Tej hnub dhau los lawm, tej suab luag cuag li tsuas yog lub plhaub looj sab nraud xwb. Sab hauv, peb lub siab qhuav qhawv, qaug zog, tsis muaj dabtsi. Peb yeej tseem luag ntxhi rau sawv daws, tiamsis cuag li txoj kev zoo siab tiag hauv Vajtswv nws ploj lawm thaum twg tsis paub. Nyob rau hauv txhua yam uas peb yuav ua thiab tej yam uas tshwmsim los tsis raws li peb siab xav, peb yooj yim hnov qab tias txoj kev zoo siab tsis yog los ntawm lub caijnyoog los, tiamsis los ntawm Vajtswv txoj kev tshwm ntsej muag, tus uas nrog nraim peb nyob txhua hnub.
Hnub no, yog hnub 30/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gene Markland dhau ntawm Zaj kawm ZOO SIAB HAUV VAJTSWV
Vajluskub: “Nej cov uas yog neeg ncaj ncees, cia li txaus siab thiab zoo siab, rau qhov tus Tswv tau pab nej lawm. Nej cov uas mloog nws lus, cia li qw zoo siab” (Ntawv Nkauj 32:11)
Muaj ib zaug thaum tab tom pehawm, kuv hnov tej menyuam yaus pehawm Vajtswv los ntawm lub siab kub lug: “Oh kuv yog Yexus tug Nws ua rau kuv muaj kev zoo siab ib txhis! Kuv lub siab zoo kawg!” Tau koob hmoov kawg thaum uas tau hnov tej menyuam tej suab nkauj hu, lub suab nkauj zoo siab, ncaj ncees thaum tej menyuam fij hu qhuas Vajtswv. Muaj tseeb li ntawd, txoj kev zoo siab uas Vajtswv pub yog peb lub hauv paus zog (Nehemis 8:10).
Tiamsis tshuav cov neeg uas loj hlob lawm ne yuav zoo li cas? Tau ntev npaum cas lawm peb txais tsis tau txoj kev zoo siab ntawd hauv peb lub neej? Thiab yog tias muaj, peb yuav nthuav tawm txoj kev zoo siab ntawd li cas?
Kuv nco txog zaj xwm txheej nyob hauv Vajluskub, thaum Vajntxwv Daviv coj lub fijxab los txog rau hauv Yeluxalees. Hauv yawg lub siab muaj kev zoo siab, cuag li yuav luag tawg thaum yawg txais Vajtswv txoj kev tshwm ntsej muag rov qab los. 2 Xamuyees 6:14-15 hais:
“Daviv sia ib daim thav ntxwv ntaubmag ntawm nws lub duav, Daviv dhia seevcev kawg nkaus nws lub zog qhuas tus Tswv. Daviv thiab cov pejxeem Yixalayees kwv lub Phijxab los tso rau hauv lub nroog Yeluxalees, lawv zoo siab qw ntshoo nrooj thiab tshuab raj tshuab xyu nrov doog diaj los”.
Vajntxwv Daviv hu nkauj, vim thaum ntawd, Vajtswv yog tus loj kawg nkaus tab tom tshwm ntsej muag ntawm lub fijxab ntawd. Tiamsis niaj hnub nim no, Vajtswv txoj kev tshwm ntsej muag nws nyob tsis muaj chaw, tiamsis nyob hauv peb lub siab. Thaum peb paub tseeb txog qhov no, txoj kev zoo siab yuav puv npo.
Kuv twb pom tim ntsej tim muag txoj kev zoo siab ntawd nthuav tawm, thaum ib tug neeg lees txim thiab thov Tswv Yexus los nyob hauv lawv lub siab. Kuv ntsia pom lawv qw zoo siab thaum txais tau txoj kev cawmdim, thiab tsa suab qhuas Vajtswv tom qab ua kevcai raus dej.
Daviv kuj tsa suab hu zoo siab hauv Ntawv Nkauj 35:9 “Ces kuv yuav zoo siab rau qhov muaj tus Tswv ua tus pab kuv, kuv yuav kaj siab lug rau qhov nws cawm kuv dim”
Thaum kuv muaj 17 xyoo, kuv ntsib Vajtswv tshwj xeeb, thiab kev zoo siab puv npo hauv kuv ua rau kuv luag ib hmos, pw tsis tsaug zog!
Muaj ib txhia Pawg Ntseeg lawv pehawm Vajtswv hauv txoj kev kub siab lug: lawv hu nkauj, npuaj teg, seev cev, luag zoo siab, txaus siab rau Vajtswv txoj kev tshwm ntsej muag. Vajtswv zoo siab thaum ntsia pom lawv lub siab hlub tau nthuav tawm zoo li ntawd. Tiamsis Vajtswv kuj zoo siab thaum ntsia pom muaj qee tus zaum twj ywm ntsiag to, ua rau lub siab puv npo kev zoo siab, vim nyob hauv lawv lub hlwb lawv kuj txais tau Vajtswv txoj kev tshwm ntsej muag.
