Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Ua Vajtswv tsaug vim peb muaj txoj koob hmoov loj tshaj yog tau paub Vajtswv, nyob hauv Vajtswv txoj kev tshwm ntsej muag nrog nraim peb thiab zoo siab txais yuav Vajtswv txoj kev hlub. Txawm li los, thaum peb ntsib ntau yam nyob hauv lub neej, ntau zaug ua rau peb hnov qab tej no lawm. Nyob rau lub caijnyoog ib xyoo tshiab tom ntej, peb yuav tau tseg lub sijhawm no los tshuaj saib yus lub neej.
Hnub no, yog hnub 08/01/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gordon Robertson dhau ntawm Zaj kawm UA NEEJ MUAJ VAJTSWV NYOB NROG NRAIM
“Kuv tsuas thov tus Tswv pub ib yam rau kuv xwb, yam uas kuv xav yuav, yog kuv xav nyob hauv tus Tswv lub tsev mus tas kuv simneej, kuv xav tsis thoob rau tej uas nws ua zoo, thiab kuv yuav thov nws ua tus coj kuv txoj haukev”(Ntawv Nkauj 27:4)
Ua ntej peb yuav tau tig peb lub siab mus rau ntawm Vajtswv kom muaj lub siab mos muag thiab nyob ze Vajtswv. Cia li thov Vaj Ntsujplig tshuaj peb lub siab thiab pab peb tshem tej yam uas tawv nyob hauv peb lub siab mus. Tsis paub puas muaj neeg ua rau koj muaj kev tu siab? Puas yog koj tab tom ua kev txhaum? Tej no ua rau koj lub siab tawv thiab rhuav tshem koj txoj kev sib raug zoo nrog tus muaj hwjchim loj kawg nkaus. Cia li mus nyob ze Vajtswv kom koj tau Vajtswv zam txim thiab ntxuav txhua txoj kev txhaum thiab kho zoo txhua txoj kev tu siab nyob hauv koj lub siab. Thaum peb ntshaw thiab nrhiav Vajtswv txoj kev ncaj ncees, Vajtswv lub siab nyiam yuav dhau los ua peb lub siab nyiam.
Ib yam li Daviv tau hais nyob hauv Ntawv Nkauj 27:4 sau tias:
“Kuv tsuas thov tus Tswv pub ib yam rau kuv xwb, yam uas kuv xav yuav, yog kuv xav nyob hauv tus Tswv lub tsev mus tas kuv simneej, kuv xav tsis thoob rau tej uas nws ua zoo, thiab kuv yuav thov nws ua tus coj kuv txoj haukev”
Raws li nqe Vajluskub no, Vajtswv txojlus ntuas kom peb yuav tau nrhiav Vajtswv. Thov Vajtswv pab peb kom peb puv npo Vaj Ntsujplig, nyob hauv Vajtswv txoj kev tshwm ntsej muag thiab tau Vajtswv ci Vajtswv qhov pom kev rau peb. Yog li peb yuav tau tswj peb lub siab ua Vajtswv lub tuam tsev.
Nyob hauv cov neeg Yudais lub tuam tsev, lawv yuav tau ua tej kevcai theej txhoj thiab muab cov ntshav tsiaj ntawd coj mus ywg rau saum lub thaj kom thiaj npog tau tib neeg tej kev txhaum. Tswv Yexus ua tag nrho tej ntawd pub rau peb lawm. Yog li tamsim no, Vajtswv xav kom peb fij dab tsi? Vajtswv tos ntsoov peb lub siab thiab peb lo lus qhuas.
Yuav ua li cas peb thiaj yuav ua tau li ntawd? Peb yuav tau qhuas thiab txhawb nqa Vajtswv yuav tau ceev faj nyob hauv peb lo lus hais. Vim tej zaug peb ho yuav siv peb lub qhov ncauj los foom hmoov lossis foom phem rau lwm tus, lossis ua rau lwm tus ciaj lossis tuag. Yog li, Tswv Yexus hais txog yam uas yuav ua rau peb tsis huv li no:
“Tej uas tawm ntawm lub ncauj puav leej yog pib hauv lub siab, tej ntawd thiaj yog tej ua rau tib neeg tsis huv.”
Ntawm no yog yam uas peb yuav ua tawm nyob rau hauv peb txoj kev ua neej.
Yog li, peb yuav tau cim civ nug peb tus kheej tias tsis paub peb puas nthuav tawm txoj kev cia siab, kev zoo siab, kev ncaj ncees thiab kev kaj siab nyob rau hauv lub neej no? Lossis peb nthuav tawm txoj kev txhawj, kev nyuaj siab thiab kev nroo li ub li no? Tej no yog tej uas los hauv peb lub siab los. Yog li, yog tias peb lub siab ntim puv nkaus tej yam zoo ces peb yuav nthuav tawm tej yam zoo. Vajntxwv Daviv tau thov Vajtswv li no nyob hauv Ntawv Nkauj 19:14 tias:
“Tus Tswv, koj yog kuv qhov chaw nkaum thiab yog kuv tus cawmseej , thov kom tej Ius kuv hais thiab tej uas kuv xav haum koj siab.”
Yog peb mloog Vajtswv lus, mloog Vajtswv lub suab thiab ua yam haum Vajtswv siab ces peb yuav yog cov ntsev thiab lub teeb ci rau tej neeg nyob ib ncig peb. Yog li, hla mus rau xyoo tshiab no, peb yuav tau txo hwjchim, nrhiav kev zam txim thiab hloov pauv dua tshiab nyob hauv Vajtswv. Vajtswv yog tus pub tej lus cog tseg no rau tus neeg uas yog Vajtswv menyuam nyob hauv Ntawv Nkauj 23:6
“Kuv paub hais tias koj yog tus zoo tshaj plaws thiab hlub kuv mus tas kuv tiam neej, thiab kuv yuav nyob hauv tus Tswv lub tsev mus tas kuv lub neej.”
Thov caw nrog kuv peb thov Vajtswv ua ke.
Ua Vajtswv tsaug Vajtswv koj pub rau peb muaj cai tau ua Vajtswv menyuam, nyob hauv Vajtswv kev tshwm ntsej muag thiab zoo siab txais yuav Vajtswv koj txoj kev hlub. Yog nyob hauv kuv lub siab tseem tshuav yam dabtsi tsis haum Vajtswv koj siab thov Tswv Yexus cov ntshav ntxuav kom huv thiab hloov pauv kuv lub siab. Thov Vajtswv pab kom kuv npaj kuv lub siab thiab nrhiav kom pom yam tshiab yam zoo nyob rau hauv txoj kev sib raug zoo ua ke nrog Vajtswv nyob rau hauv lub xyoo tshiab no. Kuv thov hauv Tswv Yexus Khetos lub npe. Amees.
Cov kwv tij txhua tus, thov kom nej ntshaw Vajtswv txoj kev ncaj ncees thiab cia siab kom tau nyob hauv Vajtswv txoj kev tshwm ntsej muag. Vajtswv xav kom peb muab peb lub qhov ncauj thiab peb lub neej ua rau kom Vajtswv tau koob meej. Tseg sijhawm mus nyob ze Vajtswv, tshuaj peb lub neej thiab npaj txhij nthuav tawm peb txoj kev cia siab, kev zoo siab, kev ncaj ncees thiab kev kaj siab rau tej neeg ib ncig!
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply