Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Yam twg thiaj yog yam uas koj saib muaj nqis tshaj? Yam twg yog yam uas koj yuav coj nrog koj tus kheej mus ua ke tag koj tiam neej, lossis thaum uas koj nkag mus rau hauv lub neej ib txhis? Nco qab ntsoov tias nyiaj txiag, khoom hauv ntiajteb no txawm yog yuav muaj nqis npaum cas los tsuas yog nyob ib vuag xwb, tsuas yog tej nyuag khoom ua qhua yuav dhau mus sai. Tsuas yog txoj kev sib txuas ua ke nrog Vajtswv xwb thiaj yuav nrog peb mus nyob hauv lub neej ib txhis. Yog li, peb tau caw los ua lub neej vam khom rau Vajtswv, ua lub neej pub rau Vajtswv vim Vajtswv lub hwjchim ci ntsa iab.
Hnub no, yog hnub 18/01/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Peter Lundell dhau ntawm Zaj kawm VAM KHOM RAU VAJTSWV
“Tej uas qhovmuag tsis tau porn lossis qhovntsej tsis tau hnov, thiab tej uas neeg lub siab xav tsis txog hais tias yuav muaj los. Vajtswv npaj tej ntawd tseg rau cov neeg uas hlub Vajtswv lawm” (1 Kauleethaus 2:9).
Kuv nrog kuv niam wb mus nyob rau ib lub tsev tshiab tiamsis me dua. Zoo li sawv daws nyob hauv kuv tsev neeg, kuv niam txuag heev nyob hauv txoj kev siv nyiaj. Thaum uas peb tshem tsev, wb ua tib zoo xaiv tej khoom uas tseem ceeb khaws cia tshuav cov khoom twg tsis siv lawm ces thiaj muab pov tseg mus. Thaum uas wb tsiv mus lawm, lub tsev qub dhau los tsis muaj dab tsi tsuas tshuav 4 daim phab ntsa lawm xwb. Txuas ntxiv ces yog wb nqa tej khoom ntawd mus rau ntawm lub tsev tshiab.
Nyob hauv peb lub neej, peb ua tib zoo nyob rau hauv txhua tes haujlwm tiamsis kuj muaj qee ntu neej peb tsis ceev faj. Thiab txhua zaug peb nkag mus rau ib ntu neej tshiab, peb cia li muab txhua yam yav dhau los tso tseg, nyob rau ntawm kuv tus kheej ces yog lub tsev uas kuv tau loj hlob tuaj, nws muaj ntau yam ua kev nco txog nyob rau hauv heev.
Txog rau thaum tag sim neej ces yuav tseg tag nrho peb tej khoom tseg. Lub sijhawm dhau mus zuj zus, sawv daws kuj yuav hnov qab peb.
Tsis tas li ntawd, txawm yog peb yuav muaj kev tu siab lossis peb txoj kev xav yuav zoo li cas peb yuav tau khiav kom dhau lub neej dhau los kom peb nkag mus rau ib ntu tshiab nyob rau hauv lub neej. Tseeb tiag, Vajtswv yog tus pub kev txawj ntse rau peb kom peb hnov qab peb lub neej qub thiab tig mus rau lub neej tom ntej. Sawv daws puav leej paub tias qhov no yog yam uas yuav tsum tau muaj. Tiamsis feem ntau peb pheej xav txog yav dhau los. Yog li peb thiaj muab tej nyuag ris tsho qub khaws cia txawm yog yeej tsis hnav ntxiv lawm. Peb kuj pheej muaj peb tej kev nyuaj siab khaws cia. Thiab peb ua lub neej raws li yus lub siab nyiam.
Tiamsis Vajtswv txojlus qhia kom peb tsis txhob ua li ntawd.
