Oă dơ̆ rài kis bol he dê gơlơh bol glar ngan. Kờp ngai ală bơta kư lơh wêh lơh wơl kung be kơrwàl: sền gàr hiu tŭm, pơnrĭng broă lơh, kơlôi hiu nhă in… Bơdìh mat bol he ñọ̆, mơ ya tom dơlam neh jơh pràn rau. Mơ ò gơs cau lơi wă wòng bol he neh jơh pràn, lơbơn lơñọ tus mbe lơi. Mơ ya gơs tŭ lơi oh mi kơlôi lah, ală gơnoar broă dờng mơ Yàng jao oh mi in gơ ò di la gơnoar broă kơnjơ̆ taih? Rơp gơlik mbe lơi dilah hơ̆ la bơta nđàc jòng mang taih?
Ngai do, ngai 26/6/2025, Bơta Hoi Dan Kờp Ngai dan jà jơh ală cau iat kơlôi sơnơng Jơnau Yàng kơnom di bơta dong kơl Pauline Hylton bơh tơnggume GƠNOAR BROĂ HALA BƠTA NĐÀC
Sră Goh: “Behơ̆ dilah añ la Yàng mơ la Cau Bơto, mơ neh rào jơng bol mê in, gen bol mê kung pal rào jơng bal mơ gơp behơ̆ sơl.” (Jang 13:14)
Añ ò kòñ ngan lòt tus hiu pơjum dô ềt lơi. Tài bơh kờp dơ̆ tus ting hơ̆, cau lơi kung lùp bơh bèp añ jê. “Bèp oh di mbe lơi?” Bol khai kư lùp wêh lùp wơl sèng lùp hơ̆. Añ neh bol glar ngan tom tŭ kư pal yal bơh ală bơta bơh să-jan ồng dê. Tom nùs, añ mìng kòñ driau dờng: “Gen añ mbe lơi taih? Añ la cau dong kơl sền gàr me bèp, ròng bàr nă kòn pa dờng, dong kơl sền gar bau klau, tom tŭ añ kư pal lơh broă jơh tŭ jơ mơ sền gàr phan mơna jơtai hiu nhă dê! Ñchi bơh tai ò gơs cau lơi lùp añ mbe gơlơh taih?!”
Bèp añ neh pal reh tă ntìng (tháo khớp) jơng kiau, mơ rcang rê wơl kis mơ bol he. Añ rngòt rngơt ngan. Ngai hơ̆ tom tŭ lòt hiu pơjum, añ geh tìp mơ dô nă melŏ ơm di mpôl digùl. Jat bè añ git khai neh ơn jơh tŭ jơ nàng sền gàr bèp tom he dê.
Añ lùp khai: “Ơ melŏ, kơlôi tus bơta pal wă rò bèp rê hiu mơ kòn rngòt ngan. Kòn ò git kòn gơs tơl pràn nàng sền gàr bèp hala ò. Melŏ neh sền gàr bèp melŏ dê ngan sơl? Melŏ neh lơh mbe lơi taih?”
Khai ñọ̆, sền di añ mơ đơs:
“Ơ kòn, ò gơs bơta lơi. Geh dong kơl sền gàr bèp la dô bơta nđàc ơ kòn.”
Añ rơp ò tŭ lơi hŭi jơnau đơs hơ̆.
Jơl tus di nđò nam tơnơ̆, broă dong kơl sền gar cau tom hiu nhă neh gơlik gơs “bơta nđàc” tom mat añ, mơ ò di mìng la gơnoar broă. Ưnngai Yàng, lồi dut añ kung neh rgơi đal git broă lơh dờng mang jat gùng hơ̆.
Sră Goh neh cih wơl tom Jang 13: 12-14:
“Tom tŭ neh sir rào jơng bol khai in rau, Kơnràñ soh ào, nggui wơl mơ đơs lah: “Bol me git wă bơta añ neh lơh bol mê in sơl?
Bol mê sơnđan añ la Cau Bơto mơ la Yàng; bol mê đơs di, bơh añ ngan la behơ̆.
Behơ̆ dilah añ la Yàng mơ la Cau Bơto, mơ neh rào jơng bol mê in, gen bol mê kung pal rào jơng bal mơ gơp behơ̆ sơl.”
Yàng Jesu sùm sền broă lơh duh broă la dô bơta nđàc, mơ Kơnràñ kung bơto ală cau bơtê in bơta hơ̆.
Kòn mơnùs bol he òs geh bơto lah he gơs gơnoar, mơ he pal tompìt ai ală bơta công nha să tòm he in. Bulah behơ̆, la Cau dòn, ngan la bol he gơs gơnoar, mơ ya broă sang lòi gơnoar hơ̆ nàng duh broă cau ndai la dô bơta nđàc.
Oh mi ò dòn ơ? Pal lùp tĕ Yàng Jesu. Sền tĕ jơnau Kơnràñ đơs tom Mathiơ 16:24-25:
“Chòp Yàng Jesu đơs mơ ală cau bơtê lah: “Dilah cau lơi kòñ jat añ, gen pơndang-sang tĕ să he, tui chi-pơng he mơ jat añ.
Bơh cau lơi kòñ dong-klàs bơta kis he gen gơrơp roh, ai cau lơi tài bơh añ mơ roh bơta kis he gen rơp geh bàn wơl.”
Dô nă cau dòn la cau cih bơta đơs chò neh đơs lah: “Cau dòn la ală cau ham kòñ sền sơwì Yàng Dong Klàs Jesu”. Gơtha do tom toh ngan! Tom tŭ oh mi ham kòñ kòñ gơboh Kơnràñ mơ ji-gloh tơhir cơnđoà lòt jat Kơnràñ, oh mi rơp pơndang is să tòm he nàng kis ndròm be Kơnràñ.
Ưnngai Yàng, Kơnràñ neh ò lòi bol he lơh jơh ală bơta ìs dô nă. Kơnràñ neh ai Yàng Hwềng Goh mut ơm tom nùs nàng dong kơl bol he. Ò di be òs mơ añ tomgơl bơta kơlôi sơnơng bơh broă dong kơl sền gar me bèp- hơ̆ la bơta tơm pơrgơl crih crài Yàng ai.
Dan jà bol he dô nùs bal tòm bơta hòi dan:
Khoai Yàng, kòn git lah ò tŭ lơi buôn-soh nàng sang ală bơta công nha he dê. Mơ ya Kơnràñ neh tùs tom dunnia tom rùp să oh nga lơbơn lơñọ, nàng kis digùl dô lơgar bîng tồi-glài, mìng tài bơh Kơnràñ kòñ gơboh kòn. Dan bơto kòn git kòñ gơboh be Kơnràñ neh kòñ. Dan dong kòn rcang sir nùs nhơm duh broă be Kơnràñ neh duh broă jơh tơl nă cau. Kòn jơh nùs hòi dan tom sơnđan Yàng Jesu Krist, Amen.
Ơ jơh ală ồng mò, oh mi kòñ gơboh, Yàng Dong-Klàs Jesu ò kòñ gơboh bol he mơ jơnau đơs hơđang sră pơàr lơm. Kơnràñ neh cŭn gơltang, rào jơng ală cau bơtê in. Mơ Kơnràñ hòi jà bol he duh broă cau glài mơ nùs nhơm kòñ gơboh dròm kung bè Kơnràñ. Behơ̆ dilah ngai do oh mi gam àñ-ơnòng oă gơnoar broă mơ cau ò git, dan bañ kơlôi lah ò gơs cau lơi kơlôi tus oh mi. Yàng sền gọ̆ mơ Kơnràñ sền dờng mang kờp broă lơh duh broă oh mi dê. Kơnràñ rơp tơm pơrgơl ală bơta bol glar oh mi dê gơlik gơs dô nơm dà bô bơkah ơn Kơnràñ in. Tài bơh tom tŭ oh mi ai bơta kòñ gơboh lơh gơs bơta gơchôl, gen bơta duh broă ò gam la bơta ơnòng kơnjơ̆- mơ la bơta nđàc.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply