Lơ 04/01/2024: BƠYAN BƠNGA HƠM O TRUH

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Bơyan bơnga anŭn jing bơyan čơdơ̆ng phŭn blŭng abih bang bruă, abih bang mơnơ̆ng pơblih ao phrâo, phŭn bơnga čôh bơnga ñu. Ăt anai mơ̆n jing mơnit mông čơdơ̆ng phŭn kơ thŭn phrâo hăng lu hơdră jơlan laih anŭn tơlơi pơmĭn či ngă amăng thŭn phrâo. Ƀing ta ƀu thâo ôh hơgĕt či truh amăng hrơi mông pơ anăp, ƀing ta juăt ƀlơ̆ng bơngơ̆t kơ tơlơi či truh pơ anăp. Hơdôm tơlơi anai či ngă kơ ƀing ta rơngiă hĭ tơlơi mơak klă tum. Boh Pơhiăp Khua Yang hrơi anai hơmâo pơhơdơr brơi kơ ƀing ta kiăng kơ ƀing ta anăm ƀlơ̆ng bơngơ̆t, samơ̆ hơk mơak tŭ mă hơdôm tơlơi Khua Yang pha brơi.

Hrơi anai, lơ 04/01/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Kay Camenisch tui hăng akŏ tơlơi hrăm BƠYAN BƠNGA HƠM O TRUH

Tui anŭn anăm ƀlơ̆ng bơngơ̆t ôh kơ hrơi pơgi, yua kơ hrơi pơgi či ƀlơ̆ng bơngơ̆t kơ hrơi pơgi. Tơlơi gleh hrơi pă djŏp kơ hrơi anŭn yơh (Mathiơ 6:34)

Bơyan bơnga jing bơyan kâo khăp hloh kơ abih bơyan amăng sa thŭn. Kâo khăp kơ đang rơk mơda, khul bơnga hiam, asăp čim mơñi, mơnuih čuar hơmua čơdơ̆ng mă bruă. Samơ̆ thŭn anai, bơyan bơnga rai akaih ƀiă.

Hrơi rơŏt laih anŭn pler či truh amăng hrơi pơgi. Amăng hrơi blŭng hlâo amăng blan 1 tui hăng lơ ƀing ta juăt hơmâo, ƀing ta ăt dŏ amăng bơyan puih. Ƀing ta hơmâo tơlơi kĭ kơ̆ kơ tơlơi anai mơ̆, samơ̆ lu wơt kâo ƀuh tơnap biă mă kiăng kơ hluh tơlơi anai. Ngă hiưm pă ƀing ta dưi thâo krăn sĭt bơnyan bơnga hơmâo truh laih?

Adai rơngit thŭn anai ngă kơ kâo hơdơr nao kơ adai rơngit hơmâo truh mơng tơ̆ng krah thŭn truh pơ abih thŭn 1980. Amăng thŭn anŭn kâo ƀuh khul bơnga čôh amăng blan dua. Tơdang kâo ƀuh tơlơi bơngač pơčrang amăng bơyan puih rơŏt ngă kơ pran jua kâo rơngot. Mông anŭn kâo kiăng pơhiăp hăng mơnuih jum dar tui anai: “Bơyan bơnga aka truh ôh! Pĭt hơđơ̆ng amăng khăn ih bĕ tơdang hrơi rơŏt aka truh, ñu či ngă kơ ih rơŏt”.

Samơ̆ hrơi rơŏt ƀu truh ôh, jai hrơi jai hơmâo lu bơnga čôh. Tơlơi anŭn ngă kơ kâo ƀu mơak pran jua ôh. Kâo kơnơ̆ng kiăng hrơi rơŏt či ngă brơi kơ khul bơnga ƀu thâo čôh bơnga dơ̆ng tah. Hơdôm hrơi kŏm hơmâo găn rơgao laih ngă kơ kâo hluh laih mông anai, bơyan bơnga hơmâo truh laih amăng thŭn anŭn.

Yua kơ anŭn kâo hơmâo rơngiă hĭ tơlơi anŭn. Biă mă ñu kâo khŏm čơkă bơyan bơnga hơmâo truh, samơ̆ kâo nanao ƀlơ̆ng bơngơ̆t amăng hrơi mông anŭn. Yua kơ ƀlơ̆ng bơngơ̆t anŭn yơh hơmâo mă đuaĭ tơlơi mơak kơ kâo. Tui anŭn kâo ƀu kiăng ngă glaĭ ôh tơlơi anŭn amăng bơyan bơnga anai. Kâo ƀu thâo ngă hiưm pă ôh kiăng kơ bơyan bơngă rai tañ, samơ̆ kâo khŏm mơak kơ abih bang tơlơi anŭn.

Tơlơi anŭn hơmâo ngă brơi kơ kâo thâo, hơmâo lu khul tơlơi amăng tơlơi hơdip anai ngă kơ tơlơi hơdip ƀing ta ƀu jing klă tum dơ̆ng tah. Nang ai yua kơ ƀing ta hlăk ƀlơ̆ng bơngơ̆t kơ bơngăt ƀing ta. Hơmâo lu wơt ƀing ta ƀlơ̆ng bơngơt yua kơ pơmĭn glaĭ kơ hrơi blŭng hlâo ƀing ta nao sang hrăm hră, pơmĭn glaĭ kơ hrơi ƀing ta tơbiă mơng sang hră, ƀôdah pơmĭn glaĭ kơ mông ƀing ta čơdơ̆ng sang anŏ phrâo? Yua kơ tơlơi ƀlơ̆ng bơngơ̆t anŭn yơh ngă kơ ƀing ta rơngiă hĭ tơlơi mơak amăng hrơi anŭn.

