Lơ 27/12/2023: DŎ TƠGUAN HRƠI MÔNG KHUA YANG

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hmâo mơ̆ ih mơtah hơtai tơdang dŏ tơguan Khua Yang laĭ glaĭ kơ tơlơi ih rơkâo? Hmâo tơlơi iâu laĭ sui hrơi mông samơ̆ aka ƀuh Khua Yang laĭ glaĭ. Boh Pơhiăp Khua Yang mơguah anai pơtrut ih abih pran jua đaŏ kơnang laih anŭn dŏ tơguan hrơi mông kơ Ñu.

Hrơi anai, lơ 27/12/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Diane Markins tui hăng akŏ tơlơi hrăm DŎ TƠGUAN HRƠI MÔNG KHUA YANG

 “Yêhôwa či ngă pơgiơ̆ng abih bang bruă lơ̆m kơ kâo. Ơ Yêhôwa, tơlơi khăp Ih dŏ nanao hlŏng lar; Anăm lui hĭ ôh bruă tơngan Ih ngă!” (Tơlơi Adoh Hơđăp 138:8)

Ƀing ta juăt laih kơ tơlơi dŏ tơguan, mơ̆ng bruă anĕt truh kơ bruă prŏng, bơhơmutu dă ruaĭ kiăng kơ blơi gơnam, tuh ia pêtrol. Bôdah dŏ tơguan ha mơkrah kơ drơi jan ta, tơguan rơbeh dua rơpăn blan kiăng ƀuh ană nghe tơkeng rai ƀôdah dŏ tơguan kơ tơlơi pơđĭ prăk amăng bruă mă. Hnŭn yơh, dŏ tơguan jing sa tơlơi khŏm găn yơh amăng tơlơi hơdip anai.

Hmâo mơ̆ ih lăng nao kơ bruă pă thâo amăng tơlơi hơdip ta laih anŭn tơña nang lăp mơ̆ kiăng dŏ tơguan? Hmâo mơ̆ ih tơguan kiăng kơ pơplih, anăp kơ sa gah pơkŏn dơ̆ng amăng sa hrơi mông sui ƀôdah ih tŭ ư lui hĭ tơlơi anŭn yua kơ ƀu dưi pơplih tah tơlơi anai?

Kâo hmâo dŏ tơguan sui biă mă kiăng dưi ngă tui tơlơi kâo kiăng amăng tơlơi hơdip. Bơ ih hiưm pă, tơlơi hơgĕt ngă kơ ih tañ lui hĭ tơdang dŏ tơguan? Nang ai rĭm čô ƀing ta hmâo yơh tơlơi laĭ glaĭ kơ ta pô. Hăng kâo, mông hrơi čem rong ană bă, răk wai tơlơi rơnŭk rơnom amăng sang anŏ laih anŭn đĭ kơyar mă bruă buih ƀơ̆ng jing tơlơi kơñăm phŭn amăng tơlơi hơdip kâo. Anŭn jing tơhnal lăp đôč samơ̆ laĭ biă mă kâo amuñ lui yua kơ huĭ hyưt hăng kơbah mơnuih atăt kơčrâo brơi. Samơ̆ tơdang kâo pơyơr abih bang tơlơi huĭ hyưt đĭ kơ Khua Yang, anŭn Ñu pơđur hăng alum kâo yak rơbat nao hăng Ñu.

Boh Pơhiăp Khua Yang amăng hră Êsai 40:31 yơh pơđĭ ai kâo amăng tơlơi hơdip anai “Samơ̆ hlơi pô čang tơguan kơ Yêhôwa sĭt ñu či hmâo pran kơtang phrâo yơh, Gơñu či pơr glong kar hăng čĭm grư̆, Gơñu či đuaĭ samơ̆ ƀu gleh glăn ôh, Gơñu či rơbat samơ̆ ƀu rơmơ̆n tơdu ôh.”

Hmâo mơ̆ ih gir ngă pơgiơ̆ng bruă tui hăng pran ih pô bơ ƀu kơnang kơ Khua Yang ôh? Bruă ngă tui ta pô sĭt ngă kơ ta tŭ nua hnal tuč kơtraŏ hăng răm rai.

Yua kơ anŭn yơh, hmâo lu wơ̆t amăng tơlơi hơdip kâo tơña kơ arăng kơ lu bruă ƀu tơpă hơnơ̆ng laih anŭn bruă sat kiăng kơ hơduah ƀuh tơhnal hơgĕt arăng ngă khul tơlơi anŭn laih anŭn hơduah jơlan djru pơkra glaĭ. Hơnŭn yơh, lăng glaĭ kâo pô, kâo khŏm rơnak hloh amăng bruă ngă kiăng huaĭ soh glaĭ rơngiao kơ tơlơi kâo kiăng. Samơ̆ ƀing ta khŏm pơdah tơlơi kơhnâu laih anŭn răng amăng abih bruă ƀing ta ngă.

Kiăng đŭt hĭ akha phŭn kơ tơlơi anai, ƀing ta khŏm pơmĭn dlăm hlâo kơ ngă. Bing ta khŏm rơkâo kơ Khua Yang, đŏk Boh Pơhiăp Ñu kiăng kơ tui hơduah tơlơi kơhnâu mơ̆ng Ñu. Tơdah ih bưp tơlơi gleh tơnap pă ih dưi iâu laĭ rơđah ten ñen tui hăng tơlơi iâu laĭ pơhmutu anai: “Bơni kơ Khua Yang yua tơlơi Ih pha brơi kơ kâo. Rơkâo Ih djru kâo nanao tui hơduah Ih laih anŭn dŏ tơguan hrơi mông Ih kiăng djru kâo găn hĭ tơlơi truh anai.”

Gah yŭ anai jing biă mơta tơlơi ƀing ta kiăng ngă pơdah tơlơi hơin kơnang ƀơi hơdră jơlan hiam klă Khua Yang dưm dăp kơ ƀing ta:

Pơmĭn glaĭ kơ tơhnal yua hơgĕt Khua Yang brơi ih bưp tơlơi truh anŭn laih anŭn hơin kơnang Ñu jing Pô nanao dŏ hơbĭt hăng ih hăng pơplih abih bang tui hăng tơlơi kiăng hiam klă Ñu.
Hơduah sa čô gơyut amăng tơlơi đaŏ kiăng hrŏm hơbĭt iâu laĭ laih anŭn pơtrut đur tơdruă.
Đŏk Boh Pơhiăp Khua Yang laĭ nao kơ gru ƀing mơnuih gir dŏ tơguan Khua Yang laih anŭn lu ƀing đaŏ pơkŏn ha abih pran jua tơguan Khua Yang. Lăng hăng hla tui Khua Yang Yêsu.

Sĭt yơh Boh Pơhiăp Khua Yang amăng Tơlơi Adoh Hơđăp 138:8 ba glaĭ tơlơi pơđĭ ai hăng alum kơ hlơi pô tơguan Khua Yang: “Yêhôwa či ngă pơgiơ̆ng abih bang bruă lơ̆m kơ kâo. Ơ Yêhôwa, tơlơi khăp Ih dŏ nanao hlŏng lar; Anăm lui hĭ ôh bruă tơngan Ih ngă!”

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih hmâo hơdră hiam klă kơ kâo tui hăng hrơi mông Ih. Kâo đaŏ Ih hmâo tơlơi kơñăm hiam klă brơi kơ kâo găn khul tơlơi hlăk truh amăng tơlơi hơdip kâo. Rơkâo Khua Yang atăt kâo, pha brơi kơ kâo tơlơi kơhnâo laih anŭn djru kâo pơmĭn kơčăng răng hlâo kơ khưp ư. Rơkâo Khua Yang nanao djru kâo kơjăp pran jua đaŏ kơnang kơ Ih laih anŭn dŏ tơguan tơlơi Ih hmâo ƀuăn laih hăng kâo. Kâo iâu laĭ hăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, tui hơduah Khua Yang laih anŭn kơnang kơ Ñu thĭm brơi pran kơtang kiăng kơ ih dưi kơjăp pran jua đaŏ kơnang kơ hrơi mông hiam klă Ñu. Khua Yang či djru ih por glông kar hăng čim sing laih anŭn ngă lu mơta tơlơi prŏng yom tui hăng tơlơi ih čang rơmang. Pioh bĕ hrơi mông dŏ hơjăn hăng Khua Yang, pơmĭn Boh Pơhiăp Ñu laih anŭn jao abih bang tơlơi gleh tơnap ih đĭ kơ Khua Yang. Ih dưi pơhaih hăng sa čô gơyut amăng tơlơi đaŏ kiăng kơ gơñu iâu laĭ pơala brơi kơ ih amăng hrơi mông dŏ tơguan Khua Yang laĭ glaĭ.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.