Đei dôm lu năr hlôi bơih, na tơdrong hiĕk chhôk nhen thoi lăp jơ̆ tơpu ‘ngoaih. Gah lăm, jơhngơ̆m lu bơ̆n hrĕng kro, gleh lap păng rơhông. Lu bơ̆n oei hiĕk hiôk hăm đĭ đăng bơngai, mă lei nhen thoi tơdrong hiôk chơt tơpă tơ anih Kră Yang đei hiong đơ̆ng layơ ưh kơ băt. Lăm lơ tơdrong hiơ̆k bơngơ̆t păng dôm lu tơdrong đei truh ưh kơ thoi hơpơi wă, lu bơ̆n ‘bônh dêh kơ hiơt khan tơdrong hiôk chơt ưh kơ truh đơ̆ng tơdrong jum dăr, mă truh đơ̆ng tơdrong oei hơdai đơ̆ng Kră Yang, Tơ’ngla oei ling lang oei hơdai lu bơ̆n rim năr.
Năr ‘nâu, ‘năr 30/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Gene Markland kơ̆l ‘bai CHƠT HIÔK LĂM KRĂ YANG.
Sơ̆p Hla Bơar ‘Bok Kei-Dei: “Ơ lu bơngai tơpăt, chơt hiôk bĕ Păng ‘nă hal bĕ lăm Kră Yang! Ơ lu bơngai đei jơhngơ̆m tơpăt, ôr jreo chơt bĕ!” (Hơriso 32:11)
Mĭnh wơ̆t ei lăm jơ akŭm akuh, inh mơ̆ng kơtơ̆ng khŭl hơ’lơ̆p hơri ư-ang kơ Kră Yang hăm đĭ jơhngơ̆m ‘bĕnh tơdrong hiôk chơt: “Ôi inh gah Yêsu hiôk chơt ling lang! Jơhngơ̆m inh chơt hiôk dêh!” Pŭn hiôk tơpă kơplah đei mơ̆ng kơtơ̆ng nơ̆r hơri hiôk đơ̆ng khŭl hơ’lơ̆p, nơ̆r hơri ‘bĕnh tơdrong hiôk chơt hmă đĕch, đĭ jơhngơ̆m kơplah lu hơ’lơ̆p pơyơ̆r nơ̆r hơri ư-ang kơ Kră Yang. Trŏ thoi noh, tơdrong hiôk chơt Kră Yang ăn ‘noh bơih jơ̆ tu jơhngơ̆m pran kơ lu bơ̆n (Nêhêmi 8 :10).
Mă lei lu bơngai ‘lŏ kră lei thoi yơ? Đei đunh dang yơ bơih lu bơ̆n ưh kơ mơn đei tơdrong hiôk chơt ‘noh lăm tơdrong arih bơ̆n? Păng tơdah đei, lei lu bơ̆n tơ’bôh tơdrong hiôk chơt ‘noh thoi yơ?
Inh ‘blŏk dơ̆ng kơ tơdrong hơ’mon lăm Sơ̆p Hla Bơar ‘Bok Kei-Dei, kơplah pơtao Đawit chĕp Hom Pơgơ̆p wih brŏk tơ Jêrusalem. Tơdrong hiôk chơt ‘bĕnh blai lăm jơhngơ̆m sư, jơhngơ̆m nhen wă pơchah kơplah sư sơng iŏk tơdrong oei hơdai đơ̆ng Kră Yang. II Samuel 6:14-15 đei roi tơ’bôh:
“Wă hơri bơnê kơ Kră Yang, Đawit iŏk hrŭk ao êphot, na suang đĭ jơhngơ̆m chơt hiôk. Kơplah Đawit păng đĭ kon pơlei Isơrael tung anhăk ba Hom pơgơ̆p Kră Yang nơ̆r jreo tơkĕch hiôk chơt păng hlôm keng.”
Pơtao Đawit suang hơri, yua kơplah noh sơ̆, ‘Bok Kei-Dei jơ̆ Tơ’ngla Tih Hloh oei kơpal Hom Pơgơ̆p ‘noh. Mă lei dang ei, tơdrong oei hơdai đơ̆ng Sư ưh pă mĭnh dơnơ̆ng mĭnh ‘bôt ayơ ‘noh đĕch, mă oei lăm kơdih jơhngơ̆m lu bơ̆n. Păng kơplah lu bơ̆n băt kơnăl kơ tơdrong ‘noh, tơdrong hiôk chơt gô ‘bĕnh blai.
