Lơ 07/12/2023: KHUL BOH PƠTŬ RƠĐAH

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Ƀing ih khăp lăng khul pơtŭ laih anŭn adai hiam klă amăng mlam mơ̆? Hmâo mơ̆ mông ƀing ih ur đĭ ƀơi tơlơi hiam rŏ hling hlang kơ mơnơ̆ng mơnuă amăng adai rơngĭt anai? Pô Hrih Pơjing hnŭn jing Ơi Adai tơlơi dưi mơyang ƀing ta kơkuh pơpŭ hmâo hrih pơjing adai rơngit lơ̆n tơnah hiam klă anai. Ñu kiăng kơ ƀing ta hơ̆k mơak mă tŭ tơlơi hơdip ƀơi lŏn tơnah hăng khul tơlơi hiam klă hloh kơ abih bang.

Hrơi anai, lơ 07/12/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Jennifer Devlin tui hăng akŏ tơlơi hrăm KHUL BOH PƠTŬ RƠĐAH.

“Hơduah bĕ Pô hmâo hrih pơjing laih khul pơtŭ Plêat laih anŭn pơtŭ Ôriôn; pơblih tơlơi mlam mơmŏt jing hĭ ưm mơguah, pơblih tơhrơi jing hĭ mlam mơmŏt, iâu ia mơ̆ng ia rơsĭ laih anŭn tuh hĭ ñu ƀơi lŏn tơnah; anăn Ñu jing Yêhôwa.” (Amôs 5:8)

Hlăk kâo dŏ hrăm hră amăng sang hră gưl klâo, anih sang hrăm kâo hmâo sa adŭ hơduah hrăm kơ khul boh pơtŭ amăng adai rơngit. Kâo amoaih khăp biă mă kơ tơlơi rơgơi laih anŭn khul tơlơi pơhrăm kơ yang đar yua kơ anŭn yơh kâo juăt pioh hrơi mông amăng adŭ hiam klă anai kiăng kơsem lăng khul boh pơtŭ. Hnŭn jing thŭn đŭt kơ gưl hrăm yua kơ anŭn kâo khŏm ruah khul tơlơi kâo hrăm. Kâo dưi mơ̆ hmâo puăng lu tơdang hrăm pơgiơ̆ng hĭ anih pơhrăm gưl klâo kiăng kơ hrăm tơlơi pơhrăm kơ tơlơi hơduah hrăm kơ adai rơngit hloh kơ tơlơi pơhrăm kơ tơlơi hrăm pơkŏn? Kâo dưi ngă kar hăng anŭn mơ̆? Kâo pơmĭn kâo či hrăm kơ tơlơi hrăm kơsem ep kơ adai. Hăng tơlơi tŭ ư kơ nai pơtô laih anŭn hrơi mông hrăm amăng tơngan, kâo rơbat nao pơ adŭ hrăm hăng mrô akŏ mơnuih hrăm hmâo tĕp ƀơi bah amăng.

Tơlơi pơhrăm blŭng hlâo, abih bang ƀing hrăm khŏm pơƀŭt glaĭ ƀơi jơlan tơ̆ng krah anih pioh hră hăng anih pơgop phŭn amăng sang hră. Ƀing gơmơi dŏ amăng khul grê mơak mơai hloh kơ anih hrăm pơkŏn amăng sang hră. Tơdơi kơ anŭn nai pơđar kơ ƀing gơmơi khŏm dŏ ah rŏng ƀơi grê dŏ anŭn amăng adŭ kơnăm mơmŏt hăng bơnal phim pơčrang hmâo pioh amăng grông sang. Hlăk anŭn ƀing gơmơi lăng nao rai kơ tơdruă laih anŭn thâo krăn anih adŭ anŭn jing anih hiam klă biă mă amăng anih sang hră.

Ƀing gơmơi ah rŏng ƀơi grê dŏ mơak mơai biă mă hăng khul apui ƀu rơđah ôh amăng abih gưl tơlơi pơhrăm. Hlăk anŭn, ƀing gơmơi mưn ƀing gơmơi hlăk đih amăng sưng, som khăn laih anŭn glưh hĭ mông râo mơdưh sa wơ̆t dơ̆ng. Tơdang hmư̆ nai pơtô pơblang kơ tơlơi hrăm kơ adai rơngit ƀing gơmơi hmâo hrăm mă lu mơta tơlơi kơ adai rơngit kơ Ama Amăng Adai Adih hmâo hrih pơjing. Kâo bơni biă mă yua kơ kâo hmâo ruah mă anih pơhrăm anai. Ƀu djơ̆ kơnơ̆ng kâo dưi găn hĭ kơ tơlơi pơlông amăng sang hrăm hră gưl klâo hăng puăng kơ tơlơi pơhrăm jing glong biă mă, ăt dŏ lu mơta amăng tơlơi pơmĭn kâo hiam biă mă laih anŭn tơlơi khăp kơ adai hăng lu la lu lin khul boh pơtŭ hiam rŏ. Tơlơi hrăm gưl anai ba glaĭ kơ kâo lu mơta tơlơi mơak mơai yua kơ hmâo tơlơi pơhrăm kơ tơlơi hrăm kơ adai jing kơ kâo ƀu hrăm dơ̆ng tah tơlơi hrăm kơ tơlơi pơplih amăng lăm gơnam jing tơlơi pơhrăm tơnap biă mă hăng kâo.