Ntau zaug, tej kev txhawj hauv lub neej ua rau peb hnov cuag li tsis muaj kev zoo siab. Yeej yog yuav muaj qee lub sijhawm muaj kev nyuaj siab, quaj ntsuag, ib yam li Tswv Yexus tau quaj rau lub nroog Yeluxalees. Tiamsis thaum lub hnub dhau mus, txhua yam nyob ntsiag to, thiab tshuav koj ib leeg lwm xwb, ces tig koj lub siab tawm ntawm tej kev txhawj, thiab rov qab los rau tus uas txhawb koj lub zog.
Nco ntsoov: Vajtswv kev tshwm ntsej muag, tus ua rau Daviv hu nkauj zoo siab, kuj tab tom nrog koj nyob ua ke rau lub sijhawm no. Nws tab tom nrog koj ua haujlwm ua ke rau txhua lub sijhawm. Yog li, cia li zoo siab, vim koj yog Vajtswv tug, thiab Vajtswv zoo siab nyob hauv koj lub siab.
Txoj kev sib raug zoo ntawm koj thiab Vajtswv yog lub txhab zoo, tsis muaj leej twg yuav chwv txog, tsis muaj dabtsi yuav hloov chaw tau. Twb yog txoj kev tshwm ntsej muag ntawd yog lub hauv paus zoo siab thiab yog koj lub zog. Ntawd tsis yog tej kev zoo siab ib vuag hauv ntiajteb no, tiamsis yog kev zoo siab ib txhis tsis muaj dabtsi piv tau (1 Petus 1:8).
Txhob pub leej twg txeeb tau koj txoj kev zoo siab. Tswv Yexus hais nyob hauv Yauhas 15:11
“Kuv hais tej no rau nej kom nej zoo siab ib yam li kuv zoo siab, thiab nej yuav zoo siab kawg nkaus li”
Vajtswv xav kom koj ua lub neej txhua hnub hauv txoj kev zoo siab nplua mias los ntawm Vajtswv txoj kev tshwm ntsej muag los. Cia li qhib siab txais yuav thiab tu txoj kev sib raug zoo ntawd hauv txoj kev thov Vajtswv thiab Vaj Ntsujplig ua tus coj kev, kom txoj kev zoo siab hauv Vajtswv dhau los ua ib feem hauv peb lub neej txhua hnub.
Hauv Kalatias 5:22 Paulus sau: “Tiamsis Vaj Ntsujplig yuav ua rau neeg muaj lub siab sib hlub, zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj”
Cia lub txiv ntawm txoj kev zoo siab loj hlob thiab nthuav tawm hauv koj lub neej. Txoj kev zoo siab hauv Vajtswv yuav yog koj lub zog loj. Thiab tsis muaj leej twg, tsis muaj ib qhov xwm txheej twg lossis ib txoj kev sim siab twg yuav txeeb tau txoj kev zoo siab uas Vajtswv tso hauv koj lub siab tawm!
Thov caw nrog kuv peb thov Vajtswv ua ke
Tus Tswv, kuv ua koj tsaug rau txoj kev zoo siab ntawm koj yog lub zog rau kuv tus ntsujplig. Thov Vajtswv zam txim rau kuv vim muaj tej lub sijhawm kuv tau hnov qab tej ntawd thiab cia tej kev txhawj npog koj kev tshwm ntsej muag, ua poob txoj kev zoo siab thiab kev kaj siab nyob hauv Nws. Hnub no, thov Vajtswv ua kom kuv rov qab muaj txoj kev zoo siab nrog koj li thaum pib. Thov Vaj Ntsujplig tshuab txojsia rau hauv kuv tus ntsujplig tab tom tuag no. Thov Vajtswv pab kom kuv nco ntsoov tias Vajtswv yeej tseem hlub, tseem nrog nraim, thiab tuav kuv tes txhua hnub. Kuv thov hauv Tswv Yexus Khetos lub npe. Amees.
Cov kwv tij txhua tus, lub neej tsis yog thaum twg twb tshwmsim los raws li lub siab nyiam, tiamsis Vajtswv xav pub rau koj muaj ib txoj kev zoo siab ruaj khov, hla dhau txhua txoj kev xav, txhua lub caijnyoog lossis txhua qhov xwm txheej. Txoj kev zoo siab ntawd nws tsis nrov nroo ntws, tiamsis nws maj mam loj hlob hauv peb lub siab paub vam khom Nws. txawm tab tom ntsib dhau yam dabtsi los, cia Vajtswv rov qab ua kom muaj txoj kev zoo siab ntawd. Twb yog Vajtswv txoj kev tshwm ntsej muag yog lub zog rau koj tus ntsujplig. Thiab tsis muaj ib yam dabtsi yuav txeeb tau txoj koob hmoov ntawd thaum uas koj cia koj tau so hauv Vajtswv sab tis.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply