Lơ 03/12/2023: KHUA YANG NANAO DŎ HRŎM

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi.

Hơdôm tơlơi iâu laĭ Khua Yang aka laĭ glaĭ kơ ƀing ta ôh, đơđa ngă kơ ƀing ta gleh glan laih anŭn ƀrư̆ ƀrư̆ ataih tui mơng Khua Yang. Ƀing ta pơmĭn mơ̆ Khua Yang hơmâo wơr bit ƀing ta laih ƀôdah Ñu ƀu ngă hơgĕt ôh kiăng kơ djru ƀing ta, Hơdrôm Hră Ơi Adai pơhiăp hơmâo brơi kơ ƀing ta thâo Ñu hơmâo hơdră jơlan yom pơphăn brơi kơ rĭm čô mơnuih. Khua Yang hơmâo prap pre brơi kơ ƀing ta hơdôm tơlơi yom pơphăn amăng hrơi mông hiam klă Ñu. Khua Yang ƀu ataih mơng ƀing ta ôh, Ñu nanao dŏ hrŏm ƀing ta.

Hrơi anai, lơ 03/12/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăngBrooke Keith tui hăng akŏ tơlơi hrăm KHUA YANG NANAO DŎ HRŎM

Samơ̆, tui hăng hră Ơi Adai hơmâo čih laih: “Hơgĕt tơlơi mơta aka ƀuh, tơngia aka hơmư̆, Laih anŭn pran jua ană mơnuih kŏn pơmĭn nao lơi, Samơ̆ Ơi Adai hơmâo pơkra pioh brơi laih kơ ƀing khăp kơ Ñu,” (I Kôrantô 2:9)

Amăng tơlơi hơdip, hơmâo lu tơlơi truh ƀu djơ̆ tui tơlơi ƀing ta kiăng. Ƀing ta kiăng tơlơi anai samơ̆ hơmâo tŭ mă tơlơi pơkŏn. Ƀing ta rơkâo hơduah Khua Yang pha brơi ƀing ta tui hăng tơlơi ƀing ta kiăng samơ̆ Ñu ƀu pha brơi kơ ƀing ta ôh. Ƀing ta kiăng tơlơi sêh mơyang truh kơ ƀing ta, laih anŭn nanao kơsem hơduah tơlơi anŭn. Giơ̆ng anŭn, tơdang aka ƀu tŭ mă tơlơi laĭ glaĭ, hơmâo hrơi mông ƀing ta kiăng kơ lui hĭ, ƀu kiăng đaŏ kơnang kơ Khua Yang dơ̆ng tah.

Tơdah ƀing ta hơmâo găn laih hrơi mông Khua Yang ƀu laĭ glaĭ ôh tơlơi ƀing ta iâu laĭ, dŏ kơjăp pran jua laih anŭn đaŏ kơnang bĕ kơ Khua Yang. Khŏm thâo bĕ tơlơi anai: Khua Yang nanao dŏ hrŏm laih anŭn Ñu či laĭ glaĭ kơ ih amăng hrơi mông Ñu kiăng. Mơng rơnuk đưm truh ră anai, ƀing mơnuih đaŏ kơ Khua Yang aka ƀu hơmâo tơlơi či mlâo ôh. Abraham đaŏ kơnang kơ Khua Yang laih anŭn Ñu ƀuăn či pha brơi kơ ñu ană kơ tơlơi ƀuăn. Ƀôdah sa tơlơi ră ruai kơ Thomas Edison ăt brơi kơ ƀing ta thâo tơlơi klă tum amăng hrơi mông Khua Yang.

Thomas Edison jing sa čô čơđai hơmâo tơlơi rơgơi. Samơ̆ ƀing nai pơtô ñu pơmĭn ñu hưt, kơnuih hơdip phara hăng mơnuih pơkŏn ngă kơ ñu tơnap biă mă kiăng kơ hơmâo gơyut. Nang ai Thomas Edison ăt iâu laĭ rơkâo Khua Yang djru ñu kiăng kơ dưi hơmâo gơyut. Nang ai rĭm mlăm ñu nanao hia ƀơi sưng pĭt ñu tơdang pơmĭn nao kơ hơdôm čơđai pơkŏn djik djak kơ ñu. Nang ai hơmâo lu wơt ñu tơña Khua Yang: “Yua hơgĕt Khua Yang ƀu dŏ hrŏm hơbit kâo amăng mông anŭn?”. Nang ai tơlơi Khua Yang ƀu laĭ glaĭ amăng mông ñu dŏ hyal mal hlăk dŏ čơđai ngă kơ ñu nanao tơña yua hơgĕt Khua Yang ƀu laĭ glaĭ kơ ñu.

