Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Koj ntshaw thiab tos yam dabtsi tshaj nyob hauv koj lub neej? Tej zaug lo lus teb yuav nyob txij ntawm lub sijhawm thiab lub caijnyoog sib txawv, nyob txij ntawm tej kev cheem tsum uas tshwm tuaj. Thaum mus kawm ntawv peb tshaw kom yus xeem tau rau hauv tej tsev kawm ntawv qib siab nto npe lug. Thaum mus ua haujlwm ces xav kom tau txoj haujlwm tau nyiaj hli siab. Tshuav kev cheem tsum ntawm sab ntsujplig zoo li cas? Tsis paub puas muaj leej twg lossis ib yam dabtsi twg nws yuav txhawm tau peb txoj kev ntshaw?
Hnub no, yog hnub 10/12/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Martha Noebe dhau ntawm Zaj kawm VAJTSWV YOG KUV TXHUA TXOJ KEV CHEEM TSUM
“Kuv tuaj deb deb tshwm rau lawv porn. Cov Yixalayees, kuv yeej ibtxwm hlub nej, kuv yuav hlub nej mus ibtxhis.” (Yelemis 31:3)
Muaj ib tag kis sawv ntxov, kuv haus ib taub dej qab zib txias pib ib hnub tshiab mus. Ntuj kub thiab lub tshuab cua txias tseem tsis tau ua haujlwm yog li kuv thiaj mus rau ntawm qhov chaw muag dej yuav hom dej uas kuv nyiam. Kuv hnov zoo siab heev thaum uas kuv tau haus taub dej uas kuv nyiam kom daws txoj kev kub ntawd. Txawm yog thaum nyuam qhuav haus taub dej ua rau kuv txaus siab los taub dej ntawd kuj daws tsis tau kuv txoj kev nqhis thiab txoj kev tshav kub.
Kuv hnov twg twg lub suab hu nkauj tias: “Koj yog lub zog rau kuv pheeb/ koj yog qhov khoom muaj nqis uas kuv nrhiav/ koj yog kuv qhov kev cheem tsum”. Lub suab nkauj ntawd ua rau kuv xav nyob ze Vajtswv hauv Vajtswv kev tshwm ntsej muag. Lub sijhawm ntawd, kuv sab nqaij tawv xav haus taub dej ntawd daws kuv txoj kev nqhis tiamsis sab ntsujplig kuv xav kom tau ntau tshaj. Kuv tsuas xav kom tamsim ntawd muaj sijhawm pub rau Vajtswv.
Ntau zaug kuv xav kom ntsia pom Vajtswv, xav paub Vajtswv ntau dua. Kuv xav nyob ze Vajtswv. Thaum lub ntsiab lus ntawm zaj nkauj nws chwv txog kuv lub siab ces kuv pom tias kuv yuav tau mus nyob ze Leej Txiv saum ntuj yog tus uas hlub kuv.
Ib yam li Vajtswv txojlus nyob hauv Ntawv Nkauj 103:13-14 sau tias: “Leej txiv hlub nws cov menyuam npaum li cas, tus Tswv hlub cov ua hwm nws npaum li ntawd. Tus Tswv paub hais tias nws muab dabtsi los tsim peb; nws nco ntsoov hais tias peb yog hmoov av xwb.”
Kuv rov qab los rau ntawm qhov chaw ua haujlwm. Ob peb feeb tom qab, kuv ib tug phooj ywg ua haujlwm nws nqa ib taub dej txias rau kuv thiab xav tias ntshe kuv cheem tsum pab daws txoj kev nqhis. Tseeb tiag ntseeg tsis tau li! Kuv tsis tau ntsib dhau tej no yav dhau los. Qhov uas tau ib tug neeg twg ntawd hlub thiab tab ncuab txog mas zoo kawg nkaus li. Ntawd yog yam zoo kawg nkaus uas Vajtswv hais rau kuv txog Vajtswv txoj kev hlub loj kawg nkaus uas Vajtswv tseg rau kuv. Vajtswv hlub kuv thiab Vajtswv xav nthuav tawm tej ntawd rau kuv paub nyob hauv kuv lub neej.
Vajtswv txojlus nyob hauv Yelemis 31:3 qhia rau peb paub txog ib qhov tseeb zoo kawg nkaus tias: “kuv tuaj deb deb tshwm rau lawv porn. Cov Yixalayees, kuv yeej ibtxwm hlub nej, kuv yuav hlub nej mus ibtxhis.”
Yog ib txoj koob hmoov zoo kawg nkaus thaum Vajtswv nrog nraim peb nyob. Vajtswv ua haujlwm meej meej los hlub peb dhau ntawm tej nyuag haujlwm me me txog tej haujlwm loj. Yog li peb yuav tau hlub Vajtswv. Vajtswv yog peb qhov kev cheem tsum thiab yog nej li. Vajtswv yog tus uas nyob ntawm peb ib sab. Ua Vajtswv tsaug vim yog ib hnub uas tau koob hmoov Vajtswv pub rau kuv.
Thov caw nrog kuv peb thov Vajtswv ua ke.
Vajtswv, kuv ua koj tsaug ntau vim Vajtswv koj yog kuv txoj kev cheem tsum. Nyob hauv koj kuv muaj txhua yam. Thov koj pab kom kuv nco ntsoov Vajtswv koj kev tshwm ntsej muag hauv kuv lub neej, koj yuav nyob ntawm kuv ib sab hlub kuv los ntawm txoj kev hlub mus ib txhis. Thov Vajtswv pab kom kuv nthuav tawm txoj kev hlub Vajtswv dhau los ntawm tej haujlwm meej meej hlub lwm tus kom lawv paub tias kuv yog Vajtswv tus menyuam thiab. Kuv thov hauv Tswv Yexus Khetos lub npe. Amees.
Cov kwv tij txhua tus, tau koob hmoov tshaj thaum peb txais tau Vajtswv txoj kev hlub ib txhis. Vajtswv txoj kev hlub nthuav tawm dhau los ntawm Vajtswv txoj kev saib xyuas, muab pub thiab tu peb. Vajtswv kuj xav kom peb nthuav tawm txoj kev hlub ntawd pub rau sawv daws. Tab ncuab txog tej neeg ib ncig qhov kev cheem tsum thiab pab lawv los ntawm tej uas Vajtswv pub rau koj. Koj txoj kev tshua thiab ua haujlwm yuav yog tus choj tuam qhib kev rau lawv los nyob ze Leej Txiv uas muaj kev hlub.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply