Lơ 06/02/2024: MƠNĂ ĂT DŎ HM O TƠLƠI ČANG RƠMANG

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Arăng juăt laĭ nao kơ tơlơi čang rơmang kar hăng sa tơlơi mưn mơak, bă blai tơlơi rơngai. Samơ̆ či hiư̆m pă tơdah arăng “krư̆” kơ ƀing ih yua kơ tơlơi čang rơmang kơ ƀing ih? Ƀing ih čang biă mă tơguan Khua Yang laĭ glaĭ tơlơi ƀing ih iâu pơthưr, tơl ngă pơrơngiă hĭ tơlơi rơnŭk rơnua hăng tơlơi mơak hrăp amăng tơlơi hơdip? Anăm hăt hot, yua kơ Khua Yang hlăk wai lăng kơ ƀing ih amăng anih tơlơi rơnŭk rơnua, laih anŭn Ñu ƀuăn Ñu či pha brơi kơ ƀing ih lu hloh dơ̆ng.

Hrơi anai, lơ 06/02/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Sarah Fletcher tui hăng akŏ tơlơi hrăm MƠNĂ ĂT DŎ HM O TƠLƠI ČANG RƠMANG.

“Ơ ƀing mơnă dŏ hmâo tơlơi čang rơmang, wơ̆t glaĭ bĕ pơ kơđông! Amăng hrơi anai, Kâo pơthâo tơlơi Kâo či brơi glaĭ kơ ih dua wơ̆t lu hloh” (Sakari 9:12)

Hlâo kơ jă nao thŭn phrâo, năng ai amăng rĭm čô ƀing ta leng mưn ƀuh bă blai tơlơi čang rơmang. Hnŭn jing mông ƀing ta lăng glaĭ amăng tơlơi rơgao laih hăng anăp nao pơ tơlơi hơdip pơanăp, hơdơr pơmĭn glaĭ hơdôm anih ƀing ta hmâo nao laih anŭn pơmĭn nao kơ anih ƀing ta kiăng nao. Samơ̆ tơ̆ng krah tơlơi mơhao kơtưn nao pơ anăp anŭn, či hiư̆m pă tơdah ƀing ih mưn ƀuh ƀing ih khŏm dŏ hnơ̆ng, dŏ kơjăp pơanih kơ pô laĭ lui hlâo Sakari iâu jing “kơđông”?

“Ơ ƀing mơnă dŏ hmâo tơlơi čang rơmang, wơ̆t glaĭ bĕ pơ kơđông! Amăng hrơi anai, Kâo pơthâo tơlơi Kâo či brơi glaĭ kơ ih dua wơ̆t lu hloh” (Sakari 9:12)

Tăp năng ječ hmač kơsŭng nao pơ anăp – đuaĭ tui khul tơlơi rơgao hloh pran kơtang ƀing ta, rơgao hloh kơ tơlơi pơmĭn laih anŭn tơlơi kơñăm Khua Yang hmâo pioh brơi kơ ƀing ta.

Boh Pơhiăp Khua Yang amăng Sakari hmâo djơ̆ amăng pran jua kâo, tơdang kâo hăt hot biă mă hơduah tơlơi pơklaih, tơlơi pơsuaih laih anŭn tơlơi pơkơjăp, pơkơtang glaĭ kơ kâo pô ăt hrŏm hăng ƀing mơnuih amăng sang anŏ kâo khăp hơeng kar kaĭ mơ̆n. Hrơi anai truh hrơi pơkŏn găn gao, kâo kơwưh rơkâo kơ Khua Yang pơblih tơlơi truh amăng tơlơi hơdip kâo laih anŭn ngă pơgiơ̆ng hĭ khul tơlơi Ñu hmâo ƀuăn laih.

Abih bang bruă blĭp hmâo tơlơi pơrơđah – kâo hluh amăng tơlơi hơdip, hmâo khul hrơi mông, khul buă laih anŭn čăl črăn khŏm ƀing ta pơhrăm mă kơ hơdră jơlan dŏ dơ̆ng glaĭ hăng mơak hrăp, wơ̆t dah hlăk bưp khul tơlơi truh ƀing ta ƀu kiăng. Dŏ dơ̆ng glaĭ ƀu djơ̆ hăng kơnuih rơnŭk rơnua, klaih lui samơ̆ ăt dŏ djă kơjăp tơlơi čang rơmang wơ̆t dah kơ ƀing ta pô hlăk dŏ mơnă.

Kâo đaŏ hmâo hrơi mông Khua Yang wai lăng ƀing ta amăng kơđông, hlăk gah rơngiao dih tơlơi čang rơmang ăt dŏ ngă bruă găn mơ̆ng khul tơlơi iâu laĭ, kơwưh rơkâo kơ ƀing ta, wơ̆t kơ ƀing ta ƀuh ha ƀôdah ƀu ƀuh. Laih anŭn kâo bơni yua kơ Boh Pơhiăp Khua Yang pơkơjăp kơđông anai jing sa anih hmâo tơlơi rơnŭk rơnua – anih wai lăng ƀing ta rơnŭk rơnua tơl tơlơi čang rơmang klă tum hmâo pơrơđah, atăt ba ƀing ta truh pơ anih hmâo tơlơi pơkra glaĭ.

Jơlan Hră Ơi Adai Pơhiăp anai pơkơjăp tơlơi čang rơmang amăng tơlơi hơdip ƀing ta hăng tơlơi ƀuăn sĭt tui anai Khua Yang či pha glaĭ dua wơ̆t kơ khul tơlơi ƀing ta hmâo rơngiă laih.

Amăng thŭn phrâo anai, čang rơmang abih bang ƀing ta gir run djă kơjăp tơlơi čang rơmang ƀing ta hmâo pơhaih, kiăng tơlơi čang rơmang anŭn wai lăng ƀing ta nanao rơnŭk rơnua tơl kơ tơlơi pơkra glaĭ tum num hmâo ngă amăng tơlơi hơdip ƀing ta; yua kơ Pô hmâo ƀuăn hăng ƀing ta jing Ơi Adai hơnơ̆ng ten.

Rơkâo ƀing ta pioh mông iâu laĭ hrŏm hơbĭt
Ơ Khua Yang, tăp năng kâo hăt hot hăng sư̆ bư̆ ngă khul bruă kâo kiăng. Rơkâo kơ Ih djru kơ kâo nanao thâo hơduah rơkâo laih anŭn čang tơguan tơlơi Ih kiăng. Bơni kơ Ih nanao wai lăng kâo ƀơi kơđông rơnŭk rơnua Ih. Kâo đaŏ laih anŭn dŏ tơguan mông hrơi Ih ngă tŏ tui hơdră Ih amăng tơlơi hơdip kâo. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, ƀing ih hlăk pơrơngiă hĭ mơ̆ tơlơi rơnŭk rơnua tơdang hur har biă mă ngă khul hơdră jơlan kơ ƀing ta pô? Čang rơmang biă mă amăng thŭn phrâo anai, ƀing ih či thâo krăn tơlơi Khua Yang kiăng brơi kơ rĭm mông hrơi, kiăng kơ dưi hơdip mơak hrăp amăng abih bang tơlơi truh, hăng tơlơi čang rơmang kơjăp ƀơi boh pơhiăp Khua Yang ƀuăn, Ñu nanao dŏ jĕ giăm wai lăng ƀing ta laih anŭn pha brơi kơ ƀing ta tơlơi mơyun hiam lu hloh dơ̆ng.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.