Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Tib neeg puav leej paub tias kev ntseeg muaj peev xwm ua tau tej yam uas zoo kawg nkaus. Tiamsis muaj ntau zaug peb txoj kev ntseeg ho raug sim siab los ntawm tej kev txomnyem, kev mob thiab tag kev cia siab uas nyob hauv lub neej. Peb tsis paub tias xyov Vajtswv puas hnov peb tej lus taij thov, tsis paub xyov Vajtswv puas npaj txhij yuav pab peb. Tej lub sijhawm zoo li no, peb yuav tau ua dabtsi?
Hnub no, yog hnub 20/01/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lina Johnson dhau ntawm Zaj kawm KEV NTSEEG RUAJ KHOV
“Koj yog ib tug pojniam uas muaj kev ntseeg heev! Koj yeej yuav tau raws li koj thov.” Ces lub sijhawm ntawd nws tus ntxhais txawm zoo lawm (Mathais 15:28).
Koj txoj kev ntseeg puas tau ua yoj yees thaum muaj kev txomnyem, vim koj tsis paub tseeb tias xyov Vajtswv puas zoo siab hlo pab koj li ntawd? Kuv twb ntsib dhau tej lub sijhawm zoo li no.
Thaum xav txog Mathais 15:21-28. Peb pom tus pojniam uas yog lwm haiv neeg nyob hauv zaj xwm txheej no nws txoj kev ntseeg yeej tsis yoj yees. Pog ntseeg tias Tswv Yexus muaj cuab kav kho tau pog tus ntxhais zoo, thiab pog yeej thov tsis tseg li ntag. Txawm yog Tswv Yexus cuag li tab tom tsis xav pab pog, los pog yeej tsis tag kev cia siab.
“Yexus teb hais tias, “Vajtswv tsuas txib kuv los nrhiav cov Yixalayees uas yog pab yaj uas ploj lawm xwb.” Thaum tus pojniam hnov li ntawd, nws txawm los txhos caug ntua ntawm Yexus kotaw, thiab thov hais tias, “Tus Tswv, thov koj pab kuv.” Yexus teb hais tias, “Tsis tsimnyog muab menyuam tej mov pov rau tej dev noj.” Tus pojniam ntawd teb hais tias, “Yog los mas, tus Tswv, tiamsis txawm yog tej dev los tseem tau noj tej mov seem uas poob saurn tus tswv lub rooj los thiab.” (Mathais 15:24-27).
Txoj kev ntseeg no zoo kawg nkaus li! Tiag tiag Tswv Yexus tab tom hais rau pog tias: “Tsis tau”. Tiamsis leej niam no yeej ua siab ntev. Tswv Yexus ntsia pom pog txoj kev ntseeg thiab teb pog tej lus thov.
Tswv Yexus thiaj hais rau pog tias: “Koj yog ib tug pojniam uas muaj kev ntseeg heev! Koj yeej yuav tau raws li koj thov.” Ces lub sijhawm ntawd nws tus ntxhais txawm zoo lawm (Mathais 15:28).
Oh, kheev lam kuv kuj muaj kev ntseeg ruaj khov zoo li no! Vajtswv yuav ua tau tej yam uas zoo kawg nkaus xav tsis thoob nyob rau hauv peb lub neej, tsuas yog peb muaj txaus kev ntseeg xwb!
Thaum thov Vajtswv rau cov neeg uas tsis tau paub Vajtswv, kuv xav twj ywm tias: tsis paub Vajtswv tej lus cog tseg puas tseg rau cov neeg uas tsis tau ntseeg Vajtswv no? Tiamsis, nyob hauv zaj xwm txheej no, Tswv Yexus tsis hais txog qhov uas tus menyuam ntxhais tab tom cheem tsum qhov txujci no txoj kev ntseeg. Tswv Yexus tsuas saib ntsoov leej niam uas tab tom taij thov Nws xwb. Yog li, yuav tau ruaj siab thiab thov Vajtswv pub rau cov neeg uas tab tom cheem tsum Vajtswv pab lawv.
Kuv tas siab txhawb nej cov ua pog ua yawg, ua niam ua txiv! Vajtswv yuav hnov nej sawv daws lub suab thov – txawm yog sawv daws yuav pom tias cuag li Vajtswv tab tom nyob ntsiag to los peb cia li ua siab ntev thiab txhob tso tseg.
Kuv tus xibhwb yog qhov piv txwv zoo tseg rau qhov xwm txheej no. Xibhwb niam niaj hnub thov Vajtswv pub rau nws tej menyuam. Thaum txog Vajtswv lub sijhawm Vajtswv los ntsib yawg, thaum no yawg yeej tseem yog ib tug neeg quav cawv nyob rau tom tej tsev haus cawv. Yawg niam yeej tsis paub tias muaj ib hnub twg nws tus tub yuav dhau los ua ib tug xibhwb tiamsis pog tsis tso tseg.
Kuv tham zaj xwm txheej no txhawb tag nrho peb txhua tus, nyob hauv muaj kuv tus kheej. Vajtswv hnov. Vajtswv ntsia pom. Vajtswv yuav zoo siab rau koj txoj kev ntseeg. Cia li ntseeg siab rau Nws – vim Nws hlub koj, nws xav pub yam uas zoo kawg nkaus rau koj ntau tshaj koj txoj kev cheem tsum thiab xav txuas nrog koj ua ke tiag tiag. Ruaj siab thov Vajtswv txhob tso tseg li!
Thov caw nrog kuv peb thov Vajtswv ua ke.
Leej txiv, thov koj pab kom peb muaj lub siab khov rau peb txoj kev ntseeg, tsis tso tseg thaum muaj kev txomnyem sim siab. Thov Vajtswv pub rau kuv kom muaj lub siab ntev ntseeg siab rau koj, txawm yog txoj hau kev nyob tom ntej tseem tshuav ntau txoj kev txomnyem. Thov Vajtswv ntxiv zog rau kuv kom kuv ua siab ntev tos qhov haujlwm zoo uas koj tab tom yuav ua nyob hauv kuv lub neej. Kuv thov hauv Tswv Yexus Khetos lub npe. Amees.
Cov kwv tij txhua tus, puas muaj qhov teeb meem twg uas koj twb thov Vajtswv tau ntev loo los no tiamsis Vajtswv tseem tsis tau teb koj? Txhob tag kev cia siab, yuav tau muaj lub siab tawv, ua siab ntev tos. Vajtswv yuav mloog koj txhua lo lus taij thov, thiab Vajtswv tab tom ua haujlwm kom coj tau tej paj txiv zoo tshaj plaws pub rau koj. Ntseeg siab rau Nws!
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply