Lơ 21/12/2023: TƠLƠI ɃUĂN DƯI DJRU GĂN HĬ TƠLƠI RUĂ NUĂ

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Abih bang gơnam amăng lŏn tơnah anai leng dưi pơblih samơ̆ tơlơi Ơi Adai ƀuăn nanao hlŏng lar ăt kar kaĭ. Wơ̆t amăng rơnŭk pă boh pơhiăp Ñu ăt ƀu pơblih. Khua Yang nanao dŏ hrŏm hơbĭt hăng ƀing ta, pơgang, pha brơi laih anŭn djru ƀing ta găn hĭ abih bang tơlơi ruă nuă tơdang ƀing ta đaŏ kơnang laih anŭn kơwưh rơkâo kơ Ñu.

Hrơi anai, lơ 21/12/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Ashley Key tui hăng akŏ tơlơi hrăm TƠLƠI ɃUĂN DƯI DJRU GĂN HĬ TƠLƠI RUĂ NUĂ.

“Ƀing ta thâo laih, abih bang tơlơi pơƀŭt glaĭ leng kơ jing hĭ tơlơi hiam kơ ƀing khăp kơ Ơi Adai, jing kơ ƀing mơnuih Ơi Adai hmâo iâu mă tui hăng tơlơi Ñu ruah mă hlâo.” (Rôm 8:28)

Jĕ giăm phrâo anai, kâo pioh lu hrơi mông pơmĭn nao kơ H’Mari, amĭ Khua Yang Yêsu gah drơi jan asar đeh. Jing sa čô mơnuih đah kơmơi, sa čô mơnuih ngă amĭ, kâo mưn hluh tơlơi dưi găn hĭ kơ tơlơi ruă nuă amăng tơlơi tơkeng. H’mari ăt găn mơ̆n tơlơi ruă nuă tơdang tơkeng rai Pô Pơklaih kơ abih bang ană mơnuih, jing Khua Yang Yêsu ƀing ta khăp hơeng.Tơdang kâo čơdơ̆ng pơmĭn kơ tơlơi anai kâo hling hlang biă mă yua kơ kâo aka pơmĭn ôh kơ tơlơi anai hlâo dih. Wơ̆t kơ tui anŭn, H’Mari khŏm găn tơlơi ruă nuă kar hăng lu đah kơmơi pơkŏn hmâo găn laih tơdang tơkeng.

Samơ̆ Ơi Adai dŏ hrŏm hơbĭt laih anŭn thim pran kơtang brơi kơ H’Mari kiăng kơ ñu dưi găn hĭ tơlơi ruă nuă amăng drơi jan asar đeh anai. Yua kơ anŭn, kâo pơyơr đĭ tơlơi bơni hơơč kơ Khua Yang yua kơ Ñu djru kâo thâo krăn Ñu ƀuăn djru kơ ƀing ta găn hĭ tơlơi ruă nuă.

Hră Ơi Adai Pơhiăp čih lu biă mă kơ tơlơi ƀuăn anai. Ơi Adai pha brơi kơ Yôsep tơlơi rơpơi ƀuh ñu či git gai ƀing ayŏng ñu hăng ƀing ană plei pla. Yua kơ tơlơi anŭn ƀing ayŏng ñu bơrơmŭt laih anŭn sĭ hĭ ñu pơ ƀing sĭ mia Madian laih anŭn ƀing Madian anŭn sĭ hĭ ñu brơi kơ Pôtipar kiăng kơ ngă hlŭn. Tơdơi kơ sĭ ngă hlŭn laih pơ čar Êjip ñu tŭ mă lu tơlơi lông lăng amăng tơlơi hơdip amăng lu thŭn. Bơnai Pôtipar phong tơlơi soh Yôsep ngă pơmlâo kơ ñu yua kơ anŭn arăng mă Yôsep krư̆ amăng mơnă, hrah lui laih anŭn arăng wơr hĭ ñu. Samơ̆ abih bang bruă hmâo tơlơi pơblih tơdang pô khua pŭ ia tơpai hlâo anŭn jing gơyut dŏ hrŏm hơbĭt amăng sang mơnă hmâo hơdơr kơ ñu tơdang pơtao Pharaôn kiăng kơ mơnuih yaih pơblang brơi kơ tơlơi ñu rơpơi.

Čơdơ̆ng Phŭn črăn 41 či ruai glaĭ kơ bruă pô khua pŭ ia tơpai pơhiăp hăng Pharaôn tơlơi rơpơi kơ ñu hmâo Yôsep yaih pơblang brơi yua kơ anŭn yơh Pharaôn hmâo pơđar kơ Yôsep rai kiăng yaih pơblang brơi kơ tơlơi pơtao rơpơi. Tơdơi kơ Yôsep yaih pơblang tơlơi rơpơi kơ Pharaôn tui anŭn yơh ơi pơtao hmâo pŭ đĭ Yôsep ngă khua wai lăng čar Êjip.

Ƀing ih ƀuh hling hlang mơ̆? Wơ̆t Yôsep dŏ amăng sang mơnă laih anŭn tơlơi rŭng răng amăng tơlơi hơdip samơ̆ ñu ăt ruah mă jơlan đaŏ kơnang kơ Ơi Adai. Yua kơ anŭn Ơi Adai ngă pơgiơ̆ng hĭ tơlơi Ñu pha brơi kơ Yôsep amăng tơlơi rơpơi ñu hmâo ƀuh hlăk ñu dŏ hlăk ai. Rơngiao kơ tơlơi anŭn, Ơi Adai jing Pô hmâo pơklaih djru kơ Yôsep dưi găn hĭ abih bang tơlơi ruă nuă kiăng kơ pŭ ñu đĭ ngă khua ƀu djơ̆ kơnơ̆ng kiăng kơ pơklaih lŏn čar Êjip đôč ôh samơ̆ pơklaih kơ abih bang ană plei pla Israel dơ̆ng mơ̆n. Yôsep pô hmâo hiăp tui anŭn tơdang bưp ƀing ayŏng ñu amăng hră Čơdơ̆ng Phŭn 50:20:
“Ƀing gih pơmĭn kiăng ngă sat kơ kâo, samơ̆ Ơi Adai ngă brơi tơlơi anŭn jing hĭ tơlơi hiam, kiăng ngă bruă hiam hrup hăng tơlơi hlăk truh hrơi anai, anŭn jing kiăng pơklaih tơlơi hơdip lu mơnuih.”

Giăm dua rơbâo thŭn tơdơi kơ anŭn, ƀing ta dưi hrăm thâo kơ tơlơi ră ruai kơ H’Mari, jing amĭ kơ Khua Yang Yêsu. Yua kơ bruă pơhaih anăn amăng hră yua kơ anŭn H’Mari hrŏm hăng Yôsep nao hrŏm hơbĭt truh pơ plei Bêtlêhem. Gơñu ƀu hơduah hmâo anih jưh yua kơ anih sang jưh abih laih, yua kơ anŭn H’Mari khŏm tơkeng kơ Ană Nge Yêsu amăng war rơmô, pŏ sŏm hăng khăn đih amăng atŏng rơ̆k. Ană Nge Yêsu jing Pô Pơklaih, Ơi Adai hmâo pha brơi kơ ană mơnuih mơnam. Wơ̆t dah khŏm gir añ tŭ mă khul tơlơi ruă nuă amăng drơi jan asar đeh, amăng tơlơi ruă gah bơngăt jua samơ̆ H’Mari hmâo ruah mă jơlan đaŏ kơnang ƀơi Boh Pơhiăp Ơi Adai.

Rơngiao kơ anŭn, Khua Yang ăt pơhơdơr kơ kâo kơ kơyâo bơrơkal Yang Krist tơdang Ñu tŭ tơlơi ruă nuă, tŭ tơlơi tơnap tap yua kơ tơlơi soh kơ abih bang ană mơnuih mơnam amăng anŭn hmâo ƀing ih laih anŭn kâo. Ñu pô yơh hmâo ƀuăn Ñu či dŏ hrŏm hơbĭt hăng ƀing ta amăng tơlơi tơnap tap ƀing ta hlăk bưp.

Tơdah ƀing ih hlăk bưp tơlơi ruă nuă brơi kơwưh rơkâo bĕ kơ Khua Yang pŏk brơi mơta gah bơngăt kơ ƀing ih kiăng kơ lăng ƀuh khul tơlơi hiam klă Ơi Adai hlăk ngă brơi kơ ƀing ta. Hrup hăng Boh Pơhiăp Khua Yang hmâo čih amăng hră Rôm 8:28 tui anai: “Ƀing ta thâo laih, abih bang tơlơi pơƀŭt glaĭ leng kơ jing hĭ tơlơi hiam kơ ƀing khăp kơ Ơi Adai, jing kơ ƀing mơnuih Ơi Adai hmâo iâu mă tui hăng tơlơi Ñu ruah mă hlâo.” Yua kơ anŭn, khul tơlơi tơnap tap ƀing ih khŏm găn ră anai či tañ đuaĭ rơngao thĕng hĭ amăng tơlơi kơñăm hiam klă kơ Khua Yang. Khua Yang yơh jing Pô dŏ hrŏm hơbĭt hăng kơ ƀing ih laih anŭn djru kơ ƀing ih dưi găn hĭ dơnŭng tơ-u kơ tơlơi djai.

Rơkâo kơ Khua Yang djru kơ ƀing ih thâo krăn tơlơi Ơi Adai ƀuăn Ñu nanao dŏ hrŏm hơbĭt hăng ƀing ih hlăk ƀing ih bưp tơlơi ruă nuă. Rơkâo kơ Khua Yang pha brơi tơlơi mơyun hiam bă blai ƀơi ƀing ih hăng sang anŏ ƀing ih amăng bơyan Nôel thŭn anai.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua amăng tơlơi khăp pap hling hlang Ih djru kâo kơjăp yak găn hĭ khul tơlơi rơbŭ kơthel laih anŭn tơlơi ruă nuă amăng tơlơi hơdip anai. Rơkâo kơ Ih djru kơ kâo ƀrư̆ hrơi jai mưn găn tơlơi rơnŭk rơnua Ih pha brơi amăng bơyan Nôel anai laih anŭn ăt brơi mơ̆n kơ khul kleng klông amăng tơlơi hơdip kâo. Kâo iâu laĭ hăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, ƀu hmâo tơlơi hơgĕt ngă kơ ƀing ta huĭ bral tơdang ƀing ta djă păn kơjăp amăng tơlơi Khua Yang ƀuăn djru kơ ƀing ta dưi găn hĭ tơlơi ruă nuă. Găn rĭm tơlơi lông lăng Ñu či pŭ ƀing ta đĭ glong hloh dơ̆ng laih anŭn ƀing ta či mưn găn tơlơi khăp pap prŏng hloh dơ̆ng. Anăm wơr bĭt bơrơđah pran jua bơni kơ Khua Yang laih anŭn pơpha kơ abih bang mơnuih khul bruă hling hlang Khua Yang hmâo ngă amăng tơlơi hơdip kơ ƀing ih.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.