Tơdang Ơi Adai ƀu ba rai ƀing gơyŭt brơi kơ Thomas Edison kar hăng ƀing čơđai pơkŏn, samơ̆ Khua Yang hơmâo pha brơi kơ ñu lu tơlơi yom pơphăn pơkŏn dơ̆ng. Ñu hơk mơak pơčeh rai lu tơlơi, laih anŭn kiăng pơjing rai lu tơlơi tŭ yua mơng tơlơi hơmâo laih amăng lŏn tơnah anai. Amăng lu tơlơi pơmĭn anŭn ñu hơmâo pơčeh rai apui črang rơđah, gơnam čih glaĭ tơlơi pơhiăp laih anŭn gơnam pơdah rup hơmâo lu tơlơi tŭ yua biă mă.

Ƀing ta hơmâo ƀuh laih, wơt dah Khua Yang ƀu laĭ glaĭ tơlơi ñu iâu laĭ samơ̆ Khua Yang hơmâo pha brơi ñu lu tơlơi pơkŏn. Tơl Thomas Edison hơmâo tha truh laih, hơdôm tơlơi ñu hơmâo pơčeh rai ngă kơ ñu jing hĭ mơnuih khĭn kơtang amăng pran jua kơ glăk glai ƀing čơđai. Ñu hơmâo ngă brơi kơ ƀing čơđai nanao hơmâo tơlơi pơmĭn kiăng, hơmâo tơlơi pơčeh laih anŭn nanao ƀu lui hĭ tơlơi ñu hơmâo đaŏ laih. Khua Yang nanao dŏ hrŏm jĕ giăm ƀing ta laih anŭn Ñu dŏ hrŏm ƀing ta amăng rĭm mông, rĭm hrơi.

Samơ̆, hơmâo mơ̆n đơđa ƀing ta pơmĭn Khua Yang ƀu hyơk bơngơt kơ ƀing ta laih anŭn hơmâo lui ƀing ta laih. Samơ̆ Khua Yang jing Pô hơmâo hơdră jơlan yom pơphăn brơi kơ ƀing ta laih anŭn Ñu nanao dŏ hrŏm hăng ƀing ta, rơbat hrŏm hăng ƀing ta.

Boh Pơhiăp Khua Yang hơmâo pha brơi kơ ƀing ta tơlơi čang rơmang amăng Khua Yang, pha brơi ƀing ta hơdôm tơlơi pran jua ƀing ta aka pơmĭn nao ôh tui tơlơi pơmĭn hiam klă Khua Yang.

Yêhôwa laĭ: “Yua kơ Kâo Pô thâo hơdră Kâo pơkra brơi laih kơ ƀing gih; anŭn jing hơdră rơnŭk rơnua ƀu djơ̆ jing hơdră tơlơi răm ruă kơ ƀing gih ôh, kiăng pha brơi kơ ƀing gih sa rơnŭk pơ anăp laih anŭn sa tơlơi čang rơmang”. (Yêrêmi 29:11)

Samơ̆, tui hăng hră Ơi Adai hơmâo čih laih: “Hơgĕt tơlơi mơta aka ƀuh, tơngia aka hơmư̆, Laih anŭn pran jua ană mơnuih kŏn pơmĭn nao lơi, Samơ̆ Ơi Adai hơmâo pơkra pioh brơi laih kơ ƀing khăp kơ Ñu,” (I Kôrantô 2:9)

Rơkâo ƀing ta pioh mông iâu laĭ hrŏm hơbĭt:
Bơni kơ Khua Yang yua kơ Ih ƀu lui kâo ôh. Rơkâo Ih djă kâo nanao dŏ amăng tơlơi lir hơbit jĕ giăm Ih kiăng kơ dưi thâo krăn hơdră jơlan hiam klă Ih hơmâo pha brơi kơ tơlơi hơdip kâo. Kâo đaŏ sĭt Ih hơmâo pha brơi kơ kâo hơdôm tơlơi yom pơphan amăng mông hiam klă Ih. Rơkâo Ih djru kâo thâo gir amăng tơlơi dŏ tơguan tơlơi Ih hơmâo ƀuăn brơi kơ kâo. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, Ơi Adai ƀing ta jing Pô hơnơ̆ng ten, Ñu nanao dŏ jĕ giăm laih anŭn rơbat hrŏm hơbit ƀing ta amăng rĭm anih. Ƀing ta khŏm đaŏ kơnang kơ Khua Yang, djă tơlơi lir hơbit hăng Ñu, pioh hơjăn mông mơnit kơsem hơduah Khua Yang laih anŭn dŏ tơguan hrơi mông hiam klă Ñu. Anăm brơi ôh tơlơi gŭn găn, ƀôdah tơlơi ƀu đaŏ ƀing ta ngă kơ ƀing ta pơđing Khua Yang, samơ̆ hăng abih pran jua kơsem hơduah bĕ Khua Yang. Ñu či laĭ glăi kơ ih tum djop tơdang ih hơmâo abih pran jua kơsem hơduah Ñu.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.