Hơmâo đơđa mơnuih mă bruă hăng abih pran jua yua kơ huĭ rơngiă bruă ñu. Kar kaĭ hăng anŭn mơ̆n, nai ia jrao pơthâo brơi kơ ƀing ta thâo tơlơi ruă ƀing ta, tơlơi anŭn či ngă kơ ƀing ta ƀlơ̆ng bơngơ̆t kơ tơlơi hơdip ƀing ta pơ anăp. Tơlơi anŭn či ngă kơ ƀing ta tơdu hĭ pran jua, tơlơi hơdip ƀing ta, laih anŭn tơlơi mơak ƀing ta. Hloh kơ anŭn dơ̆ng, tơlơi ƀing ta ƀlơ̆ng bơngơ̆t ƀu či hrŏ hĭ tơlơi rung răng ƀing ta amăng hrơi pơ anăp ôh. Tơlơi ƀlơ̆ng bơngơ̆t kơnơ̆ng thim tơlơi kơtraŏ kơ ƀing ta đôč.

Boh Pơhiăp Khua Yang amăng hră Mathiơ 6:34 hơmâo pơhơdơr brơi kơ ƀing ta: “Tui anŭn anăm ƀlơ̆ng bơngơ̆t ôh kơ hrơi pơgi, yua kơ hrơi pơgi či ƀlơ̆ng bơngơ̆t kơ hrơi pơgi. Tơlơi gleh hrơi pă djŏp kơ hrơi anŭn yơh”.

Ƀing ta anăm ƀlơ̆ng bơngơ̆t kơ hrơi pơgi ôh. Tơlơi gleh glan hrơi pă tum djŏp kơ hrơi anŭn yơh.

Yua kơ anŭn yơh, kâo hơk mơak yua kơ bơyan bơnga hơmâo truh tañ. Kar hăng boh hră tơlơi adoh hơmâo čih Kâo Thâo Pô Djă Tơlơi Hơdip Pơ Anăp: “Kâo ƀu thâo hrơi pơgi či hiưm pă? Kâo kơnơ̆ng hơdip rĭm hrơi đôč. Kâo pơmĭn kơ yang hrơi bơngač, anih adai anŭn bơblih hiưm thâo lĕ? Kâo ƀu ƀlơ̆ng tơlơi hơdip pơ anăp hiưm pă. Kâo hơmư̆ laih asăp Khua Yang rai kâo hlăk rơbat jĕ Yêsu mông anai, yua Ñu thâo hlâo rĭm jơlan. Pơ anăp kâo dŏ hơmâo lu lĭn tơlơi, kâo ƀu ƀlơ̆ng bơngơ̆t dơ̆ng ôh. Yua kâo thâo pô djă anăp tơlơi hơdip, hăng kâo thâo Ñu hlăk wai lăng” hơmâo pơalum kâo lu biă mă laih anŭn ngă kơ kâo đaŏ kơjăp kơ Khua Yang.

Djơ̆ biă mă khŏm truh Blan Kllâo mơĭ, anŭn jing bơyan bơnga či truh sĭt, samơ̆ ră anai kâo hlăk ƀuh bơyan bơnga truh laih. Bơni kơ Khua Yang yua kơ Ih hơmâo brơi tơlơi hơdip phrâo kơ kâo laih anŭn kâo hơmâo tŭ mă tơlơi anŭn amăng rĭm mơnit mông amăng tơlơi hơdip anai.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih jing Pô djă tơlơi hơdip pơ anăp ƀing gơmơi. Bơni kơ Khua Yang yua kơ Ih hơmâo pha brơi tơlơi hơdip phrâo amăng thŭn anai. Rơkâo Khua Yang nanao djru ƀing gơmơi thâo đaŏ kơnang kơ Khua Yang jing Pô thâo rơđah abih bang tơlơi hơmâo truh kơ ƀing gơmơi laih anŭn djru ƀing gơmơi ƀu ƀlơ̆ng bơngơ̆t kơ hrơi pơgi. Bơni kơ Khua Yang yua kơ Ih nanao rơbat hrŏm ƀing gơmơi amăng rĭm yak rơbat amăng tơlơi hơdip. Kâo iâu lăi hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, hơdră jơlan Ơi Adai nanao jing hiam klă kơ abih bang ƀing ta. Tui anŭn anăm brơi tơlơi ƀlơ̆ng bơngơ̆t mă đuaĭ hĭ tơlơi mơak amăng ƀing ta. Hơdơr glaĭ bĕ, rĭm bruă hơmâo truh amăng hrơi pơ anăp leng kơ dŏ amăng hơdră jơlan Khua Yang. Tui anŭn hơk mơak bĕ amăng Khua Yang, bơni kơ Khua Yang yua kơ hơdôm tơlơi ih hlăk hơmâo ră anai, laih anŭn pơyơr đĭ hơdôm tơlơi ih kiăng ngă amăng thŭn phrâo anai kơ Khua Yang.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.