Lơ 12/02/2024: ČƠKĂ THŬN PHRÂO

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Thŭn sô rơgao laih hăng hơdôm bruă mơak laih anŭn rơngot. Yak mŭt thŭn phrâo, Khua Yang pŏk ƀơi anăp ƀing ta khul tơlơi hơdip phrâo. Ñu iâu ƀing ta rơbat amăng jơlan phrâo hăng lu mơta tơlơi hling hlang, khul mơta tơlơi kơtuă, laih anŭn khul bruă sêh mơyang hlăk dŏ tơguan. Wơ̆t thâo krăn tơlơi đaŏ či hmâo lu tơlơi lông lăng, samơ̆ tơlơi čang rơmang ƀơi Khua Yang yơh jing tơlơi pơtrut pơđur kơ ƀing ta.

Hrơi anai, lơ 12/02/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Dayna Lovelady tui hăng akŏ tơlơi hrăm ČƠKĂ THŬN PHRÂO.

Tui anŭn, tơdah hlơi pô dŏ amăng Krist, ñu anŭn jing mơnuih hrih kơphrâo yơh, abih tơlơi so rơgao hĭ laih, anai nê, abih bang tơlơi leng kơ jing kơphrâo soh sel.” (2 Kôrantô 5:17)

Rĭm wơ̆t thŭn phrâo truh, ƀing ta găn dơ̆ng lu tơlơi mưn phara. Hmâo mơnuih hơ̆k mơak yua kơ anai jing mông gal kiăng anăp nao kơ lu tơlơi kơñăm laih anŭn tơlơi čang rơmang phrâo. Hmâo mơnuih mơak ƀiă yư khul tơlơi tơnap hăng tơlơi lup amăng thŭn sô rơgao laih. Samơ̆ ăt hmâo mơ̆n mơnuih bơngơ̆t yua kơ ƀu thâo krăn ôh thŭn phrâo či hiưm lĕ, hmâo tơlơi phara hăng thŭn sô mơ̆.

Lu gơyut gơyâu hăng ƀing tơpul mă bruă hăng kâo hơ̆k čang kiăng kơ thŭn sô rơgao tañ laih anŭn thŭn phrâo čơdơ̆ng, yua kơ thŭn rơgao bưp tơlơi tơnap đơi. Kâo thâo krăn tơlơi gơñu găn anŭn mơ̆n. Tơdơi kơ sa thŭn lu tơlơi pơplih: tơlơi dưi jing, hơ̆k mơak luk lŏm hăng ruă rơngot hăng hơtah mơtai, kâo prăp čơdơ̆ng kơ sa tơlơi phrâo yơh.

Lăng glaĭ sa thŭn rơgao, kâo hmâo dưi hĭ lu tơlơi kơñăm amăng bruă pơhrăm pơjuăt kiăng kơ hmâo pran, laih anŭn pơgiơ̆ng hĭ tơlơi pơlông đuaĭ ataih. Kâo jĕ giăm hloh hăng Khua Yang găn bruă hrăm Tơlơi Ơi Adai Pơhiăp hăng kơkuh pơpŭ kơ Ñu. Kâo ăt mưn tơlơi rơngot tơdang ƀing amăng sang anŏ rơngiă. Anŭn jing thŭn kâo ƀu thâo wơr ôh.

Tơdang pơplih hră yap lơ thŭn đăp jing hră lơ thŭn phrâo, kâo pơmĭn anai yơh jing mông kiăng ngă pơphrâo kâo pô, sa tơlơi čơdơ̆ng phrâo kơ khul tơlơi kâo kơñăm phrâo. Thŭn phrâo jing rup pơdah kơ tơlơi đĭ kyar laih anŭn prŏng tui amăng tơlơi hơdip. Tơdang pơmĭn kơ thŭn 2023, kâo hơdơr sa jơlan Tơlơi Ơi Adai Pơhiăp juăt biă mă laĭ kơ khul tơlơi sô hơđăp či rơgao kiăng pioh glaĭ kơ tơlơi phrâo.

“Tui anŭn, tơdah hlơi pô dŏ amăng Krist, ñu anŭn jing mơnuih hrih kơphrâo yơh, abih tơlơi so rơgao hĭ laih, anai nê, abih bang tơlơi leng kơ jing kơphrâo soh sel.” (2 Kôrantô 5:17)

Tơdang lơ̆m kơ Yang Krist, ƀing ta ƀu hơdip tui kơnuih hơdip hơđăp dơ̆ng tah, samơ̆ hmâo tơkeng dơ̆ng kơphrâo, pơblih phrâo laih anŭn đĭ tui amăng tơlơi lir hơbĭt hăng Khua Yang. Anai jing hơdră nanao ƀu thâo pơjưh ôh, kiăng pia ƀing ta ƀu kơnơ̆ng pơblih kơ phrâo tơdang blŭng hlâo tŭ mă Khua Yang, bơ nanao pơblih kơphrâo hlăk ƀing ta yak rơbat hăng Khua Yang rĭm hrơi. Kar hăng lu tơlơi pơlir pơkŏn, tơlơi pơlir ƀing ta hăng Yang Krist khŏm kơ lăng glaĭ laih anŭn răk wai kiăn dưi đĭ tui.

Tơdang pơmĭn kơ 2 Kôrantô 5:17, kâo hơdơr nao kơ tơlơi pơhiăp juăt hmư̆: “Thŭn phrâo, mơnuih phrâo”. Ƀing ta juăt pơhiăp tơlơi pơhiăp anai samơ̆ dŏ ngă hlun kơ bruă tơngan hơđăp laih anŭn ƀu dưi giơ̆ng ôh tui tơlơi kơñăm ƀing ta. Samơ̆ Hră Boh Pơhiăp Ơi Adai pơtă ƀing ta čơdơ̆ng glaĭ bĕ laih anŭn dŏ kơjăp yua kơ ƀing ta lơ̆m kơ Yang Krist. Hăng hơdră brơi kơ Ñu pơplih tơlơi pơmĭn, pran jua laih anŭn bơngăt jua ta pô, ƀing ta či thâo krăn gah pă khŏm kơ pơplih kơphrâo amăng tơlơi hơdip ta pô, laih anŭn khĭn yak rơbat tui Ñu.

Amăng hră Êsai 43:18-19 čih: “Anăm hơdơr glaĭ dơ̆ng ôh khul bruă hmâo rơgao laih, Kŏn anăm pơmĭn nao dơ̆ng lơi kơ bruă hlâo adih. Anai nê, Kâo či ngă sa bruă phrâo! Ră anai ñu hlăk pơrơđah rai samơ̆ ƀing gih ƀu thâo ôh hă?Anŭn jing Kâo či pŏk sa roh jơlan amăng tơdrŏn har, Laih anŭn ngă brơi khul ia krong ro ƀơi anih thu kro.

Wơ̆t thŭn sô pioh glaĭ kơ ƀing ta lu tơlơi mlaih tơdu, tơlơi hơưi yua kơ lu tơlơi kơñăm aka dưi giơ̆ng, samơ̆ thŭn phrâo truh laih, laih anŭn Khua Yang či ngă khul tơlơi phrâo. Wơ̆t ƀing ta hơ̆k mơak ƀôdah blơ̆ng bơngơ̆t, Khua Yang kơ tơlơi čang rơmang hrŏm hơbĭt ih či čơkă thŭn phrâo. Djă kơjăp tơlơi đaŏ, tơlơi čang rơmang amăng thŭn phrâo bĕ laih anŭn rơkâo Khua Yang ngă khul tơlơi phrâo amăng tơlơi hơdip ƀing ta.

Rơkâo ƀing ta pioh mông iâu laĭ hrŏm hơbĭt
Ơ Khua Yang, rơkâo Ih atăt kâo rơbat amăng thŭn phrâo anai hăng tơlơi đaŏ laih anŭn tơlơi čang rơmang amăng tơlơi phrâo Ih či ngă. Čang rơmang Ih djru kâo pơčĕ hơdră, dưm tơlơi kơñăm, laih anŭn nanao tui hơduah Ih kiăng kơ dưi prŏng tui hloh dơ̆ng. Amăng thŭn phrâo anai, rơkâo Ih pơblih kâo kiăng kơ kâo nanao hơdip tui Ih kiăng. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, thŭn sô rơgao laih, thŭn phrâo truh yơh. Khua Yang pha brơi kơ ƀing ta mông gal kiăng hơdip, kiăng khăp laih anŭn mă bruă Ñu. Bơni bĕ kơ Khua Yang yua kơ lu tơlơi hiam klă Ñu hmâo ngă laih kơ ƀing ta amăng thŭn rơgao, laih anŭn đaŏ kơnang bĕ kơ khul tơlơi phrâo bơ Ñu či ngă brơi kơ ƀing ta amăng thŭn phrâo. Khua Yang nanao dŏ jĕ ƀing ta, atăt gai laih anŭn brơi tơlơi pap Ñu kơ ƀing ta. Čang rơmang ƀing ta čơkă thŭn phrâo amăng tơlơi hơ̆k mơak, tơlơi čang rơmang laih anŭn pran jua thâo hơdơr bơni.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.