Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Koj puas tab tom muaj kev zoo siab nyob hauv Vajtswv, lossis koj yeej tseem tabtom tawm tsam nrog tej kev txomnyem ntawm tus kheej? Txawm yog cov neeg uas muaj zog tshaj plaws los kuj muaj lub sijhawm qaug zog, tag kev cia siab. Txog rau thaum uas koj qhib koj lub siab puas ntsoog rau ntawm Vajtswv, peb thiaj yuav txais tau txoj kev zoo siab thiab lub neej puv ntoob tiag nyob hauv Nws.
Hnub no, yog hnub 04/02/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Martha Noebel dhau ntawm Zaj kawm UA LUB NEEJ PUV NTOOB TOM QAB LUB SIJHAWM PUAS NTSOOG
“Thov Vajtswv tus uas nej cia siab rau, pub nej muaj kev zoo siab thiab nyob kaj siab lug, Vaj Ntsujplig tus Dawbhuv lub hwjchim yuav pab kom nej muaj kev cia siab rau Vajtswv heev zuj zus.” (Loos 15:13)
Muaj ib zaug kuv hnov Xibhwb James Robinson ua tim khawv qhia txog yawg lub neej. Yawg hais txog yawg lub sijhawm txomnyem nyob rau yav dhau los, vim yawg niam yawg txiv yog tus tsis hwm Vajtswv. Nkawd tu yawg lub neej thaum me nyuam yaus zoo li ntuj tawg. Tiamsis ua Vajtswv tsaug, tom qab ntawd, yawg ntsib ib khub niam txiv ntseeg Vajtswv lees tu thiab coj yawg los ntseeg Vajtswv.
Yawg ua tim khawv ntxiv tias thaum yawg pib ua xibhwb, yawg lub neej puv npo txoj kev chim, ntxhov siab thiab txoj kev ntshaw tib si. Txog rau thaum uas yawg lub siab yuav tsum tau lwj puas ntsoog ntawm Vajtswv xub ntiag, yawg pib nrhiav pom txoj kev cia siab tiag rau tsev neeg thiab nws tes haujlwm.
Kuv xav tsis thoob thaum uas hnov yawg ua tim khawv txog tej no: Kev ntshaw ua nkauj nraug? Ib tug xibhwb zoo li no kuj raug ntxeev ntxias los ntawm txoj kev ntshaw ua hluas, thiab ntau zaug tseem muaj siab xav muab tus kheej tua pov tseg? Vim li cas tej ntawd ho tshwmsim tuaj? Tas kuv rov qab nco txog tus tub xa moo zoo nto npe lug kuj ntsib yeebncuab lub tswv yim no. Kuv pom tias yeej tsis yooj yim li thaum uas yus yog tus nyob nruab nrab ntawm sawv daws. Lub nra nyhav heev thaum qhuab qhia rau cov ntseeg, haujlwm ntau, mus tsis so, tag nrho puav leej yog kev sim siab rau tus neeg ua Vajtswv haujlwm.
Tom qab ntawd kuv cim civ nug tias yam dabtsi tau ua rau yawg muaj kev zoo siab ua neej. Tib neeg txoj kev qaug zog thiab tus kheej sab nqaij tawv tau tav yawg kev saj tsis tau txoj kev ywj pheej tiag nyob hauv Yexus Khetos. Txhob nkag siab yuam kev, yawg yog ib tug hwm Vajtswv. Yog Vajtswv ib tug tub qhe tab tom ua Vajtswv haujlwm. Tiamsis yawg kuj tab tom ntsib tej teeb meem uas yawg daws tsis tau tsuas yog Vajtswv xwb thiaj yuav pab tau. Yawg tau kov yeej thaum yawg txo yawg lub hwjchim los txais yuav txoj kev hlub thiab lub siab hlub tshua uas Vajtswv pub rau yawg.
Yeej tsis muaj leej twg xav poob rau txoj kev puas tsuaj, tiamsis yog tsis vam khom Vajtswv, peb yuav yooj yim ntog. Peb yuav tau nco ntsoov tias peb yog leej twg. Peb tsuas yog cov neeg qaug zog, yog li yuav tau tuav rawv Yexus Khetos yog tus uas yuav rub peb tes nce.
Thaum kawg, cia Vajtswv txojlus nyob hauv Loos 15:13 txhawb peb zog tias:
“Thov Vajtswv tus uas nej cia siab rau, pub nej muaj kev zoo siab thiab nyob kaj siab lug, Vaj Ntsujplig tus Dawbhuv lub hwjchim yuav pab kom nej muaj kev cia siab rau Vajtswv heev zuj zus.”
Thov caw nrog kuv peb thov Vajtswv ua ke
Tus Tswv ntau zaug lub neej no muaj ntau yam ua rau kuv tsis muaj kev zoo siab tiag, hnov qab tias Vajtswv tus uas niaj hnub tiv thaiv saib xyuas kuv. Kuv thov muab kuv lub neej puas tsuaj fij rau koj, thov Vajtswv koj hlub kuv, rub kuv tes, pub rau kuv saj tau txoj kev zoo siab tiag nyob hauv koj. Kuv thov hauv Tswv Yexus Khetos lub npe. Amees.
Cov kwv tij txhua tus, koj puas tab tom saj tau txoj kev zoo siab tiag nyob hauv Vajtswv, lossis koj tseem tab tom tig mus tig los ntawm tej teeb meem ntawm koj tus kheej? Thov kom peb mloog Vajtswv lus los ntawm lub siab puas ntsoog kom txais tau txoj kev kaj siab tiag nyob hauv Nws. Thov kom peb lub neej dhau los ua tus qauv ci Yexus Khetos tus duab thiab Nws txoj kev hlub. Cia siab tias peb yuav tuav rawv lub homphiaj kom ua tiav kuv txoj kev sib tw, thiab tuav rawv tus Cawm Seej txoj kev hlub.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply