Hăm đei layơ buăl đei jet kơdih: “Tŏk bŏk teh đak tơblah dih băl păng ưh kơ kơnhăm hiơ̆k băl ‘nâu, hăm kăl kơ wă tơ’bôh đon lui hơđăl ưh” Hăm inh đei lơ kơ măt lăng sek tơlang jum dăr, kư̆m đei lu bơ̆n rơih iŏk thĕng hreh đĕch wă bơwei đon lui bơ̆n hăm Kră Yang. Mă tơpă, lu bơ̆n ưh kơ băt dang yơ Kră Yang gô yua iŏk tơdrong arih rim năr bơ̆n wă tơplih bơhngol. Kư̆m rŏ lăng kơplah mă ưh kơ đei bu wă chang hmĕng bơih, tơdrong arih lu bơ̆n jing ŭnh tơ̆k pơchrang lăm jơhngơ̆m bu bu noh oei chơchă chang hơmĕng.
Năr ‘nâu, ‘năr 01/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kay Camenisch kơ̆l ‘bai ĐEI KĂL DÊH ƯH?
Sơ̆p Hla Bơar ‘Bok Kei-Dei: “Lu iĕm athei pơchrang hơdah kơ đe tơdrong hơdah lu iĕm thoi noh mơ̆n, na đe băt kơ tơdrong iĕm pơm ‘lơ̆ng, na đe bơnê hăm ư-ang kơ ‘Bă bơ̆n tơ plĕnh ti.” (Mathiơ 5:16)
Đơ̆ng rŏng kơ “A-men,” drŏ kăn hơ’lơ̆p drâu sơnăm ngơk kơ̆l lăng tơ inh păng jet: “ Ih ‘mêm tơpă kơ Kră Yang, hăm trŏ ưh duch?”
Năr noh, klo akăn nhi năm ba hơ’lơ̆p drŏ kăn noh năm sa ‘bĕng mi, lu nhôn rôp ti dih băl păng krao khan hơdrol kơ sŏng sa. Hnam dơnŏ bơngai hơ’lơ̆p ‘nâu ưh kơ đei juăt pơm thoi noh, rŏ lăng lu sư hrơ kơ anih tơpôl.
Đei minh năr nai, kơplah klo akăn nhi păng ‘bar ‘nu kon drŏ ‘nglo năm tơ teh đak Brazil, lu nhôn kư̆m krao khan hơdol kơ sŏng sa. Kơplah lar măt, lu nhôn ‘bôh bơngai drŏ ‘nglo hlĭch lăng tơ kơ’bang lu nhôn, đak măt sư lĕch. Bơngai drŏ ‘nglo noh pơma: “Na đei minh năr ayơ noh, inh păng hnam dơnŏ inh kư̆m krao khan hăm Kră Yang thoi noh.”
Sư đei roi sư jơ̆ đêl bơngai klo, bơngai ‘bă ưh kơ ‘lơ̆ng achăng lê̆ hnam dơnŏ. Tơdrong arih pơm yoch pơm kơ hnam dơnŏ pơchah răm. Minh sơnăm hơdrol, sư đei lui sơng iŏk Kră Yang, păng sư rơhing dêh noh ‘maih wă ‘bôh hnam dơnŏ sư wơ̆t lui kơ Kră Yang, wă kơ Kră Yang pơklaih dôm kơ jĭ rơka.
Rŏ lăng buăl oei tơchĕng: “Liơ ưh kơ krao khan lăm jơhngơ̆m hăm Kră Yang đĕch? Hăm kăl kơ kŭp kơ̆l krao khan tơ anih tơpôl ưh?”
Inh lui ngeh Kră Yang mơ̆ng nơ̆r krao khan lu bơ̆n, mă khan lăm jơhngơ̆m dah nơ̆r re. Lei tơdrong hăm trŏ kơ wă kơnhăm ưh?
Lăm ‘bar tơdrong noh, hnam dơnŏ nhôn oei pơm tơdrong juăt kơ pơm rim năr, păng ưh kơ băt đei bơngai oei hnhoi lăng.
Đei bơngai drŏ kăn hơ’lơ̆p lăng ‘bôh păng hlôh kơ lu nhôn ‘mêm kơ Kră Yang. Bơngai drŏ ‘nglo lu nhôn tơ’bơ̆p tơ Brazil kư̆m mơn ‘bôh tơdrong noh. Đơ̆ng tơdrong tơ’bôh noh đei hơtŭt ‘bơm jơhngơ̆m sư păng pơm kơ sư đei đak măt lĕch.
Kơplah ‘bôh dôm tơdrong noh, inh đei hưch hanh kơ nơ̆r ‘bok Pôl chih gơih ăn kơ bơngai lui tơ Kôrintô:
“Yua kơ iĕm lui đơ̆ng nhôn bơtho tơpă boih na lu iĕm kư̆m dang hla bơar kơthơ tơbăt kơ nhôn tơbăt kơ đe nhôn ‘bok bơtho iĕm boih. Yua kơ iĕm dang hla bơar kơthơ, na đĭ-đăng bơngai gơh đŏk gơh lăng.” (II Kôrintô 3:2)
Pôl ưh kơ đei bu chih hla bơar kơthơ roi tơbăt kơ sư, yua kơ lăng lăm tơdrong arih lu bơngai lui đĕch noh ‘bôh tôm kơ tơdrong mă sư bơtho tơ’bôh. Kư̆m thoi noh, bơngai tam mă lui kư̆m băt kơ Kră Yang đơ̆ng lu bơ̆n arih rim năr.
Brei mơsơ̆ ‘nâu, klo inh, Robert đei jơ năm ngôi tơ lu ‘bok bơtho mă ‘bă sư đei bơ̆jang, kơplah ‘bok noh đei pơjing Hnam Akŭm tơ Brazil. Năm ngôi noh đei tơ’blŏk ăn kơ jơhngơ̆m đon lu nhôn: bơngai nai oei lăng tơdrong arih lu bơ̆n păng tơdrong noh kăl tơpă!
Lăm năr năm ngôi noh, lơ bơngai ră roi ăn kơ Robert mơ̆ng dôm kơ tơdrong arih rim năr gah mĕ ‘bă sư lăm jơ năr bơ̆jang tơ noh. Mă khan ưh kơ đei tơdrong kiơ tih, mă lei tôm tơdrong jing ‘bai hŏk iŏk jrŭ să mă lơ bơngai oei ‘blŏk khŏm khŏm.
Đei minh ‘nu bơngai drŏ kăn đei ră roi mĕ Robert hrŭk hơbăn ao guăng ‘lơ̆ng. Năr ‘nei, sư đei jơhngơ̆m chơ minh ‘nu buăl sư năm tơ đe et sa tơ anih pơlei, lu sư đei hok iŏk yă âu păng hrŭk hơbăn ao mă ‘lơ̆ng, lăng ‘lơ̆ng rŏ tơpă.
Mă lei kơplah mĕ Robert năm sơng iŏk, sư hiôk chơt kơkuh păng pơ’lơ̆ng jet: “‘Bar ‘nu kon tam tơchĕng truh tơ dôm lu bơngai wă tơ’bơ̆p ưh? Lu sư ưh kơ đei mơdrŏng. Duch tơ chĕng gô hiôk ‘biơ̆ tơdah lu bơ̆n hrŭk hơbăn ao krô hmă đĕch năm truh tơ noh.” Yă âu pơ’lơ̆ng bơtho tơ’bôh athei lu sư tơplih hơbăn ao krô hmă đĕch.
Tơm kơ đơ̆ng lăm jơhngơ̆m băt kơ tơchĕng hiơ̆k kơ bơngai nai đơ̆ng yă âu dan ăn tơdrong ‘blŏk jrŭ să lăm jơhngơ̆m lu sư, bơtho lu bơ̆n băt kơ hiơ̆k bơwei bơngai jum dăr păng lu sư ‘mêm kơ yă âu yua kơ tơdrong noh.
