Lơ 20/02/2024: PIOH HRƠI MÔNG BRƠI KƠ KHUA YANG

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Ƀing đaŏ Yang Krist ƀing ta kiăng jing kar hăng Khua Yang, samơ̆ lu wơ̆t ƀing ta ƀu pioh hrơi mông brơi kơ Ñu, samơ̆ gir mă ta pô kiăng kơ kơsem hơduah tơlơi laĭ glăi amăng tơlơi hơdip. Ƀing ta wơr bit laih, kiăng kơ hơmâo tơlơi pơblih amăng pran jua laih anŭn tơlơi hơdip, ƀing ta khŏm jĕ giăm Khua Yang laih anŭn kơsem hơduah tơlơi Khua Yang kiăng amăng tơlơi hơdip ƀing ta.

Hrơi anai, lơ 20/02/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Belinda Elliott tui hăng akŏ tơlơi hrăm PIOH HRƠI MÔNG BRƠI KƠ KHUA YANG

“Nao jĕ bĕ pơ Ơi Adai, laih anŭn Ñu či rai jĕ pơ ƀing gih” (Yakơ 4:8)

Kâo lăng glaĭ ƀŭk kâo pô laih anŭn kơhôih. Kâo hơmâo brơi ñu glong đơi, laih anŭn mông anai ƀŭk kâo preo yơh. Kâo gir dui glaĭ gơñu tơpă amăng mông kâo či nao mă bruă anai. Anai jing sa tơlơi juăt sat kâo juăt ngă. Kâo juăt pioh sôi hrơi biă mă ƀu nao kăp ƀuh, laih anŭn ƀŭk kâo jai hrơi jai preo yơh. Kâo ƀu kiăng tui anŭn ôh. Samơ̆ ƀŭk kâo tui anŭn yua kơ kâo pioh sôi hrơi ƀu nao kăp ƀŭk.

Kâo ƀu thâo hluh lơi yua hơgĕt kâo ƀu re nao kăp ƀŭk ôh. Sa akŏ hơmâo ƀŭk phrâo sĭt či hiam yơh. Giơ̆ng kơ pơkra laih ƀŭk hlâo adih, kâo mơak biă mă yua kơ ƀŭk kâo ră anai tơpă laih anŭn hiam.

Samơ̆ ră anai, kiăng laĭ klâo blan tơdơi, kâo dŏ ƀơi nil hăng ƀuk preo ƀơi akŏ, tơña glaĭ kâo pô yua hơgĕt kâo ƀu nao kăp ƀŭk. Kâo ƀu thâo ngă hơgĕt dơ̆ng tah hăng ƀuk glong anai. Ƀŭk kâo čơdơ̆ng thu kro, sat biă mă. Wơt dah gir biă mă, samơ̆ kâo ăt ƀu thâo ngă gơñu tơpă dơ̆ng tah.

Tơdang kâo pơmĭn kơ tơlơi anŭn ƀơi anăp nil rĭm mơguah, Khua Yang ƀuah kâo kơ tơlơi hơdip gah bơngăt kâo. Kâo mưn Khua Yang pơtô kâo kơ tơlơi kâo ăt ngă hrŭp hăng anŭn mơ̆n hăng Khua Yang.

Kâo tơña glaĭ kâo pô: Ƀŭk kâo anai hơmâo tơlơi hơgĕt kiăng pơhmutu hrŏm tơlơi rơbat tui Yang Krist mơ̆? Anŭn jing mông Khua Yang pơhơdơr brơi kơ kâo kơ tơlơi kâo hơmâo iâu laĭ hăng Khua Yang amăng hrơi kŏm rơgao laih.
“Tơdah ih kiăng hrŭp hăng Kâo, ih khŏm pioh hrơi mông brơi kơ Kâo lu hloh”.
Anŭn jing tơlơi sĭt. Amăng hrơi kŏm rơgao, kâo kơnơ̆ng pohiăp brŏk amăng mông iâu laĭ, laih anŭn ƀu hơmâo mông kiăng kơ lir hơbit sĭt hăng Khua Yang ôh.
“Ơ Khua Yang, yua hơgĕt kâo ƀu thâo ngă kar hăng đah kơmơi rơgơi amăng Hră Tơlơi Pơrơtưh 31?”
“Ơ Khua Yang, yua hơgĕt kâo ƀu hơmâo tơlơi gir?”
“Ơ Khua Yang, yua hơgĕt kâo ƀu thâo khăp kơ mơnuih kar hăng Ih hơmâo khăp laih?”
“Bơkơ boh Yang Bơngăt Hiam amăng Hră Galati jing hiưm pă? Yua hơgĕt kâo ƀu thâo tŭ mă hơdôm kơnuih anŭn amăng tơlơi hơdip kâo rĭm hrơi?”

Kâo tơña nanao tơlơi tơña anŭn amăng hơdôm hrơi kŏm rơgao, samơ̆ kâo aka pioh hrơi mông sĭt kiăng kơ hơmư̆ tơlơi laĭ glaĭ mơng Khua Yang ôh. Ră anai Ñu hlăk laĭ glaĭ hăng tơlơi rơđah đong.

Tơlơi kâo kiăng anŭn jing tơlơi pơblih kơnơ̆ng kơ Khua Yang đôč dưi ngă.
Khua Yang pơhơdơr brơi kơ kâo, kơnơ̆ng tơl kâo thâo đaŏ kơnang kơ Khua Yang, kâo či tŭ mă kơnuih hrŭp hăng Yang Krist. Samơ̆ ră anai kâo gir mă kâo pô – tơlơi anai kơnơ̆ng ba glaĭ kơ kâo tơlơi hơtah hơtai đôč.

Hơdrôm Hră pơtô brơi kơ ƀing ta hơdră jơlan kiăng kơ dưi hơdip sa tơlơi hơdip dưi hĭ:
“Kâo jing phŭn boh kơƀâu, ƀing gih jing than. Hlơi pô dŏ amăng Kâo nanao, Kâo dŏ amăng ñu, ñu anŭn či mơboh lu. Yua kơ gah rơngiao kơ Kâo ƀing gih ƀu dưi ngă hơgĕt gĕt ôh” (Yôhan 15:5)

Kar hăng tơlơi ƀing ta wai lăng ƀŭk ƀing ta, ƀing ta khŏm triăng nao kăp ƀŭk, tơlơi ngă kơphrâo pran jua ăt kiăng ƀing ta pioh hrơi mông lu kơ Ama ƀing ta dŏ hăng adai dih mơ̆n. Kâo či jai hrŭp hăng Yang Krist hloh dơ̆ng tơdang kâo pioh hrơi mông hơmư̆ laih anŭn hrăm Boh Pơhiăp Khua Yang. Anŭn jing mơnit mông Ñu pơkra pran jua laih anŭn pơkra tơlơi kâo kiăng tui hăng tơlơi Khua Yang kiăng.

Tŏ mơ̆ng anŭn kâo dưm dăp mông hrơi amăng tơlơi hơdip kâo. Ƀu djơ̆ mông hrơi či kăp ƀŭk ôh, samơ̆ mông hrơi nao ƀơi anăp Khua Yang laih anŭn jak iâu Ñu pơblih kâo jing sa čô mơnuih Ñu kiăng.

Bơkơ ih? Jơlan ih rơbat tui Khua Yang kơƀah hĭ tơlơi dưi hĭ mơ̆? Tui anŭn yơh ih khŏm pioh hrơi mông lu hloh dơ̆ng brơi kơ Khua Yang – Pô djru ih dưi hĭ kơnuih soh sat ƀing ta.

Pioh bĕ mông hrơi nao pơ Khua Yang ră anai. Ñu ƀu lui hĭ ih ôh. Yua kơ Khua Yang pơsĭt hăng ƀing ta:
“Nao jĕ bĕ pơ Ơi Adai, laih anŭn Ñu či rai jĕ pơ ƀing gih” (Yakơ 4:8)

Rơkâo ƀing ta pioh mông iâu laĭ hrŏm hơbĭt
Ơ Khua Yang, lu wơt kâo kơnơ̆ng đuaĭ tui hơdôm tơlơi kâo kiăng ngă samơ̆ ƀu pioh mông hrơi kơsem ep tơlơi Khua Yang kiăng amăng tơlơi hơdip kâo. Rơkâo Khua Yang djru kâo thâo pioh mông hrơi hơmư̆ tơlơi lăi glaĭ mơng Khua Yang laih anŭn ngă tui tơlơi Ñu kiăng. Rơkâo Khua Yang pơhrăm pran jua kâo kiăng kơ kâo dưi hơmâo kơnuih hrŭp hăng Yang Krist. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, tơ̆ng krah tơlơi hơdip gŭn găn anai, ih hơmâo pioh hrơi mông kiăng kơ bưp Khua Yang mơ̆? Mông anai, tơdơi kơ mông lir hơbit anai, pioh bĕ mông hrơi nao ƀơi anăp Khua Yang, laih anŭn amăng hrơi mông pơ anăp, dưm dăp bĕ mông amăng rĭm hrơi, kiăng kơ nao ƀơi plă tơkai Khua Yang tŭ mă mông hrơi jĕ giăm Khua Yang. Jak bĕ Khua Yang mŭt amăng pran jua laih anŭn pơblih pran jua ih, pơkra ih jing hrŭp hăng Yang Krist.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.