Lơ 08/02/2024: ABIH BANG BRUĂ LENG HM O TƠLƠI PƠKĂ

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hrup hăng sa thŭn hmâo pă bơyan , bơyan bơnga, bơyan phang, bơyan hla răng, bơyan puih, tơlơi hơdip ƀing ta amăng lŏn tơnah jing sa ruaĭ hrơi hmâo tơlơi pơkă. Rĭm hrơi pơkă leng hmâo tơlơi kiăng pia laih anŭn tơlơi kơñăm gơñu, wơ̆t mơak ƀôdah rơngot, wơ̆t rơnŭk rơnua ƀôdah angĭn poh yă. Wơ̆t dah ƀing ih hlăk dŏ pơpă, Khua Yang thâo klă tơlơi kiăng kơ ƀing ih, Ñu či dưm dăp laih anŭn atăt ba ƀing ih găn abih bang hrơi pơkă amăng tơlơi hơdip.

Hrơi anai, lơ 08/02/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Lori D’Augostine tui hăng akŏ tơlơi hrăm ABIH BANG BRUĂ LENG HM O TƠLƠI PƠKĂ.

Ƀing ih khăp bơyan pă hloh? Kơ kâo, kâo khăp biă mă bơyan bơnga. Ƀu hmâo hơgĕt hiam hloh dơ̆ng tơdang mă tŭ bơyan bơnga tơdơi kơ lu blan glong rơơ̆t rơŏt, ŭ uăn. Adai rơơ̆ hiam, huih lŏn adai rơơ̆ hiam klă biă mă, tơl kơ abih bang mơnơ̆ng răm rai yua kơ … hơjan rai.

Hơjan amăng khul hrơi akŏ bơyan bơnga? Hiư̆m ƀu hil tơdang hlăk mơak amăng pơ-iă bơyan bơnga blĭp hmâo hơjan tuh trŭn hĭ?

Laih anŭn mơ̆ng anŭn kâo thâo hluh kâo ƀu mơak ôh hăng huih lŏn adai bơyan hơjan. Kâo hlăk gir pơkơdơ̆ng glaĭ hăng bơyan rơơ̆t rơŏt hăng pơrŭng anŭn. Kâo kiăng rĭm mông nanao hmâo tơlơi plŏng dôl amăng pơ-iă bơyan bơnga rơơ̆ djhul.

Biă mă tơlơi hơdip gleh tơnap ăt kar hăng bơyan hơjan. Ăt đơđa hmâo mơ̆n amăng anih kual, bơyan hơjan hăng bơyan phang kơnơ̆ng pơ ataih ƀơƀiă hrơi, ƀu thâo glơng hlâo ƀơi mông pă hơjan truh. Tơlơi anai rŏ dah ƀu djơ̆ ôh samơ̆ abih bang ƀu djơ̆ nanao ƀu djơ̆ ôh.

Mông hrơi pơkuh bơyan rŏ dah tơnap hluh laih anŭn glong glĭn, samơ̆ anŭn jing mông hrơi djơ̆ gal kiăng kơ prŏng đĭ tui amăng tơlơi đaŏ. Tui hăng Boh Pơhiăp Khua Yang, tơlơi đaŏ kiăng pia jing tơlơi hơĭn kơnang kơ khul tơlơi ƀing ta ƀu thâo ƀuh. Brơi hơđơ̆ng bĕ, sa bơyan bơnga phrâo hlăk čơkă kơ ƀing ih. Khua Yang nanao kơjăp hăng khul tơlơi pơkă Ñu hmâo dưm dăp laih, kar hăng tơlơi hơnơ̆ng ten Ñu hăng tơlơi hơdip ƀing ta. Wơ̆t dah ƀing ih dŏ pơpă, bơyan bơnga ăt či dŏ rai. Anŭn jing hơdră yang đar amăng adai rơngit lŏn tơnah.

Tơdang sa thŭn krư̆ glaĭ, năng ai ƀing ih hlăk pơmĭn kơ sa bruă mơnuă phrâo, sa tơlơi lir pơgop phrâo ƀôdah sa tơlơi prŏng, tơlơi hiam klă phrâo kiăng ngă. Bơyan bơnga juăt ba glaĭ kơ ƀing ta tơlơi mơhao kơ khul tơlơi phrâo. Khua Yang thâo krăn ƀing ta kiăng biă mă hmâo tơlơi pơkra glaĭ, laih anŭn Ñu či pha brơi kơ ƀing ta khul yak rơbat kơtưn kơphrâo tui hăng hrơi mông pơkă.

Boh Pơhiăp Khua Yang amăng Khua Pô Pơtô 3:1 hmâo pơhiăp hăng ƀing ta:
“Abih bang bruă leng hmâo hrơi mông soh sel, abih bang tơlơi ƀơi gah yŭ kơ adai leng kơ hmâo hrơi pơkă brơi kơ ñu soh sel.”

Jơlan Hră Ơi Adai Pơhiăp juăt anai pơklă pơsĭt ƀing ta či găn lu hrơi mông pơkă amăng lŏn tơnah anai. Khul hrơi pơkă anŭn ƀu djơ̆ kơnơ̆ng jing pă bơyan, samơ̆ hmâo lu hrơi mông tui anai: Hmâo hrơi mông tơkeng rai, hmâo hrơi mông djai hĭ; hmâo hrơi mông pla, hmâo hrơi mông buč hĭ gơnam arăng pla laih; Hmâo hrơi mông pơdjai hĭ, hmâo hrơi mông pơsuaih; Hmâo hrơi mông ruh hĭ, hmâo hrơi mông pơdơ̆ng đĭ; Hmâo hrơi mông čok hia, hmâo hrơi mông klao hơ̆k; Hmâo hrơi mông kơ-ŭ kơyăm, hmâo hrơi mông yŭn suang; Hmâo hrơi mông glŏm boh pơtâo, hmâo hrơi mông pơƀŭt glaĭ boh pơtâo; Hmâo hrơi mông khăp hơeng, hmâo hrơi mông hrah lui hĭ; Hmâo hrơi mông hơduah sem, hmâo hrơi mông pơrơngiă lui; Hmâo hrơi mông djă pioh glaĭ, hmâo hrơi mông glŏm lui hĭ; Hmâo hrơi mông hek pơtơĭ hĭ, hmâo hrơi mông sĭt thep; Hmâo hrơi mông dŏ rơiăt, hmâo hrơi mông pơhiăp đĭ; Hmâo hrơi mông khăp, hmâo hrơi mông areh hil; Hmâo hrơi mông pơblah wang, hmâo hrơi mông rơnŭk rơnua.

Ƀing ih ƀuh ƀing ih hlăk dŏ amăng hrơi mông pă? Năng ai ƀing ih hlăk dŏ tơ̆ng krah lu hrơi mông phara hrŏm hơbĭt ha sa. Năng ai hmâo mơ̆n ƀing ih hlăk dŏ đom amăng sa hrơi mông sui sĭn biă mă laih anŭn čang rơmang pŭ nao pơ sa čal črăn phrâo. Wơ̆t kơ ƀing ih dŏ pơpă, brơi thâo bơni nanao!

Boh Pơhiăp Khua Yang amăng Khua Pô Pơtô ba rai kơ ƀing ta tơlơi čang rơmang:

“Abih bang bruă Ơi Adai hmâo ngă leng kơ jing hiam klă soh sel amăng hrơi mông ñu. Wơ̆t dah Ơi Adai hmâo dưm pioh laih tơlơi hlŏng lar amăng pran jua ană mơnuih, samơ̆ gơñu ăt ƀu thâo hluh ôh bruă mơnuă Ñu ngă čơdơ̆ng mơ̆ng phŭn hlŏng truh pơ hnal tuč.”

Salômôn hmâo pơđah tơlơi hơgơ̆m kơ tơlơi kiăng laĭ sĭt kơ tơlơi hơdip amăng lŏn tơnah anai. Wơ̆t kơ hrơi mông pơkă pă leng hmâo tơlơi kơñăm, laih anŭn kâo đaŏ ƀing ih dưi hmâo “tơlơi mơak mơai” amăng abih bang tơlơi truh. Ƀing ih ƀuh mơ̆ amăng 28 hrơi mông pơkă Salômôn hmâo laĭ nao, hmâo khul hrơi mông kơnăm mơmŏt kar hăng djai hĭ, pơdjai hĭ, čok hia, hrah lui hĭ, glŏm lui hĭ, areh hil laih anŭn tơlơi pơblah wang? Khul hrơi mông rơngot hơning anŭn hmâo tơlơi kiăng laĭ hơgĕt lĕ?

Tơlơi kiăng pia dŏ amăng, tơlơi tŏ tui kơ bơyan puih jing bơyan bơnga. Amăng tơlơi hơdip, hmâo mơ̆n khul mơta tơlơi khŏm djai hĭ hlom ƀom kiăng kơ ƀing ta dưi hmâo tơlơi găn hĭ kơ tơlơi hơdip klă tum tui hăng tơlơi Khua Yang kiăng. Tơlơi hơdip laih anŭn tơlơi djai ƀu lui tơdruă, samơ̆ djru gum hrŏm. Tơpur kơ tơlơi djai nanao ba glaĭ tơlơi čang rơmang kơ sa tơlơi phrâo. Hrup hăng sa hơdră: mơ̆ng tơlơi djai truh pơ tơlơi hơdip, ƀing ta hmâo tơlơi pơblih kơphrâo.

Hiam klă biă mă, Khua Yang jing Pô hrih pơjing abih bang hlô mơnơ̆ng mơnuă, Ñu thâo khul hrơi mông pơkă pă pơgop glaĭ jing hiam hloh brơi kơ ƀing ih (Bơhmutu: Hek pơtơĭ hăng sĭt thep; khăp hăng mông hrơi areh hil, hia hăng klao mơak). Yua kơ Khua Yang thâo laih anŭn lăng ƀuh abih bang bruă, yua kơ anŭn yơh brơi kơ ƀing ih nanao đaŏ kơnang kơ hơdră jơlan prŏng prin Ñu. Anăm ƀlơ̆ng bơngơ̆t ôh… yua kơ bơyan bơnga giăm truh laih!

“Yua kơ bơyan puih abih laih yơh, ia hơjan hmâo khong hĭ laih; Hmâo lu bơnga blang ƀơi lŏn; Bơyan adoh bơni truh laih yơh, laih anŭn asăp čĭm mơñi kuang hyu pơ djŏp djang anih amăng čar ta.” (Tơlơi Adoh Hiam 2:11-12)

Rơkâo ƀing ta pioh mông iâu laĭ hrŏm hơbĭt
Ơ Khua Yang, rơkâo kơ Ih pha brơi kơ kâo tơlơi rơnŭk rơnua hăng tơlơi hơ̆k mơak amăng abih rơnŭk thŭn amăng tơlơi hơdip. Kâo đaŏ kơnang kơ hơdră prŏng prin ih, kơ abih bang bruă truh leng hmâo tơlơi kiăng pia hăng kơñăm. Rơkâo kơ Ih atăt ba kâo găn khul hrơi mông tơnap tap, kiăng kơ kâo dưi tŭ mă tơlơi bơngač kơ tơlơi čang rơmang kơ bơyan bơnga phrâo. Čang rơmang biă mă kâo či kơjăp pran jua gir kơtir tơguan khul tơlơi phrâo kơ Ñu hmâo prăp rơmĕt brơi kơ kâo. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, wơ̆t kơ ƀing ih mưn ƀuh kơ ƀing ih hlăk dŏ amăng rơnŭk pă, brơi kơ ƀing ih nanao đaŏ kơnang hơdră prŏng prin kơ Khua Yang, laih anŭn hơ̆k mơak tŭ mă kơ khul hrơi mông amăng lŏn tơnah. Brơi hơdơr bĕ, tơdơi kơ bơyan puih rơơ̆t rơŏt, bơyang bơnga hiam klă či rai. Anŭn jing tơlơi ƀuăn Khua Yang pha brơi kơ ƀing ta, ăt hrup hăng hơdră yang đar hmâo laih. Brơi prăp pre čơkă mă tŭ bơyan bơnga phrâo hăng tơlơi čang rơmang laih anŭn tơlơi hơ̆k mơak.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.