Lơ 13/02/2024: JƠLAN KLAH

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Nang ai hlơi pô amăng ƀing ta ăt hmâo mưn găn sul kul tơdang dŏ tơ̆ng krah jơlan klah amăng tơlơi hơdip. Ƀing ta ƀu thâo gah kiăng ruah jơlan pă nao, ƀu thâo klă ruah jơlan anŭn ba ƀing ta truh pơpă. Samơ̆ Khua Yang thâo krăn abih jơlan, Ñu či atăt ƀing ta truh anih pơdơi rơnŭk rơnua tơdang ƀing ta thâo hơni kơnang kơ Ñu.

Hrơi anai, lơ 13/02/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Candy Arrington tui hăng akŏ tơlơi hrăm JƠLAN KLAH

“Yêhôwa laĭ: “Dŏ dơ̆ng bĕ ƀơi khul akiăng jơlan laih anŭn lăng bĕ, Tơña hơduah khul jơlan đưm adih, Lăng lăng pă jing jơlan sĭt, glong tơpă laih anŭn rơbat nao bĕ ƀơi jơlan anŭn, Hơduah bĕ anih pơdơi kơ bơngăt ƀing gih. Samơ̆ gơñu laĭ glaĭ: ‘Ƀing gơmơi ƀu kiăng nao ôh jơlan anŭn.”( Yêrêmi 6:16)

Sui thŭn mơ̆ng anai, rơkơi bơnai gơmơi hmâo nao pơ Scotland. Gơmơi rơngiă ƀiă hmâo sa blan prăp pre hră đĭ deh por, anih jưh laih anŭn hơdră hyu ngui. Gơmơi pơr nao truh pơ čar angle, đĭ sŏng truh Edinburgh, găt deh tui hăng tơlơi juăt pơ anih anai. Gơmơi nao djŏp anih lŏn dư hăng lăng ƀuh ia dơnao, sang krĭn ngă hăng boh pơtâo, gru sang ƀôdah jơlan đưm hơđăp. Gơmơi hmư̆ arăng ruai glaĭ tơlơi pơblah đưm, tơlơi pơblah kơ mơnuih amăng djuai ngă pơtao.

Kâo hơduah anih pơdơi atoai jơlan, đuaĭ hyu tui hăng čăl jĕ kiăng plai ƀiă gleh. Samơ̆ tơ truh plao ia gah yŭ, gơmơi rơngiă mông hloh tui tơlơi pơmĭn blŭng hlâo. Gơmơi găn ia samơ̆ ƀu djơ̆ tui hơdră gơñu pơthâo hlâo amăng intenet. Gơmơi khŏm tơguan sŏng tơdơi dơ̆ng amăng sui mông.

Tơdang găn ia laih, gơmơi bưp jơlan anĕt glŭt hlu. Gơmơi găn lơ̆n daŏ, găn jơlan kơdư, khŏm găt deh răng biă mă kiăng kơ brơi deh pơkŏn bơblaĭ deh gơmơi yua kơ jơlan anĕt đơi. Hmâo mông kâo giăm hia. Kâo pơmĭn gơmơi jrôk jơlan ƀu thâo ƀuh gah pơjing tah. Kâo pơđur rơkơi kâo wơ̆t glaĭ, samơ̆ ñu laĭ ƀing ta nao ataih laih, ƀu anăm wơ̆t glaĭ tah. Pŭn biă mă gơmơi lăng buh anih phone jreo, tañ mơtam iâu glaĭ sang jưh gơmơi hmâo pơkă. Gơñu laĭ gơmơi nao djơ̆ jơlan laih, wơ̆t dah khŏm găt deh sui mông dơ̆ng kah dưi truh. Hơđơ̆ng pran jua tơdang gơmơi hmâo nao djơ̆ jơlan, sa anih pơdơi rơnŭk hlăk dŏ tơguan pơ anăp.

Mlam brư̆ mơmŏt tui, hnal tuč mơ̆ng ataih gơmơi ƀuh hmâo bơngač apui. Tơdang gơmơi truh pơ anih anŭn, rơmŏn hăng ƀu hmâo pran dơ̆ng tah, pô sang jưh hmâo tŭ jum gơmơi abih pran jua. Wơ̆t dah gơmơi nao pĭt aka hmâo gơnam hơgĕt amăng kian lơi samơ̆ ƀu hmâo tơlơi hơgĕt yom hloh dưi pơdơi ƀơi mông anai.

