Gơs tú lơi he lơh bơta lơi tìs sơl, mơ bulah he kờn híu, kờn pồn, mơya nùs nhơm he dê ờ suk ơm sơl? He git he neh lơh ờ niam nùs Yàng. mơya he pồn pleh, ờ kờn dờp broă tìs he dê, mơ kơlôi is lah “Yàng rơp git mơ!” Mơya, gơs dồ bơta nền cê: Yàng ờ tú lơi sang lời tồi glài. Tú Yàng đơs hớ là tồi glài, gen hớ ngan là tồi glài, bol he ờ rgơi pleh klàs. Mơ Yàng sùm gam kơn gơn he gơjran sang glài, ờ di nàng lơh glài mơya nàng sơmbòi bol he in, mơ toh tồi glài he in.
Ngai do, ngai 25/06/2025, rơndap bơta hòi kòp ngai hòi jà ồng mọ oh mi kơlôi sơnơng Jơnau Yàng bal mơ mò Martha Noebel bơh tơnggume TÚ YÀNG ĐƠS “HỚ LÀ TỒI GLÀI”
Sră Goh: “Añ neh yal tơlik glài añ jê Yàng in, ò pồn bơta tồi glài iơh bơsak añ jê; Añ đơs lah: “Añ rơp yal ală bơta tìs glài añ jê Yàng Jehôwa in,” Gen Yàng neh toh bơta tồi glài añ jê.” (Đơs Crih 32:5)
Bol he ngan gam kơp kờn rài kis đah hwềng pràn kơl dang sơl ơ? Tú hớ, ban híu bơta gơjran sang glài là dồ broă dờng màng ngan. Bol he pal tus mơ Yàng mơ jơh nùs lùp Yàng: “Ơ Yàng, gơs bơta lơi tòm rài kis kon dê gam kup kơryan kon dờp geh wil tơl ală bơta mơ Yàng neh rcang lài kon in sơl?”
Bè gơlơh dilah bol he dờp git ală broă mơ he lơh dut ndơl bơta hớ là tồi glài? Tú Yàng ơn tê mơ tup bư nùs nhơm he dê, Yàng tơngkah mơ sơnio dồ bơta lơi là “tồi glài”, gen bơta hớ mờng ờs lơh he in ờ niam nùs. Bol he kờn tơmoh sơnđăn broă tìs he dê bơh dồ nơm sơnđăn he kơno gơlơh niam he in, rlau mơ he dờp git bơta hớ là tồi glài. Halà bùlah git hớ là glài, bol he kung ờ niam nùs nàng dờn dờp broă tìs he dê sơl.
Mơya bol he gơs tú lơi híu lah: tú Yàng đơs hớ là tồi glài, gen bơta hớ là tồi glài, bulah bol he ờ dờn dờp bơta hớ là tồi glài? Ngan bol he kung pal càng geh tơngkah lah: dê đap mat Yàng Tòm Trồ, ờ gơs tồi dờng hala dềt, tồi lơi kung là tồi? Gơs tú lơi he pơrlồm is să tờm he, tian gơs kơlôi is lah Yàng rơp nđàc sơnghit bơh ală jơnau đơs he hê, mơ he gơlơh bè dồ nă cau ờ sền gó tồi glài he neh tìs? Gơs pơnah lơi tòm nùs nhơm he dê đơs lah: Yàng neh “sang lòi” cồng nha tồi glài he dê sơl ơ?
Yàng Tòm Trồ kờn gơboh bol he. Mơ bơh bơta kờn gơboh, Yàng ờ kờn bol he kis tòm bơta tồi glài tai. Mơya dồ bơta kup kơryan hớ là: Bol he ngan jê sồt moat jrùng bơh tồi glài he dê sơl ơ? Bol he gơs nùs mhar gơjran sang glài, dan Yàng toh glài, mơ sang sơrbì jơh ală broă tồi glài sơl ơ?
Cau cih Sră Đơs Crih 32:5 cih lah: “Añ neh yal tơlik glài añ jê Yàng in, ò pồn bơta tồi glài iơh bơsak añ jê; Añ đơs lah: “Añ rơp yal ală bơta tìs glài añ jê Yàng Jehôwa in,” Gen Yàng neh toh bơta tồi glài añ jê.”
Ngai do, bol he sền gó oă cau neh gơkòl cah is. Mơ tú he sền nền cê mơ đal git tờm ryas nchi bơtài gơlik gơs bè hớ, gen hớ là tài bơh tồi glài ờ hềt yal tơlik dê đap mat Yàng. Yàng đơs bơta hớ là tồi glài, mơya cau lơh tìs gen ờ dờn dờp broă hớ là tìs. Să tờm Yàng neh đơs hớ là tồi glài, gen broă hớ ngan là tồi glài.
Bol he pal sền sơwì nùs nhơm he dê. Lùp is lah: “gơs bơta lơi kon pal kờn geh Yàng toh glài sơl ơ?” digơlan kalke ngan nàng lơh bơta hớ, mơya Yàng rơp tus mơ he dồ bă niam lơbơn nàng sơnio bơta mơ Yàng kờn tomgơl hwềng nùs he dê. Kờp ngai, bol he pal geh dờng tòm Yàng. mơ bơta gơjran sang glài hớ là sơntờm gùng lòt hớ.
Ban pồn ndơp tồi glài, pal yal jơh Yàng in. pal lời bơta toh glài Yàng dê lơh goh ală broă tìs he dê. Bulah kalke ngan, mơya bol he ờ rgơi tom pơndang bal mơ Yàng Tòm Trồ ờ. Tú Yàng đơs bơta lơi là tồi glài, gen broă hớ ngan là tồi glài.
Pal dan mơ Yàng bè ồng David neh dan: “Dan Yàng pleh mat bơh di ală tồi glài añ jê, Mơ jùt jơh ală bơta iơh bơsak añ jê. Ơ Yàng Tom Trồ, dan crơng gơs tòm añ dô nơm nùs sàng goh; Mơ ơn tòm añ dô nơm hwềng nùs pa mơ song ngan.” (Đơs Crih 51:9-10)
Dan jà bol he dô nùs bal tòm bơta hòi dan:
Khoai Yàng kon kờn gơboh, tú do kon ờ kờn kis tòm bơta klam jơngo đah hwềng tai. Dan Yàng nđàc sơnghit mơ toh jơh tồi glài mơ kon neh pồn prap, neh ờ yal dê đap Yàng. dan crơng gơs tòm kòn dô nơm nùs sàng goh; Mơ ơn tòm kòn dô nơm hwềng nùs pa mơ song ngan, nàng kon rgơi dờp geh wil tơl ală bơta niam mơ Yàng neh rcang lài kon in. kon ừn ngài Yàng tài bơh bơta nđàc Yàng sùm pà ai kon in, bulah kon là dồ nă cau ờ di pal. Kon jơh nùs hòi dăn ai sơnđan Yàng Jesus Krist, Amen.
Ơ ală ồng mọ oh mi kờn gơboh, Yàng sùm jòi ală nùs git gơjran sang glài, git rê wơl, mơ git dan nùs nđàc sơnghit Yàng dê. Dilah ngai do he dờp git nùs nhơm he dê gơs broă ờ song, gen ban pồn prap. Tài bơh tú he yal dê đap Yàng, gen tồi glài hớ geh toh, nùs nhơm geh tomgơl, mơ gùng lòt jat Yàng he dê rơp sơntờm wơl tòm bơta niam mơ sàng goh mơ să tờm Yàng pà ai he in.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply