Lơ 26/04/2024: ĐAŎ KƠNANG KƠ KHUL TƠLƠI TA ČANG RƠMANG

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hmâo hơdôm khul tơlơi ƀing ta kiăng thâo klă rơđah, samơ̆ Khua Yang ƀu brơi kơ ƀing ta thâo. Mông Ñu rai dơ̆ng pơanăp jing sa amăng khul tơlơi anŭn. Khua Yang kiăng ƀing ta hrăm hơdră hơin kơnang kơ Ñu amăng mông hrơi Ñu pơkă. Dŏ tơguan amăng tơlơi đaŏ či djru tơlơi hơdip gah bơngăt ƀing ta prŏng tui laih anŭn nanao prăp pre kiăng bưp Khua Yang.

Hrơi anai, lơ 26/04/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Helen Ryser Smith tui hăng akŏ tơlơi hrăm ĐAŎ KƠNANG KƠ KHUL TƠLƠI TA ČANG RƠMANG

“’Brơi ih đaŏ kơnang kơ YÊHÔWA hăng abih pran jua, Anăm kơnang ƀơi tơlơi rơgơi ih pô ôh. Brơi ih thâo krăn Ñu amăng abih jơlan ih rơbat, Ñu yơh či ngă pơtơpă hĭ khul jơlan ih.'(Tơlơi Bơrơtưh 3:5-6)

Hlăk 2000 thŭn hlâo, ƀing ding kơna Khua Yang hmâo tơña kơ Yêsu tui anai: “Hơbin Ih či rai dơ̆ng?” Ră anai, lu mơnuih amăng ƀing ta ăt hmâo tơlơi tơña kar hăng anŭn mơ̆n. Kâo khăp kơ Boh Pơhiăp Khua Yang yua kơ tơlơi sĭt Ñu ƀu bơblih tui thŭn blan ôh. Mơak biă mă tơdang Khua Yang Yêsu brơi kơ ƀing ta thâo krăn mông Khua Yang či rai dơ̆ng. Samơ̆ kơđai glaĭ, Khua Yang Yêsu laĭ hăng ƀing ding kơna Ñu laih anŭn hăng ƀing ta kơnơ̆ng thâo hơgĕt lăp thâo đôč.

Hiưm ih pơmĭn ƀing ding kơna Ñu tŭ mơ̆ kơ tơlơi laĭ glaĭ anai mơ̆ng Khua Yang Yêsu? Tơdah gơñu kiăng thâo krăn mông hrơi Khua Yang rai dơ̆ng bơ ƀing ta ăt kiăng thâo tơlơi anŭn mơ̆n. Kâo pô ăt kiăng thâo rơđah rơđong kiăng kơ kâo hmâo hơdră hăng ngă djơ̆ tui tơlơi kâo kiăng. Samơ̆ Khua Yang laĭ tui anai: “Jao bĕ hơdră jơlan ih amăng tơngan Kâo laih anŭn Kâo kiăng ih đaŏ kơnang kơ Kâo abih bang.”
Boh Pơhiăp Khua Yang amăng Hêbrơ 11:1 pơtrŭt pơđur ƀing ta khŏm đaŏ kơnang kơ Ñu abih bang: “’Tơlơi đaŏ jing tơlơi thâo sĭt kơ khul tơlơi ƀing ta čang rơmang, jing tơlơi pơsĭt kơ khul tơlơi ƀing ta ƀu thâo ƀuh ôh.”

Sĭt yơh, Khua Yang yơh hmâo pơtô kâo đaŏ kơnang kơ Ñu amăng 13 thŭn rơgao. Anŭn jing mông rơbat amăng tơlơi hơdip gah bơngăt sui laih hăng djru kâo wơr bĭt hĭ pơklon laih anŭn đup gưt Ñu abih bang.

Pơhmutu kar hăng ih hlăk pi kian ană nge anĕt aneo anai laih anŭn ih ƀu thâo prŏng anĕt, ƀuk jŭ ƀôdah kơñĭ, hmâo ƀôdah ƀu hmâo ƀuk, tap năng ih ƀu thâo lơi pi kian ană nge đah rơkơi ƀôdah đah kơmơi. Samơ̆ hăng rơnŭk rơgơi anai ih khŏm tơguan ană nge prŏng kah dưi thâo krăn đah rơkơi ƀôdah đah kơmơi hăng hơbŏ rup ñu hiưm pă. Truh mông pơkă hrơi tơkeng samơ̆ kâo ƀu hmâo mưn sa mơta tơlơi hơgĕt ôh.

Kâo khŏm tơguan thĭm pluh hrơi dơ̆ng anŭn kah ruă hlung. Mông anŭn kâo pơmĭn lu yua kơ anai jing tal blŭng kâo ngă amĭ. Kâo tơña kâo pô: “Kâo khŏm ngă hơgĕt anai? Kâo kơnơ̆ng phrâo 21 thŭn đôč. Hiưm kâo dưi jing sa čô amĭ klă hiam mơ̆? Khul tơlơi tơña anai kâo tơña hlâo kơ kâo thâo krăn Khua Yang laih anŭn aka tŭ jum Khua Yang Yêsu ngă Khua amăng tơlơi hơdip. Samơ̆ bơni kơ Khua Yang yua kơ Ñu jing Pô Hơnơ̆ng Ten wơ̆t dah kâo jing mơnuih ƀu tŏng ten. Bơni kơ Khua Yang yua kơ Ñu yua sa čô pô djru amăng bruă ia jrao jing mơnuih thâo krăn tơlơi hyưt bral bơdah ƀơi ƀô̆ mơta kâo hăng laĭ kơ kâo tui anai: “abih bruă či hiam soh sel, hơin kơ kâo hăng hmư̆ asăp kâo laih anŭn ƀing ta hrŏm hơbĭt či găn tơlơi anai.” Mơ̆ng tơlơi pơhiăp ñu anŭn ngă kơ kâo hơin kơ ñu jing sa čô rơgơi dưi djru kâo. Ƀiă mông mơ̆ng anŭn, hnal tuč kâo hmâo tơkeng kơ sa čô ană đah rơkơi hiam biă mă sĭt anai jing sa tơlơi mơak yơh. Tơdơi kơ anŭn, kâo dưi lăng ƀuh ană kâo laih anŭn čum ƀơi ƀô̆ ñu. Kâo pơmĭn lăp biă mă kơ tơlơi tơguan anai.

Hră Tơlơi Bơrơtưh 3:5-6 pơtrŭt pơđur ƀing ta: “Brơi ih đaŏ kơnang kơ YÊHÔWA hăng abih pran jua, Anăm kơnang ƀơi tơlơi rơgơi ih pô ôh. Brơi ih thâo krăn Ñu amăng abih jơlan ih rơbat, Ñu yơh či ngă pơtơpă hĭ khul jơlan ih.”

Kâo mơak biă mă tơdang dưi lăng ƀuh ƀô̆ mơta ană đah rơkơi kâo tal blŭng laih anŭn či mơak hloh dơ̆ng amăng hrơi ƀing ta čơkă Khua Yang rai dơ̆ng. Sĭt mă biă mă tơdang pơmĭn nao kơ bruă ƀing ta đuaĭ nao hăng bon ƀơi tơkai Pô hmâo djai pơala kơ tơlơi soh ƀing ta.

Dŏ tơguan ƀu djơ̆ jing bruă amuñ ôh samơ̆ hrăm hơdră đaŏ kơnang kơ Ơi Adai Ama laih anŭn hrơi mông Ñu ƀu kơnơ̆ng djru tơlơi đaŏ ƀing ta prŏng tui đôč ôh samơ̆ dŏ djru kơ ƀing ta jing tơlơi bơngač kơ ƀing aka thâo krăn tơlơi khăp Khua Yang brơi kơ gơñu. Đup gưt Khua Yang bĕ laih anŭn brơi Ñu ngă Khua tơlơi hơdip ƀing ta. Đaŏ kơnang kơ Ama Hăng Adai jing Pô wai lăng tơlơi hơdip ƀing ta hlâo kơ lŏn tơnah anai hmâo hrih pơjing rai yua kơ Ñu hmâo mơ̆ng blŭng hlâo.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ kơ Ih thâo rơđah abih tơlơi truh kơ kâo amăng tơlơi hơdip anai. Wơ̆t dah hmâo lu tơlơi truh kơ kâo samơ̆ kâo aka thâo hluh, samơ̆ rơkâo Ih djru kâo nanao đaŏ kơnang kơ Ih abih bang laih anŭn rơbat nao amăng tơlơi khăp hling hlang Ih. Rơkâo Ih djru kâo tŏng ten đuaĭ tui Ih tơl abih tơlơi hơdip kâo. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, ƀing ta ƀu thâo krăn rơđah mông hrơi Khua Yang či rai dơ̆ng samơ̆ ƀing ta đaŏ sĭt kơ tơlơi anŭn. Anŭn yơh, rĭm hrơi phrâo jing mông hrơi lăp kiăng kơ ƀing ta ngă pơgiơ̆ng hĭ bruă Khua Yang hmâo jao laih kơ ƀing ta ƀơi lŏn tơnah. Đaŏ kơnang bĕ kơ Khua Yang, jao abih bang tơlơi laih anŭn pơyơr tơlơi hơdip ih kơ Ñu.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.