Dơnai teng leng râo mơdưh gơmơi amăng mơguah hrơi tŏ tui. Rơmo hlăk ƀơ̆ng rơ̆k ƀơi anăp sang. Ƀơ̆ng mơguah giơ̆ng, gơmơi nao pơ dơnuč gah yŭ kơ plao ia, anai ăt jing gah yŭ kơ Scotland. Ƀơi anăp gơmơi jing ia rơsĭ prŏng prĭn hiam biă mă, phara hăng lu anih kâo hmâo ƀuh. Tơlơi anai pơjuh alum ƀuh glaĭ tơlơi gleh hrơi tơ̆m brôi nang lăp yơh.

Abih bang ƀing ta leng jing mơnuih tuai đuaĭ hyu ƀơi jơlan tơlơi hơdip anai, laih anŭn hlơi pô ăt khŏm khưp ư ruah jơlan nao tơdang ƀơi anăp jing jơlan klah. Lu wơ̆t ƀing ta nao ƀơi jơlan gleh tơnap, tơ ƀing ta tơña kâo nao ƀôdah dơ̆ng glaĭ. Hmâo mơ̆n ƀing ta nao amăng jơlan rơnŭk hơđơ̆ng, samơ̆ mưn rŏ dah ƀing ta hlăk jrôk laih. Samơ̆ kar hăng Yêrêmi 6:16, Ñu iâu ƀing ta tui hơduah tơlơi kơčrâo mơ̆ng Ñu kiăng yak nao amăng jơlan tơpă sĭt laih anŭn hơduah ƀuh anih pơdơi kơ bơngăt ta.

Tơlơi hơdip anai juăt dui ƀing ta truh jơlan klah sul kul. Anăm huĭ ôh samơ̆ tui hơduah bĕ tơlơi atăt mơ̆ng ƀing thâo krăn jơlan anŭn. Rơkâo kơ Khua Yang pha brơi kơ ƀing ta tơlơi rơgơi, găn tơlơi iâu laĭ hăng pơmĭn Boh Pơhiăp Ñu, laih anŭn ruah anăp gah djơ̆ hloh amăng tơlơi atăt mơ̆ng Yang Bơngăt Hiam. Tơdang hmâo Khua Yang atăt gai, ƀing ta huaĭ kiăng khưp ư mơ̆ng tơlơi dưi ƀôdah tơlơi pơmĭn ta pô dơ̆ng tah. Sĭt rơnŭk rơnua ƀiă mă yua kơ hmâo Khua Yang atăt gai ƀing ta amăng abih hơdră jơlan ataih pơanăp, kar hăng Ñu hmâo atăt laih ană plei pla Ñu găn lu rơnŭk hơdip hăng truh pơ ră anai:
“Wơ̆t dah tui anŭn, ƀing gih ăt ƀu đaŏ ôh kơ Yêhôwa Ơi Adai ƀing gih, 33jing Pô nao hlâo kơ ƀing gih amăng rĭm jơlan kiăng hơduah brơi anih kơ ƀing gih pơdơ̆ng sang khăn; amăng mlam hmâo tơmeh apui, tơhrơi hmâo gơnăm kơthul kiăng kơ kơčrâo brơi jơlan kơ ƀing gih khŏm nao.”(Tơlơi Pơtô Mơñă Tơlơi Juăt 1:32-33)

Rơkâo ƀing ta pioh mông iâu laĭ hrŏm hơbĭt:
Ơ Khua Yang, hmâo mông kâo sul kul hăng huĭ hyưt tơdang dŏ dơ̆ng ƀơi jơlan klah kơ tơlơi hơdip. Kâo ƀu thâo ôh či wơ̆t glaĭ pơklon ƀôdah rơbat nao pơnăp, ƀôdah djơ̆ mơ̆ kâo hlăk jrôk jơlan laih. Rơkâo kơ Ih pha brơi kơ kâo tơlơi rơgơi laih anŭn pran jua hơin kơnang kiăng rơbat tui tơlơi Ih gĭt gai. Rơkâo Ih čông kâo hăng nao hơbĭt hăng kâo, ba kâo truh pơ anih rơnŭk rơnua ƀơi đŭt jơlan. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, ih hlăk klă anăp hăng jơlan klah pă amăng tơlơi hơdip? Apăn bĕ tơngan Khua Yang, kiăng kơ Ñu čông atăt ih amăng jơlan Ñu hmâo ruah laih kơ ih. Tơdang ih rơbat laih hăng Ñu, sĭt ih ƀu či jrôk jơlan. Brơi ih hơdơr nanao tơlơi sĭt anai kiăng kơ dưi hmâo tơlơi rơnŭk rơnua amăng jơlan ih nao pơanăp.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.