Inh đei ‘bôh tơm măt tơdrong hiôk chơt đei tơ’bôh, kơplah mĭnh ‘nu bơngai tơjur akâu kơdih tơbral păng krao apĭnh ‘Bok Dŏng Pơklaih Yang Yêsu mơ̆t lăm jơhngơ̆m sư. Inh đêl đei lăng ‘bôh bơngai nai hiôk chơt kơplah đei sơng iŏk tơdrong dŏng pơklaih, păng tơlĕch nơ̆r ư-ang kơ Kră Yang đơ̆ng rŏng kơplah iŏk ‘ba-tem.
‘Bok Đawit kŭm đei nơ̆r jreo hiôk chơt lăm Hơriso 35:9: “Bơhngol inh gô chơt hiôk lăm Kră Yang. Chhôk hal lăm Sư dŏng pơklaih”
Lăm kơplah 17 sơnăm, inh đei Kră Yang oei hơdai hăm tơdrong gĭt dêh, tơdrong hiôk chơt ‘bĕnh blai truh kơ inh nŏng kơ hiĕk hơnơ̆ng prăt măng, ưh kơ gơh kơ tep!
Đei Khŭl Bơngai Lui tơ mĭnh anih kơkuh kơ Kră Yang lăm jơhngơ̆m hiôk chơt: bơngai hơri, tap ti, suang, hiĕk chơt, jơhngơ̆m hiôk lăm tơdrong oei hơdai đơ̆ng Sư. Kră Yang hiôk kơplah ‘bôh jơhngơ̆m ‘mêm đơ̆ng lu sư đei tơ’bôh thoi noh. Mă lei Sư kŭm lăp đon kơplah ‘bôh dôm lu bơngai thĕng hreh hơ oei kơkuh, jơhngơ̆m ‘blĕnh blai tơdrong hiôk chơt jrŭ tơlăm, yua kơ lăm jơhngơ̆m lu bơngai ‘noh oei sơng iŏk kơdih tơdrong oei hơdai đơ̆ng Sư.
Mưh lăp, dôm lu tơdrong hiơ̆k bơngơ̆t lăm tơdrong arih pơm kơ lu bơ̆n nhen thoi ưh pă đei anih kơ tơdrong hiôk chơt. Păng trŏ, gô đei kơplah đei sơ’ngon, nhơ̆m hmoi, thoi kơdih Kră Yang Yêsu kŭm đêl đei nhơ̆m mơnat kơ Jêrusalem. Mă lei kơplah năr kơjung đei hlôi, dôm tơdrong ưh pă đei, păng buăl oei pă mĭnh drô̆ lăm anih thĕng hreh- athei ăn jơhngơ̆m kơdih lĕch hlôi đơ̆ng dôm tơdrong hiơ̆k bơngơ̆t, păng wih brŏk hăm Tơ’ngla oei hơdai pơlung buăl.
Athei ‘blŏk: kơdih tơdrong oei hơdai đơ̆ng ‘Bok Kei-Dei, Tơ’ngla pơm kơ ‘bok Đawit suang hiôk chơt, kŭm oei hơdai buăl lăm jơphŭt ‘nâu. Sư năm hơdai hăm buăl lăm rim jơnăr . Thoi noh, athei hiôk chơt, yua kơ buăl gah Sư, păng Sư kŭm lăp đon oei lăm jơhngơ̆m buăl.
Tơdrong pơgơ̆p buăl hăm Kră Yang jơ̆ mĭnh anih mong tơmam gĭt kăl, ưh kơ đei bu gơh pel truh, ưh kơ đei kiơ gơh tơplih. Kơdih tơdrong oei hơdai anoh jơ̆ tu tơdrong hiôk chơt păng jơhngơ̆m pran kơ buăl. ‘Noh ưh kơ trŏ jơ̆ thoi tơdrong hiôk chơt dang ei đĕch mă teh đak ba ăn, jơ̆ tơdrong hiôk chơt “Đơ̆ng sơ̆ iĕm ưh kơ ‘bôh Yêsu Krist thoi yơ, mă iĕm ‘mêm kơ Sư tơpă. Dang ei iĕm kư̆m ưh kơ ‘bôh Sư mă iĕm kư̆m lui kơ Sư kơjăp, jơhngơ̆m iĕm hiôk ling-lang măng năr. (I Pêtrôs 1:8)
‘Nĕ kơ ăn bơngai bu tơgar iŏk tơdrong hiôk chơt ‘noh. Kră Yang Yêsu khan lăm Yôhan 15:11:
“Inh roi ăn kơ iĕm dôm tơdrong âu wă kơ iĕm chơt hiôk kư̆m thoi Inh chơt hiôk. Thoi noh na lu iĕm gô chơt hiôk tơpă.”
