Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Puas tau muaj zaum twg koj taij thov kom Vajtswv pub yam uas koj ntshaw rau koj lawm tau, tiamsis tsuas txais tau Vajtswv txoj kev ntsiag to xwb? Tej lus taij thov Vajtswv tseem tsis tau teb ua rau muaj ib txoj kev khuam nyob rau hauv peb lub siab. Peb muaj ntau txoj kev khuab xeeb thiab xav hais tias Vajtswv hnov qab peb lawm. tiamsis Vajtswv muaj ib lub homphiaj zoo tseg rau peb txhua tus lub neej. Thaum txog Vajtswv lub sijhawm, Vajtswv yuav kho zoo peb tej qhov txhab, thiab pub yam uas peb niaj hnub ntshaw rau peb.
Hnub no, yog hnub 19/03/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Maria Schleicher dhau ntawm Zaj kawm VAJTSWV KHO ZOO COV NEEG UAS MUAJ LUB SIAB NTSWS PUAS TAS
“Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhovrooj rau nej. Rau qhov txhua tus uas thov yeej yuav tau, txhua tus uas nrhiav yeej ntsib, thiab txhua tus uas khob, Vajtswv yeej yuav qhib qhovrooj rau nws” (Mathais 7:7-8).
Puas muaj ib zaum twg koj kub siab lug thov rau ib yam dabtsi twg, tiamsis cuag li Vajtswv yeej tsis tau teb koj tej lus thov? Kuv muaj lawm. kuv thov Vajtswv ntau xyoo rau tus txiv neej uas kuv yuav yuav ua txiv thiab kuv tsev neeg tom ntej.
Thaum Tswv Yexus nkag los thiab hloov pauv kuv lub neej, kuv tab tom tham ib tug hluas tsis ntseeg. Tej zaug kuv lub neej tshiab nyob hauv Yexus Khetos tsis muaj qhov chaw tseg rau txoj kev sib hlub no. Kuv poob ib lub sijhawm ntev kuv thiaj tso tau txoj kev sib hlub no, tiamsis thaum kawg kuv yeej txiav txim siab ua raws li Vajtswv lub siab nyiam. Kuv txawm xav tias ntshe Vajtswv yuav muab nqi zog rau kuv txoj kev mloog lus dhau los ntawm coj ib tug neeg tshiab rau kuv yuav ua kuv tus txiv.
Tiamsis Vajtswv tsis ua li ntwd, kuv mob siab heev.
Kuv twb thov Vajtswv rau kuv tus txiv uas kuv yuav yuav tau kaum xyoo. Nyob hauv kuv lub siab kuv paub tias muaj ib hnub twg ntawd kuv yuav yog ib tug niam tsev, ib leej niam, tiamsis kuv tag kev cia siab vim cuag li Vajtswv tsis ua qhov haujlwm ntawd kom sai.
Ntawd yog lub caij nyob ib leeg thiab muaj kev nyuaj siab tiamsis kuj ua rau muaj ntau yam muaj nqis. Vajtswv kho zoo lub qhov txhab hauv kuv, dhau los ntawm qhia rau kuv pom txog Vajtswv txoj kev hlub nyob mus ib txhis thiab zoo kawg nkaus. Vajtswv nthuav Vajtswv tus kheej qhia rau kuv, pab kom kuv pom tias kuv yeej tsis muaj ib yam dabtsi yuav nyuaj siab li. Kuv ntseeg tau tias Vajtswv yog kuv txhua txoj kev cheem tsum. Vajtswv tshem tawm tej lus dag ntxias hauv kuv thiab muaj ib hnub twg Vajtswv yuav txhawm kom puv nkaus kuv lub siab uas tsis muaj dabtsi, thiab tsuas yog Vajtswv tib leeg xwb thiaj ua tau qhov no. Muaj ntau zaug Vajtswv ua rau kuv pom txog tus duab ntawm txoj kev hlub zoo kawg nkaus, thaum Vajtswv nthuav tawm Vajtswv txoj kev hlub tsis muaj nrim rau kuv (Saib I Yauhas 4:17-19).
“Nws kho cov neeg uas siab ntsws puas tas thiab qhwv lawv tej qhov txhab.” (Ntawv Nkauj 147:3).
Kaum xyoo tom qab, kuv thiaj ntsib tus txiv neej uas tamsim no kuv hu nws ua kuv tus txiv. Kuv tau ris lub meej mom ua niam yau rau nws tus tub – tus tub luag ntxhi, mloog lus thiab hlub kuv ib yam li kuv yog leej niam yug nws. Vajtswv teb kuv tej lus thov zoo tshaj ntau npaug. Kuv tsis tau muaj ib zaum twg yuav xam tau lub neej zoo npaum li ntawd. Dhau los ntawm qhov uas ua siab ntev tiv dhau lub caijnyoog tos thiab tau kho zoo nyob hauv Vajtswv, kuv saj tau txoj kev hlub loj thaum uas tu tsev neeg tau koob hmoov uas Vajtswv pub rau kuv – txhua hnub ua lub neej nthuav tawm Tswv Yexus txoj kev hlub los ntawm lo lus hais thiab tej haujlwm ua.
Hnub no, cia siab tias Vajtswv kuj yuav teb koj tej lus taij thov thiab kho zoo lub siab puas ntsoog nyob hauv koj lub neej. “Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhovrooj rau nej” (Mathais 7:7-8).
Txoj kev uas Vajtswv teb peb tej lus tej zaug tsis zoo li peb xav, tiamsis Vajtswv yuav ua kom tiav tej uas koj ntshaw ntawd pub rau koj thaum txog Vajtswv lub sijhawm. Cia li thov kom Vajtswv siv lub sijhawm tos ntawd los kho zoo koj lub siab thiab qhia koj yam tshiab txog Vajtswv tus kheej.
Thov caw nrog kuv peb thov Vajtswv ua ke.
Ua Vajtswv tsaug koj tau mloog kuv tej lus taij thov. Ua Koj tsaug koj tau teb kuv tej lus taij thov thaum txog koj lub sijhawm zoo kawg nkaus. Thov Vajtswv pab kuv kom muab kuv tej kev npaj ntawm tus kheej tso tseg thiab ntseeg rau Vajtswv lub homphiaj zoo kawg nkaus tseg rau peb lub neej. Thov Vajtswv kho zoo tej kev puas ntsoog hauv kuv lub siab, kom kuv npaj txhij los txais txoj koob hmoov thaum Vajtswv teb peb tej lus taij thov. Kuv thov hauv Tswv Yexus Khetos lub npe. Amees.
Cov kwv tij txhua tus, nej puas tseem muaj tej lus taij thov twg uas Vajtswv tsis tau teb? Cia siab tias koj yuav tsis ua xyem xyav, tsis tag kev cia siab tiamsis ua siab ntev, taij thov. Thiab txais yuav lub sijhawm uas koj tos, kom kawm tau txoj kev paub vam khom Vajtswv los ntawm txoj kev ntseeg tsis yoj yees. Vajtswv muaj ib txoj kev npaj zoo tseg rau koj lub neej. Thiab thaum txog lub sijhawm zoo kawg nkaus, Vajtswv yuav teb koj tej lus taij thov raws li txoj kev zoo tshaj tej uas koj xav tshaj ntau npaug.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply