Gơs tŭ lơi he lùp is : “Digul dunnia tòm pơndăng mơ mơ ò koñ kah kơlôi băl mơ gơp do, gơs càng ngăn lah păl ràng tơlik bơta dòn lọh lang sơl” gơs oă bơta wet sền cahrña gut dăr, gơs dơ̆ bŏl he sac rwah dô bă ngit ngơt prap gar bơta dòn he di gơwèt mơ Yang. Mơya ngăn lah, bŏl he rơp ò git geh tŭ lơi Yang rơp ngùi rài kis òs mòng kòp ngai he di nang tòmgơl dô hwềng soàn. Digơlan lah tòm tŭ nisơna ò gơs cau kơlôi tus, rài kis bŏl he gơlik gơs wơl bơta àng dềt rhền sọl pơnđăng tòm hwềng nùs cau lơi găm jòi bàn bơta gơn kơnòm.
Ngai do, ngai 01/07/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Kay Camenisch dê bơh Tơnggume GƠS CÀNG NGĂN SƠL?
Sră Goh: “Behơ̆, bơta àng bol mê dê pơnđàng tĕ di đap ală cau, nàng bol khai in gŏ ală broă niam bol mê dê, mơ jòng ro Bèp bol mê ơm hơđang trồ.” (Mathiơ 5:16)
tơnơ̆ jơnau “Amen”kơnòm ur prau sơnăm tơngơr mat hơđăng sền ăñ mơ lùp: “Cau bơtọ gơs kơñ gơboh Yang ngăn sơl ơ!?”
Ngai hơ̆, tŭ ur klau ăñ cèng kơnòm ur do lòt sa ƀàn mì kẹp, bŏl he sơmbat tê băl mơ họi dăn lài mơ tŭ sa. Hiu nhă cau kơnòm ur ò mòng bơta do, digơlan bŏl khai basil họi dăn tŭ ơm diđap oă cau.
Dô dơ̆ ndai, tŭ ur klau hi mơ bar nă kon klau tus Brazil, bŏl he kŭng họi dăn lài mơ tŭ sa. Tŭ pò măt, bŏl he gŏ dô nă cau nac crih găm sơnding să sền di cơnòng bŏl he, dà măt gơ ngăr. Cau hơ̆ đơs lah “Gơs dô ngai lơi, ăñ mơ hiu nhă ăñ kŭng rơp họi dăn mơ Yang behơ̆.”
Khai tombơhbơr lah khai neh lah dô nă cau bau klau, cau lơh bèp ò sŏng. Bơta kis tồi glài neh lơh hiu nhă gơ cah is. Dô năm lài, khai neh dòp rò Yang, mơ bơta khai kơp koñ rlau jơh la geh gŏ hiu nhă ri wơl băl mơ Yang, tồ geh Kơnrẵn lơh wơl pa ală bơta tềl sồt.
Digơlan he rơp kơlôi: “ñchi bơh tai ò họi dăn òm mơ Yang lơm? Gơs càng ngăn lah păl cŭn bồ họi dăn diđap tiah oă cau sơl? “
Ăñ dòn lah Yang iat kơno jơnau họi dăn bŏl he di, bulah òm hala jơnau driau dờng. Gen, bơta hơ̆ rơp gơs càng ngăn sơl?
Tòm bar broă gơlik gơs hơ̆, hiu nhă ăñ mìng găm lơh ală broă òs mòng be kòp ngai, mơ ò tŭ lơi git hala git lah gơs cau găm sền sơwì.
Cau kơnòm ur sền gŏ mơ wă lọh lah bŏl he koñ gơboh Yang. Cau ồng bŏl he tìp măt tòm tiah Brazil kŭng đal git bơta hơ̆. Bơh broă lơh hơ̆ rơp lơh rngoh rngac hwềng nùs khai mơ lơh khai ĭn gơhọr dà măt.
Tŭ sền lọh lang ală bơta hơ̆, ăñ găm gơlơh ală jơnau cau Gơnoăr Bơtô Pol pơyoa tus ală cau dòn tòm Kôrintô tuh bềng hwềng nùs ăñ :
“Oh mi la sră pơyoa bol hi dê, cih tòm nùs bol hi dê, jơh tơl nă cau git bal mơ sền bal.” (II Kôrintô 3:2)
Ồng Pol ò càng ñcau cih sră pơyoa yăl tơnggit ồng ĭn, tài bơh mìng càng sền tòm rài kis ală cau dòn Yang di lơm la tơl tồ ƀàn bơta tềng rềng jơnau bơtọ sôr di mơ ồng bơtọ yăl Jơnau Niăm. Kŭng behơ̆ sơl, cau bơdih rơp đal git Yang bơh broă bŏl he kis kòp ngai.
Ală ngai rềp do, bau klau ăñ, Robert gơs tŭ ri wơl còp ală cau Gơnoăr Bơtô mơ bèp neh geh lơh broă băl, tŭ ồng bơt bơtào Hiu Jum Goh tòm Brazil. Broă lòt tŭ hơ̆,lơh kis wơl tòm hwềng nùs bŏl he jơnau tơngkah: cau ndai găm wèt sền rài kis bŏl hedi mơ bơta hơ̆ gơs kwơ ngăn!
Tòm tŭ lòt còp rwăng hơ̆, oă cau yăl wơl Robert ĭn iat ală jơnau yăl tơnggit òs mòng bơh me bèp he tòm tŭ tơngai dùh broă tềng hơ̆. Bulah ò gơs bơta lơi dờng màng, mơya jơh ală bơta gơlik gơs ală bơta bơtọ jrô ndơp ală lơh cau kah sum.
Dô nă cau mò ne yăl wơl lah me Robert di òs soh ồi ào niam. Ngai hơ̆, tŭ mò koñ pơndiang khai băl mơ dô nă cau bơyô tai lòt di tiah yờ sa tombau tềng ƀòn dềt ne, bŏl khai neh đòn jat soh ồi ào mơ niăm ngăn, hang mơnĕ ngăn.
Mơya tŭ me Robert tus rò, mò hòn chò còp să gen lơbơn niăm lùp lah: “ Bar nă kọn gơs kơlôi tus ală cau bŏl he rơp tìp sơl? Bŏl khai ò wil tơl ală bơta. Mò kơlôi bŏl khai rơp gơlơh khat gơboh rlau dilah bŏl he sọh ồi ào ò sơmpô ir tŭ tus tềng hơ̆”. Mò lơbơn niăm tơngkah bŏl khai ri wơl sọh ồi ào ò sơmpô ir .
Bơh hwềng nùs kơlôi tus cau ndai mò di neh lòi wơl bơta kah jrô ngăn tòm hwềng nùs bŏl khai, bơtọ bŏl khai git kah kơlôi tus cau gut dăr mơ bŏl khai koñ gơboh mò bơh bơta behơ̆.
Bŏl he ò kis digul Rài do dô bă bă cah is. Bulah koñ hala ò koñ, kòp nă bŏl he gơlik “sră pơyoa kis.” Broă bŏl he kis rơp pơnđăng hiu nhă bŏl he di, tòm jơnŭm hiu lơh broă bal bŏl he di, mơ Hiu Jum Goh bŏl he di. Mơ dilah bŏl he rơp yăl tơnggit he la cau dòn Yang, gen rài kis bŏl he di kŭng găm pơnđăng wơl rùp să Yang Tom Trồ di.
Tòm rài kis kòp ngai, cau ndai rơp ơn nùs tôr tus broă bŏl he lơh lòt kòp ngai. Bŏl khai gŏ lọh bŏl he găm gơjrañ, cahrña, hala nùs bềng koñ gơboh mơ lơbơn niăm. Digơlan broă bŏl khai “geh sền” di tiah bŏl he la “sră pơyoa yăl tơnggit” mìng dô nơm lơm bơh Yang Jesu mơ bŏl khai dòp geh tom rài kis. Mơ rơp kŭng lah, bơh nùs nhờm kis bŏl he di neh lơh bŏl khai pơlac săng wơl mơ Kơnrẵn!
Mơya kŭng gơs git nđợ cau neh dòn dòp Yang bơh bơta sŏng rĭng, bơta rĭng lơngai mơ bơta hon chò, bơh jơnau kis bŏl khai neh gŏ ƀàn di tiah ală cau dòn Kơnrẵn.
Yang Jesu neh tơngkah kòp nă bŏl he tom Mathiơ 5: 16:
“Behơ̆, bơta àng bol mê dê pơnđàng tĕ di đap ală cau, nàng bol khai in gŏ ală broă niam bol mê dê, mơ jòng ro Bèp bol mê ơm hơđang trồ.”
Ngăn, bơta do kwơ màng ngăn!
Dan jà bol he dô nùs bal tòm bơta hòi dan:
Khoai Yang Jesu, dăn dŏng kọn kis dô rài kis niăm her ràng tơlik bơta dòn di Kơnrẵn, bơh ală broă dềt rhền rlau jơh tus di ală broă dờng rlau tai. Dăn Yang bơtọ kọn git lơh àng sơnđăn Kơnrẵn mơ gơlik gơs cau lơh cơng kis koñ gơboh in Yang di tòm dunnia do. Kọn kơp koñ gơlik gơs “sră pơyoa yăl tơnggit” niăm her sơnđăn Kơnrẵn ĭn, tồ cèng oă cau ri wơl mơ Kơnrẵn rlau. Kọn jơh nùs họi dăn, kọn ai sơnđăn Yang Jesu Krist, Amen.
Ơ ală ồng mọ ọh mi koñ gơboh, gơs tŭ bơh ală broă lơh gơlơh be dềt rhền mơ òs mòng tòm rài kis kòp ngai gơlik gơs wơl jơnau lơh cơng pràn kơldăng rlau jơh bơta dòn ĭn bŏl he di. Dô jơnau họi dăn dềt rhền di tiah gơs oă mpồl cau, Dô nơm măt niăm lơnhơn, dô jơnau đơs koñ gơboh, hala dô nơm broă lơh kah kơlôi lơbơn niăm, jơh ală bơta gơlik gơs “sră pơyoa kis” gen ală cau găm sền òm di rài kis bŏl he, tồ bơh hơ̆ bŏl khai sền gŏ Yang, Bơtau gen bŏl he rơp ala. Băñ rngòt ràng tơlik bơta dòn bŏl he di kis wăñ kòp ngai, tài bơh ò git bơh ală broă dềt rhền bŏl he di, gơs oă hwềng soàn rơp gŏ Yang mơ ri wơl mơ Kơnrẵn!
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply