Lơ 23/01/2024: KHUA YANG YÊSU, PÔ IÂU LAĬ PƠALA BRƠI KƠ ɃING TA

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Ƀing ta juăt iâu laĭ hăng tơlơi čang rơmang Khua Yang či pơblih tơlơi truh ƀing ta hlăk bưp samơ̆ ƀu pơmĭn ôh tơlơi iâu laĭ či pơblih kơnuih kơ ƀing ta. Bruă nanao iâu laĭ hăng Khua Yang či djru kơ ƀing ta nao jĕ pơ Ñu hăng djă kơjăp tơlơi lir pơgop hăng Ñu hloh dơ̆ng. Khua Yang Yêsu yơh jing Pô hlăk dŏ gah hơnuă kơ Ơi Adai hăng iâu laĭ pơala brơi kơ ƀing ta.

Hrơi anai, lơ 23/01/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Scott Pressonqua tui hăng akŏ tơlơi hrăm KHUA YANG YÊSU, PÔ IÂU LAĬ PƠALA BRƠI KƠ ɃING TA.

“Hlơi pô či klă kơđi gơñu? Yêsu Krist jing Pô hmâo djai laih anŭn hmâo hơdip glaĭ laih, Pô dŏ gah hơnuă kơ Ơi Adai laih anŭn iâu laĭ pơala brơi kơ ƀing ta.” (Rôm 8:34)

Tơdang iâu laĭ, lu mơnuih amăng ƀing ta kiăng biă mă Khua Yang laĭ glaĭ mơtam samơ̆ ƀiă biă mă mơnuih amăng ƀing ta gir run čañg tơguan Ñu laĭ glaĭ tơlơi ƀing ta iâu laĭ. Biă mă ñu, ƀu djơ̆ ôh rĭm mông Khua Yang leng laĭ glaĭ tơlơi ƀing ta rơkâo. Hmâo lu wơ̆t ƀing ta iâu laĭ hăng Khua Yang samơ̆ hmâo sa mơta tơlơi sĭt jing lu khul mơta tơlơi ƀing ta rơkâo, Ñu ƀu laĭ glaĭ ƀôdah Ñu kiăng kơ ƀing ta dŏ čang tơguan tơlơi Ñu laĭ glaĭ.

Yua hơgĕt ƀu djơ̆ rĭm mông Khua Yang leng laĭ glaĭ tơlơi kơwưh rơkâo kơ ƀing ta? Yua Khua Yang kiăng kơ ƀing ta khŏm kơwưh rơkâo kơ Ñu amăng abih bang tơlơi truh ƀu djơ̆ ôh tơdang kơnơ̆ng tơdang bưp tơlơi hơdip tơnap tap ƀing ta mă kơwưh rơkâo kơ Ñu. Rơngiao kơ tơlơi anŭn, Khua Yang kiăng kơ ƀing ta hmâo tơlơi lir pơgop lik lir hăng Ñu.

Khua Yang hmâo tơlơi dưi pơblih abih bang tơlơi truh amăng mơnit mông đôč kar hăng Ñu hmâo pơsuaih tơlơi ruă laih anŭn pơklaih mơnuih djai hơdip glaĭ. Năng ai ƀing ta ăt hmâo laih lăng ƀuh Khua Yang hmâo ngă khul bruă rơgao hloh tơlơi ƀing ta thâo hluh. Tơdang sa čô mơnuih amăng sang anŏ ƀing ta hmâo tơlơi ruă tui anŭn yơh ƀing ta dưi ngă bruă hơgĕt lĕ? Ơi Adai jing Yang thâo abih bang tơlơi truh kơ ƀing ta amăng tơlơi hơdip anai. Khua Yang thâo ƀing ta mưn ƀuh tơlơi gleh glan tơdang ană bă ƀu gưt hiăp. Khua Yang thâo krăn bruă mă tơnap tap kơ ƀing ta. Khua Yang thâo krăn ƀing gơyut gơyâo tăp năng či pơblư̆ kơ ƀing ta. Khua Yang ăt dŏ thâo krăn dơ̆ng mơ̆n kơ ƀing ta bưp lu mơta tơlơi ƀlơ̆ng bơngơ̆t, tơlơi ƀu hmâo tơlơi rơnŭk rơnua amăng tơlơi hơdip anai.

Samơ̆ Khua Yang yơh kiăng kơ ƀing ta bơrơđah pran jua đaŏ kơnang kơ Ñu laih anŭn čang tơguan kơ Ñu mă bruă yua kơ Ñu jing Yang pơblih tơlơi truh kơ ƀing ta amăng mơnĭt mông đôč. Yua hơgĕt Khua Yang kiăng kơ ƀing ta ngă bruă kar hăng anŭn? Hiư̆m ƀing ta hluh khul tơlơi tơnap tap kơ ƀing mơnuih aka đaŏ kơ Khua Yang tơdah ƀing ta ƀu bưp tơlơi truh kar hăng ƀing gơñu? Hiư̆m ƀing ta dưi jing hĭ pô gơ̆ng jơlan sĭt brơi kơ Ñu tơdah ƀing ta ăt hmâo hơdip laih hăng bưp khul tơlơi truh tơnap tap kơtang tĭt?
Brơi kơ hơdơr bĕ, Ơi Adai pha brơi kơ ană mơnuih ƀing ta tơlơi dưi kơ tơlơi rơngai ruah mă. Laih anŭn Ñu ăt thâo krăn ană mơnuih či ngă soh. Khua Yang ăt thâo krăn dơ̆ng mơ̆n bruă kơ ƀing ta ƀu gưt hiăp Ñu jing pơphŭn ngă kơ ƀing ta lĕ amăng tơlơi soh laih anŭn tơlơi soh hmâo găn laih amăng abih bang rơnŭk ană mơnuih. Khua Yang ăt thâo krăn hlâo dơ̆ng mơ̆n yua kơ ƀing ta ruah mă tơlơi soh glaĭ yua kơ anŭn yơh ƀing ta či mă tŭ tơlơi hơtơ̆m pah laih anŭn tơlơi soh ƀrư̆ hrơi či jă kơtang lu la lu lin amăng lŏn tơnah. Samơ̆ Khua Yang kiăng kơ ƀing ta đaŏ kơnang kơ Ñu amăng tơlơi mơak ƀôdah tơlơi tơnap tap. Yua kơ bruă anŭn yơh, Khua Yang brơi khul tơlơi tơnap tap truh kơ ƀing ta.Năng ai amăng rĭm čô ƀing ta leng kơ hmư̆ laih tơlơi pơhiăp “Tơlơi iâu laĭ či pơblih tơlơi truh.” Samơ̆ bruă biă mă ƀing ta iâu laĭ kơnơ̆ng hăng tơlơi kiăng Khua Yang pơblih tơlơi truh kơ ƀing ta hlăk bưp samơ̆ ƀu pơmĭn ôh tơlơi iâu laĭ či pơblih kơ kơnuih ƀing ta. Kơ bruă nanao iâu laĭ hăng Khua Yang yơh či djru kơ ƀing ta nao jĕ giăm Ñu hloh dơ̆ng laih anŭn djă kơjăp tơlơi lir pơgop lik lir hăng Ñu. Hmâo lu mông amăng tơlơi hơdip anai ƀing ta kiăng Khua Yang ngă tui tơlơi ƀing ta rơkâo laih anŭn ngă tui tơlơi pô ƀing ta kiăng. Sĭt biă mă, kơ kâo pô yơh ăt găn laih tơlơi găn kar hăng anŭn samơ̆ kâo ăt hrăm mơ̆n hơdră jơlan kơwưh rơkâo kơ Khua Yang ngă tui tơlơi Ñu kiăng amăng abih bang tơlơi truh kâo hlăk bưp. Kâo ăt hrăm mơ̆n hơdră jơlan kơwưh rơkâo kơ Yang Bơngăt Hiam djru kơ kâo tơdang kâo ƀu thâo hiư̆m pă kiăng iâu laĭ hăng Khua Yang. Kâo ăt hrăm mơ̆n hơdră jơlan iâu laĭ hăng tơlơi čang rơmang Khua Yang či laĭ glaĭ kâo wơ̆t dah hmâo lu mông tơlơi Ñu laĭ glaĭ ƀu kar hăng tơlơi kâo čang rơmang samơ̆ kâo thâo sĭt Ñu jing Yang ăt hlăk dŏ git gai.

Khua ding kơna Pôl yơh jing tơlơi bơhmutu mơak hrăp amăng abih bang tơlơi truh amăng tơlơi hơdip Ñu. Kiăng kơ mơak hrăp amăng abih bang tơlơi truh amăng tơlơi hơdip kar hăng khua ding kơna Pôl jing bruă ƀu amuñ ôh. Kơ khua ding kơna Pôl yơh jing tơlơi hơdip bơhmutu hiam kiăng ƀing ta hla tui tơdang kơwưh rơkâo kơ Ñu. Sĭt biă mă, Ơi Adai brơi tơlơi tơnap tap truh kơ ñu kiăng kơ ñu kơnang pran kơtang Khua Yang kiăng kơ dưi găn laih anŭn hmâo Yang Bơngăt Hiam atăt ba kiăng kơ čih glaĭ khul hră mơit ba rai tơlơi mơak pơtrŭt laih anŭn tơlơi čang rơmang ƀơi Khua Yang tơdang bưp tơlơi tơnap tap amăng tơlơi hơdip.

Yua kơ anŭn, brơi hñuai hla tui bĕ tơlơi hơdip kơ khua ding kơna Pôl, kơjăp pran jua iâu laĭ hăng Khua Yang laih anŭn kơnang kơ Ñu amăng abih bang tơlơi truh ƀing ta hlăk bưp wơ̆t dah ƀing ta ƀu dưi truh kơ khul tơlơi ƀing ta čang rơmang.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih jing Pô thâo abih bang tơlơi truh kơ kâo amăng tơlơi hơdip anai. Bơni kơ Ih yua kơ Ih hmâo yua Boh Pơhiăp Ih amăng hrơi anai kiăng pơhơdơr kơ kâo khŏm đaŏ kơnang ƀơi Ih laih anŭn kơjăp pran jua iâu laĭ wơ̆t dah hmâo mông kâo ƀu hmâo mă tŭ khul tơlơi kâo čang rơmang. Samơ̆ rơkâo kơ Ih djru kơ kâo thâo krăn Ih jing Pô hiam klă laih anŭn Ih hmâo hơdră jơlan hiam klă ƀơi tơlơi hơdip kâo. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, ƀu hmâo mông jing rơgao ôh kiăng kơ čơdơ̆ng glaĭ mơ̆ng blŭng kơ tơlơi lir pơgop hăng Khua Yang. Ƀu hmâo mông jing rơgao ôh kiăng kơ gưt tui asăp Khua Yang iâu amăng tơlơi hơdip kơ ƀing ih laih anŭn ngă tui khul hơdră jơlan Khua Yang hmâo prăp rơmĕt hlâo laih kơ ƀing ta. Brơi nao jĕ Khua Yang, Ñu či nao jĕ kơ ƀing ih. Brơi tŏng ten đơ̆k Bơh Pơhiăp Khua Yang laih anŭn iâu laĭ hăng Ñu jing Pô dŏ gah hơnuă kơ Ơi Adai hăng iâu laĭ pơala kơ ƀing ta. Brơi kơjăp pran jua đaŏ kơnang kơ Ñu amăng tơlơi hơdip hiam mơak wơ̆t kơ tơlơi hơdip tơnap tap.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.