Lơ 09/01/2024: MƠBOH RAI BOH HIAM

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Lăng mơboh thâo krăn phŭn kơyâo. Sa tơlơi hơdip đĭ kơyar ƀu pơdơi ôh mơboh rai khul boh hiam. Mơnuih pơkŏn hlăk lăng ƀuh khul mơboh pă kơ Yang Bơngăt Hiam amăng tơlơi hơdip kơ ƀing ih? Laih anŭn ƀing ta khŏm hơdip hyư̆m pă kiăng kơ mơboh rai boh hiam amăng tơlơi hơdip kơ ƀing ta?

Hrơi anai, lơ 09/01/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Aaron Little tui hăng akŏ tơlơi hrăm MƠBOH RAI BOH HIAM.

“Ră anai Ơi Adai ô laih jong ƀơi phŭn kơyâo; abih bang kơyâo ƀu mơboh rai boh hiam ôh, Ñu či drom hĭ laih anŭn glŏm lui amăng apui.” (Mathiơ 3:10)

Ama kâo mă bruă amăng bruă mơnuă hmâo 40 thŭn laih. Amăng plah wah kơ hrơi mông anŭn, amĭ kâo jing pô dŏ hrŏm hơbĭt ha abih pran jua dŏ mơ̆ng klon djru kơ tơpul mă bruă kar hăng pha brơi mơnơ̆ng ƀŏng huă, mơnơ̆ng ƀơ̆ng amăng mông yom amăng thŭn. Amĭ kâo pơyơr kơ khul tơlơi ñu hmâo kơ tơlơi mă bruă Khua Yang. Mă yua khul mông hrơi pơdơi amĭ kâo pơjing glaĭ anih lŏn ƀing gơmơi dŏ kiăng kơ pla phŭn kơyâo. Kâo khư̆p pran jua hăng bruă ngă kơ amĭ kâo. Ƀing gơmơi hmâo pla laih phŭn kơyâo ƀơ̆ng mơboh amăng lu thŭn.

Amĭ kâo khăp biă mă khul phŭn kơyâo ƀơ̆ng mơboh amăng đang gơmơi. Amĭ kâo pioh lu hrơi mông kiăng kơ pla, sai kơmơ̆k, wai lăng, pơdjai hlăt hăng pĕ mơboh ñu. Plah wah Blan Tơjuh ƀôdah Blan Păn sang apui gơmơi bă boh troh phrâo pĕ mơ̆ng đang. Amĭ kâo yua hrơi mông ñu ngă boh troh laih anŭn pioh boh troh amăng long. Tơdang kâo dŏ čơđai, kâo tơña kơ kâo pô yua kơ hơgĕt amĭ kâo ngă khul bruă kar hăng anaun. Anai ƀu djơ̆ ôh Rơnŭk Thŭn Tơnap Tap Kơ Buih Ƀơ̆ng. Rơngiao kơ anŭn ăt ƀu djơ̆ phŭn tơbiă rai prăk kăk amăng sang anŏ gơmơi. Tơdang kâo prŏng laih, kâo mă thâo amĭ kâo khăp ngă bruă anŭn laih anŭn kiăng pơpha khul long mơboh anŭn brơi kơ lu mơnuih pơkŏn.

Amĭ kâo ăt pioh mơ̆n kơ hrơi mông čŏng lui hĭ khul phŭn kơyâo ƀu hiam. Hnŭn ƀu djơ̆ bruă amuñ ôh brơi kơ amĭ kâo tơdang khŏm čŏng lui hĭ khul phŭn kơyâo ƀu hiam kơ amĭ kâo hmâo pioh laih lu hrơi mông amăng lu thŭn kiăng kơ pla gơñu. Samơ̆ anŭn jing bruă khŏm ngă yơh. Abih bang phŭn kơyâo pă ƀu mơboh hiam khŏm mă lui hăng pơblih phŭn pơkŏn. Djơ̆ mơ̆ amĭ kâo ngă kar hăng anŭn kiăng kơ hmâo hĭ khul phŭn boh troh mơboh hiam? Bruă amĭ kâo ngă abih bang djơ̆ tui hăng Boh Pơhiăp Khua Yang amăng Hră Ơi Adai Pơhiăp.

Mathiơ 3 čih ruai glaĭ kơ bruă Yôhan Ƀatem, ayŏng sa boh ơi yă kơ Khua Yang Yêsu, jing pô prăp rơmĕt brơi kơ jơlan Ñu tơdang iâu pơthưr kơ arăng kơhmal tơlơi soh laih anŭn tŭ ƀatem kiăng kơ tơlơi hơdip hmâo tơlơi pơblih kơphrâo. Tơdang Yôhan Ƀatem ƀuh ƀing nai pơtô tơlơi juăt rai tui anŭn yơh ñu ƀuah kơ tơlơi hơdip ƀu sĭt kơ ƀing gơñu tơdang ƀing gơñu ƀu hơdip ngă tui khul tơlơi ƀing gơñu pơtô kơ ană plei pla. Ñu laĭ tui anai tơlơi hơdip kơ ƀing gơñu ƀu mơboh rai boh hiam.

Boh Pơhiăp Khua Yang amăng hră Mathiơ 3:10 čih tui anai: “Ră anai Ơi Adai ô laih jong ƀơi phŭn kơyâo; abih bang kơyâo ƀu mơboh rai boh hiam ôh, Ñu či drom hĭ laih anŭn glŏm lui amăng apui.”

Yôhan Ƀatem kiăng laĭ hăng ƀing nai pơtô tơlơi juăt kơ tơlơi hơdip plŏm ƀlŏr kơ ƀing gơñu laih anŭn ăt jing mơ̆n tơlơi pơrâo brơi kơ ƀing ta hrơi anai. Jing ƀing đaŏ kơ Krist, ƀing ta khŏm hơdip laih anŭn hla tui tơlơi hơdip kơ Yang Krist. Yua kơ anŭn, ƀing ta khŏm mơboh rai boh hiam. Rơngiao kơ anŭn, ƀing ta khŏm bơrơđah mơboh kơ Yang Bơngăt Hiam amăng tơlơi hơdip kơ ƀing ta hrup hăng Boh Pơhiăp Khua Yang hmâo čih amăng hră Galati 5:22-23 tui anai:

“Samơ̆ boh Yang Bơngăt Hiam jing: Tơlơi khăp, tơlơi hơ̆k mơak, tơlơi rơnŭk rơnua, tơlơi gir run, tơlơi klă djrưng, tơlơi hiam klă, tơlơi tŏng ten, tơlơi tơdu rơun, tơlơi djơ̆ hơnơ̆ng. Ƀu hmâo ôh tơlơi juăt khă khul tơlơi kar hăng anŭn.”

Hnŭn jing khul tơlơi Khua Yang čang rơmang ƀơi ƀing ta. Ƀing ta khŏm djrưng răng amăng bruă hơdip djơ̆ tui boh pơhiăp Khua Yang pơtô amăng hră Mathiơ 3:10 laih anŭn ƀu lăng đôč đač ôh kơ jong hmâo prăp pre laih kiăng drom kơ khul phŭn kơyâo ƀu mơboh rai boh hiam. Yua kơ anŭn ƀing ta khŏm hlom ƀom gưt tui laih anŭn ngă tui Boh Pơhiăp Khua Yang pơtô.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Boh Pơhiăp Ih hmâo pơhơdơr kơ kâo khŏm hơdip djơ̆ tui Boh Pơhiăp Ih pơtô laih anŭn ƀu pơdơi mơboh kơ boh hiam brơi kơ Ih. Rơkâo kơ Ih djru kơ kâo thâo krăn kơ khul mơboh sat, tơlơi juăt sat ƀai laih anŭn drom lui hĭ ƀing gơñu tơbiă đuaĭ amăng tơlơi hơdip kâo. Kơ tơlơi hơdip kâo thâo khăp bơrơđah klă amăng bruă ngă jing boh mơmih kiăng kơ ƀing mơnuih jum dar kâo thâo krăn kơ Ih laih anŭn đaŏ tŭ jum Ih kiăng kơ tŭ mă tơlơi pơklaih laih anŭn tơlơi hơdip nanao hlŏng lar. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, brơi pioh bĕ hrơi mông ep sem lăng glaĭ pran jua tơlơi hơdip kơ ƀing ta, laih anŭn rơkâo kơ Khua Yang djru kơ ƀing ih mă glŏm lui hĭ khul mơboh sat, khul bruă ƀu ngă bơmơak kơ Khua Yang. Brơi pioh bĕ khul mơboh kơ Yang Bơngăt Hiam bă blai amăng ƀing ih kiăng ƀing mơnuih pơkŏn dưi lăng ƀuh Khua Yang găn mơ̆ng tơlơi hơdip kơ ană bă Ñu. Brơi thâo pơpha bĕ khul ƀing ih hmâo brơi kơ ƀing mơnuih pơkŏn laih anŭn anăm wơr bĭt ôh khul tơlơi pơhiăp khăp hơeng, khul tơlơi pơtrŭt laih anŭn iâu laĭ brơi kơ ƀing mơnuih amăng sang anŏ, ƀing gơyut gơyâo, ƀing mơnuih ƀing ih thâo krăn ƀing gơñu rĭm hrơi.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.