Lơ 02/12/2023: TƠLƠI RƠPƠI ɃU HIAM

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi.

Sĭt nang ai rĭm čô ƀing ta hơmâo hơmư̆ laih jơlan Boh Pơhiăp Ơi Adai “dram gơnam ƀing gih pơpă pran jua ƀing gih ăt pơ anŭn mơ̆n”. Samơ̆ ƀu amuñ ôh kiăng kơ sa čô mơnuih dưi mưn găn tơlơi hơdip đaŏ kơnang kơ Khua Yang laih anŭn thâo krăn dram gơnam jing tơlơi jang jai laih anŭn tañ rơgao.

Hrơi anai, lơ 02/12/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Laura Bagby tui hăng akŏ tơlơi hrăm TƠLƠI RƠPƠI ɃU HIAM

 “Của cải các con ở đâu thì lòng của các con cũng ở đó.” (Ma-thi-ơ 6:21)

Hơmâo sa hrơi, tơdang nao blơi dram gơnam ƀơ̆ng amăng sa hrơi kŏm, kâo weh nao kơ sa boh sang sĭ mơdro. Tơdang hơmâo ruah giơ̆ng laih dram gơnam ƀơ̆ng, kâo tañ mơtăm nao pơkla prak ƀơi anih pơkla prăk laih anŭn tơbiă mơ̆ng sang mơdro. Mông anŭn, ngĭn čơdơ̆ng thŭt kơtang, kâo gir djă kơ̆ng rơdeh trŭt ƀu tul nao pơ rơdeh kâo ôh. Tơdang ba nao abih bang dram gơnam amăng rơdeh, kâo tañ mơtam ba glaĭ rơdeh trŭt glaĭ pơ anih ñu hơđăp, đĭ rơdeh glaĭ pơ sang.

Giơ̆ng anŭn hơmâo sa tơlơi trŭh pơkŏn dơ̆ng tơdang hơmâo sa boh rơdeh trŭt pơkŏn dơ̆ng tul djơ̆ ƀơi rŏng rơdeh kâo. Mông anŭn kâo pơmĭn, rơdeh trŭt anŭn hơmâo dŏ ƀơi anŭn hlâo kơ kâo găt rơdeh đuaĭ laih. Tui anŭn, kâo trŭn mơng rơdeh, trŭt đuaĭ rơdeh anŭn glaĭ pơ anih ñu kiăng kơ ƀu tul djơ̆ rơdeh kâo dơ̆ng tah.

Tơdang wơ̆t glaĭ, kâo ten ñien lăng glaĭ hơmâo nam rơka mơ̆ ƀơi rơdeh kâo. Kâo ƀuh hơmâo sa nam rơka anĕt ƀơi rơdeh kâo. Samơ̆ tơdang kâo lăng teñ ñien glăi sa wơ̆t dơ̆ng kâo ƀuh sa nam rơka prŏng biă mă ƀơi anăp rơdeh kâo. Kâo dŏ kơtuă biă mă tơdang sa boh rơdeh trŭt sơr đuaĭ mơ̆n jơlan tơdang rơbŭ thŭt kơtang hơmâo ba rai tơlơi truh prŏng tui anŭn.

Kâo ƀu hluh ôh yua hơgĕt tơlơi anŭn hơmâo truh kơ kâo. Kâo ƀu lăp tŭ mă abih bang tơlơi kar hăng anŭn ôh. Yua hơgĕt hơmâo mơnuih pioh rơdeh trŭt anŭn hăng tơlơi ƀu răng tơl rơdeh anŭn tul djơ̆ rơdeh kâo? Ƀing gơñu ƀu thâo ôh hă, bruă ƀing gơñu ngă či ba glaĭ boh than sat kơ pô pơkŏn?

Hlâo kơ anŭn, kâo hơmâo tơlơi hil laih anŭn rŭng răng yua kơ tơlơi truh kar hăng anŭn. Tơdah hlâo adih dôm thŭn, kâo ƀu hyơk bơngơ̆t ôh kơ bruă anai. Samơ̆ amăng mông anai tơdang kâo hlăk bưp tơlơi tơnap amăng prak yua amăng sang anŏ, tơdang kâo hlăk pơkom prăk kiăng kơ pơkla hĭ nua rơdeh kâo phrâo blơi. Kâo pơmĭn nam rơka ƀơi rơdeh kâo anŭn ƀu lăp ôh truh kơ kâo. Hloh kơ anŭn dơ̆ng, mơnuih hiam klă ƀu lăp ôh tŭ mă hơdôm tơlơi sat truh tui anŭn.

Giơ̆ng kơ anŭn ƀiă hrơi, kâo tơbiă rai gah rơngiao kiăng kơ kơsem lăng rơdeh kâo amăng hrơi hơjan. Tơdang nao jĕ giăm pơ rơdeh kâo, kâo ƀuh sa nam rơka hrŭp hăng hlâo adih dơ̆ng, samơ̆ ƀơi anih pơkŏn. Nam rơka anai jĕ giăm tơkai rơdeh kâo. Wơt dah nam rơka anai ƀu prŏng kar hăng hlâo ôh, samơ̆ ñu rơđah biă mă.

