Lơ 08/12/2023: NGĂ MƠNƠ̆NG ɃƠ̆NG BRƠI KƠ AKAN

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Ƀing ih mưn ƀuh tơlơi hơ̆k mơak mơ̆ tơdang tơlơi hơdip kơ ƀing ih bưp tơlơi truh? Hmư̆ rŏ dah ƀu geh gal ôh samơ̆ tơlơi lông lăng djru kơ ƀing ta đĭ kơyar laih anŭn mưn găn lu hloh dơ̆ng kơ tơlơi git gai laih anŭn tơlơi dưi mơyang kơ Khua Yang. Wơ̆t dah tơlơi lông lăng ƀing ih či bưp kar hăng “dŏ amăng hlŭng akan” laih anŭn giăm “ngă mơnơ̆ng ƀơ̆ng brơi kơ akan” tui anŭn brơi hơdơr bĕ Ơi Adai dŏ hrŏm hơbĭt hăng ƀing ih, pơgang wai lăng kơ ƀing ih laih anŭn pơlông pơhrăm kơ ƀing ih dưi jing hĭ ƀing tơhan Ñu.

Hrơi anai, lơ 08/12/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Kandy Wooten tui hăng akŏ tơlơi hrăm NGĂ MƠNƠ̆NG ɃƠ̆NG BRƠI KƠ AKAN.

“Yêhôwa pre pioh sa drơi akan prŏng kiăng kơ lun hĭ Yôna. Yôna dŏ amăng hlŭng akan klâo hrơi klâo mlam.” (Yôna 2:1)

Tăp năng kâo tơña kơ kâo pô Yôna pơmĭn tơlơi hơgĕt tơdang ñu dŏ amăng hlŭng akan. Djơ̆ mơ̆ ñu tơña tui anai: “Hiư̆m pă anai kâo dưi tơbiă đuaĭ mơ̆ng hlŭng akan? Kâo hmâo ngă tơlơi soh glaĭ hơgĕt? Ngă hiư̆m pă kâo dưi pơblih tơlơi truh kâo anai?” Năng ai amăng ƀing ta ăt tơña kơ tơlơi tơña kar hăng anŭn mơ̆n. Samơ̆ hăng kâo, kâo aka pơmĭn ôh kâo či tơña khul tơlơi tơña anai amăng hrơi mông kaih.

Tơdơi kơ kheng klin COVID-19, tơlơi buih bruă amăng lŏn tơnah ƀrư̆ hrơi hrŏ trŭn. Wơ̆t dah bưp tơlơi rŭng răng amăng lŏn tơnah anai, khul tơlơi sat ƀai pơhuĭ laih anŭn hăng lu la lu lin khul tơlơi tơnap tap pơkŏn truh samơ̆ kâo pơmĭn khul tơlơi anai ƀu ƀaĭ truh kơ kâo ôh. Hnŭn jing tơlơi pơmĭn kơ kâo pô đôč tơl tơlơi rơbŭ kơthel truh amăng tơlơi hơdip kâo dŏ rơnŭk rơnua.

Kâo hơdơr tơlơi truh dua thŭn hlâo dih. Kâo hmâo gir kiăng kơ bưp rơkơi kâo amăng abih hrơi anŭn. Amăng mông kâo hlăk nao čuă ngui ƀing gơyut gơyâo kâo tui anŭn yơh rơkơi kâo hlăk ƀlơ̆ng bơngơ̆t tŭ mă kơ tơlơi pơthâo mơ̆ng gơyut ñu mă bruă hrŏm kơ bruă rĭm čô mơnuih arăng lui bruă mă ƀing gơñu. Hmâo laih khul tơlơi asăp pơđung pơthâo kơ bruă arăng lui kơ ƀing mă bruă amăng tơlơi buih ƀơ̆ng tơnap tap kâo đaŏ sĭt ƀing gơmơi arăng ƀu lui ôh bruă mă. Ƀing gơmơi hmâo găn laih čăl črăn anŭn samơ̆ ră anai phara yơh. Sĭt jing soh glaĭ tơdang pơmĭn kar hăng anŭn!

Samơ̆ tŏ tui anŭn rơkơi kâo iâu hăng pơthâo kơ kâo, ñu ƀu mă bruă dơ̆ng tah amăng anih mă bruă anŭn. Rơkơi kâo ƀu hmâo bruă mă dơ̆ng tah, kŏn hmâo tơlơi tŭ mă tơlơi djru mơ̆ng arăng djru kơ ƀing ƀu hmâo bruă mă, ăt ƀu hmâo dơ̆ng mơ̆n tơlơi djru tơdơi kơ 13 thŭn mă bruă amăng anŭn. Hnŭn yơh blĭp pơpuh đuaĭ ƀing gơmơi tơbiă đuaĭ mơ̆ng anih rơnŭk rơnua hăng mă glơ̆m ƀơi ia rơsĭ kar hăng Yôna.

Tơdang hmư̆ tơlơi pơthâo hrup hăng anŭn, sĭt yơh kâo hmâo hia amăng sa hrơi kŏm. Samơ̆ amăng črăn anŭn mơ̆n, Khua Yang ngă kơ kâo hơdơr glaĭ khul tơlơi hmâo truh kơ Yôna. Tơdơi kơ arăng mă glŏm hĭ ñu amăng ia rơsĭ laih anŭn tŭ akan prŏng lun ƀơ̆ng. Amăng hlŭng akan ñu kơhmal laih anŭn iâu laĭ rơkâo kơ Khua Yang pap brơi kơ ñu. Tơdơi kơ klâo hrơi, Khua Yang laĭ hăng akan prŏng ŏ tơbiă ñu ƀơi lŏn thu. Klah mơ̆ng anŭn ñu gưt asăp Khua Yang nao pơ plei Niniwơ kiăng kơ pơhaih pơthâo tơlơi pơthâo mơ̆ng Khua Yang brơi kơ ană plei pla Niniwơ.

Dua thŭn tơdơi kơ anŭn, ƀing gơmơi dŏ tơguan Khua Yang pơklaih kơ ƀing gơmơi mơ̆ng tơlơi ƀu hmâo bruă mă. Kâo dŏ nanao iâu laĭ laih anŭn pơhiăp hăng Khua Yang: “Ơ Ơi Adai ah! Ih kiăng pơtô pơhrăm gơmơi tơlơi pơhrăm hơgĕt lĕ?”

Ƀing mơnuih thâo krăn klă rơđah biă mă dua rơkơi bơnai gơmơi, ƀing gơñu laĭ ƀing gơmơi aka hmâo bưp ôh tơlơi tơnap tap lu kar hăng anŭn. Sĭt biă mă, ƀing gơmơi aka tŭ ôh tơlơi pơhuĭ truh kơ tơlơi hơdip, aka bưp ôh apui ƀơ̆ng, aka bưp ôh tơlơi pơhuĭ amăng tơlơi hơdip rơkơi bơnai ƀing gơmơi. Yua kơ anŭn, Khua Yang hmâo yua bruă kơ rơkơi kâo ƀu hmâo bruă mă kiăng lông lăng ƀing gơmơi. Hlăk anŭn ƀing gơmơi kar hăng hlăk ngă “mơnơ̆ng ƀơ̆ng brơi kơ akan”. Djơ̆ mơ̆ Khua Yang brơi tơlơi truh prŏng kiăng kơ lông lăng ƀing gơmơi? Kâo pơmĭn dah Ơi Adai ƀu či ngă ôh tơlơi anŭn. Sĭt biă mă, Ơi Adai jing Pô kơhnâo rơgơi kiăng kơ ƀing gơmơi hrăm mă tơlơi pơhrăm găn mơ̆ng tơlơi truh kơ ƀing gơmơi. Yua kơ anŭn, Khua Yang pơtô kơ kâo kơ tơlơi kar hăng anai amăng čal črăn ƀing gơmơi dŏ amăng hlŭng akan:

1.Ơi Adai prăp pre pioh brơi kơ ƀing ta abih bang tơlơi rơgao hloh kơ khul tơlơi ƀing ta pơmĭn. Ƀơƀiă blan hlâo dih, dua wơ̆t ƀing gơmơi čan prăk kiăng kơ blơi sang dŏ prŏng hloh dơ̆ng leng kơ ƀu dưi jing. Kiăng kơ dưi hmâo čan prăk dưi blơi sang tui anŭn yơh ƀing gơmơi khŏm kla pơhrŏ hĭ khul prăk gơmơi đom laih anŭn tơlơi anŭn djru kơ prăk kăk ƀing gơmơi djhul hloh dơ̆ng.

2.Abih bang tơlơi truh leng dŏ amăng mông hrơi Khua Yang. Tơdang iâu laĭ tui hăng tơlơi Khua Yang kiăng tui anŭn yơh ƀing ta khŏm dŏ tơguan mông hrơi Ñu.

3.Tăp năng nang lăp biă mă kiăng kơ ƀing gơmơi dŏ tơguan. Tơlơi anŭn ngă kơ tơlơi đaŏ ƀing gơmơi hmâo tơlơi prŏng đĭ tui tơdang ƀing gơmơi hơĭn kơnang ƀơi Yang Ama, ƀơi tơlơi kơhnâo rơgơi Ñu kiăng kơ dưi găn hĭ hrơi mông kơnăm mơmŏt amăng tơlơi hơdip.

4.Bơni kơ Khua Yang yua kơ Ñu hmâo djru kơ kâo thâo krăn Ñu či ngă brơi kơ akan ŏ tơbiă ƀing gơmơi tơbiă.

Sĭt biă mă, Yôna kơnơ̆ng dŏ amăng hlŭng akan 3 hrơi 3 mlam. Laih anŭn Ơi Adai pơklaih ñu mơ̆ng hlŭng akan. Ăt kar hăng anŭn Ơi Adai hmâo pơklaih Yôna tơbiă đuaĭ mơ̆ng hlŭng akan hiư̆m pă, Ñu ăt či pơklaih ƀing ta tơbiă đuaĭ mơ̆ng hlŭng akan kar hăng anŭn mơ̆n. Tơdơi kơ Khua Yang pơklaih tơbiă đuaĭ mơ̆ng hlŭng akan tui anŭn yơh Yôna yak rơbat ƀơi jơlan nao pơ plei Niniwơ kiăng kơ ră ruai pơhaih tơlơi pơthâo mơ̆ng Khua Yang brơi kơ ană plei pla pơ plei Niniwơ. Yua kơ anŭn tơdang ƀing ta bưp tơlơi tơnap tap truh kar hăng “dŏ amăng hlŭng akan” tui anŭn yơh brơi kơ ƀing ta hơdơr bĕ Khua Yang prăp rơmĕt laih hơdră hiam klă Ñu brơi kơ ƀing ta. Yua kơ anŭn brơi hơdơr bĕ Khua Yang ƀu lui laih anŭn ƀu wơr ôh ƀing ta yua kơ ƀing ta kơnơ̆ng hlăk dŏ amăng čal črăn pơplih nao pơ anăp.

Yua kơ anŭn tăp năng ngă mơnơ̆ng ƀŏng brơi kơ akan ƀu djơ̆ jing tơlơi sat ôh. Samơ̆ ƀu bơmơak ôh tơdang dŏ amăng tơlơi truh anŭn. Samơ̆ hnŭn ƀu djơ̆ ôh jing tơlơi răm ƀăm hloh. Ƀing ta khŏm hơdơr biă mă yơh jơlan đuaĭ tui Khua Yang bă tơlơi tơnap tap lông lăng. Hloh kơ anŭn dơ̆ng Ơi Adai brơi tơlơi rơbŭ kơthel truh amăng tơlơi hơdip ƀing ta hăng đaŏ sĭt găn mơ̆ng abih bang tơlơi lông lăng ƀing ta jai prŏng kơtang hloh dơ̆ng amăng Ñu.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ wơ̆t dah tăp năng kâo bưp khul tơlơi truh kar hăng “dŏ amăng hlŭng akan” samơ̆ Ih hmâo pơklaih kâo amăng hrơi mông laih anŭn amăng hơdră hiam klă Ih. Rơkâo kơ Ih djru kơ kâo nanao đaŏ kơnang kơ Ih, tui hơduah Ih laih anŭn nanao dŏ amăng tơlơi lir pơgop hăng Ih. Bơni kơ Khua Yang yua kơ găn khul tơlơi truh Ih hmâo brơi truh amăng tơlơi hơdip kâo jai mưn găn lu hloh dơ̆ng tơlơi dưi mơyang Ih git gai. Hăng tơlơi pơpŭ kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, brơi đaŏ sĭt Khua Yang jing Pô djru kơ ƀing ih prŏng đĭ tui amăng tơlơi đaŏ găn mơ̆ng rĭm tơlơi truh amăng jơlan đuaĭ tui Ñu. Brơi kơ ƀing ih hơ̆k mơak bĕ amăng tơlơi lông lăng yua kơ thâo krăn Khua Yang hmâo pioh brơi laih kơ ƀing ih khul tơlơi hiam klă tơdơi kơ găn hĭ tơlơi lông lăng. Brơi pioh bĕ mông hrơi hơduah kơ Khua Yang, pơmĭn kơ boh pơhiăp Khua Yang rĭm hrơi laih anŭn pơđing tơngia hmư̆ khul tơlơi Ñu kiăng pơhiăp pơtô laĭ kơ ƀing ih.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.