Tơlơi pơhrăm ep hrăm kơ adai rơngit jing tơlơi pơhrăm phrâo hăng kâo samơ̆ khul boh pơtŭ amăng adai rơngit hmâo hlâo kơ anŭn laih. Lu mơnuih khăp ep kơsem lăng khul boh pơtŭ laih anŭn anih adai hiam amăng mlam. Lu rơnŭk thŭn găn gao, ƀing kơhnâo rơgơi ep hrăm khul boh pơtŭ hăng ruaĭ pơtŭ hmâo ba glaĭ kơ ƀing ta tơlơi pơblang rơđah kơ anih dŏ, anŏ phara laih anŭn anŏ tơnap kơ kual yang hrơi. Wơ̆t dah rup amăng mlam hiam laih anŭn prŏng prĭn biă mă samơ̆ bruă kiăng thâo gơnam yom hơgơ̆m amăng adai ngă kơ kâo mưn ƀuh mơak mơai hloh dơ̆ng. Yua kơ khăp kiăng kơ thâo krăn tơlơi hling hlăng amăng adai kơ đơđa mơnuih amăng lu rơnŭk ƀu pơƀŭt pơmĭn nao ôh kơ tơlơi kơkuh pơpŭ kơ Pô Hrih Pơjing, jing Pô hrih pơjing khul boh pơtŭ. Samơ̆ jing ană bă Ơi Adai ƀing ta khŏm dưi hĭ tơlơi mơneč laih anŭn tơlơi plư plač kơ yang sat.

Boh Pơhiăp Khua Yang amăng Hră Ơi Adai Pơhiăp pơthâo brơi kơ ƀing ta thâo ƀing ta ƀu dưi kơkuh pơpŭ kơ hlô mơnơ̆ng mơnuă amăng lŏn tơnah anai wơ̆t kơ khul boh pơtŭ. Ƀing ta hmâo hrih pơjing kiăng kơ pơpŭ bơni kơ Ơi Adai jing Pô hrih pơjing rai khul mơnơ̆ng kiăng kơ ƀing ta ep lăng amăng adai rơngit anai. Yua kơ anŭn, adai rơngit amăng mlam ƀu dưi pơhmu ôh hăng tơlơi dưi mơyang prŏng prin kơ Ơi Adai. Khua Yang jing Pô git gai wai lăng abih bang hlô mơnơ̆ng mơnuă amăng lŏn tơnah anai. Hmâo ƀŏ mơta Khua Yang ăt prŏng prin hloh dơ̆ng kơ khul anih ataih hloh amăng adai rơngit anai. Tơdang ƀing ta lăng gơnam hling hlang hmâo hrih pơjing amăng adai anai kar hăng: yang hrơi, yang blan laih anŭn khul boh pơtŭ brơi bơni bĕ kơ Khua Yang yua kơ Ñu pha brơi kơ ƀing ta anih rup hiam kar hăng anŭn.

Brơi ur kraih bơni hơơč kơ Khua Yang laih anŭn thâo krăn Pô tơlơi dưi mơyang kơ ƀing ta kar hăng Boh Pơhiăp Ñu amăng hră Amôs 5: 8 hmâo čih tui anai: “Hơduah bĕ Pô hmâo hrih pơjing laih khul pơtŭ Plêat laih anŭn pơtŭ Ôriôn; pơblih tơlơi mlam mơmŏt jing hĭ ưm mơguah, pơblih tơhrơi jing hĭ mlam mơmŏt, iâu ia mơ̆ng ia rơsĭ laih anŭn tuh hĭ ñu ƀơi lŏn tơnah; anăn Ñu jing Yêhôwa.”

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih jing Pô hrih pơjing kơ kâo laih anŭn abih bang mơnơ̆ng mơnuă hiam klă kiăng kơ kâo lăng đĭ amăng adai rơngit anai. Kâo bơni hơơč kơ Ih yua kơ abih bang khul mơnơ̆ng Ih hrih pơjing hăng hơdră klă hiam Ih hmâo pha brơi kơ ƀing gơmơi. Rơkâo kơ Ih djru kơ ƀing gơmơi hmâo tơlơi khĭn ngă gơ̆ng jơlan kơ Ih jing Pô Hrih Pơjing kơ abih bang ană mơnuih kiăng kơ ƀing gơñu tŭ mă tơlơi pơklaih hlŏng lar. Hăng tơlơi pơpŭ kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, ƀing ta hmâo hrih pơjing kiăng kơ pơpŭ bơni kơ Ơi Adai jing Pô hrih pơjing adai rơngit hăng tơlơi hling hlang kiăng kơ ƀing ta kơsem lăng laih anŭn hơ̆k mơak hơdip rĭm hrơi ƀơi lŏn tơnah. Yua kơ anŭn brơi ur kraih bơni hơơč bĕ kơ Khua Yang, khĭn kơtang ră ruai pơhaih tơlơi ang yang Khua Yang brơi kơ abih bang mơnuih. Ƀing ih dưi gơ̆ng jơlan kơ Khua Yang laih anŭn pơrơđah pran jua tơlơi ƀing ih bơni hăng Ñu tơdang laĭ nao abih bang mơnơ̆ng mơnuă hmâo hrih pơjing amăng adai rơngit lŏn tơnah.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.