Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi
“Tơlơi hơdip kâo, kâo thâo hluh hloh kơ abih bang!” – Năng ai tơlơi pơmĭn anai hmâo laih sa wơ̆t hmâo amăng tơlơi pơmĭn kơ ƀing ih. Ƀing ta juăt pơmĭn ƀing ta jing mơnuih thâo klă hloh kơ abih bang laih anŭn gir ngă abih bang bruă tui hăng tơlơi ƀing ta kiăng. Samơ̆ truh laih mông ƀing ta khŏm thâo klă Khua Yang mă jing Pô git gai, hăng hmâo hơdră jơlan hiam hloh brơi kơ tơlơi hơdip ƀing ta. Bruă kơ ƀing ta ƀu djơ̆ gir pơsua mă tơlơi dưi git gai, samơ̆ đaŏ kơnang laih anŭn jao abih bang bruă brơi kơ Ñu.
Hrơi anai, lơ 22/02/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Tori Troncone tui hăng akŏ tơlơi hrăm TƠLƠI K O KIĂN HA ɃÔDAH TƠLƠI KHUA YANG KIĂNG?
“Ơ Ama gơmơi dŏ amăng adai dih hơi; Brơi kơ abih bang mơnuih pơpŭ pơyom kơ anăn rơgoh hiam Ih. Brơi kơ dêh čar pơtao Ih tañ truh, brơi tơlơi Ih kiăng dưi jing ƀơi lŏn tơnah kar hăng dưi jing amăng adai mơ̆n!” (Mathiơ 6:9-10)
Kâo thâo yơh kâo pô hmâo sa tơlơi juăt phara biă mă. Kâo khăng biă mă amăng bruă dưm dăp ser mŏng amăng mơsin rao mŏng jam. Kâo thâo tơlơi anŭn hmư̆ rŏ dah ha klao biă mă, samơ̆ tơlơi sĭt jing kar hăng anŭn yơh. Tơdah mŏng jam, kơčŏk ƀeng ƀu dưm dăp tui tơlơi rơnăk, kâo nanao hmâo mưn ƀing gơñu ƀu rao rơgoh ôh.
Rơkơi kâo thâo hluh tơlơi kâo mưn. Ñu nanao gir ngă tui khul hơdră kơ mơsin rao mŏng jam kâo hmâo brơi rai.
Hmâo mơ̆n mông ñu či tơña kơ kâo: “Adơi kiăng ayŏng pioh kơčŏk anai ƀơi pă lĕ?”
“Pơpă tŭ mơ̆n, tui hăng ayŏng ƀuh ƀơi pă geh gal” – kâo juăt laĭ glaĭ kar hăng anŭn. Hlăk anŭn, tơlơi kâo kiăng biă mă sĭt yơh kar hăng anŭn. Samơ tơdang dŏ glaĭ hơjăn păn amăng sang apui, kâo gleng lăng mơta ƀơi mơsin rao mŏng jam laih anŭn tơña kơ kâo pô hmâo dơ̆ng mơ̆n hă hơdră jơlan dưm dăp pơkŏn hiam hloh dơ̆ng. Tăng năng kâo či pioh hơnơ̆ng kar hăng anŭn, tăp năng kâo pơblih anih pioh ƀơƀiă gơnam, laih anŭn tăp năng kâo rơngiă lu hrơi mông kiăng kơ dưm dăp glaĭ abih bang hiư̆m pă kiăng kơ hiam hloh kơ abih bang.
Hmâo mơ̆ ƀing ih hmâo ngă laih bruă kar hăng anŭn hăng Khua Yang? Ƀing ih hmâo mơ̆ mông mŭt čer nao amăng hơdră Ñu laih anŭn gir dưm dăp abih bang bruă tui hăng tơlơi ƀing ih kiăng? Hmâo mơ̆n mông kâo pơmĭn kơ kâo pô jing mơnuih thâo klă rơđah hloh kơ abih bang. Kâo juăt laĭ kâo đaŏ Khua Yang či ngă tơlơi hiam klă Ñu kiăng amăng abih bang tơlơi truh, samơ̆ hnal tuč kâo gir dưm dăp abih bang bruă tui hăng tơlơi kâo kiăng. Kâo juăt laĭ kâo thâo krăn Khua Yang hlăk djă tơlơi hơdip kâo, samơ̆ hnal tuč kâo gir plah sua mă tơlơi dưi git gai hăng ngă tui tơlơi pô kâo kiăng.
Tơdơi kơ rơngiă pluh mơnit kiăng kơ dưm dăp glaĭ mơsin rao mŏng jam, kâo thâo hluh klă hnal tuč kâo hmâo dưm abih ban g bruă wơ̆t glaĭ pơ anih kar hăng blŭng hlâo. Hnŭn jing boh than tơdang kâo gir čer mŭt nao amăng hơdră Khua Yang laih anŭn pơsua tơlơi dưi git gai hăng Ñu. Kâo hmâo rơngiă hrơi mông laih anŭn tơlơi gleh glan dưm dăp abih bang bruă, hnal tuč tŭ mă abih bang ăt či wơ̆t dŏ amăng anŭn tui hăng tơlơi Ñu kiăng. Kar hăng Boh Pơhiăp Khua Yang amăng Tơlơi Bơrơtưh 16:9 hmâo čih:
“Ană mơnuih pơkra brơi hơdră jơlan kơ ñu pô, samơ̆ Yêhôwa atăt gai khul yak ñu rơbat.”
Tơdang Khua Yang Yêsu pơtô kơ ƀing ding kơna Ñu iâu laĭ amăng Mathiơ 6, Ñu čơdơ̆ng tơlơi Ñu iâu laĭ hrup hăng anai:
“Ơ Ama gơmơi dŏ amăng adai dih hơi; Brơi kơ abih bang mơnuih pơpŭ pơyom kơ anăn rơgoh hiam Ih. Brơi kơ dêh čar pơtao Ih tañ truh, brơi tơlơi Ih kiăng dưi jing ƀơi lŏn tơnah kar hăng dưi jing amăng adai mơ̆n!” (Mathiơ 6:9-10)
Amăng đang Gêtsêmanê, Ñu ăt hmâo iâu laĭ laih kar hăng anŭn hăng yang Ama:
“Ơ Ama Kâo! Tơdah dưi, mă pơđuaĭ hĭ bĕ kơčŏk anai mơ̆ng Kâo; ƀu djơ̆ tui hăng Kâo kiăng ôh, samơ̆ tui hăng Ih kiăng.” (Mathiơ 26:39)
Khua Yang Yêsu nanao iâu laĭ brơi tui tơlơi Ama kiăng! Hnŭn jing sa tơlơi pơhrăm yom pơphan kơ tơlơi luă gŭ Yang Krist hmâo hơdip bơhmutu brơi kơ ƀing ta.
Tơdang iâu laĭ rơkâo kơ “tơlơi Ama kiăng” hrup hăng Khua Yang Yêsu, kâo hlăk pơyơr tơlơi dưi git gai tơlơi hơdip kâo brơi kơ Khua Yang. Kâo hlăk gat lui pran jua pơang pơgao hăng kơnuih “ƀing ta thâo klă rơđah hloh”. Pơblih amăng anŭn, kâo tŭ ư tơlơi Khua Yang kiăng nanao jing nanao jing hiam hloh kơ abih bang, laih anŭn kâo đaŏ kơnang ƀơi pran jua hơnơ̆ng ten Ñu hloh kơ khul hơdră jơlan ƀôdah tơlơi amoaih kiăng kơ kâo pô.
Rĭm wơ̆t tơdang kiăng kơ ƀing ta pô djă tơlơi dưi git gai hloh kơ gưt tui hơdră jơlan kơ Khua Yang, ƀrơi kơ ƀing ta luă gŭ nao ƀơi anăp Ama Pơ Adai Dih hăng pran jua đup gưt, laih anŭn pơyơr tơlơi iâu laĭ kar hăng Yang Krist.
“Ơ Ama gơmơi dŏ amăng adai dih hơi; Brơi kơ abih bang mơnuih pơpŭ pơyom kơ anăn rơgoh hiam Ih. Brơi kơ dêh čar pơtao Ih tañ truh, brơi tơlơi Ih kiăng dưi jing ƀơi lŏn tơnah kar hăng dưi jing amăng adai mơ̆n!”
Rơkâo ƀing ta pioh mông iâu laĭ hrŏm hơbĭt
Ơ Khua Yang, kâo thâo krăn kâo ƀu dưi git gai abih bang bruă amăng tơlơi hơdip kâo. Ơi Khua Yang, kâo thâo klă kâo ƀu dưi git gai abih bang bruă amăng tơlơi hơdip kâo. Kơnơ̆ng hơjăn Ih đôč thâo tơlơi hơgĕt jing yom hloh brơi kơ kâo, laih anŭn kâo đaŏ kơnang ƀơi Ih. Rơkâo kơ Ih djru kâo klaih lui hĭ tơlơi dưi git gai hăng pơyơr abih bang brơi kơ Ih. Kâo pơpŭ iâu laĭ hăng anăn Khua Yang Yêsu Krist, A-men.
Ơ abih bang ayŏng amai adơi khăp hơeng, mơ̆ng hlâo adih ƀing ih hlăk gir pơsua mă tơlơi dưi hăng Khua Yang amăng khul mơta bruă hơgĕt? Brơi klaih lui, đup gưt laih anŭn pơyơr đĭ abih bang khul bruă ƀing ih hlăk bruă amăng tơngan Ñu. Brơi bĕ Khua Yang djă tơlơi dưi git gai hăng ngă pơgiơ̆ng hĭ tơlơi Ih kiăng amăng tơlơi hơdip ƀing ih.
Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!
Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.
Leave a Reply