Kră Yang wă kơ buăl arih rim năr lăm tơdrong hiôk chơt ‘bĕnh blai truh đơ̆ng kơdih tơdrong oei hơdai đơ̆ng Sư. Athei pơih jơhngơ̆m sơng iŏk păng bơwei tơdrong pơgơ̆p ‘noh lăm tơdrong krao khan păng tơdrong chông anhăk đơ̆ng Yang Bơhngol ‘Lơ̆ng, wă kơ tơdrong hiôk chơt đơ̆ng Sư jing mĭnh tơdrong kăl lăm tơdrong arih rim năr kơ buăl.
Lăm Galati 5:22, ‘bok Pôl đei chih: “Mă-lei plei Yang Bơhngol ‘Lơ̆ng đei: ‘Mêm mơnat, chơt hiôk, hơđơ̆ng, kĕ chơ̆n, gơh tơgŭm, iơ̆m dim, tơnăp,”
Athei ăn plei đơ̆ng tơdrong hiôk chơt wơ̆ ‘lŏ păng tơ’bôh đơ̆ng lăm tơdrong arih buăl. Tơdrong hiôk chơt anih Kră Yang jơ̆ jơhngơ̆m pran tih hloh kơ buăl. Păng ưh kơ đei mĭnh ‘nu bơngai bu, ưh kơ mĭnh tơdrong truh dah tơdrong pơlong lăng ayơ gơh tơgar iŏk tơdrong hiôk chơt mă Kră Yang đei dan lăm jơhngơ̆m buăl!
Apĭnh đĭ đăng krao khan hơdai:
Kơkuh kơ Kră Yang, kon bơnê kơ Kră Yang tơdrong hiôk chơt anih Ih jơ̆ jơhngơ̆m pran kơ pơhngol kon. Apĭnh Kră Yang huay kơ jô̆ yo kơ kon yua kơ đei kơplah kon đei hiơt kơ tơdrong ‘noh păng ăn kơ tơdrong hiơ̆k bơngơ̆t gom klơ̆p tơdrong oei hơdai đơ̆ng Ih, tơ hiong tơdrong hiôk hian păng tơdrong hiôk chơt lăm Ih. Năr ‘nâu, apĭnh Kră Yang pơm arih lăm kon tơdrong hiôk chơt blŭng-a hăm Ih. Apĭnh Yang Bơhngol ‘Lơ̆ng Ih tơhlu tơdrong arih ‘nao lăm pơhngol oei ngach tơngiĕt ‘nâu đơ̆ng kon. Apĭnh Kră Yang tơgŭm kon ling lang ‘blŏk răk khan ih oei ling lang ‘mêm mơnat, oei hơdai, păng rôp ti kon yak năm rim năr. Kon kŭp kơ̆l krao khan hăm anăn Yang Yêsu Krist, A-men.
Ơ lu bơngai mơ̆ng mă ‘mêm kơ-eng, tơdrong arih ưh kơ trŏ layơ kŭm đei truh thoi kơdih wă, mă lei Kră Yang wă ăn kơ buăl mĭnh tơdrong hiôk chơt kơjăp, hlôi kơ dôm jơhngơ̆m mơn, hlôi kơ dôm tơdrong mă khan tơdrong truh ayơ. Tơdrong hiôk chơt ‘noh ưh kơ kăl hrơ̆ng hreng pơrŏ, mă thĕng hrĕp wơ̆ ‘lŏ lăm jơhngơ̆m dôm lu bơngai băt gơnang anih Sư. Mă khan buăl oei tơ’bơ̆p tơdrong kiơ hĭ, athei ăn kơ Kră Yang pơklaih tơdrong hiôk chơt ‘noh. Yua kơ kơdih tơdrong oei hơdai đơ̆ng Sư jơ̆ jơhngơm pran kơ pơhngol buăl. Păng ưh kơ đei tơdrong kiơ gơh iŏk lê̆ tơdrong mơnat hlĭch chrơp ‘noh kơplah buăl bơwei kơdih pơdơh lăm pơnăr Sư.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!
Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.
Leave a Reply