Tswv Yexus tham txog zaj xwm txheej ntawm tus neeg nplua nuj muaj ntau yam zoo yam nkaus li peb. zaj xwm txheej tau sau tseg nyob hauv Lukas 12:16-21 tias:
” Muaj ib tug txivneej npluanuj, nws muaj liaj muaj teb zoo thiab sau tau qoobloo ntau heev. Nws xav hais tias, ‘Kuv yuav ua li cas? Kuv tsis muaj chaw txaus ntim kuv tej qoobloo no. ‘ Nws xav hais tias, ‘Kuv yuav ua li no. Kuv yuav rhuav kuv lub txhab, thiab muab ua kom loj dua, thiaj txaus ntim kuv tej qoobloo thiab qhov txhia chaw. Ces kuv yuav hais rau kuv lub siab hais tias, koj muaj hmoo heev! Koj twb muaj txhua yam txhij zog uas kav ntau xyoo lawm. Koj cia li so nyob noj nyob haus.’ Tiamsis Vajtswv hais rau tus npluanuj ntawd tias, ‘Tus neeg ruam, hmo no koj txojsia twb yuav tu; yog li ntawd, tej qhov txhia chaw uas koj npaj tseg yuav yog leejtwg tug? ‘ Yexus xaus lus hais tias, “Tus uas npaj nyiaj txiag qhov txhia chaw los ua nws tug kom nws npluanuj, Vajtswv tsis suav hais tias tus ntawd yog neeg npluanuj .
Yog tias peb vam khom rau tej khoom ntiajteb uas peb muaj ces peb yuav yog tus neeg ruam nyob rau lub neej tamsim no. Tiamsis yam peb yuav tau ua yog nqes peev rau lub neej ib txhis.
Yog li peb tsis txhob vam khom rau tej yam uas nyob ib vuag hauv lub neej no vim tej ntawd puav leej yuav dhau mus sai sai. Tsis tas li ntawd, tej ntawd kuj tsis yog yam uas Vajtswv xav kom peb ua nyob rau hauv lub neej no.
Kuj ib yam li ntawd, lub tsev uas wb tab tom ntiav nyob kuj tsis yog wb li ces peb sawv daws txhua tus txojsia uas peb muaj kuj tsis yog peb tug. Vajtswv yog tus tsim peb los thiab pub txoj kev ua pa rau peb. Thaum tag sim neej peb yuav rov qab mus tes dawb tes npliag.
Paulus thiaj ntuas kom cov ntseeg yuav tau muab yus tej kev txhawj xeeb fij rau Vajtswv. Vajtswv yog tus pub txhua yam rau peb raws li Vajtswv lub siab nyiam uas zoo kawg nkaus. Peb yuav tau ua raws li Vajtswv tej lus vim Vajtswv twb npaj txhij lo lus cog tseg zoo kawg nkaus tseg rau peb lawm: “Tej uas qhovmuag tsis tau pom lossis qhovntsej tsis tau hnov, thiab tej uas neeg lub siab xav tsis txog hais tias yuav muaj los. Vajtswv npaj tej ntawd tseg rau cov neeg uas hlub Vajtswv lawm” (1 Kauleethaus 2:9).
Thov caw nrog kuv peb thov Vajtswv ua ke.
Ua Vajtswv tsaug koj yog tus paub zoo txhua yam tshwmsim los nyob hauv kuv lub neej. Thov Vajtswv pab kom kuv vam khom rau koj tsis yog vam khom rau tej yam uas yuav dua mus sai sai nyob rau hauv lub ntiajteb no. Yam uas kuv yuav tau ua yog nqes peev rau koj lub tebchaws nyob mus ib txhis thiab ua raws li koj tej lus samhwm tseg rau kuv. Thov Vajtswv pab kom kuv mus rau ntawm koj txojlus txhua hnub ua lub neej haum koj siab. Kuv thov hauv Tswv Yexus Khetos lub npe. Amees.
Cov kwv tij txhua tus, txhua yam nyob hauv lub ntiajteb no puav leej yog ua qhua thiab yuav dhau mus sai sia. Tsuas yog txojsia ib txhis nyob saum ntuj ceebtsheej thiaj yog tus ciam kawg peb yuav mus kom txog ua kom tiav nyob rau hauv peb txoj kev sib tw. Yuav tau vam khom Vajtswv, muab txhua yam zoo kawg nkaus fij rau Vajtswv cia Vajtswv siv koj ua Vajtswv haujlwm. Cia li nqes peev los ntawm lub sijhawm, dag zog, khoom ntiajteb thiab txhua yam uas koj muaj rau Vajtswv lub tebchaws hnub no.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply