Lơ 02/01/204: KƠÑĂM NAO KƠ TƠLƠI HƠDIP PƠ ANĂP

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi.

Hơdôm hrơi blŭng hlâo amăng thŭn phrâo anŭn jing mơnit mông kiăng kơ rĭm čô ƀing ta pơrơđah pran jua thâo hơdơr bơni kơ Khua Yang kơ hơdôm tơlơi hơmâo rơgao laih, laih anŭn jao abih bang tơlơi anŭn brơi kơ Khua Yang kơ rĭm hơdră jơlan amăng thŭn phrâo anai. Wơr hơbit lui hĭ abih hơdôm tơlơi ƀing ta rơbuh, tơlơi soh ƀing ta amăng thŭn so hơđăp, anăp nao kơ tơlơi hơdip pơ anăp, kơñăm nao kơ tơlơi ƀing ta kơñăm kiăng kơ dưi tŭ mă pri bơni kơ tơlơi Ơi Adai iâu amăng Yang Krist Yêsu.

Hrơi anai, lơ 02/01/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Cathy Irvin tui hăng akŏ tơlơi hrăm KƠÑĂM NAO KƠ TƠLƠI HƠDIP PƠ ANĂP

“Kâo đuaĭ kơñăm nao pơ anih pơkơčah, kiăng dưi mă tŭ pri kơ tơlơi iâu hăng adai kơ Ơi Adai amăng Krist Yêsu” (Philip 3:14)

Sĭt nang ai rĭm čô amăng ƀing ta leng kơ dŏ tơguan mơnit mông pơblih mơng thŭn 2023 truh pơ thŭn 2024 kiăng kơ yăp kơdŭn glaĭ mơng mrô 10 truh pơ mrô 1, laih anŭn pơhiăp Mơak Thŭn Phrâo kơ rĭm čô mơnuih. Tơdang yak rơbat găn rơgao nao kơ thŭn phrâo, hơmâo lu mơnuih či tơña, klih yua hơgĕt hrơi mông găn rơgao tañ đơi anŭn. Ăt hơmâo đơđa mơnuih kơtrăm amăng tơlơi pĭt, ƀu dŏ kơčang kơ mơnit mông pơblih mơng thŭn so hơđăp truh pơ thŭn phrâo. Gah rơngiao kơ anŭn, ăt hơmâo mơ̆n đơđa mơnuih či nao pơ sang kơkuh pơpŭ kiăng kơ rơkâo hơduah Khua Yang pha brơi tơlơi mơyun hiam kơ ƀing gơñu, kơ sang anŏ gơñu, kơ gơyŭt gơyâo gơñu, laih anŭn kơ ayăt ƀing gơñu dơ̆ng.

Wơt dah ƀing ta hơduah hơdră jơlan hiưm pă kơ tơlơi ƀing ta čơkă thŭn phrâo, samơ̆ ăt ƀing ta khŏm nanao iâu laĭ hăng Khua Yang kiăng kơ Ñu pha brơi tơlơi mơyun hiam amăng rĭm bruă ƀing ta ngă, laih anŭn wơr hơbit lui hĭ hơdôm bruă ƀing ta aka dưi ngă. Đơđa anŭn jing hơdôm tơlơi ƀing ta hơmâo prap pre či ngă amăng thŭn so hơđăp anŭn. Wơt dah ƀing ta hơmâo prap pre hơdră laih, samơ̆ ƀing ta ƀu dưi ngă pơgiơ̆ng hĭ ôh yua kơ hơmâo lu tơlơi dŏ kơtuă hơmâo truh amăng tơlơi hơdip anai.

Sĭt yơh, Boh Pơhiăp Khua Yang amăng hră Tơlơi Bơrơtưh 16:9 hơmâo brơi kơ ƀing ta thâo: Ană mơnuih pơkra brơi hơdră jơlan kơ ñu pô, samơ̆ Yêhôwa atăt gai khul yak ñu rơbat”. Yua kơ tui anŭn ƀing ta khŏm thâo luă gŭ, pơyơr abih hơdră jơlan ƀing ta amăng plă tơngan Khua Yang, laih anŭn ngă tui Boh Pơhiăp Khua Yang hơmâo čih amăng hră Yôhan 3:30 tui anai: “Ñu khŏm đĭ tui, kâo khŏm trŭn tui.”

Tui hăng Boh Pơhiăp anai, ƀing ta khŏm ngă hơdôm tơlơi ngă bơmơak pran jua Ơi Adai, laih anŭn jing đing ia ba nao ia brơi kơ mơnuih jum dar. Hloh kơ anŭn dơ̆ng, wơt dah hơmâo lu tơlơi kơñăm aka ƀu dưi ngă ôh, ƀing ta ăt khŏm thâo bơni kơ Khua Yang yua kơ hơdră jơlan yom pơphăn laih anŭn hiam klă Khua Yang hơmâo ngă amăng tơlơi hơdip ƀing ta. Tui anŭn, Boh Pơhiăp Khua Yang amăng Hơdrôm Hră hơmâo pơhơdơr brơi kơ ƀing ta khŏm thâo wơr bit lui hĭ tơlơi bruă gah rŏng, kơtưn nao kơ bruă pơ anăp kiăng kơ dưi tŭ mă pri bơni kơ tơlơi Khua Yang iâu amăng Krist Yêsu. Ƀing ta hlăk dŏ amăng tơlơi pơplong gah bơngăt, tui anŭn ƀing ta khŏm anăp nao tơlơi hơdip pơ anăp, wơr hơbit lui hĭ hơdôm tơlơi ƀing ta hơmâo rơbuh laih, hơdôm tơlơi soh amăng thŭn so hơđăp.

Nang ai rĭm čô ƀing ta leng kơ thâo dua jơlan Boh Pơhiăp Ơi Adai amăng hră Philip 3:14, laih anŭn I Kôrantô 9:24:

“Samơ̆ kâo kơnơ̆ng ngă sa mơta tơlơi, kâo wơr bĭt hĭ khul tơlơi hơgĕt gah rŏng laih anŭn kơtưn nao pơ anăp, kâo đuaĭ kơñăm nao pơ anih pơkơčah, kiăng dưi mă tŭ pri kơ tơlơi iâu hăng adai kơ Ơi Adai amăng Krist Yêsu”.

“Ƀing gih ƀu thâo ôh hă, amăng anih plong tong abih bang mơnuih leng kơ đuaĭ soh sel, samơ̆ kơnơ̆ng sa čô đôč hơmâo pri? Tui anŭn, brơi ƀing gih đuaĭ bĕ hiư̆m pă kiăng kơ ƀing gih dưi hơmâo pri”.

Tui anŭn, yak rơbat bĕ hrŏm hăng Khua Yang. Đaŏ kơnang bĕ kơ kơ Khua Yang laih anŭn rơkâo hơduah tơlơi Ñu atăt čông amăng rĭm črăn tơlơi hơdip amăng thŭn phrâo anai. Amăng rĭm hrơi hơmâo găn rơgao, ƀing ta khŏm tơña kơ Khua Yang, hơgĕt tơlơi Ih kiăng kâo ngă amăng hrơi anŭn. Tui anŭn, kơnơ̆ng tơdah ƀing ta dŏ amăng tơlơi Khua Yang atat čông, ƀing ta či dưi tŭ mă tơlơi čang rơmang kiăng kơ rơbat nao amăng thŭn phrâo anai.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih jing Pô thâo rơđah hơdôm tơlơi hơmâo truh kơ kâo amăng thŭn so hơđăp laih anŭn amăng thŭn pơ anăp anai. Rơkâo Khua Yang djru kâo wơr hơbit lui abih hơdôm tơlơi soh, hơdôm tơlơi kâo hơmâo rơbuh laih, kiăng kơ đaŏ kơjăp, laih anŭn čang rơmang rơbat hăng Khua Yang amăng thŭn phrâo anai. Rơkâo Khua Yang djru kâo nanao pioh hrơi mông kơsem hơduah Ih, laih anŭn thâo krăn tơlơi Ih hơmâo atat čông kơ kâo amăng rĭm črăn tơlơi hơdip amăng thŭn phrâo anai. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, ƀing ta ƀu či thâo anăp nao kơ tơlơi hơdip pơ anăp tơdah ƀing ta nanao hơmâo tơlơi kơtraŏ kơ bruă amăng thŭn so hơđăp. Tui anŭn rơkâo hơduah bĕ mơng Khua Yang mă lui hĭ abih bang tơlơi kơtraŏ, tơlơi rơngot hơning laih anŭn hơdôm tơlơi soh hơgơ̆m amăng ƀing ta. Bơni bĕ kơ Khua Yang kơ hơdôm tơlơi yom pơphăn, laih anŭn tơlơi mơyun hiam Ñu hơmâo pha brơi kơ ƀing ta amăng sa thŭn rơgao. Pơyơr đĭ bĕ kơ Khua Yang, rơkâo Khua Yang ngă pơgiơ̆ng hĭ hơdôm hơdră jơlan ih, tơlơi ih kiăng ngă amăng thŭn phrâo anai djơ̆ tui tơlơi Khua Yang kiăng.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.