Lơ 30/11/2023: TƠLƠI PAP JAI THIM DƠ̆NG

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi
Sa čô mơnuih đĭ čư̆ či hluh hơdôm tơlơi găn prŏng ñu či bưp laih anŭn khŏm găn rơgao abih bang tơlơi anŭn hiưm pă. Jơlan rơbat tui Khua Yang ƀing ta ăt kar hăng mơnuih đĭ čư̆ či bưp hơdôm tơlơi gleh tơnap hiưm pă. Ƀu kơnang kơ pran kơtang ta pô samơ̆ kơnang ƀơi Khua Yang Yêsu Krist jing Pô djru ƀing ta dưi hĭ, laih anŭn pha brơi tơlơi rơnuk rơnua kơ ƀing ta. Ơi Adai nanao atat čông laih anŭn djru ƀing ta amăng jơlan rơbat tui Ñu

Hrơi anai, lơ 30/11/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Brenda Williams tui hăng akŏ tơlơi hrăm TƠLƠI PAP JAI THIM DƠ̆NG

“samơ̆ Ñu laĭ: “Tơlơi pap Kâo djŏp laih kơ ih, yua kơ tơlơi dưi kơtang Kâo dưi jing tum klă amăng tơlơi tơdu ih.” (2 Kôrantô 12:9)

Hơmâo đơđa kâo bưp tơlơi lông lăng truh gao hloh kơ pran kâo dưi tŭ mă. Kâo kơnơ̆ng hia hăng Khua Yang. Mông anŭn, kâo đaŏ sĭt Khua Yang či nao hrŏm hơbit hăng kâo laih anŭn djru kâo dưi găn rơgao hĭ. Mơyun hiam biă mă tơdang kâo dưi rơbat hrŏm hơbit Khua Yang.

Kâo hơmâo mưn găn hơdôm tơlơi lông lăng amăng tơlơi hơdip kar hăng bruă khŏm găn rơgao hơdôm akŏ čư̆ glông. Samơ̆ Ơi Adai ƀuăn, Ñu či atat čông, či djru laih anŭn či pha brơi ƀing ta tơlơi kơhnâo kar hăng Boh Pơhiăp Khua Yang hơmâo čih amăng hră Tơlơi Adoh Hơđăp 37:23, 51:6. Khua Yang ăt pha brơi ƀing ta pran jua khĭn kơtang kiăng kơ dưi rơbat nao pơ anăp (Yôsuê 1:9).

Gơyŭt kâo ƀing gơñu hơmâo găn tơlơi hrăm kiăng kơ đĭ čư̆. Phrâo anai, ƀing gơñu rơbat 8km ƀơi jơlan hăng akŏ kơdư. Ƀing gơñu hơmâo găn nao khul glai klô hơmâo lu boh pơtâo prŏng. Ƀing gơñu rơbat tui jơlan anĕt arăng juăt rơbat. Tui anŭn ƀing gơñu khŏm gir biă mă kiăng kơ dưi rơbat pơgiơ̆ng hĭ jơlan ñu. Amăng abih jơlan rơbat, ƀing gơñu yua Boh Pơhiăp Khua Yang amăng Hră I Pêtrôs 5:7 kiăng kơ pơalum tơdruă laih anŭn thâo krăn Ơi Adai nanao dŏ hrŏm hăng ƀing gơñu.

Sĭt yơh, jơlan rơbat tơnap tap tơdang đĭ čư ăt kar hăng tơlơi tơnap tap ƀing ta bưp amăng tơlơi hơdip. Samơ̆, tơdang bưp tơlơi lông lăng ƀing ta juăt weh hĭ jơlan pơkŏn, jơlan ƀing ta ƀu thâo pơ anăp hiưm pă. Anăm yua pran kơtang ta pô ôh, samơ̆ đaŏ kơnang bĕ kơ Khua Yang Yêsu Krist jing Pô djru ƀing ta dưi hĭ, laih anŭn pha brơi ƀing ta tơlơi rơnuk rơnua.

Gơyŭt kâo ruai glaĭ, amăng abih jơlan đĭ čư̆, hơmâo mơ̆n boh pơtâo ƀing ta dưi păn ƀơi ñu kiăng kơ dưi đĭ glông hloh. Khul boh pơtâo prŏng jing anih ñu kơnang laih anŭn djru gơñu đĭ čư̆. Ăt kar hăng anŭn mơ̆n, Ơi Adai nanao atat čông laih anŭn djru ƀing ta amăng jơlan rơbat tui Ñu.

Tui anŭn, ƀing ta khŏm đaŏ kơnang kơ Khua Yang kar hăng Boh Pơhiăp Khua Yang hơmâo čih amăng hră Sakari 4:6 “Tơlơi anŭn ƀu djơ̆ yua mơ̆ng tơlơi dưi ôh, ăt ƀu djơ̆ yua mơ̆ng tơlơi kơtang lơi, samơ̆ yua mơ̆ng Yang Bơngăt Kâo yơh”.

Khua Yang jing Pô pha brơi pran kơtang laih anŭn tơlơi pap prŏng prĭn kơ ƀing ta kar hăng Boh Pơhiăp Khua Yang hơmâo čih amăng Hră II Kôrantô 12:9 “samơ̆ Ñu laĭ: “Tơlơi pap Kâo djŏp laih kơ ih, yua kơ tơlơi dưi kơtang Kâo dưi jing tum klă amăng tơlơi tơdu ih.” Yua kơ anŭn yơh kâo hơ̆k mơak biă mă pơ-ư kâo pô kơ khul tơlơi tơdu kâo, kiăng kơ tơlơi dưi kơtang Yang Krist dưi dŏ amăng kâo”.

“Ơ čư̆ prŏng anŭn hơi, hlơi ih jing? Ƀơi anăp Sôrôbabel, ih či jing hĭ lŏn daŏ yơh. Ñu či ba tơbiă boh pơtâo atur sang amăng tơ̆ng krah asăp ur drao: ‘Mơyun hiam đơi! Mơyun hiam đơi!” (Sakari 4:7)

Ƀing ta ƀuh amăng jơlan anai boh hră “Mơyun hiam đơi!” hơmâo lŏk glaĭ dua wơ̆t. Dŏ amăng Khua Yang ƀing ta tŭ mă tơlơi mơyun hiam prŏng prĭn. Boh Pơhiăp Khua Yang amăng hră Yôhan 1:16 hơmâo čih: “Laih anŭn mơ̆ng tơlơi pap rơbeh blai Ñu, abih bang ƀing ta hmâo mă tŭ laih tơlơi pap thim kơ tơlơi pap”.

Tơlơi pap anŭn jing pran jua pap drap Ơi Adai hơmâo pha brơi kơ ƀing ta. Tơlơi pap anŭn jing bruă mơyang Ơi Adai ngă brơi ƀơi tơlơi hơdip ƀing ta. Tui anŭn, tơdang iâu lăi hăng tơlơi đaŏ laih anŭn kơnang kơ Khua Yang, Ñu či ngă abih bang tơlơi ƀing ta ƀu dưi ngă ôh. Tơlơi pap Khua Yang tuh rai bŏ blai amăng ƀing ta, djru ƀing ta hơmâo tơlơi khĭn kơtang rơbat nao pơ anăp găn rơgao hơdôm akŏ čư̆ glông laih anŭn dưi hĭ khul tơlơi găn amăng jơlan ƀing ta rơbat tui Khua Yang.

Bơni kơ Khua Yang yua kơ Boh Pơhiăp Ñu amăng hră Luk 3:5 hơmâo pơđur alum ƀing ta jing ƀing đaŏ kơnang kơ Ñu: “Abih bang đŭng klŭng khŏm pơbă hĭ, Abih bang čư̆ hăng bol čư̆ khŏm ngă mơdơ̆ hĭ, Jơlan wĕ wŏ khŏm ngă tơpă glaĭ, Jơlan klŭng hŭp khŏm jing lŏn daŏ”. Sĭt yơh, Ñu jing Pô ƀing ta kơnang, jing pran kơtang kơ ƀing ta, jing Pô pŏk jơlan brơi kơ ƀing ta.

Rơkâo ƀing ta pioh mông iâu laĭ hrŏm hơbĭt

Bơni kơ Khua Yang Yua kơ Ih hơmâo pha brơi tơlơi pap prŏng prĭn ƀơi tơlơi hơdip kâo. Bơni kơ Khua Yang wơt dah bưp tơlơi hơdip hiam klă ƀôdah bưp tơlơi hơdip tơnap tap, Ih ăt jing Pô nanao dŏ hrŏm laih anŭn pha brơi pran kơtang kơ kâo kiăng kơ dưi hĭ. Rơkâo Khua Yang djru kâo đaŏ kơnang kơ Ih yua kơ Ih jing anih kâo kơnang, jing pran kơtang kơ kâo laih anŭn Pô pŏk jơlan brơi kơ kâo. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, đaŏ kơnang laih anŭn rơbat tui bĕ Khua Yang, wơt dah ih aka ƀu thâo ôh jơlan pơ anăp ih hlưm pă. Kơnang bĕ ƀơi Khua Yang jing Pô pha brơi tơlơi pap prŏng prĭn amăng tơlơi hơdip ih. Wơt dah amăng tơlơi hơdip hơmâo lu akŏ čư̆ ƀing ta khŏm găn rơgao, samơ̆ angak akŏ laih anŭn lăng nao bĕ kơ Khua Yang jing Pô dưi ngă pơpư̆ khul čư̆ laih anŭn jing phŭn tơlơi kơtang kơ ƀing ta.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.