Lu bơ̆n arih tŏk bŏk teh đak ‘nâu ưh kơ hơdrô̆. Mă ‘maih mă ưh, rim ‘nu kơ lu bơ̆n thoi kơ hla bơar “kơthơ arih.” Tơdrong arih lu bơ̆n gô tơ’bôh hnam dơnŏ lu bơ̆n, anih lu bơ̆n bơ̆jang sa, păng Hnam Akŭm lu bơ̆n. Tơ dah lu bơ̆n pơsĭt khan kơdih akâu noh jơ̆ Bơngai Lui, na tơdrong arih lu bơ̆n kư̆m oei pơchrang pơdah rup ‘Bok Kei-Dei.
Lăm tơdrong arih rim năr, bơngai nai gô lăng tơdrong bơ̆n pơm. Lu sư ‘bôh lu bơ̆n hơđăl oei blĕk hơwĕng, oei sek tơlang, dah jơhngơ̆m ‘bĕnh kơ ‘mêm mơnat. Rŏ lăng tơdrong lu sư “đei đŏk” lăm lu bơ̆n noh jơ̆ tơm kơ hla bơar “kơthơ roi tơbăt” minh đĕch gah ‘Bok Dŏng Pơklaih Yang Yêsu mă lu sư đei sơng iŏk lăm chăl arih. Rŏ lăng kư̆m đei, đơ̆ng tơ’bôh tơdrong arih lu bơ̆n pơm kơ lu sư tơwih rŏng kơ Kră Yang!
Mă lei kư̆m đei lơ bơngai lui sơng iŏk Kră Yang yua kơ tơdrong ‘lơ̆ng tơpăt, tơdrong hiôk hian păng chơt hiôk, yua kơ kơdranh nơ̆r arih mă lu sư ‘bôh đơ̆ng lu bơngai lui kơ Kră Yang.
Yang Yêsu đei tơtă kơ rim ‘nu lu bơ̆n lăm Mathiơ 5:16:
“Lu iĕm athei pơchrang hơdah kơ đe tơdrong hơdah lu iĕm thoi noh mơ̆n, na đe băt kơ tơdrong iĕm pơm ‘lơ̆ng, na đe bơnê hăm ư-ang kơ ‘Bă bơ̆n tơ plĕnh ti.”
Trŏ bơih, tơdrong noh gĭt kăl tơpă!
Apĭnh đĭ đăng krao khan hơdai:
Kơkuh kơ ‘Bok Dŏng Pơklaih Yang Yêsu, apinh tơgŭm kon arih lăm chăl arih ‘lơ̆ng pơm tơ’bôh đon lui đơ̆ng Ih, đơ̆ng tơdrong jang iĕ truh tơdrong drong jang tih hloh. Apinh Kră Yang bơtho tơ’bôh kơ kon băt kơ pơdah anăn Ih păng jing bơngai kơdranh arih kơ tơdrong ‘mêm đơ̆ng Kră Yang ăn kơ teh đak âu. Kon hơpơi kơ jing hla bơar “kơthơ roi tơbăt” ‘lơ̆ng ăn kơ Ih, wă kơ ba lơ bơngai lui kơ Ih lơ hloh. Kon kŭp kơ̆l krao khan hăm anăn Yang Yêsu Krist, A- men.
Ơ lu bơngai mơ̆ng mă ‘mêm kơ-eng, kư̆m đei dôm kơ tơdrong pơm nhen thoi iĕ păng krô hmă lăm tơdrong arih rim năr jing nơ̆r pơm kơdranh pran hloh ăn kơ đon lui lu bơ̆n. Minh nơ̆r krao khan hmă đĕch tơ anih tơpôl, măt lăng kơnhăm, minh nơ̆r pơma ‘mêm mơnat, dah minh tơdrong pơm pơ’lơ̆ng, tôm tơdrong jing hla bơar “kơthơ arih” mă bơngai nai ling lang lăng tơdrong arih lu bơ̆n, wă kơ đơ̆ng noh lu sư lăng ‘bôh Kră Yang, Tơ’ngla mă lu bơ̆n oei tơplih ăn. ‘Nĕ kơ mơlâu wă tơ’bôh đon lui lu bơ̆n rim năr, wă băt kơ kiơ đơ̆ng tơdrong pơm iĕ lu bơ̆n, đei lơ bơhngol gô lăng ‘bôh Kră Yang păng wih wơ̆t tơ Sư!
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!
Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.
Leave a Reply