Kâo ƀu thâo kơ̆ng pran jua kâo dơ̆ng tah, kâo hil hăng Khua Yang, Ơ Khua Yang, tơlơi hơhĕt hơmâo truh anai? Yua hơgĕt Khua Yang ƀu wai lăng rơdeh kâo? Yua hơgĕt Ih brơi tơlơi anŭn truh kơ kâo? Yua hơgĕt abih bang tơlơi hơmâo truh kơnơ̆ng kơ amăng sa hrơi kŏm đôč?

Abih bang tơlơi truh ngă kơ kâo huĭ bral, hil laih anŭn ƀu anăm kơ̆ng pioh pran jua kâo dơ̆ng tah. Hloh kơ anŭn dơ̆ng, kâo mưn abih bang tơlơi truh, wơt dah anĕt aneo tŭ mơ̆n, ăt ngă kơ kâo rơngot.

Tơdang hơmâo tơlơi hơđơ̆ng, laih anŭn pơmĭn glaĭ kơ dua bruă hơmâo truh, kâo ƀuh Khua Yang hơmâo brơi kâo tơlơi hrăm kơ tơlơi kâo khŏm đaŏ kơnang kơ hlơi ƀôdah kơ bruă hơgĕt. Kâo ƀuh, đơđa kâo kơnang kơ hơdôm tơlơi jang jai amăng tơlơi hơdip anai hloh kơ kơnang kơ Ơi Adai. Laih anŭn kâo ăt ƀu thâo krăn glaĭ lơi kơ tơlơi hơdip kâo, tơl truh hrơi mông hơmâo hơdôm tơlơi truh anĕt hơmâo truh kơ kâo. Kâo hơmâo ngă tui tơlơi kâo mưn laih anŭn ƀu đaŏ kơnang kơ tơlơi hiam klă laih anŭn tơlơi Khua Yang pha brơi. Kâo ƀuh kâo đaŏ kơnang kơ tơlơi thâo kâo pô, dram gơnam kâo pô, hơdôm tơlơi hiam kâo pô. Samơ̆ abih bang tơlơi anŭn jing tơlơi jang jai amăng lŏn tơnah laih anŭn či tañ rơgao. Tơlơi hơdip kâo ăt tañ gao kar hăng jua suă pran.

Bơni kơ Khua Yang yua kơ Ih hơmâo djru kâo dưi wai lăng pran jua kâo pô, laih anŭn ƀu brơi ôh tơlơi mưn sat ngă kơ kâo ƀu anăm kơ̆ng pioh pran jua kâo. Kâo khŏm brơi Khua Yang ngă khua tơlơi pơmĭn kâo, djru kâo thâo ƀuh hơdôm tơlơi sat. Wơt dah hơmâo nam rơka anĕt ƀơi rơdeh kâo, samơ̆ rơdeh kâo ăt thâo đuaĭ đôč. Pran rơdeh kâo ăt dŏ hiam mơ̆n. Ƀu hơmâo tơlơi hơgĕt truh prŏng đơi kơ kâo ôh.

Ăt kar kaĭ mơ̆n, amăng tơlơi hơdip gah bơngăt, ƀing ta khŏm đaŏ kơnang kơ hơdră jơlan Khua Yang. Sĭt yơh, hơdôm tơlơi ƀing ta kiăng, lŏn tơnah či tañ rơgao, samơ̆ bơngăt ƀing ta či dŏ glăi hlong lar amăng Dêh Čar pơtao Khua Yang. Tui anŭn, ƀing ta nanao kơkuh pơpŭ kơ Khua Yang bĕ, wơt dah bưp tơlơi truh, tơlơi lông lăng.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Boh Pơhiăp Ih hrơi anai hơmâo pơhơdơr brơi kơ kâo thâo, kiăng kơ kâo ƀu kơnang kơ dram gơnam, kơnang kơ hơdôm tơlơi jang jai amăng lŏn tơnah anai ôh. Kâo ƀuh hơdôm tơlơi kiăng, hơdôm tơlơi lŏm kơ lŏn tơnah anai či tañ mơtăm rơgao hĭ, tơlơi kâo khŏm ngă anŭn jing prap pre kơ tơlơi hơdip hlong lar amăng Dêh Čar pơtao Ih. Rơkâo Khua Yang djru kâo nanao thâo đaŏ kơnang kơ Ih jing Pô pha brơi gơnam laih anŭn tơlơi hơdip hlong lar. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, abih bang kơnuih ƀing ta pơrơđah rai gah rơngiao leng kơ tơbiă rai mơng tơlơi ih đaŏ kơ hlơi, kơnang kơ tơlơi hơgĕt. Tơdang ih lăng nao kơ Khua Yang, đaŏ kơnang kơ Khua Yang laih anŭn gưt asăp Khua Yang, ih ƀu či ngă tui tơlơi ih pô kiăng dơ̆ng tah. Boh Pơhiăp Khua Yang či djru ih hơdip hăng pran jua thâo bơni, laih anŭn nanao thâo ƀuh hơdôm tơlơi khŏm bơni kơ Khua Yang, pơala kơ tơlơi hil laih anŭn rŭng răng. Brơi bĕ Boh Pơhiăp Khua Yang prŏng tui laih anŭn tơbiă rai boh than mơ̆ng amăng lăm pran jua ih rĭm hrơi.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.