Lơ 01/02/2024: TƠLƠI KHĂP KLĂ TUM KƠ MƠNUIH ɃU KLĂ TUM

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hơmâo mơ̆ đơđa ƀing ta hơmâo tơlơi rơngot tơdang ƀing ta pơmĭn glaĭ kơ ƀing ta pô, yua kơ ƀing ta ƀu klă tum, yua kơ ƀing ta dŏ lu tơlơi kơƀah? Ƀing ta hơmâo tơlơi mlâo mơ̆ tơdang ƀuh jum dar ƀing ta leng kơ mơnuih ngă pơjing bruă, leng kơ mơnuih hiam, laih anŭn hơmâo tơlơi rơgơi? Sĭt yơh, amăng tơlơi hơdip anai ƀu hơmâo hlơi jing klă tum ôh. Samơ̆ hơmâo sa tơlơi pơthâo mơak kơ ƀing ta, anŭn jing mơnuih ƀu klă tum kar hăng ƀing ta hơmâo tŭ mă sa tơlơi khăp klă tum.

Hrơi anai, lơ 01/02/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Brooke Keith tui hăng akŏ tơlơi hrăm TƠLƠI KHĂP KLĂ TUM KƠ MƠNUIH ɃU KLĂ TUM

Yua kơ kâo thâo sĭt biă mă …ƀôdah hơgĕt mơnơ̆ng pơkŏn amăng abih bang mơnơ̆ng hơmâo hrih laih ƀu dưi pơčơlah hĭ ôh ƀing ta mơ̆ng tơlơi Ơi Adai khăp hơmâo pơrơđah laih amăng Krist Yêsu, Khua Yang ƀing ta (Rôma 8:38-39)

Kâo pơmĭn kâo jing sa čô mơnuih ƀu klă tum ôh amăng tơlơi hơdip anai. Ƀing ta či bŏ hăng tơlơi kơtuă biă mă tơdang ƀing ta thâo kơnuih kâo ƀu hơđơ̆ng ôh, laih anŭn tañ hil biă mă. Kơnơ̆ng hơjăn kâo đôč hơmâo tŭ mă tơngia hrŭp hăng ama kâo, tŭ mă rŏng hrŭp hăng yă kâo. Tơdang lăng glaĭ kơ kâo pô amăng nil, hăng kơnuih laih anŭn hơbŏ gah rơngiao tui anŭn, kâo ƀuh kâo jing sa čô mơnuih ƀu rưp rŏ ôh.

Samơ̆ djơ̆ mơ̆ abih bang ƀing ta leng kơ tui anŭn soh sel? Abih bang ƀing ta leng kơ hơmâo tơlơi kơƀah, đơđa ƀing ta hơmâo tơlơi mlâo tơdang pơhmu ƀing ta hăng mơnuih ƀing ta pơmĭn gơñu klă tum.
Hlăk dŏ hrăm hră, kâo hơmâo sa čô gơyŭt, ñu jing sa čô mơnuih klă tum biă mă. Rup hơbŏ gah rơngiao gơñu hiam, jing sa čô pô thâo adoh amăng Sang Kơkuh Pơpŭ, jing sa čô čơđai hrăm rơgơi, laih anŭn rơgơi tal dua amăng sang hră. Kâo thuơ laih, ñu dưi hĭ. Tơdang kâo pơmĭn kâo rơbuh, laih anŭn ngă kơ Khua Yang rơngot, bơkơ ñu, arăng pơpŭ đĭ ñu jing sa čô mơnuih klă tum.

Anăm pơmĭn ƀu hiam kơ kâo ôh, kâo khăp kơ gơyŭt kâo anŭn biă mă. Ƀu djơ̆ kơnơ̆ng jing mơnuih hiam đôč ôh, ñu ăt jing sa čô gơyŭt khăp hơeng dơ̆ng. Tui hăng kâo, ñu jing sa tơlơi ngă gơ̆ng jơlan kơ tơlơi yom pơphăn Khua Yang dưi ngă găn mơng tơlơi hơdip ană bă Ñu. Samơ̆ amăng mông anŭn, kâo ăt kiăng mơ̆n dưi jing hrŭp hăng ñu, kiăng dưi ngă jing bruă amăng rĭm bruă kâo ngă, kiăng dưi hơdip hiam klă ƀiă dơ̆ng, nang ai Khua Yang či khăp kơ kâo lu hloh dơ̆ng.

Wơt dah sui thŭn blan kâo aka ƀu thâo hluh, samơ̆ ră anai kâo hơmâo thâo laih, abih bang tơlơi pơmĭn anŭn jing soh. Khua Yang hơmâo pơjing rai kâo – kơnơ̆ng kơ kâo đôč. Khua Yang thâo či hơmâo sa hrơi kâo či jrok jơlan, laih anŭn Ñu hơmâo ba kâo glaĭ pơ sang.

Phrâo anai kâo hơmâo bưp glaĭ gơyŭt kâo anŭn. Ñu ăt hiam nanao, črang bơngač laih anŭn ăt dưi hĭ hơdôm tơlơi amăng tơlơi hơdip. Bơkơ kâo, giơ̆ng kơ hơdôm thŭn jrok jơlan, kâo mơak biă mă tơdang bưp glaĭ gơñu tơdang ñu dŏ hiam klă.

Ăt amăng mlăm anŭn mơ̆n, kâo mơdưh sôi ƀiă kiăng kơ đŏk Boh Pơhiăp Khua Yang. Tơdang đok truh pơ hră Mathiơ 9:12-13, kâo ƀu thâo kă kơ̆ng tơƀuai kâo kiăng klao dơ̆ng tah. Ñu laĭ kơ gơñu: “Ƀu djơ̆ ƀing mơnuih suaih prăl ôh kiăng kơ ơi ia jrao, samơ̆ ƀing mơnuih duăm ruă yơh kiăng. Nao bĕ laih anŭn hrăm thâo hluh hyư̆m boh pơhiăp anai kiăng laĭ: ‘Kâo kiăng tơlơi pap drap, ƀu djơ̆ mơnơ̆ng ngă yang ôh.’ Yua kơ Kâo rai ƀu djơ̆ kiăng iâu ƀing tơpă hơnơ̆ng ôh, samơ̆ ƀing soh.” Sĭt yơh, Khua Yang ăt iâu gơyŭt klă tum kâo anŭn, hloh kơ abih bang, Ñu ăt iâu abih bang ƀing mơnuih ƀu klă tum kar hăng kâo anai nao pơ Ñu.

Wơt dah ih hlăk pơblah hăng tơlơi hơdip so hơđăp ƀôdah tơlơi hơdip ră anai, hơdơr bĕ tơlơi khăp Khua Yang hơmâo čơdơ̆ng phŭn mơng tơlơi kơƀah ƀing ta. Ñu pơhiăp hăng ƀing ta tui anai, Ñu hơk mơak yua kơ hơmâo kơsem hơduah ƀuh laih triu rơngiă hloh kơ dua păn pluh dua păn drơi triu hlăk hơđơ̆ng ƀơi anih đang rơk Ñu (Mathiơ 18:12-13)

Hrơi anai, kâo hăng abih pran jua kiăng kơ ƀing ta thâo, wơt dah ƀing ta jing hlơi, Khua Yang nanao khăp kơ ƀing ta. Samơ̆ yua kơ Ñu khăp kơ ƀing ta biă mă tui anŭn Ñu ƀu či brơi ƀing ta jrok jơlan nanao yua kơ tơlơi ƀu klă tum ƀing ta ôh. Hơdơr bĕ tơlơi kâo hơmâo pơhiăp anai, laih anŭn lăng tui bĕ tơlơi hơdip kâo: tơlơi Khăp Khua Yang hơmâo pơrơđah rai klă tum amăng hơdôm tơlơi ƀu klă tum ƀing ta. Pô Pơklaih ƀing ta dưi pha brơi tơlơi khăp klă tum, ƀing ta ƀu kiăng jing hĭ klă tum ôh kiăng kơ dưi tŭ mă tơlơi khăp anŭn.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih hơmâo tŭ mă mơnuih ƀu klă tum hrŭp hăng kâo anai, kiăng kơ kâo dưi ngă ană Ih khăp hơeng. Bơni kơ Khua Yang yua kơ Ih hơmâo khăp kơ kâo wơt kơ kâo ƀu lăp kơ Ih khăp ôh, hơmâo tŭ mă kâo jing sa čô mơnuih soh. Rơkâo Yang Bơngăt Hiam pơblih kâo rĭm hrơi, kiăng kơ kâo dưi jing hrŭp hăng Ih. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, tơlơi ƀu klă tum ƀing ta ƀu dưi kơ̆ng pioh tơlơi khăp klă tum Khua Yang ôh. Ƀing ta ƀu kiăng gir kiăng kơ dưi jing klă tum kiăng kơ Khua Yang khăp ôh, yua kơ Ñu khăp mơnuih sĭt ƀing ta, khăp wơt kơ tơlơi tơdu ƀing ta, tơlơi kơƀah ƀing ta, Ñu kiăng ƀing ta pơblih, prŏng tui rĭm hrơi. Djă pioh bĕ tơlơi sĭt anai laih anŭn rơbat kơjăp amăng jơlan pơ anăp, yua kơ hơmâo thâo laih tơlơi ƀu klă tum ƀing ta či jing hĭ klă tum amăng Khua Yang.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.