“Thiab ua li cas nej yuav txhawj hais tias, nej yuav muab dabtsi los hnav? Nej sim saib tej paj ntoos tom tiaj nrag tawg li cas. Tej paj ntoos ntawd twb tsis ua haujlwm thiab tsis ntos ntaub hnav. Tiamsis kuv qhia rau nej hais tias, txawm yog Vajntxwv Xalumoos muaj nyiaj txiag ntau kawg li los nws twb tsis tau hnav ib cev ris tsho zoo npaum li tej paj ntoos ntawd ib lub li. Tej nroj tsuag uas nyob hnub no, tagkis luag twb yuav muab pov hlawv rau hauv qhov cub, ua ciav Vajtswv twb pub rau tej nroj tsuag ntawd zoo nkauj ua luaj, yog li ntawd, Vajtswv yimhuab yuav pub rau nej muaj hnav zoo dua tej roj tsuag ntawd. Ua li cas nej kev ntseeg yuav tsawg ua luaj! “Yog li ntawd, nej tsis txhob txhawj hais tias, ‘Peb yuav muab dabtsi los noj los haus thiab los hnav?” (Cov neeg uas tsis ntseeg Vajtswv, lawv niaj hnub txhawj txog tej no.) Nej Leej Txiv tus uas nyob saum ntuj ceebtsheej yeej paub hais tias nej yuav tsum muaj tej no.” (Mathais 6:28-32).
Yog ib lo lus cog tseg zoo kawg nkaus! Vajtswv tus tsim koj thiab kuv, nrog rau txhua yam muaj sia nyob, tau tab pov rau peb tias peb tsis tas yuav txhawj, vim tus tsim ib puas tsav yam mam muab tej ntawd ntxiv rau peb. Zoo li tej paj nroj tsuag tom hav zoo, tag nrho tej uas peb yuav ua yog tshwm ntsej muag thiab txais yuav txojsia uas Vajtswv pub.
Txoj kev ntseeg no tsis tau txhais tias peb yuav so tsis ua haujlwm lossis so tsis siv zog hauv lub neej. Tiamsis nws muaj ntsiab tias peb tsis nyob hauv txoj kev txhawj lossis ntshai tsam muaj tsis txaus, tiamsis paub tias tus tsim ib puas tsav yam los yuav pub tej uas peb cheem tsum rau peb, txawm yog peb yuav tsis pom Vajtswv ua tej ntawd meej meej.
Thov caw nrog kuv peb thov Vajtswv ua ke
Tus Tswv uas muaj kev hlub. Ua Vajtswv tsaug vim Koj yog tus tsim ib puas tsav yam, thiab Koj kuj yog tus pub, tus tu, saib xyuas peb txhua hnub. Vajtswv, kuv lub siab zoo siab thaum paub tias koj tsis tso kuv tseg, tiamsis zoo siab hlo tu kuv txhua feeb hauv lub neej. Thov Vajtswv pab kom kuv ntseeg koj ua tus tu, ib yam li tej nroj tsuag tsis muaj kev txhawj, tiamsis yeej tseem tawg tau zoo nkauj hauv Vajtswv txoj kev pub. Kuv thov hauv Tswv Yexus Khetos lub npe. Amees.
Cov kwv tij, txoj sia ntawm ib puas tsav yam yog nyob ntawm Vajtswv, kuv kuj yog tus uas nyob hauv. Yog li lo lus nug “noj dabtsi”, “haus dabtsi?” “hnav dabtsi” txhob dhau los ua ib qhov kev txhawj loj, txeeb txoj kev kaj siab hauv koj lub neej, vim lo lus teb twb nrhiav pom nyob hauv tus tsim ib puas tsav yam hauv ntiajteb no lawm. Tswv Yexus hais meej meej tias: “Nej leej txiv tus nyob saum ntuj ceebtsheej paub zoo tej ntawd.”
Rov qab tshuaj saib koj puas xav ntsoov txog tej kev cheem tsum txhua hnub ua rau koj hnov peb tus Vajtswv yeej tseem tab tom saib xyuas ib puas tsav yam Vajtswv tsim los, txawm yog tej nroj tsuag tom hav zoov tib si? Hnub no, pib kiag ib hnub tshiab los ntawm rov qab hais txog Vajtswv tej lus cog tseg, tias: “Koj yog kuv txiv. Koj paub kuv tej kev cheem tsum.” Txawm yog koj yuav ntsib teeb meem txog nyiaj txiag, muaj tsis txaus, lossis tej nuj nqi tab tom tsuam koj los, nco ntsoov tias Vajtswv paub tseeb yam ntawd. Vajtswv tsis hnov qab koj, tiamsis Vajtswv xav kom koj muab tso yam twg ua ntej kom yog chaw: nrhiav Vajtswv lub tebchaws thiab Vajtswv txoj kev ncaj ncees. Vajtswv yog tus yuav pab kom koj loj hlob hauv txoj kev ntseeg siab thiab Vajtswv txoj kev pab koj.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply