Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Tag kev cia siab tsis tau muaj ib zaum twg yog yam uas yooj yim txais yuav li. Tej zaug peb yuav tag kev cia siab thaum uas lwm tus lawv tsis ua raws li lawv tej lus cog tseg. Tej zaug peb kuj tag kev cia siab thaum uas lub caijnyoog tsis tshwmsim raws li peb lub siab xav. Tiamsis, peb yuav tsis muaj hnub saj tau txoj kev tag kev cia siab thaum peb paub vam khom rau ntawm Vajtswv. Vim Vajtswv yog tus ncaj ncees yuav tsis muaj hnub hnov qab Nws tej lus cog tseg yuav cawm peb lub neej.
Hnub no, yog hnub 05/03/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Wally Odum dhau ntawm Zaj kawm VAJTSWV TSIS MUAJ IB ZAUG TSIS NCAJ NCEES
“Thaum koj tas kev cia siab, mob koj siab kawg li, tiamsis thaum tau kiag lawm ua rau koj zoo siab kawg” (Pajlug 13:12).
Koj puas tau muaj zaum twg tag kev cia siab loj lawm tau? Thaum uas muaj neeg tsis ua raws li koj txoj kev ntshaw lossis lub caijnyoog tsis tshwmsim raws li koj xav? Muaj ib tug pojniam muaj hnub nyoog laus lawm nyob hauv tsev ib leeg tau hu rau tub ceev xwm qhia paub tias muaj ib tug mab tsw txhiab tab tom nyob hauv nws tsev. Tub ceev xwm yuam kom pog tso ib co ncuav hauv tsev mus rau nraum zoov kom ntxias tus mab tawm mus. Tau ib pliag, pog rov hu thiab hais tias: “Kuv twb ua raws li koj qhia. Thaum no ho muaj ob tug mab tsw txhiab nyob hauv tsev!”
Tej zaug peb txhua tus puav leej saj tau qhov tseeb nyob hauv Pajlug 13:12: “Thaum koj tas kev cia siab, mob koj siab kawg li, tiamsis thaum tau kiag lawm ua rau koj zoo siab kawg” Txog txoj kev tag kev cia siab tej zaug yuav cuam tshuam txog txhua feem hauv peb lub neej. Tus tub txawg sab kev txijnkawm Jimmy Evans hais tias yav dhau los muaj peb yam ua rau tej txijnkawm sib nrauj: Nyiaj txiag, kev pw ua niam txiv thiab hwjchim (lossis xav ua tus tswj). Tiamsis thaum no qhov uas ua rau tib neeg sib nrauj tsis yog los ntawm peb yam ntawd lawm, tiamsis yog txoj kev tag kev cia siab. “Tseeb tiag koj zoo tsis thooj li kuv xav”.
Ib nyob hauv tej yam ua rau tag kev cia siab yog tej lo lus cog tsis ua raws li ntawd. Muaj ib tug coj kev hu nkauj nws txhawj heev rau txoj kev xyaum nkauj rau Pawg Ntseeg lub koob tsheej Tswv Yexus yug. Vim thaum twg los twb muaj ib ob tug nyob hauv pab ntaus suab tsis tuaj txhua zaum uas xyaum. Txog rau zaum kawg, tus coj hais tias: “Kuv thov ua tsaug rau tus ntaus Piano vim nws tib leeg yog tus uas muaj ntsej muag txhua zaug nyob rau ob hlis dhau los.” Tamsim ntawd, tus ntaus suab piano sawv tseev, nyo hau thiab hais tias: “Tsawg kawg kuv yuav tau ua qhov ntawd, vim hmo no kuv yuav tuaj koom tsis tau.”
Txoj kev tag kev cia siab tsis yog tsuas yog los ntawm lwm tus xwb. Ntau zaug lub caijnyoog peb tswj tsis tau kuj ua rau peb ntshai thiab tag kev cia siab. Kuv twb ntsib dhau qhov ntawd, yog zaum uas kuv tag kev cia siab tshaj plaws hauv lub neej.
Kuv txiv mob ung thư pob txha. Nws tiv tus mob tau ob xyoo. Nyob rau txiv xyoo kawg, peb tseem npaj siab tias yuav mus saib kuv tus niam laus. Kuv kub siab lug nrog txiv mus. hli plaub xyoo dhau los, txiv yeej tseem mob. Peb koom mus ua ke rau tom chaw tàu khiav, npaj hom phiaj rau txoj kev yuav mus rau thaum lub yim hli. Tiamsis thaum txog yim hli, kuv txiv tag sim neej. Kuv tsis yog nyuaj siab vim txiv tuag xwb tiamsis tseem tag kev cia siab vim kuv ua poob lub sijhawm zoo kom ua tiav txiv txoj kev ntshaw nyob ntawm txiv ib sab. Paub tias qhov no tsis yog tim txiv. Lub caijnyoog nws txomnyem heev rau txiv lawm.
Tag kev cia siab yog ib qhov teeb meem loj, tej zaug yuav ua rau peb tej kev xav tsis yog txog lub neej thiab ntau zaug tseem ua cuam tshuam rau peb txoj kev saib ntsoov rau Vajtswv.
Jimmy Harris hais tias: “Tus neeg ua xyem xyav tsis yog tus uas nws tsuas ntsib dhau tej kev iab siab yav dhau los tiamsis tseem ceeb yog tus neeg uas yooj yim tsis ntseeg siab rau lub neej tom ntej.”
Muaj ntau tus tib neeg cia rau txoj kev tag kev cia siab ua yuam lawv txoj kev ntsia rau Vajtswv. Lawv xav tias Vajtswv kuj zoo li tib neeg, Vajtswv tsis ua raws li Vajtswv tej lus cog tseg thiab tswj tsis tau txhua yam. Tiamsis zoo kawg nkaus, Vajtswv yog tus ncaj ncees. Kuv tau txhawb zog los ntawm Paulus thaum nws hais rau cov neeg Kauleethaus: “Vajtswv yog tus ncaj ncees; Vajtswv thiaj hu nej los nrog nws tus Tub Yexus Khetos uas yog peb tus Tswv sib nraug zoo” (1 Kauleethaus 1:9).
Thaum kuv ntsib kuv txoj kev qaug zog txawm yog kuv tus kheej ua tsis tau dabtsi lossis ua tsis dabtsi rau lub caijnyoog los kuv tau txhawb zog thaum kuv paub tias kuv lub neej nyob hauv Vajtswv txhais tes.
Txawm li los qhov ntawd tsis tau txhais tias kuv yeej yuav tsis mag ris lub nra. Kuv yeej yuav ris. Tiamsis qhov ntawd muaj lub ntsiab tias kuv loj hlob hauv txoj kev ntseeg siab thiab mloog lus thaum uas kuv saj tau Vajtswv txoj kev ncaj ncees nrog nraim kuv nyob.
Ib yam li tus sau Ntawv Nkauj tau hais: “Nws yuav nthuav hlo nws ob phabtis los roos koj , nws yuav tsomkwm koj, koj yuav nyob tso siab plhuav; nws txojkev ncaj ncees yuav tsomkwm thiab tiv thaiv koj” (Ntawv Nkauj 91:4).
Thaum kuv nkag siab Vajtswv txoj kev ncaj ncees, kuv yuav tiv taus txhua lub caijnyoog ua rau kuv tag kev cia siab yav dhau los. kuv ntseeg siab rau Vajtswv tej lus cog tseg, thiab muab kuv lub neej tom ntej fij rau Vajtswv.
Mauxes twb hais qhia qhov no rau cov neeg Yixalayees los lawm ntev: “Vajtswv tsis zoo li tej neeg uas pheej hais lus dag; Nws tsis yog tus uas pheej yuav hloov siab Nws coglus li cas, nws yeej ua li ntawd; nws hais li cas, yeej muaj li nws hais (Teev Npe 23:19).
Yog Vajtswv hais yam dabtsi ces Vajtswv tus yamntxwv kuj nyob tom qab thiab ntag. Vajtswv yog tus tswj txhua lub caijnyoog thiab Vajtswv tsis muaj ib zaum hais tias: “Kuv tsis muaj ib zaum twg xav tias qhov ntawd yuav tshwmsim los”. Vajtswv tsis yog tsuas xav ua kom muaj raws li Vajtswv tej lus xwb, tiamsis Vajtswv tseem muaj txaus hwjchim los ua tiav raws li Vajtswv tej lus.
Vajtswv tej lus cog tseg rau peb nws loj dua peb tej kev xav ntau npaug. Tus tub txawg Fred Smith tau sau txog ib qhov uas nws tau ntsib dhau pab kom peb nkag siab qhov no. Yawg sau: “Ib yam muaj nqis uas kuv nco ntsoov yog los ntawm ib lub chaw muag ncuav nthee. Kuv zaum ze ntawm ib nkawm niam txiv hluas. Tom qab nkawd noj nkawd lub ncuav tas tus txiv sawv mus them nyiaj, thiab kuv pom tias nws tus pojniam tsis sawv caum nws qab.
“tiamsis tus txiv rov qab los thiab sawv ntawm tus niam xub ntiag. Tus niam cev tes muag puag tus txiv xub pwg, tus txiv nqa tus pojniam sawv, nthuav qhia tias nws tab tom raug pas khi tag nrho tus niam lub cev. Nws tsaws nws pojniam tawm hauv lub rooj zaum tawm hauv tsheb los. thiab thaum uas tus txiv maj mam muab tus niam tso rov rau hauv tsheb, sawv daws nyob ntawd puav leej ua twjywm ntsiag to saib. Txog rau thaum muaj ib tug ua haujlwm hauv chaw muag khoom hais los ntawm lub suab hwm taus: “Tus txiv no nws saib nws tej lus cog tseg tseem ceeb heev”.
Vajtswv saib taus Vajtswv tej lus cog tseg. Paulus tau sau rau Timautes tias: “Txawm yog peb tsis ua ncaj los nws tseem ua ncaj , rau qhov nws tsis rov dag nws ib zaug li.” (2 Timautes 2:13). Thaum kuv qaug zog, thiab thaum kuv txoj kev ntseeg tsuag, Vajtswv yeej ncaj ncees. Koj thiab kuv muaj cuab kav pheeb rau qhov tseeb zoo kawg nkaus ntawm no.
Thov caw nrog kuv peb thov Vajtswv ua ke.
Tus Tswv, lub neej no muaj ntau zaug ua rau kuv tag kev cia siab. Tiamsis ua Vajtswv tsaug vim Vajtswv yog tus ncaj ncees. Vajtswv ua raws li Vajtswv tej lus tau cog tseg rau kuv thiab tsis muaj ib hnub yuav tso kuv tseg. thov Vajtswv pab kom kuv tiv dhau txoj kev tag kev cia siab thiab saib ntsoov tej koob hmoov uas Vajtswv tau muab pub rau kuv. Thov Vajtswv pub kom kuv muaj kev cia siab thiab ntseeg siab rau Vajtswv tej lus cog tseg tsis hloov pauv. Kuv thov hauv Tswv Yexus Khetos lub npe. Amees.
Cov kwv tij txhua tus, nco ntsoov tias txawm yog lub neej no yuav muaj ntau yam tag kev cia siab los, Vajtswv yeej ua raws li Vajtswv tej lus cog tseg thiab yuav tsis tso peb tseg ib zaug li. Ntseeg siab rau Vajtswv tej lus cog tseg thiab ua lub neej raws li Vajtswv lub siab nyiam. Thov Vajtswv pub rau peb kom muaj lub zog, muaj kev zoo siab thiab muaj kev kaj siab hauv txhua lub caijnyoog kom peb ruaj khov rau Vajtswv tej lus cog tseg.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply