Lơ 17/01/2024: LĂNG ĐĬ KƠ KHUA YANG

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hơmâo mơ̆ đơđa ih mưn huĭ hyưt tơdang Khua Yang jao brơi kơ ih ngă sa bruă yom? Ƀôdah hơmâo sa tơlơi đing đaŏ kơ ih pô tơdang bưp tơlơi tơnap prŏng truh? Hơdơr bĕ, tơdang Khua Yang jao brơi kơ ih sa bruă ngă, Ñu či pha brơi kơ ih tơlơi dưi mơyang kiăng kơ dưi ngă pơgiơ̆ng hĭ bruă anŭn. Ih ƀu kiăng kơnang kơ pran kơtang ih pô ôh, samơ̆ kơnơ̆ng kơnang kơ pran kơtang mơng Khua Yang.

Hrơi anai, lơ 17/01/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Gordon Robertson tui hăng akŏ tơlơi hrăm LĂNG ĐĬ KƠ KHUA YANG

“Ƀu djơ̆ ôh hă Kâo hơmâo pơtă laih kơ ih? Brơi ih jing kơtang laih anŭn khĭn bĕ! Anăm tơtư̆ yơ̆ng ôh, anăm hwĭ bral ôh! Yua kơ Yêhôwa Ơi Adai ih ăt dŏ hrŏm hăng ih amăng abih jơlan ih nao”. (Yôsuê 1:9)

Dŏ hơdip tơ̆ng krah tơlơi hơdip bŏ hăng tơlơi tơnap tap laih anŭn rŭng răng, ƀing ta amuñ biă mă či rơbuh nao amăng tơlơi ƀlơ̆ng bơngơ̆t, rơngot hơning. Samơ̆ tơlơi yom ƀing ta khŏm ngă anŭn jing lăng đĭ kơ Khua Yang, Pô pơphŭn laih anŭn Pô ngă pơgiơ̆ng hĭ tơlơi đaŏ ƀing ta (Hêbrơ 12:2)

Khua Yang Yêsu jing tơlơi laĭ glaĭ kơ abih bang bruă kơ ană mơnuih ƀing ta. Ñu či pha brơi. Ñu či ba rai tơlơi dưi hĭ – tơlơi dưi hĭ anŭn ƀu tơbiă rai mơng bruă ƀing ta ngă ôh, samơ̆ tơbiă rai mơng bruă Khua Yang hơmâo ngă. Ƀing ta kơnơ̆ng kơ đaŏ kơnang kơ Khua Yang đôč.

Kơnơ̆ng Pêtrôs jing ding kơna Khua Yang khĭn yak trŭn pơ ia tơdang mơnuih pơkŏn dŏ glaĭ amăng sŏng. Wơt dah tui anŭn, tơdang ƀuh rơbŭ kơthel, ñu čơdơ̆ng kơtrăm yơh. Hră Mathiơ 14:31 hơmâo brơi kơ ƀing ta thâo, Khua Yang hơmâo djă kơ̆ng ñu laih anŭn tơña:
“Yua hơgĕt ih pơđing?”

Lu wơt ƀing ta kơnơ̆ng pơmĭn nao kơ tơlơi ƀing ta hơmâo đaŏ sĭt mơ̆ kơ Khua Yang đôč; samơ̆ ƀing ta wơr bit hĭ sa tơlơi yom, anŭn jing Khua Yang ăt thâo rơđah kơ tơlơi đaŏ ƀing ta. Khua Yang thâo ƀing ta dưi ngă hơdôm bruă Ñu hơmâo jao brơi kơ ƀing ta, samơ̆ lu wơt ƀing ta pơpư̆ pran jua laih anŭn đing đaŏ.

Tơdang ƀing Israel hơngah ƀu kiăng mŭt nao amăng plei Kanaan tơdang ƀing kơnuă hơmâo pơthâo brơi hơmâo lu ƀing mơnuih prŏng dŏ amăng plei, Yôsuê laĭ kơ ƀing gơñu anăm huĭ ôh “yua kơ ƀing gơñu či jing hĭ gơnam ƀơ̆ng kơ ƀing ta” (Tơlơi Yap 14:9).

Yôsuê jing sa čô mơnuih thâo huĭ pơpŭ kơ Ơi Adai laih anŭn bŏ hăng tơlơi dưi mơyang Ơi Adai pha brơi. Ñu đaŏ sĭt, ƀu hơmâo tơlơi hơgĕt Khua Yang ƀu dưi ngă; Ơi Adai hơmâo pha brơi ƀing ta lŏn čar, ƀing ayăt či jing gơnam čem rong ƀing ta.

Pă pluh thŭn tơdơi, Ơi Adai hơmâo pơđur Yôsuê hlâo kơ ñu git gai plei pla mŭt nao amăng drŏn blah:
Ƀu djơ̆ ôh hă Kâo hơmâo pơtă laih kơ ih? Brơi ih jing kơtang laih anŭn khĭn bĕ! Anăm tơtư̆ yơ̆ng ôh, anăm hwĭ bral ôh! Yua kơ Yêhôwa Ơi Adai ih ăt dŏ hrŏm hăng ih amăng abih jơlan ih nao (Yôsuê 1:9)

Tơdang Khua Yang hơmâo laĭ hăng ƀing ta anăm huĭ ôh, Ñu ăt hơmâo prap rơmet brơi kơ ƀing ta mơ̆n, yua kơ bruă pơ anăp ƀu amuñ ôh.

Samơ̆ blŭng hlâo, Ñu laĭ: “Ƀu djơ̆ ôh hă Kâo hơmâo pơtă laih kơ ih” Kiăng laĭ tơdang Ñu hơmâo pơtă laih, abih bang bruă hơmâo ngă pơgiơ̆ng laih. Tơdang Khua Yang laĭ: “Khŏm hơmâo tơlơi bơngač”, hơmâo tơlơi bơngač mơtam.

Laih anŭn Ñu ƀuăn: “Yua kơ Yêhôwa Ơi Adai ih ăt dŏ hrŏm hăng ih amăng abih jơlan ih nao”.
Khua Yang ăt pơtă tăn laih anŭn ƀuăn brơi kơ ƀing ta găn mơng Boh Pơhiăp:
Tui anŭn, nao bĕ laih anŭn pơjing abih bang djuai mơnuih jing hĭ ding kơna Kâo,… Laih anŭn brơi ƀing gih hơdơr, Kâo dŏ hrŏm hăng ƀing gih nanao tơl đŭt lŏn tơnah (Mathiơ 28:19-20)

Tơdah Khua Yang hơmâo pơtă laih, Ñu či ngă pơgiơ̆ng yơh. Ƀing ta kơnơ̆ng ngă bruă hơmâo jao brơi ƀing ta laih anŭn ră ruai Tơlơi Pơthâo Hiam.

Tơdang ƀing ta gưt asăp Khua Yang, ƀing ta či tŭ mă tơlơi Ñu ƀuăn amăng hră Hêbrơ 13:5: “Kâo ƀu či klah mơ̆ng ih ôh kŏn lui ih lơi.”

Rơkâo ƀing ta pioh mông iâu laĭ hrŏm hơbĭt
Ơ Khua Yang, rơkâo Ih pha brơi kơ gơmơi tơlơi đaŏ kơjăp amăng Ih, anăm brơi gơmơi rơngiă hĭ tơlơi hơk mơak yua kơ tơlơi ƀlơ̆ng bơngơ̆t ôh. Rơkâo Ih pha brơi kơ gơmơi tơlơi khĭn, tơlơi kơtang tơdang bưp tơlơi tơnap tap laih anŭn tơlơi rŭng răng amăng tơlơi hơdip, yua kơ thâo sĭt tơlơi dưi hĭ ƀing gơmơi dŏ kơjăp amăng tơngan Ih. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, dŏ amăng tơlơi hơdip bŏ hăng tơlơi tơnap tap anai, ƀing gơmơi hơmâo tơlơi rơnuk rơnua tơdang gơmơi thâo Khua Yang Yêsu jing tơlơi laĭ glaĭ abih bang bruă amăng tơlơi hơdip gơmơi. Ñu jing phŭn tơlơi pha brơi laih anŭn tơlơi čang rơmang sĭt amăng rĭm črăn tơlơi hơdip. Đaŏ kơnang rơbat tui tơlơi atat čông mơng Khua Yang bĕ, Ñu či brơi ih tơlơi dưi hĭ.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.